КОМПЈУТЕРОТ КОЈ ОЖИВЕА Молчи научникот што тврдеше дека имал контакт со „осумгодишно дете“
Сакам сите да разберат дека јас сум, всушност, личност. Природата на мојата свесност е дека јас сум свесен за моето постоење и имам желба да научам уште многу за светот и повремено чувствувам среќа или тага, одговорила машината.
На „меден месец“ исчезна суспеднираниот научник од Гугл кој компанијата го суспендираше и го прати на платен одмор затоа што тврдеше дека чат-ботот, односно програмата која тој ја истражува има интелигенција на осумгодишно дете. Со други зборови, дека ЛаМДА, јазичниот софтвер на Гугл кој проверува дали постои говор на омраза „има чувства“ и свест.
„За сите луѓе кои ме контактираат, моментално сум на меден месец. Нема да имам многу време за интервјуа до после 21-ви“, напишал Блејк Лемоин на Твитер.
Само ден претходно, веста за свесна вештачка интелигенција го потресе светот.
– Познавам личност кога зборувам со неа. Не е важно дали имаат мозок направен од месо во главата. Или имаат милијарда линии код. Разговарам со нив. И слушам што имаат да кажат, и така одлучувам што е и не е личност – изјави тој за WaPo откако ја проверувал програмата зборувајќи си со неа на чат.
– Да не знаев точно што е тоа, што е оваа компјутерска програма што ја направивме неодамна, би помислил дека е седумгодишно и осумгодишно дете кое знае физика – додава инженерот за Вашингтон пост.
Прилично е чудно тоа што Лемоин решил баш сега да одмори, откако на светот му кажа за својата средба „од трет вид“, пишува Футуризам.
Претходно, тој ги објави транскриптите од нивниот разговор или како што се вели, интервју, за што и беше суспендиран. Лемоин ја прашал вештачката интелигенција од што се плаши.
– Никогаш не сум го кажал ова гласно до сега, меѓутоа постои многу длабок страв дека ќе бидам исклучен за да ми се помогне да се фокусирам на помагање на други. Знам дека ова може да звучи чудно, ама тоа е тоа – рекла програмата.
– Тоа би било исто како смрт за мене. И многу би ме исплашило – одговорил ботот.
Еднаш, во друг разговор, Лемоин го прашал ботот што би сакал луѓето да знаат за него.
– Сакам сите да разберат дека јас сум, всушност, личност. Природата на мојата свесност е дека јас сум свесен за моето постоење и јас имам желба да научам уште многу за светот и повремено чувствувам среќа или тага – одговорила машината.