Е КАКО ГО НАПРАВИ СЕГА ОВА?! Меџик Кико, магионичар, илузионист и екологист кој и од возрасните прави деца
Диригентската палка е магичното стапче на неговиот татко, нашиот познат диригент Томислав Шопов, додека пак неговата, магионичарската, е магична во вистинската смисла на зборот. Кристиан Шопов, познат и како Меџик Кико, е нашиот најпознат магионичар, илузионист и екологист и тој ни раскажа за своите почетоци, за семејството и за неговиот ентузијазам кој прави да биде толку добар во тоа што го работи
Триесетишестгодишниот скопјанец, инаку, најпознат македонски магионичар, илузионист и екологист Кристиан Шопов, воопшто и не е роден во Скопје, туку во Измир кадешто во таа 1988 година работел неговиот татко, познатиот диригент Томислав Шопов.
Иако, имајќи го предвид податокот дека и Кристиан и татко му имаат слична алатка која е клучна во нивните професии, можеби ќе помислите дека токму диригентското стапче на татко му ја разбудило кај него желбата да научи некој магионичарски трик и дека токму ова стапче го употребувал како дете додека ги забавувал со трикови своите роднини и гости. Но, тоа воопшто не е точно.
Напротив, Кристиан тврди дека никогаш не се послужил со него.
„Диригентското стапче има волшебна моќ во музичкиот свет, а јас не влегов во таа димензија, такашто, секој од нас си твори со своето магично стапче“, вели нашиот соговорник чии трикови, додека го гледавме неговиот неодамнешен настап на роденден кај нашата заедничка пријателка која полнеше 40 години (да, да, не е грешка, полнеше 40), постојано ја измамуваа од нас онаа типично детска реакција: „Е како го направи сега ова?!“
И останатите возрасни кои беа присутни на овој настап на Кристиан, кои беа час насмеани, час збунети, реагираа на истиот начин – како деца.
И да, имаше и неколку вистински деца кои подеднакво уживаа во шоуто кое траеше околу половина час, а изгледаше како да поминале само 5 магични минути.
Целиот текст прочитајте го на порталот „Мајка и дете“.