КАКО ИЗГЛЕДАШЕ СКОПЈЕ ВО 80-ТИТЕ ГОДИНИ Видеа од еден заборавен град

Скопје без загадување, без толку згради на секој чекор, Камениот Мост со старата ограда, плоштад без скулптури и со старата калдрма, зеленило кое сега го нема … Ова се дел од импресиите од снимките објавени во групата „Скопје низ слики и видеа во 20 век“ на Фејсбук, а кои ја имаат способноста некои од нас да ги вратат во некое друго, подзаборавено време.

Осумдесеттите години беа турбулентно време за скопјани, а во тоа време се градеа и некои од поновите скопски населби. На следното видео лесно ќе ги препознаете градбите кои подоцна ќе станат населба „Аеродром“. Во тоа време никна и Соборниот Храм. Снимката е направена за време на празник, па градот е празен.

Во второто видео, се гледа она што тогаш го нарекувале „Нов Аеродром“. А потоа мал исечок, од еден градски Дедо Мраз кој брза на „Рекорд“ една тетка во тогашниот дуќан на „Европа“ да му ја наполни торбата бомбони и слатки, веројатно за децата на градскиот плоштад.

Во третото видео можеме да видиме каква беше старата ограда на Камениот мост, која според многумина требаше да остане или да биде реставрирана во тој манир, наместо денешната бетонска ограда.

Среќниот летен џагор и живот низ градот беа одлика на осумдесеттите. Можат да се видат младите момци и девојки како флертуваат. На крајот од видеото го има и она мало вовче од некогашниот „Лунапарк“ во чии вагони се возеа децата со своите родители.