ЕПШТАЈН Ѝ УДРИЛ МЕРАК „ВИЛАТА НА ТИТО“ ВО ЊУЈОРК Чекал добра цена откако изгорелa, пак била прескапа

Џефри Епштајн, озлогласениот американски финансиски магнат и осуден сексуален престапник, во 2018 година разгледувал можност да ја купи таканаречената Титова вила на Петтата авенија во Њујорк. Се работи за објект што со децении служел како седиште на поранешната југословенска, а подоцна и српската дипломатска мисија.

Информацијата произлегува од објавените документи на американското Министерство за правда, кои ја откриваат неговата приватна преписка неколку месеци пред апсењето. Во тие материјали се споменува и Србија, преку интересот за зградата на адреса Петта авенија 854, архитектонски бисер од златното доба на Менхетен.

Пожарот како сигнал за бизнис

Во утринските часови на 10 декември 2018 година, Епштајн примил електронска порака од Дејвид Мичел, долгогодишен инвеститор и финансиски советник.

„Голем пожар во зградата што ја разгледувавме, Мисијата на Србија на Петтата авенија 854. Можеби сега е добро време за понуда, ако сте заинтересирани“, пишувало во пораката.

Преписката покажува дека пораката била проследена со пакет од 26 фотографии, план на просториите и извадок од текст објавен во „Њујорк Пост“ во 2017 година, во кој вилата се рекламирала со цена од 50 милиони долари.

Комуникацијата продолжила преку СМС-пораки. Епштајн испратил линк до текст за пожарот на двајца соговорници, чии имиња се затемнети во документите.

„Амбасадата на Србија“, прашал Епштајн.

„Контакт од дипломатската мрежа ми јави“, му одговориле.

„Можеби цената сега ќе биде пореална“, напишал тој.

„Значително пореална, но треба да се пресметаат и трошоците за обнова“, следел одговорот.

Продажба по години чекање

Иако Епштајн покажал интерес, трансакцијата не се реализирала во тој период. Вилата била продадена дури во 2022 година, четири години подоцна.

– Новиот сопственик купи значаен дел од историјата на Њујорк – изјавил тогаш Тристан Харпер, агент од компанијата „Даглас Елиман“, која ја посредувала продажбата.

Харпер додал дека Јосип Броз Тито, поранешен претседател на СФРЈ, иако комунист, имал исклучително добар вкус за недвижности. Објектот првпат бил официјално понуден на продажба во 2017 година, а во јуни 2021 година било соопштено дека е прифатена готовинска понуда од 50 милиони долари, по договор меѓу државите наследнички.

Врз основа на Договорот за сукцесија, на Србија ѝ припаднале нешто помалку од 40 проценти од износот.

Вила со митови од Студената војна

Според огласот за продажба, вилата има четири ката и уште два кровни ката, вкупно 18 соби, шест бањи и вински подрум. Станува збор за првата зграда во Њујорк со два електрични лифта, кои и денес функционираат. Оригиналниот ентериер е зачуван, а од 1969 година објектот е под заштита на државата и на градот Њујорк.

Во дипломатските и медиумските кругови со децении кружеле приказни дека за време на Студената војна, кога таму престојувал Тито, на врвот постоела просторија што не можела да се прислушува, додека прозорците кон Петтата авенија биле непробојни.

Во моментот на продажбата, зградата немала централна климатизација, а гасната инсталација била исклучена по пожарот, што дополнително ја намалило нејзината пазарна вредност.