КОЛКУ ЌЕ ИЗДРЖИ ПОЛСКА БЕЗ РУСКИОТ ГАС? Се спремавме за ова, во Германија е полошо

Полска добива 46 отсто од гасот, 64 отсто од нафтата и 15 отсто од јагленот од Русија, анализира невладината „Форум Енерџи“. Тоа ја прави еден од најголемите купувачи на руска енергија во ЕУ. И покрај тоа, земјата беше една од најгласните кои бараа да се стави крај на руските енергенси на Стариот континент. Утринава гасот беше сопрен, а „Газпром“ тврди дека тоа е трајно, сè додека Полјаците не платат во рубљи. Ќе издржат ли Полјаците на примерот кој самите го дадоа?

– Ако Русија го прекине снабдувањето со гас во Европа поради тензиите околу Украина, Полска е подобро подготвена од другите земји кои во голема мера зависат од рускиот гас, како што е Германија – изјави Јацек Сасин, полскиот вицепремиер за Политико, еден ден пред гасот навистина да сопре.

Полни складишта, гас од Норвешка и од САД

Засега, складиштата за гас во Полска се полни со 80-90 отсто, Сасин. Всушност, полската влада уште во 2019 година објавила дека ќе го сопре увозот на руски гас штом истече договорот со „Газпром“, а тој истекнува токму на крајот на годинава.

За да обезбеди друг гас, Полска минатите години се трудеше да го зголеми увозот на течен природен гас(ЛНГ) од Катар и од САД, преку терминалот Швинјушие. Втора можност е речиси завршената Балтичка цевка, гасовод кој ќе носи норвешки гас во Полска преку Данска. Ќе можат ли овие извори да го надополнат гасот кога ќе ги снема полните резерви?

Не е гасот, проблем се нафтата и јагленот

Но, гасот изгледа не е главниот проблем. Тука се нафтата и јагленот. Две третини од увезениот течен нафтен гас (ТНГ) во Полска доаѓал од Русија во 2020 година, што претставува повеќе од половина од потрошувачката, вели полското Здружение за течен гас. Владата проценува дека со него се напојуваат 3,5 милиони автомобили во земјата. Претходно месецов, амандманот за забрана на ТНГ беше отфрлен од повеќето пратеници.

– Иако сме за санкции, мислиме дека овој амандман е лош и штетен. Да се лишат Полјаците од полнење гориво со поевтино гориво е нешто сурово, особено што се однесува на помалку богатите Полјаци … Дополнително, ќе ги погодите малите полски претприемачи. Што сакаш да им кажеш? Дека денеска ќе им го одземеш ова гориво? – рече Сасин по гласањето.

Транспаренти и анти-руска кампања

Сепак, планот останува увозот на ТНГ да се сопре до крајот на годинава, информираше премиерот Матеуш Моравјецки. Минатиот викенд, Моравјецки започна кампања за билборд за да ја „разбуди совеста“ на западните општества и политичари. Комбиња украсени со транспаренти на кои пишува „#Bloodoil“, „#stopRussianoil“ и слики од опустошената од војна Украина кои се развиорени низ Западна Европа од Варшава.

Полска дозволува да надлетуваат руски авиони?

И покрај целата кампања, Полска продолжува да купува енергенси. Но, има и уште една работа. Малку е познато дека Варшава им дозволува на руските авиони да летаат над Полска за да транспортираат нуклеарно гориво во Унгарија.

Заменик-министерот за надворешни работи, Павел Јаблонски, за Политико потврди дека таквата дозвола е дадена, наведувајќи ги „безбедносните причини“ и нагласи дека слични одобренија биле доделени за руското нуклеарно гориво од Словачка и од Чешка.