ГЕРМАНСКИ ВОЈНИЦИ БЕЗ ГЕРМАНСКИ ПАСОШ? Писториус нуди решение за кадровските проблеми во Бундесверот

Германскиот министерот за одбрана Борис Писториус (СПД) предлага луѓето кои не се Германци да бидат примени во армијата. Неговиот предлог го поддржаа либералите и опозицискиот сојуз.

Како да се реши проблемот со недостиг на персонал во редовите на Бундесверот? Шефот на Министерството за одбрана, Борис Писториус, може да замисли да ја пополни таа „дупка“ со војници кои немаат германско државјанство. Во меѓувреме, неговиот предлог беше поддржан од водечки експерти за одбрана од владејачката коалиција (социјалдемократи, зелени, либерали), но и од опозицијата, пишува Дојче веле.

-Во потрагата по соодветни млади луѓе, кои се подготвени да служат воена служба во редовите на Бундесверот, во принцип, мораме многу повеќе да размислуваме на европски план – вели претседателката на Комисијата за одбрана во Бундестагот, Мари – Агнес Штрак Цимерман (ФДП) за весникот „Рајнише Пост (РП).

А под тоа размислување во пошироки, европски димензии, таа верува „дека војниците без германски пасош можат побрзо да добијат германско државјанство поради нивната успешна служба во Бундесверот“.

Oтворени прашања

И Јохан Вадефул (ЦДУ) исто така беше отворен за предлогот на Писториус.

– Во принцип, ја сметаме идејата исправна, но клучот е како точно да се спроведе. Дали оваа можност ќе им биде на располагање само на граѓаните на земјите-членки на ЕУ или НАТО? Или и на другите? Дали е неопходно целосно познавање на германскиот јазик?Има уште многу прашања кои треба да се разјаснат – изјави Вадефул за дизелдорфскиот весник РП.

Министерот Писториус и самиот рече дека за пет до осум години Бундесверот мора да биде подготвен и за водење војна, затоа е неопходно да се преземе брза акција.

– Во контекст на кадровската стратегија, тоа е исклучително краток период. Затоа, треба да се преземе итна акција – посочува Вадефул.

Изменета воена служба

Писториус предложи воведување на изменета задолжителна воена служба, односно отворање на Бундесверот и за машки и за женски војници без германски пасош.

– Нема да бидеме првата армија во Европа што ќе го направи тоа – изјави сојузниот министер за одбрана за весникот „Тагешпигел“. Тој додаде дека во Германија има луѓе со мигрантско потекло, од втора или трета генерација, кои сè уште немаат германско државјанство.

Со оглед на кадровските проблеми во редовите на Бундесверот, германската јавност веќе подолго време разговара за стратегии за регрутирање нови припадници на војската. Една од споменатите идеи е повторното воведување на задолжителниот воен рок, кој беше укинат во 2011 година. Минатата година во Бундесверот беше формирана посебна работна група чија задача е да најде можни решенија за кадровските проблеми.