Булеварот Борис Трајковски е пред завршување, работите се реализираат пред предвидениот рок, соопшти денеска градоначалникот на Скопје, Орце Ѓорѓиевски.

„По 30 години чекање, за само 5 месеци работа, булеварот Борис Трајковски е пред завршување. За рекордно време, пред предвидениот рок, ставаме крај на децениската сообраќајна голгота на една од најважните скопски артерии“ објави скопскиот градоначаник на социјалните мрежи.

Тој истакна дека со реализацијата на проектот повеќе од 100.000 граѓани ќе добијат модерен и безбеден булевар што треба да придонесе за полесно секојдневно движење и намалување на сообраќајниот метеж.

Ѓорѓиевски сподели видео од извршениот увид во изградбата на сообраќајницата кон Драчево.

The post 🎥ПО САМО 5 МЕСЕЦИ РАБОТА ПРИВРШУВА ИЗГРАДБАТА НА БУЛЕВАРОТ БОРИС ТРАЈКОВСКИ Крај на децениската голгота за 100.000 граѓани appeared first on plusinfo.mk.

Новиот објект на основното училиште „Крсте Мисирков“ во населбата Ченто во општина Гази Баба денеска свечено беше во употреба во присуство на премиерот Христијан Мицкоски, министерката за образование Весна Јаневска, градоначалникот Бобан Стефковски, како и наставници, ученици, родители и граѓани.

 – Објектите во кои се организира воспитно – образовниот процес, се суштински за неговиот квалитет. Во добри услови и пријатна средина, мотивацијата за учење е поголема и затоа пред две години Владата и општините се обединија околу еден приоритет – да вложиме во инфраструктурата и да го зајакнеме овој столб на образованието. По две години делата се видливи. Ова училиште е резултат на тие заеднички заложби – рече министерката Јаневска.

Новиот објект има два спрата со 30 училници и вкупна површина од 3.128 квадратни метри. Вредноста на инвестицијата е 170 милиони денари.

 – Ова е значеан објект уште повеќе затоа што до пред некој година овде постоеа само бараки коишто се оставени тука од времето на земјотресот практично, 50 и повеќе години, децата учеа во супстандардни услови, за разлика од тоа што денес може да го видите, навистина едни европски услови. Е сега останува само тоа да се одржува и да се чува. Остануваат уште некои детали, на пролет да зазелени, оградата да се смени, можеби паркингот за вработените, но и тоа нам дека ќе се заврши бидејќи верувам во работата на градоначалникот – рече Мицкоски, заблагодарувајќи се на сите ангажирани во проектот.

Јаневска потсети дека Владата и Министерството за образование и наука вложуваат подеднакво во сите региони на државата и за две години реализирале 90 проекти во вредност од 70 милиони евра. Половина од средствата се обезбедени преку Министерството за образование и наука и другата половина преку повикот на Владата за финансирање на капитални проекти на општините.

The post 📷 „КРСТЕ МИСИРКОВ“ ВО ЧЕНТО ДОБИ УЧИЛНИЦИ КАКО ОД ФИЛМОВИТЕ „Сега е важно само да го чувате и одржувате“ appeared first on plusinfo.mk.

Град Скопје потврди дека го раскинал договорот за реконструкција на Луна парк со фирмата „Мастеф“ ДООЕЛ Скопје, склучен на 6 мај 2026 година, во вредност од 621.007.264 денари, односно околу 10,1 милиони евра, и информмира дека тоа е направено спогодбено и со цел да

се избегне двојна набавка на исти реквизити.

„Во однос на постапките за набавка и спогодбеното раскинување на договорот склучен по новиот тендер, Град Скопје ја информира јавноста дека станува збор за одлука со која се избегнува двојна набавка на исти реквизити и се обезбедува одговорно трошење на јавните средства.

Имено, по раскинувањето на претходниот договор за набавка на реквизити, склучен во времето на градоначалникот Коце Трајановски, фирмата повела судска постапка против Град Скопје. Судската одлука во корист на фирмата, со која Градот има обврска да ги плати реквизитите, била донесена откако веќе бил склучен договорот по новиот тендер” – се вели во соопштението.

Од градот велат дека, бидејќи новата набавка опфаќала и реквизити предвидени со претходниот договор, било решено новиот договор да се раскине спогодбено. Со тоа се спречува непотребно дуплирање на опремата и дополнително оптоварување на градскиот буџет.

„Оваа одлука не го менува рокот за изградба на новиот Луна парк. За еден месец ќе започне монтирањето на седумте реквизити набавени со претходниот договор, паралелно со уредувањето на просторот, за да се создадат услови овој дел од паркот да започне со работа.

Со новиот тендер што дополнително ќе биде објавен ќе се набават дополнителни реквизити, меѓу кои ролеркостер и панорамско тркало, со кои ќе се заокружи понудата на забавни содржини. На овој начин, вредноста на новиот договор ќе биде помала од 10 милиони евра“ – се вели во соопштението на Град Скопје.

Градот информира дека Луна паркот ќе се простира на поголема површина од некогашниот, проширувајќи се и на просторот во Градскиот парк каде што се наоѓаа летните дискотеки, отстранети пред шест месеци.

„Ова ќе овозможи повеќе простор за нови атракции, подобра организација на содржините и попријатен престој за посетителите“ – се вели во соопштението.

The post ГРАДОТ ВЕТУВА ДЕКА СКОПЈЕ ЌЕ ДОБИЕ ЛУНА ПАРК ВО ПРЕДВИДЕНИОТ РОК Договорот е раскинат спогодбено, ќе има нов на помала сума appeared first on plusinfo.mk.

Град Скопје го раскинал договорот за изградба на новиот Луна парк со фирмата „Мастеф“ ДООЕЛ Скопје, покажуваат податоците на Бирото за јавни набавки. Во објавеното известување е наведено дека договорот е раскинат на 17 август годинава, без да биде објавено образложение за причините.

Договорот беше склучен на 6 мај 2026 година, во вредност од 621.007.264 денари, односно околу 10,1 милион евра. Информацијата за раскинувањето стана јавна деновиве, откако ја објавија повеќе медиуми.

Предмет на договорот беше проектирање, набавка и монтажа на 16 забавни реквизити, како и партерното уредување и изградбата на придружни објекти. Меѓу предвидените атракции беа ролеркостери, панорамско тркало, пиратски бродови, рингишпил и други реквизити за деца и возрасни.

Работите требаше да ги изведува група економски оператори во која биле „Мастеф“ и „Пирамид Билдинг Солушнс“, заедно со „Жикол“ и „Геоконтрол“ како подизведувачи. Договорот беше со времетраење од 36 месеци.

Градоначалникот Орце Ѓорѓиевски претходно најавуваше дека новиот Луна парк ќе биде готов до крајот на 2027 година. Тоа беше јавно најавениот рок, додека рокот наведен во договорот беше три години. Град Скопје досега не објави причина за раскинувањето.

The post РАСКИНАТ ДОГОВОРОТ ЗА ЛУНА ПАРКОТ ВО СКОПЈЕ „Мастеф“ требаше да го реновира за 10 милиони евра appeared first on plusinfo.mk.

Жена на 50-годишна возраст била нападната во сопствениот стан во скопската општина Аеродром, откако затекнала непознато лице во домот. Напаѓачот ја удрил со тврд предмет, а потоа побегнал со пари.

Според пријавеното, инцидентот се случил на 13 октомври, околу 16 часот. Кога Л.П. се вратила во својот стан, забележала дека влезната врата била насилно отворена и оштетена. Не можела веднаш да влезе бидејќи однатре била блокирана со столица.

Откако успеала да ја тргне столицата и да влезе во станот, затекнала едно лице, кое ја нападнало со тврд предмет и побегнало.

По нападот, жената забележала дека од станот недостигаат пари.

Полицијата презема мерки за откривање на сторителот и расчистување на случајот.

The post НАПАДНАТА И ОГРАБЕНА ЖЕНА ВО СТАН ВО АЕРОДРОМ Вратата била блокирана со столица, а напаѓачот ја удрил и побегнал appeared first on plusinfo.mk.

Илјадници граѓани, волонтери, млади и претставници на локалната власт денеска се вклучија во продолжението на големата акција за чистење на Скопје. Градоначалникот Орце Ѓорѓиевски им се заблагодари на учесниците,  за како што вели, најмасовната волонтерска акција организирана од Градот досега од овој тип.

Во акциите од овој тип се вклучуваат општините, градоначалниците, учениците и граѓаните, а се чистат паркови, улици, пешачки патеки и јавни површини. Градоначалникот најави дека акциите ќе се организираат двапати месечно.

„Илјадници луѓе повторно ја претворија љубовта кон Скопје во дело. Со засукани ракави и со искрена желба да придонесат, покажаа дека чист и уреден град се создава со труд, со одговорност и со заедништво“, напиша Ѓорѓиевски на Фејсбук.

Тој им се заблагодари на сите што одвоиле време за чистење на јавните површини.

„Посебна благодарност упатувам до советниците од опозицијата кои се придружија на акцијата. Скопје е дом на сите нас, а грижата за него треба да нè обединува“, вели градоначалникот.

Ѓорѓиевски испрати порака и до граѓаните што несовесно фрлаат отпад, повикувајќи ги да го почитуваат трудот на своите сограѓани.

„Некој денес одвои од своето време, се наведна и го собра она што друг го фрлил. Вложи сила и труд за сите да живееме поубаво. Никој нема право со својата неодговорност да го погазува тој придонес“, порача Ѓорѓиевски.

Градоначалникот информираше дека во употреба е пуштена нова механизација за одржување на јавната хигиена.

Истовремено, низ Скопје веќе се поставуваат 3.300 нови контејнери, со кои треба да се подобри собирањето и транспортирањето на отпадот.

„Обезбедуваме опрема, работиме на терен и создаваме услови за јавна хигиена каква што скопјани заслужуваат“, истакна Ѓорѓиевски.

Тој најави дека големите акции за чистење ќе се организираат двапати месечно, со цел одржувањето на јавните површини да стане редовна практика.

The post 📷 НАЈМАСОВНА ВОЛОНТЕРСКА АКЦИЈА ДОСЕГА ЗА ЧИСТЕЊЕ НА СКОПЈЕ Се вклучија и опозициски советници appeared first on plusinfo.mk.

Нацртот за Деталниот урбанистички план „Барутана“ нема да биде ставен на дневен ред на Советот на Општина Центар сè додека не се најде законски издржано и прифатливо решение за сите отворени прашања, особено за стабилноста на теренот и пристапната сообраќајница, рече градоначалникот на Општина Центар, Горан Герасимовски, на денешниот брифинг со новинарите.

– Мојот став е јасен. Сè додека не најдеме законско и прифатливо решение за сите отворени прашања, јас како градоначалник нема да предложам овој нацрт-ДУП да биде ставен на дневен ред на Советот. За Водно мора да бидеме особено внимателни. Не е доволно само да се исполнат формалните процедури, туку мора да бидеме сигурни дека решенијата се безбедни, законски и во интерес на граѓаните – истакна Герасимовски.

Тој информираше дека Дирекцијата за заштита и спасување (ДЗС) дала позитивно мислење за нацртот за „Барутана“, потврдувајќи дека условите од областа на заштитата и спасувањето се соодветно вградени во планската документација.

Позитивни мислења и оценки доставиле и Комисијата за урбанизам на Град Скопје, Агенцијата за катастар на недвижности, ЈП „Водовод и канализација“ – Скопје, Секторот за води и Секторот за природа при Министерството за животна средина и просторно планирање, Агенцијата за електронски комуникации, ЕСМ-Топлификација, Агенцијата за цивилно воздухопловство, Управата за заштита на културното наследство, АД „Водостопанство“ и Министерството за внатрешни работи.

Герасимовски нагласи дека позитивните мислења од институциите не значат автоматско донесување на нацрт-ДУП-от, ниту дека со нив завршува постапката.

– Мислењата на институциите се важни, но за мене е подеднакво важно да ги отстраниме сите сомнежи околу стабилноста на теренот. Затоа, покрај анализите што веќе ги имаме, ќе ѝ наложиме на планерската куќа да нарача посебна студија од Градежниот факултет за процена на ризикот од ерозија, свлекување и нестабилност на падините. Сакам да имаме јасна и целосна стручна слика пред да се носат какви било конечни одлуки. Имаме законска обврска да ја водиме постапката, но тоа не значи дека нацрт-ДУП-от мора да биде усвоен по секоја цена. Ќе ги разгледаме сите забелешки, ќе ги направиме потребните дополнителни анализи и ќе бараме решение кое нема да ја доведе во прашање безбедноста на граѓаните – рече Герасимовски.

The post ПЛАНОТ ЗА БАРУТАНА ЌЕ СЕ ОТВОРИ КОГА ЌЕ СЕ ЗАТВОРАТ СИТЕ ПРАШАЊА Прво ќе се испита стабилноста на теренот appeared first on plusinfo.mk.

Почната е постапката за претквалификација на изведувачи за првата линија на брзиот автобуски превоз (БРТ) во Скопје. Градоначалникот на Скопје Орце Ѓорѓиевски го соопшти ова по средбата со делегација на Бордот на директори на Европската банка за обнова и развој (ЕБОР).

На средбата се разговарало и за пречистителната станица за отпадни води во Трубарево, како и за реализацијата на Зелениот акциски план за Скопје.

„Веќе е започната постапката за претквалификација на изведувачи за Линија 1, а паралелно продолжуваат активностите за обезбедување стручна поддршка за реализација на проектот“, напиша Ѓорѓиевски во објавата.

Според градоначалникот, БРТ треба да овозможи побрз и посигурен јавен превоз, со помал сообраќаен метеж и со помало загадување.

„Скопјани заслужуваат побрз, посигурен и поквалитетен јавен превоз“, порача тој во писмената објава.

Ѓорѓиевски наведе дека со делегацијата на ЕБОР разговарал за стратешките инвестиции и за продолжување на соработката со банката.

„Секој проект мора да решава вистински проблем, а секоја инвестиција да носи конкретна придобивка за скопјани“, напиша градоначалникот.

Посебна тема била пречистителната станица за отпадни води во Трубарево. Ѓорѓиевски ја посочи како значајна инвестиција за заштитата на водите, животната средина и за здравјето на граѓаните.

Разговорите со ЕБОР ја опфатиле и модернизацијата на градската инфраструктура, како и подобрувањето на енергетската ефикасност.

„Ја потврдив и определбата за понатамошна соработка во модернизацијата на инфраструктурата, енергетската ефикасност и реализацијата на Зелениот акциски план за Скопје“, напиша Ѓорѓиевски.

Градоначалникот ѝ се заблагодарил на делегацијата на ЕБОР за посетата и за досегашната поддршка на проектите во Скопје.

The post ПОЧНА ПОСТАПКАТА ЗA ИЗБОР НА ИЗВЕДУВАЧИ ЗА БРТ Ѓорѓиевски со ЕБОР ги отвори и проектите за Трубарево и за Зелениот акциски план appeared first on plusinfo.mk.

На повеќе од 50 локации во сите скопски општини, денеска продолжува масовната акција за чистење на Скопје. Како што најави градоначалникот на Град Скопје, Орце Ѓорѓиевски, во акцијата повторно ќе се вклучат општините, градоначалниците, учениците и граѓаните, кои ќе чистат паркови, улици, пешачки патеки, јавни површини и простори меѓу зградите.

– Повторно со илјадници волонтери, во сите скопски општини, со силна волја да покажеме колкава промена можеме да направиме кога работиме заедно. Ќе чистиме на повеќе од 50 локации – паркови, улици, пешачки патеки, јавни површини и простори меѓу зградите. Секое маало е важно. Секој дел од Скопје заслужува внимание, грижа и чиста околина – вели Ѓорѓиевски.

Тој најави дека ваквите активности ќе се организираат двапати месечно и ги повика граѓаните да се приклучат на акцијата и да дадат свој придонес за почиста животна средина.

– Овие акции ќе се одржуваат двапати месечно. Ќе бидеме упорни, ќе се собираме повторно и ќе градиме традиција на заедништво и одговорност. Вистинскиот успех ќе биде кога грижата за чистотата ќе продолжи и меѓу две акции – секој ден, во секое маало. На неодговорноста ќе одговориме со личен пример. На секое несовесно фрлање отпад ќе се спротивставиме со свест, истрајност и илјадници луѓе решени да го чуваат својот град. Но и со одговорност – истакна Ѓорѓиевски.

Од Град Скопје информираат дека граѓаните за точните локации и начинот на приклучување кон акцијата треба да се обратат до својата општина.

The post ПОВТОРНО ЧИСТЕЊЕ НА СКОПСКИТЕ УЛИЦИ, ПАРКОВИ И МААЛА Ѓорѓиевски најави нова масовна акција appeared first on plusinfo.mk.

Општина Карпош го предаде базенот кај спортската сала „Наум Наумовски Борче“ на користење на Националната пливачка федерација (НПФ).

Станува збор за објект кој почна да го гради поранешната Агенција за млади и спорт, но беше оставен недовршен. Со поддршка од Владата, Министерството за спорт обезбеди средства за негова доизградба, а во јуни годинава новиот објект беше предаден во владение на Општина Карпош.

Со предавањето на базенот на НПФ се прави значаен исчекор кон воспоставување нов модел на управување со спортската инфраструктура во кој националните спортски федерации ќе имаат активна улога во управувањето со спортските објекти, со цел нивно поефикасно користење и создавање подобри услови за развој на спортот.

Министерот за спорт, Борко Ристовски, истакна дека пливањето е меѓу приоритетите на Министерството и на Владата, нагласувајќи дека соработката со локалната самоуправа и Пливачката федерација е важна за враќање на овој спорт на местото што го заслужува.

За првпат Националната пливачка федерација ќе стопанисува со базени.

– За почеток, станува збор за два базена. И за другите базени, кога ќе ги довршиме, ќе најдеме соодветен договор со градоначалниците за и тие да ѝ бидат предадени на НПФ. Федерацијата ќе добие и финансиска поддршка од Министерството за спорт и од Владата, за да може правилно да стопанисува со овие објекти и тие да бидат максимално искористени за развој на пливањето. Нашата заложба е спортските објекти што ги гради државата да бидат стопанисувани од националните федерации кои имаат квалитет и капацитет тоа успешно да го реализираат – истакна министерот Ристовски.

The post СО БАЗЕНОТ ВО КАРПОШ ЌЕ РАКОВОДИ ПЛИВАЧКАТА ФЕДЕРАЦИЈА Нов модел за управување со спортската инфраструктура appeared first on plusinfo.mk.