ДРЕМКА ЗА ДВАЈЦА ВО ТАФТАЛИЏЕ Не дремете дома, дојдете на средба со авторот Братислав Димитров
На 8 јуни, сабота, авторот Братислав Димитров ќе се сретне со оние кои ја прочитале или оние кои сакаат да ја прочитаат неговата последна книга „Дремка за двајца“. Средбата е закажана во Бифе Тафталиџе, кое се наоѓа близу бензинската пумпа, онаа после Лептокарија, додека се движите кон Сити мол. Некогашниот Томе од бензинската пумпа ќе биде таму за да ни прераскаже некои стари скопски приказни и, како што шеговито, но искрено додава – за да си ја продаде книгата.
Го памтите Томе од бензинската пумпа? Да, одамна беше, но е култен лик помеѓу повозрасните скопјани.
Братислав Димитров кој иако сега има 72 наместо тогашните 27 години, а оваа негова улога е далеку зад сите оние подоцнежни значајни нешта што ги создавал, од пишување драми и режирање претстави до пишување колумни, па дури и краток излет во политиката, сепак ги задржал своите највпечатливи карактеристики – мустаќите (наместо црни, сега се бели) и – стилот.
Епа во сабота (8 јуни), тој ќе дојде да ја испромовира својата последна книга насловена како „Дремка за двајца“ во Бифе Тафталиџе, кое се наоѓа близу, погодете што?
Па близу бензинска пумпа, онаа после Лептокарија додека се движите кон Сити мол.
Како и да е, иако е дипломиран актер, со повеќе одиграни улоги на филм, телевизија и во театар, Димитров е попознат како драматург, а најпознат како колумнист чии книги со колумни се печатат во големи тиражи, а првите две (заедно со некогашниот магазин „Теа“- модерна) во фантастични 70.000 примероци!
Тој е еден од ретките автори кој, како што вели, е подеднакво читан од млади и стари, богати и сиромашни, монахињи и монаси, криминалци и проститутки, академици и работници…
Повеќе за ова прочитајте ТУКА.