КИМ КАРДАШИЈАН ОСТРО ГИ КРИТИКУВАШЕ ДЕПОРТАЦИИТЕ НА ИМИГРАНТИТЕ ВО САД „Станува збор за луѓе, а не за бројки”

Ким Кардашијан, ријалити ѕвезда која одамна се наметна и како активистка за реформи во американскиот правосуден систем, повторно предизвика бурни реакции со своите зборови. На доделувањето на наградата DVF („Diane von Fürstenberg Awards”, награда за жени кои се истакнале во борба за правда и хуманост) во Венеција, таа јавно проговори за имиграциските рации на американската Федерална служба за имиграција (ICE – Immigration and Customs Enforcement” ).

Со емотивен тон, Кардашијан рече дека станува збор за семејства и работници кои даваат придонес во американското општество, но кои наместо признание се соочуваат со сурови депортации.

– Тоа не се само имигранти на хартија, тоа се соседи, пријатели и колеги кои ги градат овој град и оваа земја – изјави таа пред присутните.

Остра реакција од властите

Нејзиниот говор ја погоди чувствителната тема на имиграцијата, која веќе со години предизвикува жестоки поделби во американската јавност.

– Мораме да најдеме подобар начин. Овие луѓе се дел од нас, тие не се закана, туку сила што ја движи Америка – додаде Кардашијан.

Одговорот од властите стигна брзо и беше остар. Министерството за внатрешна безбедност ја обвини дека е „дезинформирана и одвоена од реалноста” и постави провокативно прашање:

– Кој од овие осудени насилници би сакала да остане во земјата?” Со тоа ја ставија на удар, сугерирајќи дека нејзините изјави ја занемаруваат опасноста што дел од тие лица ја претставуваат за заедницата.

Повторени критики и пораки за хуманост

Кардашијан не се повлече. Таа и претходно зборувала на оваа тема. Уште во јуни, преку социјалните мрежи, ги осуди имиграциските акции, нарекувајќи ги „немилосрдни” и „нечовечки”.

– Да се одвојуваат децата од нивните родители е трагедија. Нема ништо поправедно или похрабро од тоа да се застане на страната на семејствата – порача тогаш.

Таа нагласи дека зад секоја бројка се крие човечка судбина и дека одвојувањето на децата од родителите остава последици кои не можат лесно да се поправат.

Поддршка од други познати личности

Со ваквиот став, таа се приклучи на поширокиот хор на познати личности кои го критикуваат пристапот на администрацијата на Доналд Трамп кон имигрантите. Глумецот Марк Руфало рече дека „овие рации се срам за Америка”, додека актерката Ева Лонгорија изјави дека „стравот што го внесуваат во заедниците е поголем од секоја наводна корист”.

И покрај критиките, Министерството останува цврсто на својата позиција, уверувајќи дека акциите се насочени само кон лица кои извршиле тешки кривични дела. За нив, тоа е прашање на ред и безбедност, а не на хуманост.

Но, Кардашијан ја гледа поинаку приказната – како борба за достоинството на оние кои, и покрај сите препреки, го живеат „американскиот сон”.

Општество во поделба

Контроверзијата што се разви околу нејзините изјави уште еднаш покажа колку е поделено американското општество околу прашањето на имиграцијата. Едни ја гледаат како храбар глас што зборува за неправдите, други како личност што се впушта во теми кои се многу посложени од светот на шоубизнисот.

Без разлика на различните толкувања, јасно е дека зборовите на Кардашијан повторно успеаја да ја насочат јавната дебата кон прашање што САД одамна не успеваат да го решат – како да се сочуваат редот и безбедноста, а притоа да се зачува човечноста.