Обединетите Арапски Емирати (ОАЕ) планираат да деблокираат дел од иранските средства што со години беа замрзнати во земјата, како дел од поширок договор кој би требало да придонесе за намалување на тензиите и обновување на соработката меѓу двете страни.

Според информациите што ги објави „Ројтерс“, станува збор за најмалку 10 милијарди долари ирански средства, додека првите три милијарди долари веќе биле префрлени.

Изворите наведуваат дека конечниот износ што би можел да биде деблокиран може да достигне и до 20 милијарди долари.

За возврат, Иран би требало да ги прекине нападите и да ја продолжи економската и разузнавачката соработка со Обединетите Арапски Емирати.

Доколку договорот биде целосно реализиран, тој би можел да претставува значаен чекор кон деескалација на тензиите во регионот и обновување на комуникацијата меѓу двете земји, чии односи во изминатите години беа обременети со бројни безбедносни и геополитички предизвици.

Засега нема официјална потврда од властите во Техеран и Абу Даби за деталите од евентуалниот договор.

The post ОАЕ ПОДГОТВЕНИ ДА ГИ ОСЛОБОДАТ ИРАНСКИТЕ МИЛИЈАРДИ Емиратите нудат деблокада на средства во замена за мир appeared first on plusinfo.mk.

Германскиот канцелар Фридрих Мерц му испратил рачно напишано писмо на Доналд Трамп по повод неговиот 80. роденден, а во понеделник лично ќе му врачи и подарок чија содржина засега се чува во тајност.

Писмото преку курир ќе пристигне во Белата куќа, додека мистериозниот пакет ќе биде предаден на Самитот на Г7 во францускиот град Евијан, покрај Женевското Езеро.

Што се крие во пакетот?

Од германската влада не откриваат што ќе добие Трамп, но ова не е првпат Мерц да избере необичен подарок за американскиот претседател.

При една од претходните средби му подари копија од изводот на родени на неговиот дедо од германското село Калштат, заедно со палка за голф. Подоцна му врачи и реплика од историскиот договор за пријателство и трговија меѓу САД и Прусија од 1785 година.

Роденден со спектакл

Трамп в недела ќе го прослави јубилејниот 80. роденден во Вашингтон со голем број гости и борба во кафез, по што директно ќе отпатува на Самитот на Г7.

Таму треба да се сретне со лидерите на најмоќните западни економии, меѓу кои и со германскиот канцелар.

Од добри односи до заладување

Иако двајцата лидери минатата година имаа добар почеток на соработката, односите во последно време значително заладија.

Причина се критиките на Мерц за американската политика кон Иран и кризата на Блискиот Исток. По тие изјави, Трамп најави повлекување на 5.000 американски војници од Германија.

Поради тоа, сè уште нема официјална потврда дали двајцата ќе одржат посебна билатерална средба за време на самитот.

The post ТРАМП ЗА 80. РОДЕНДЕН ЌЕ ДОБИЕ ПИСМО И МИСТЕРИОЗЕН ПАКЕТ Што му подготви Мерц среде дипломатското заладување? appeared first on plusinfo.mk.

The post „НИКОГАШ НЕ СМЕ БИЛЕ ПОБЛИСКУ, НЕ ШПЕКУЛИРАЈТЕ“ Aрагчи потврди дека се финализира договорот Иран-САД appeared first on plusinfo.mk.

До 6.000 евра месечно ќе заработуваат дел од украинските војници на фронтот, додека Киев се обидува да го надомести сериозниот недостиг на луѓе по четири години војна со Русија.

Претседателот на Украина Володимир Зеленски најави пакет мерки со кои треба да се зајакне армијата, во време кога преговорите со Москва се во застој, а потребата од нови борци станува сè поизразена.

Пешадијците добиваат четирикратно повисоки примања

По состанокот со клучните министри, Зеленски соопшти дека владата веќе подготвува механизам за новите исплати, кои би требало да почнат уште во јуни.

Основната воена плата ќе биде зголемена за една третина и ќе достигне околу 600 евра месечно.

Најголемо зголемување ќе добијат пешадијците на првата борбена линија. Нивните месечни примања ќе можат да достигнат и до 300.000 гривни, односно околу 6.000 евра.

Покрај повисоките плати, ќе бидат воведени и нови договори за борбени мисии со траење од 10, 14 или од 24 месеци.

Киев бара засилување од странство

Украинскиот претседател најави и проширување на системот за регрутација на странски доброволци.

– Наредив да се создадат значително повеќе можности за регрутирање странски волонтери во украинската армија и да се отворат повеќе канали за регрутирање во оваа смисла – изјави Зеленски.

Според проценките на украинските воени публикации, од почетокот на војната на украинска страна се приклучиле околу 10.000 доброволци од повеќе од 70 земји.

82 милијарди евра за одбрана

Новите мерки доаѓаат откако Украина обезбеди заем од 90 милијарди евра од Европската Унија, што ѝ овозможува значително зголемување на воените трошоци.

Годинешниот буџет за одбрана треба да достигне околу 82,5 милијарди евра, што претставува рекордно ниво од почетокот на војната.

Зеленски порача дека целта е истовремено да се зајакне одбраната и да продолжи трансформацијата на украинската армија во услови на продолжен конфликт со Русија.

The post КИЕВ КУБУРИ СО ПЕШАДИЈА, ПА НУДИ И ДО 6.000 ЕВРА Зеленски ја отвора вратата и за странски војници appeared first on plusinfo.mk.

Словенија повторно ги отвори вратите кон Хрватска и Унгарија без гранични контроли, ставајќи крај на мерките што беа воведени во октомври 2023 година поради безбедносни и миграциски ризици.

Од полноќ беа отстранети сообраќајната сигнализација и опремата поврзана со контролите, а полициските службеници се вратија во своите матични единици.

Крај на мерките воведени во 2023 година

Новата словенечка влада предводена од Јанез Јанша донесе одлука за укинување на привремените контроли кон Хрватска и кон Унгарија, кои претходните власти повеќепати ги продолжуваа.

Контролите беа воведени во октомври 2023 година поради зголемените миграциски притисоци на балканската рута и безбедносните ризици поврзани со кризата на Блискиот Исток.

Иако контролите најчесто беа формални и без детални проверки на документи, на поголемите премини често создаваа колони во периоди на зголемен сообраќај.

Pozdravljamo odluku slovenske Vlade @JJansaSDS o ukidanju privremenog nadzora na granici s Hrvatskom, koja omogućuje punu primjenu slobodne zone prolaska za vozila i putnike #Schengen! Hrvatska i Slovenija nastavljaju graditi dobrosusjedske odnose i jačati suradnju… pic.twitter.com/q5jFzaZlFq

— Andrej Plenković (@AndrejPlenkovic) June 12, 2026

Безбедноста нема да биде намалена

Словенечките власти уверуваат дека безбедносната состојба нема да се влоши. Наместо контроли на граничните премини, полицијата ќе применува таканаречени компензаторни мерки, односно мобилни и случајни проверки врз основа на проценка на ризик.

Според словенечката полиција, враќањето на службениците во редовните единици ќе овозможи повеќе ресурси за справување со нелегалната миграција и со новите обврски што произлегуваат од Европскиот пакт за миграција и азил.

Пленковиќ задоволен од одлуката

Хрватскиот премиер Андреј Пленковиќ ја поздрави одлуката на словенечката влада, оценувајќи дека таа овозможува целосно функционирање на шенгенскиот простор меѓу двете земји.

Тој порача дека Хрватска и Словенија ќе продолжат да соработуваат во борбата против нелегалната миграција и против прекуграничниот криминал.

Поддршка и од Брисел

Одлуката ја поздрави и европскиот комесар за внатрешни работи и миграција Магнус Брунер, кој оцени дека станува збор за доказ оти реформите во Шенген ја зајакнуваат довербата меѓу земјите-членки.

И покрај словенечкиот потег, осум држави и натаму задржуваат привремени контроли на своите внатрешни шенгенски граници. Меѓу нив се Германија, Франција, Австрија, Италија, Данска, Холандија, Норвешка и Шведска.

The post ЈАНША ЈА КРЕНА „ШЕНГЕН“ РАМПАТА ЗА ХРВАТСКА Пленковиќ слави, Брисел го поздрави потегот appeared first on plusinfo.mk.

Техеран ја оттурна можноста за брз договор со Вашингтон и ги демантираше информациите дека меморандум за запирање на конфликтот би можел да биде потпишан во Женева веќе во наредните денови.

„Конечната одлука сè уште не е донесена. Надлежните тела мора да ја завршат расправата за секој детал од текстот и за секој можен договор“, објавија иранските медиуми.

Демантот следува откако американскиот претседател Доналд Трамп изјави дека разговорите се практично завршени и дека клучните точки веќе биле усогласени.

„Иран лаже, не се договоривме така“

Американскиот претседател Доналд Трамп остро го нападна Техеран, обвинувајќи ги иранските власти дека пласираат неточни информации за условите од евентуалниот договор со САД.

Во објава на социјалната мрежа Truth Social, Трамп тврдеше дека верзијата на договорот што се појавила во медиумите нема никаква врска со она што било договорено зад затворени врати.

„Условите што Иран им ги доставил на лажните вести немаат никаква врска со она што било договорено писмено. Она што го кажаа, вклучително и нивното слабо и патетичко соопштение дека постигнале договор, нема никаква врска со вистината“, напиша Трамп.

Тој дополнително ги обвини иранските претставници за нечесно однесување и порача дека со нив е тешко да се водат преговори во добра волја.

„Ова се многу нечесни луѓе. Не можете да работите со нив со добра намера. Неверојатно!“, додаде американскиот претседател.

„300 милијарди долари за обнова“

Паралелно со демантот, иранската агенција „Мехр“ објави детали од работна верзија на меморандум кој содржи 14 точки и ги открива условите под кои Техеран би бил подготвен да постигне договор.

Најголемо внимание привлекува барањето САД и нивните сојузници да подготват план за реконструкција на Иран вреден најмалку 300 милијарди долари.

Покрај тоа, Иран бара и одмрзнување на 24 милијарди долари ирански средства што се наоѓаат во странство. Според нацртот, половина од тие средства треба да му бидат ставени на располагање на Техеран уште пред официјалниот почеток на преговорите.

Повлекување од Ормуз за целосна контрола

Во документот се наведува и барање за целосно повлекување на американските сили од областите околу Иран, како и укинување на поморската блокада во рок од 30 дена.

Техеран бара и повторно отворање на Ормускиот Теснец, но под услов пловидбата да се одвива според ирански правила и под иранска контрола.

Меѓу клучните точки се и траен прекин на огнот на сите фронтови, вклучително и во Либан, како и обврска на САД да не се мешаат во внатрешните работи на Иран.

Нуклеарната програма останува на маса

Иран преку документот потврдува дека останува во рамките на Договорот за неширење на нуклеарно оружје и тврди дека нема намера да развива нуклеарно оружје.

Предвиден е 60-дневен период за разговори околу нуклеарните прашања и укинувањето на американските санкции.

Истовремено, Техеран јасно наведува дека неговата ракетна програма и поддршката за регионалните сојузници нема да бидат предмет на преговори.

И покрај оптимистичните пораки што изминатите денови пристигнуваа од Вашингтон, останува нејасно дали двете страни навистина се блиску до договор или станува збор за уште една рунда дипломатско надмудрување.

The post НЕМА ДА ИМА ПОТПИШУВАЊЕ ВО ЖЕНЕВА, ПОРАЧА ИРАН Техеран објави свој нацрт, спомнати се 300 милијарди долари appeared first on plusinfo.mk.

Проверувањето на Фејсбук утрово за многумина заврши со порака за грешка наместо со нови објави. Според платформата Downdetector, проблемите почнале околу 9:30 часот по источноамериканско време, кога нагло се зголемил бројот на пријави од корисници кои не можеле да пристапат до Фејсбук, Инстаграм и Месинџер.

Многумина при обидот за најавување добиле порака:

„Оваа страница моментално не е достапна.“

Засега нема официјално објаснување за причините за прекинот, ниту информација кога услугите ќе бидат целосно нормализирани.

Дел од корисниците имале проблеми и со апликцијата WhatsApp.

Ваквите прекини редовно предизвикуваат лавина реакции на други социјални мрежи, каде корисниците проверуваат дали проблемот е кај нивните уреди или станува збор за поширок пад на системот.

Сепак, ваквите прекини не се невообичаени за технолошкиот гигант на Марк Закерберг. Бидејќи Facebook, Messenger, Instagram и WhatsApp користат дел од истата инфраструктура, дефект во еден сегмент од системот често предизвикува проблеми и кај останатите услуги.

The post ФЕЈСБУК И ИНСТАГРАМ ВО ПРЕКИН Корисници од повеќе земји пријавуваат дека не можат да пристапат appeared first on plusinfo.mk.

Американскиот претседател Доналд Трамп изјави дека САД ја добија војната во Иран и дека за тоа не им е потребна помошта од Европа.

Тој ова го изјави за италијанскиот „La7 Omnibus“, кога беше запрашан што би им рекол на лидерите на групата Г7, вклучувајќи ги Италија и Франција, во врска со недостатокот на поддршка во управувањето со кризата со Техеран.

– Ја добивме војната во Иран, не ни беше потребна помошта од Европа. Нивната помош беше неважна – рече Трамп.

Трамп вчера изјави дека очекува договорот со Иран да биде потпишан во наредните денови, дека „документите се блиску до конечна форма“ и дека церемонијата може да се одржи „некаде во Европа“ и дека на неа ќе присуствува потпретседателот на САД, Џ.Д. Венс.

The post ТРАМП ПРОГЛАСИ ПОБЕДА НАД ИРАН „Ја добивме војната, не ни беше потребна помош од Европа“ appeared first on plusinfo.mk.

 Тим од Институтот за кардиоваскуларни заболувања „Дедење“ и од Институтот за здравствена заштита на мајки и деца „Д-р Вукан Чупиќ“ успешно имплантираше механичка циркулаторна поддршка кај тринаесетгодишен пациент од Сараево.

Лекарите истакнуваат дека станува збор за исклучително сложена процедура што претставува мост до трансплантација на срце и нов чекор напред во  детската кардиохирургија во Србија, јави РТС.
Тринаесетгодишното момче, на кое му беше вградено вештачко срце поради сериозно срцево заболување, се опоравува добро, а лекарите велат дека таа интервенција му го продолжила животот и му дала можност да чека на трансплантацијата на срце, која му е потребна.

Според кардиохирургот д-р Саша Боровиќ, такви процедури изведуваат само ретки центри во светот.
– Успешно вградивме вештачко срце кај 13-годишно дете. Малку се центрите во светот што го прават ова. Се осмеливме да ги поместиме границите на медицината во оваа институција и благодарение на нашата заедничка работа и искуство, успеавме да го постигнеме тоа – рече Боровиќ.

Тој истакна дека, според возраста на пациентот, ова е една од најретките процедури од ваков вид.

– Според возраста на детето, ова е трет ваков случај во светот. Двајца помали пациенти беа оперирани во САД, во врвни центри, а третиот сега е опериран во Србија – рече Боровиќ.

The post ЛЕКАРИ ВО СРБИЈА ПРВПАТ ВГРАДИЈА ВЕШТАЧКО СРЦЕ КАЈ ТРИНАЕСЕТГОДИШНИК Трет ваков случај во светот appeared first on plusinfo.mk.

Русија и Украина ноќеска и рано утрово разменија серија напади со беспилотни летала, објавија официјални лица на двете земји.

Три лица се повредени во централниот руски регион Татарстан, додека еден работник на железницата е убиен во руски напад врз украинскиот регион Суми.

Британските медиуми пренесуваат дека нападите следат по големите руски воздушни напади во Украина во последните недели, по кои Киев во изминатите денови ги засили нападите со дронови со долг дострел врз руските нафтени постројки, што доведе до недостиг на гориво на Крим и на други места низ земјата.

Цели на напади се индустриските постројки во Татарстан, изјави раководителот на овој регуион, Рустан Миниханов, во објава на Телеграм.

Градот Нижнекамск во овој регион денеска ќе ги откаже сите јавни настани поради закани за напади со беспилотни летала, изјави градоначалникот Радмир Белјаев.

Белјаев не спомена дали беспилотните летала предизвикале штета. Во областа се наоѓаат неколку водечки индустриски капацитети, вклучувајќи ја петрохемиската фабрика „Татњерфт ТАНЕКО“ и рафинеријата за нафта.

Таљати, град во Волга, на околу 800 километри југоисточно од Москва и центарот на најголемиот руски производител на автомобили „Автоваз“, исто така беше цел на напад, изјави регионалниот гувернер.

Регионалниот гувернер на рускиот пограничен регион Брјанск доцна синоќа објави дека две лица се убиени, а 10 се повредени во украинскиот напад.

Русија синоќа собори 231 украински дронови, објавија локалните медиуми, повикувајќи се на руското Министерство за одбрана.

Од украинска страна известуваат дека руски беспилотни летала нападнале железнички станици, електрични сигнални столбови и трафостаници во северниот украински регион Суми, а во нападите е убиен еден железничар, додека друг е повреден.

Украинските воздухопловни сили соопштија дека од синоќа од 18 часот, Русија лансирала 117 беспилотни летала, а воздушната одбрана соборила или неутрализирала 102 од нив.

Три лица се повредени, синоќа, во напад со беспилотно летало во јужниот град Николаев, соопштија локалните власти преку Телеграм и додадоа дека се оштетени 14 приватни згради. Во друг напад рано утрово е повреден еден маж, соопштија локалните власти.

The post УКРАИНА И РУСИЈА НОЌЕСКА МЕЃУСЕБНО СЕ НАПАЃАА СО ДРОНОВИ Има мртви и повредени на двете страни appeared first on plusinfo.mk.