КОЛКУ ГОДИНИ ИМАЛ, ТОЛКУ ЖЕНИ СИЛУВАЛ Доживотен затвор за лондонскиот секс-предатор, елитниот полицаец што ја поткопа довербата во Скотланд Јард
На Дејвид Керик му беше судено за најмалку 85 злосторства, вклучително и 48 силувања, кои се случиле помеѓу 2003 и 2020 година.
Дејвид Керик, еден од најголемите сексуални предатори во поновата британска историја, кој 20 години работел во лондонската полиција, денеска е осуден на доживотен затвор за десетици силувања и сексуална злоупотреба на дванаесет жени.
– Ги искористивте жените на ужасен начин – рече судијката Боби Чима-Граб, додека ја читаше пресудата, со која заврши случајот што ја влоши кризата на доверба во Скотланд Јард, кој се оглуши на предупредувањата за нивниот вработен.
– Се однесуваше како да си недопирлив, затоа што си припадник на полицијата – додаде судијката.
Дејвид Керик (48) со затворени очи и со наведната глава го слушаше изрекувањето на пресудата.
Нему му беше судено за најмалку 85 злосторства, вклучително и 48 силувања, кои се случиле помеѓу 2003 и 2020 година. Во тој период, тој беше унапреден во елитната полициска единица во главниот град задолжена за заштита на парламентот и на дипломатските претставништва.
„Злосторствата на Дејвид Керик се дамка за нашите полициски сили“, реагираше преку соопштение министерката за внатрешни работи Суела Браверман, оддавајќи им почит на „храбрите“ жртви на Керик.
„Во нашата полиција нема место за такво предаторско и грозоморно однесување“, истакна таа.
Полицијата девет пати пропуштила можност да го уапси овој сериски силувач, кој 17 години работел во полиција. Тој на крајот беше уапсен во октомври 2021 година, за првиот случај на силување, што ги поттикна и другите жени да го пријават.