🎥 ГО СОВЛАДА МОНТ ЕВЕРЕСТ БЕЗ БОЦА ЗА КИСЛОРОД И СЕ СИМНА СО СКИИ Полјакот Анджеј Баргиел испиша историја

Полјакот Анджеј Баргиел, 37-годишен алпинист и скијач на екстремни височини, направи нешто што досега не успеал никој човек на Земјата: се искачи на Монт Еверест без употреба на дополнителен кислород – и потоа целосно се спушти со скии до крајот на снегот по Хумбу ледникот.

На 22 септември, по речиси 16 часа искачување низ прочуената „зона на смртта“ (над 8.000 метри, каде што нивото на кислород е екстремно ниско), Баргиел се врза за своите скии директно на врвот и започна спуштање по патеката преку Јужниот премин (South Col Route). До камп II стигнал истата вечер и таму се одморил – напорниот успон траел подолго од планираното, па мракот го принудил да ја прекине авантурата до следното утро. Потоа, со помош на дрон што го управувал неговиот брат Барек, успешно ја минал опасната зона на ледникот Хумбу и стигнал безбедно до базниот камп – станувајќи првиот човек што се искачил и спуштил од Еверест без кислородни боци.

– Искачувањето беше тешко затоа што во ова време од годината нема други експедиции. Условите се многу потешки и бараат повеќе работа. Сакав директно да одам од базниот камп до врвот, но времето не дозволуваше. Тоа е неверојатна висина. Мораш да бидеш подготвен да функционираш 16 часа над 8.000 метри – изјави Баргиел.

Овој подвиг не е само уште едно екстремно достигнување. Повеќе од 6.000 луѓе го искачиле Еверест, но помалку од 200 тоа го направиле без дополнителен кислород. Да се скија потоа по истиот пат – тоа е нешто што никој досега не го сторил.

– Го подели спустот во две фази – објаснува Баргиел. „Навигацијата низ технички сложениот ледник беше можно да се направи само наутро, во побезбедни услови. Врвот сам по себе беше напорен и исцрпувачки. Никогаш не сум минал толку време на толкава височина, и тоа само по себе беше огромен предизвик“.

Зошто овој подвиг е толку импресивен? На врвот на Еверест – на височина како патнички авион – воздухот содржи само околу една третина од кислородот на морското ниво. Предолго задржување таму може да предизвика оштетување на мозокот, течност во белите дробови или смрт. Баргиел поминал речиси 16 часа во тие услови и сепак направил контролирано, вешто спуштање со скии.

Ова беше негов обид број три по неуспешните експедиции во 2019 и 2022 година.

– Ова е еден од најважните моменти во мојата спортска кариера. Да се спуштам од Еверест без кислород беше сон што го носев со години. Знаев дека тешките есенски услови и планирањето на линијата на спуст преку ледникот Хумбу ќе бидат најголемиот предизвик во мојот живот – изјави тој.

Баргиел одамна важи за човек што ги поместува границите на можноста. Во 2018 година стана првиот (и сè уште единствен) човек што се спуштил со скии од К2 – вториот највисок врв на светот. Сега, со освојувањето на Еверест, тој е единствениот алпинист во историјата што скијал од двата највисоки врвови – Еверест и К2 – како и од сите осумхилјадници во Каракорум, и тоа секогаш без дополнителен кислород.

Неговиот подвиг се слави како револуција во човечката издржливост, алпинизмот и екстремното скијање – доказ дека со доволна решителност, тренинг и дух, човекот сè уште може да ги поместува границите на невозможното.