Рокот за изградба на автопатот Охрид-Кичево останува ист до првиот квартал 2027 година, а за  автопатите Тетово-Гостивар, Гостивар-Букојчани и Прилеп-Битола рокот на изградба е до 2029 година, истакна вицепремиерот Николоски кој заедно со премиерот Христијан Мицкоски и директорот на ЈП за државни патишта Коце Трајановски, извршија увид на целата траса на автопатот Охрид – Кичево.

-Рокот за изградба на автопатот Охрид-Кичево останува ист, a тој е до првиот квартал 2027 година. Ќе го завршиме во тој рок и тој рок не беше зададен од нас, беше зададен од Владата која ништо не работеше и даваше само рокови. Во првиот квартал од следната година ќе имаме функционален автопат од Охрид до Киечво. Во однос на трасата од Тетово до Гостивар и од Гостивар до Букојчани, рокот е 2029 година. Истиот рок е и за автопатот Прилеп – Битола со што таму очекуваме едната лента да биде готова првата половина од 2027 година”-изјави вицепремиерот Николоски.

Во рамки на денешната обиколка на трасата на автопатот Охрид -Кичево, тие извршија увид и на клучката Требеништа која неодамна беше пуштена во употреба.

– Од оваа клучка Требеништа треба да оди потенцијално новиот автопат кој треба да води од Требеништа до Ќафасан и изградбата на оваа клучка е во функција на изградбата на потенцијално новиот автопат.  Доколку успееме да најдеме согласност со УНЕСКО кои ќе имаат мисија во јуни, а ќе ги  презентираат извештаите во месец јули,  од тука ќе почнува новиот автопат, така да изградбата на оваа клучка е доказ дека сакаме да го градиме овој автопат, а лентата кај што сме сега е новата летна за ГП Ќафасан – истакна вицепремиерот Николоски.

Тој додаде дека има два специфични делови, едниот дел од над Кичево до влезот во тунелите кај Пресека и кај селото Ботун.

– Кај Пресека имаме стабилизација на косини преку Галерии- најмодерно инженерско решение што може да се најде во моментов. Паралелно со тоа можеби и најголемиот проблем е кај селото Ботун. За жал до крај на 2024 година не биле изведени геотехнички истражувања. Тие истражување кои што ги направивме ние, ни дадоа дека се работи за земјиште со лош квалитет за голем инфраструктурен проект со многу вода и песоклив терен и за да се заштити тој терен ќе се изградат шест објекти кои влегуваат длабоко во земја до 21 метар или колку една осумкатница, односно сликовито кажано шест осумкатници ќе спуштиме во земја за да го заштитиме земјиштето- рече Николоски.

The post ШЕСТ ОСУМКАТНИЦИ ЌЕ СЕ СПУШТАТ ВО ЗЕМЈАТА ЗА ДА СЕ ЗАШТИТИ АВТОПАТОТ КАЈ БОТУН Николоски вели дека тоа нема да спречи автопатот Кичево – Охрид да биде готов на почетокот на 2027 година appeared first on plusinfo.mk.

Меѓународниот Аеродром Скопје и Аеродромот Свети Апостол Павле Охрид ги завршија првите 4 месеци од годинава, со силен, рекорден пораст на бројот на патници од 32,4%, опслужувајќи вкупно 1,2 милиони патници.

Во истиот период, јануари-април, двата македонски аеродрома опслужија вкупно 8.123 летови, што е годишно зголемување од 10,7%.

– Среќни сме што силниот, рекорден пораст продолжува, и покрај глобалните геополитички предизвици и енергетската криза. Ова не е случајност, туку директен резултат на нашата силна посветеност и континуирани напори, заедно со Владата, за проширување на мрежата на авиолинии од двата македонски аеродрома. Оваа година, досега, отворивме 5 нови дестинации, додека во наредниот период ќе отвориме дополнителни 7 нови дестинации, од двата аеродрома, со што годинава ќе имаме вкупно 12 нови дестинации. Со ова, очекуваме порастот на патници да продолжи до крајот на годината, создавајќи силна основа за стабилен пораст во наредните години – изјави Неџат Курт, генерален директор на ТАВ Македонија.

Како што нагласи тој, покрај проширувањето на мрежата на авиолинии и порастот на воздушниот сообраќај, ТАВ Македонија ќе остане фокусирана на подобрување на квалитетот на услугите на аеродромот, обезбедувајќи одлично искуство за клиентите – и за авиокомпаниите и за патниците.

Во рамките на летниот распоред на летaње, кој почна на крајот на март и завршува на крајот на октомври, 15 авиокомпании летаат до 54 дестинации од скопскиот аеродром, вклучувајќи ги редовните летови преку целата година и сезонските летови, додека во исто време 7 авиокомпании летаат до 24 чартер дестинации, што значи вкупно 78 дестинации од аеродромот во македонскиот главен град.

По отворањето на новите авиолинии до Будимпешта и Неапол од скопскиот аеродром, во јуни и јули ќе почнат летови до Трабзон (чартер), Самсун (чартер), како и до Палермо и до Алгеро.

Од охридскиот аеродром, со летниот распоред на летање, 8 авиокомпании летаат до 17 дестинации, од кои 14 се редовни дестинации преку целата година и сезонски дестинации, додека три се чартер-летови.

По отпочнувањето на новите летови од Охрид до Братислава, Милано и Штутгарт, во јуни ќе се отворат и новите линии до Вроцлав и Катовице, а од 21 јуни, Аустриан ерлајнс има најавено дека ќе почне да лета од Охрид до Виена.

The post КРИЗАТА НЕ ГИ ПОГОДУВА Македонските аеродроми опслужија 1,2 милиони патници и отворија 5 нови дестинации appeared first on plusinfo.mk.

Имаме активен напредок во изградбата на повеќе од 50 километри од трасата на автопатите на коридорите 8 и 10 д – изјави денеска Џош Бејкер, главен проектен менаџер на „Бехтел и Енка“, изведувач на автопатските делници на коридорите 8 и 10 д, а кој пред премиерот Христијан Мицкоски и министерот за транспорт Александар Николоски ги претстави досегашните активности.

Бејкер посочи дека досега се завршени активности за повеќе од 6 милиони кубни метри ископ, 2 милиони кубни метри насип, како и 100.000 кубни метри бетон.

-Сè ова, посочи, го постигнавме со поддршка на повеќе од  340 локални подизведувачи, а оваа бројка ќе продолжи да се зголемува како што напредува работата. Спроведовме над 11.000 часа обука за безбедност и вештини, која им се нуди на сите што работат на проектот – рече Бејкер.

Според директорот на Јавното претпријатие за државни патишта, Коце Трајановски, активно се работи, особено на делницата од Гостивар кон Бокојчани.

– Оваа делница во најголемиот дел е планинска со многу мостови, многу вијадукти и многу косини што треба да се прават, меѓутоа има фронт за работа. Од вкупно 31 километар, на 11 километри има фронт за работа, а на другиот дел усвоен е урбанистчкиот план, направени се елаборатите за експропријација, веќе се дадени во соодветните подрачни единици на Министерството за финансии, односно во делот на имотноправните односи. Значи, активно почнуваме да ги решаваме преостанатите километри од тие 11 до 31 километар. Можам да кажам дека ние не го кочиме „Бехтел и Енка“, туку секогаш сме пред него по пет-шест километри за да може непречено да работат – изјави Трајановски.

The post „БЕХТЕЛ И ЕНКА“ ИМА НАПРЕДОК ОД 50 КИЛОМЕТРИ НА АВТОПАТИШТАТА ОД КОРИДОРИТЕ 8 И 10Д Завршен е ископ на 6 милиони кубни метри ископ и 2 кубни метри насип appeared first on plusinfo.mk.

Должничката листа на Управа за јавни приходи се зголеми на 5.018 фирми и граѓани. Тие не ги намириле своите обврски за даноци, царини и акцизи до крајот на април кои им доспеале на заклучно со 31 јануари 2026 година.

Нивниот вкупен нето-долг изнесува 197 милиони евра (12.127.971.312 денари) што е повеќе за 141.348.894 денари од претходната листа.. Нето-долгот за даноци и придонеси изнесува 11.938.936.253 денари, (повеќе за 131.074.325 од претходната листа), додека долгот за царински давачки е 189.035.059 денари (повеќе за 10.274.569 од претходната листа)

На листата се 1.954 должници – правни лица (повеќе за 56 од претходната листа) и 3.064 физички лица (помалку за 14 од претходната листа).

Од претходната листа повторно се појавуваат 4.811 должници. Кај 3.091 од нив долгот е зголемен за дополнителни 177 милиони денари, додека 262 должници успеале да го намалат долгот за вкупно 207 милиони денари. Кај 1.458 должници состојбата останала непроменета.

На новата листа се најдоа и 207 нови должници, со вкупен долг од 418 милиони денари.

Од УЈП најавуваат дека во следната објава ќе бидат доставени информации и за преземените мерки за наплата кон овие субјекти.

The post ПОВЕЌЕ ОД 5.000 ФИРМИ И ГРАЃАНИ НЕ ГИ НАМИРИЛЕ ДАНОЧНИТЕ ОБВРСКИ Тие должат 197 милиони евра за данок, придонеси и царина appeared first on plusinfo.mk.

Дизел горивото од ноќеска на полноќ поевтинува за 4 денари по литар, а цената на бензинот ЕУРОСУПЕР БС-98 се намалува за половина денар по литар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши намалување на малопродажните цени на нафтените деривати во просек за 1,78 отсто.

Новата малопродажна цена на ЕУРОДИЗЕЛ БС (Д-Е V) е 89,5 денари за литар, ЕУРОСУПЕР БС – 98 ќе се продава за 86,5, цената на ЕУРОСУПЕР БС-95 не се менува и останува 85 денари за литар. Со одлуката на РКЕ за 4,5 денари се намалува и малопродажната цена на Екстра лесното масло за домаќинство (ЕЛ-1) и ќе изнесува 94 денари. Малопродажната цена на Мазутот М-1 НС, пак, се зголемува за 0,248 денари и ќе биде 49,968 денари за килограм.

Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 0,444 отсто, кај дизелот за 6,073 и кај екстра лесното масло за 6,495 отсто, додека кај мазутот има зголемување за 0,791 отсто. Курсот на денарот во однос на доларот по кој беа формирани цените со претходната пресметка е понизок за 0,1199 отсто. Напоменуваат дека ова се максималните цени на нафтените деривати и додаваат дека трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Во најголем дел од бензинските пумпи во земјава дизелот се продава за три, а бензините за 2 денари пониско од максимално уптврдената цена од РКЕ.

The post ДИЗЕЛОТ ПОЕВТИН ЗА 4 ДЕНАРИ Од ноќеска нови цени на горивата appeared first on plusinfo.mk.

Енергетската криза беше јасен сигнал дека енергетската безбедност и транзицијата мора да одат паралелно. Македонија суштински го редефинираше пристапот кон енергетиката – од пасивно следење на пазарот, кон активно планирање, инвестиции и развој, изјави министерката за енергетика и рударство Сања Божиновска на Belgrade Energy Forum 2026,што се одржува во Белград (Србија).

Таа нагласи дека со новиот Закон за енергетика, усвоен во 2025 година, државата воведе системско планирање и предвидлива рамка за инвеститорите, со што значително се забрза инвестицискиот циклус во обновливите извори на енергија.

Министерката потенцираше дека производството на електрична енергија од сонце е зголемено речиси 50 пати во споредба со 2016 година.

Во своето обраќање таа ги издвои и капиталните државни инвестиции преку АД ЕСМ, особено проектите за изградба на фотоволтаични централи во РЕК Битола и РЕК Осломеј, оценувајќи ги како симбол на праведната енергетска транзиција и трансформацијата на поранешните јагленски капацитети во извори на чиста енергија.

Министерката посочи дека Македонија активно работи на гасното интерконективно поврзување со Грција и Србија, со што се отвора пристап до нови извори на природен гас и LNG терминали, а паралелно се зајакнуваат и електроенергетските интерконекции со соседните земји.

Говорејќи за европските политики и механизмот CBAM, министерката истакна дека државата веќе воспостави систем за Гаранции за потекло на електрична енергија, што ќе им овозможи на македонските компании поголема конкурентност и полесен пристап до европскиот пазар.

-Нашата визија е Македонија да стане држава со декарбонизиран, дигитализиран и регионално интегриран енергетски систем, со значително поголемо домашно производство на чиста енергија. Регионалната соработка денес не е избор, туку неопходност за стабилна и сигурна енергетска иднина -рече Божиновска.

Во рамки на форумот, министерката оствари и повеќе билатерални средби со претставници на регионални институции, компании и меѓународни партнери, посветени на нови инвестиции, енергетско поврзување и продлабочување на регионалната соработка во енергетиката

The post ПРОИЗВОДСТВОТО НА СТРУЈА ОД СОНЦЕ Е ЗГОЛЕМЕНО ЗА 50 ПАТИ ВО ОДНОС НА 2016 ГОДИНА Божиновска вели Македонија е активен играч во енергетската транзиција appeared first on plusinfo.mk.

Следејќи ги современите трендови во финансискиот сектор и растечките потреби на клиентите за поголема диверзификација и пристап до глобални инвестициски можности, Халкбанк АД Скопје ја проширува својата понуда со нова услуга, инвестирање во хартии од вредност на странски пазари.

Новата услуга претставува уникатна можност на домашниот пазар, клиентите преку една доверлива институција да добијат интегриран пристап до локални, регионални и глобални пазари на капитал, со поддршка, сигурност и експертиза што ги нуди Халкбанк.

Со воведувањето на оваа услуга, покрај веќе постоечката можност за тргување на Македонска берза, како и останатите банкарски и инвестициски услуги, клиентите ќе можат да инвестираат и во различни видови хартии од вредност на странски пазари, вклучително купопродажба на акции на глобално препознатливи компании, удели во ETFs (Exchange Traded Funds), како и други финансиски инструменти достапни на меѓународните берзи.

Дополнително, клиентите добиваат можност и за инвестирање во должнички хартии од вредност на странски пазари, меѓу кои државни обврзници, корпоративни обврзници и еврообврзници (EUROBONDS), што овозможува креирање на диверзифицирани инвестициски портфолија согласно различните инвестициски профили и стратегии на клиентите.

Тргувањето ќе се одвива на најразвиените светски пазари, вклучувајќи ги САД, Канада, Велика Британија, Германија, Франција, Италија, Швајцарија, Холандија, Белгија, Данска, Ирска, Шведска, Норвешка, Финска, Австрија, Шпанија, Португалија, Полска, Чешка, Унгарија, Романија, Хрватска и Словенија.

Во време кога инвестирањето станува сè поважен дел од личното и корпоративното финансиско планирање, Халкбанк продолжува да гради современ финансиски екосистем, создаден според потребите на клиентите и насочен кон долгорочен раст и финансиска стабилност.

За повеќе информации за услугата, условите и начинот на инвестирање, заинтересираните клиенти можат да се обратат во најблиската филијала на Халкбанк или да ја посетат официјалната веб-страница на банката.

The post ХАЛКБАНК НУДИ ИНВЕСТИРАЊЕ ВО ХАРТИИ ОД ВРЕДНОСТ НА СТРАНСКИ ПАЗАРИ Нова услуга од Банката appeared first on plusinfo.mk.

Македонските возила за урбана хигиена „Грин машинс“, кои се произведуваат во БРАКО во Велес, деновиве привлекоа големо внимание во Германија на светскиот саем ИФАТ — водечки меѓународен саем за технологии за животна средина, комунална опрема и одржлива урбана инфраструктура.

Рамо до рамо со конкуренцијата од Швајцарија, Франција, Италија, Германија, Соединетите Американски Држави и други земји производители во оваа индустрија, македонската компанија ги презентираше своите најсовремени решенија за одржување на урбаната хигиена.

Од „Грин машинс“ велат дека клиентите денес бараат возила со различни типови на погон — електрични, дизел и водородни, а македонскиот производител нуди комплетна палета на решенија.

Дури 98 проценти од производството на БРАКО и „Грин машинс“ се пласира надвор од државата, во повеќе од 60 земји низ светот. Последната голема испорака беше реализирана во Саудиска Арабија, поточно во главниот град Ријад, каде беа испорачани 52 возила за одржување на урбаната хигиена.

„Грин машинс Македонија“ има свои компании-ќерки во Обединетото Кралство, Холандија и во Соединетите Американски Држави.

Изминатата недела „Грин машинс“ истовремено ги изложи своите машини на три светски настани, во Минхен, во Лас Вегас и во Ливерпул.

The post БРАКО И „ГРИН МАШИНС“ НА СВЕТСКИОТ САЕМ ИФАТ ВО МИНХЕН Македонската компанија нуди електрични, дизел и водородни возила appeared first on plusinfo.mk.

Делегација на Британската амбасада во Скопје, предводена од амбасадорот Метју Лосон, оствари официјална работна посета на „Алкалоид“ АД Скопје, на која домаќин беше генералниот директор и претседател на Управниот одбор, Живко Мукаетов. За време на посетата беа презентирани развојот на компанијата, нејзините пласмани и производственото портфолио, а делегацијата ги посети и Музејот на „Алкалоид“, производствените капацитети на ПЦ Фармација и Институтот за истражување и развој.

„Алкалоид“ АД Скопје е присутен на пазарот во Обединетото Кралство од 2007 година, кога британската Агенција за лекови и медицински помагала (MHRA), избрана од компанијата како референтен регулатор, по извршената инспекција на производствените капацитети, на сегментот фармација му додели сертификат за сообразност со ЕУ-стандардите за добра производствена пракса (ЕU-GMP). Набргу потоа беше издадена и првата дозвола за пласман на лекот „лизиноприл“. Денес „Алкалоид“ има над 1.000 дозволи за пласман на свои фармацевтски производи на пазарите во Европската Унија.

По излезот на Обединетото Кралство од Европската Унија, во 2021 година „Алкалоид“ ја основаше својата подружница Alkaloid UK Limited, со цел отворање нови можности и форми за проширување на операциите. Велика Британија претставува особено пребирлив и конкурентен пазар на кој влезот е исклучително сложен, пред сѐ поради високите стандарди што мора да ги исполнат производителите во рамките на една од најстрого регулираните индустрии во светот – фармацевтската. Проценките се дека до крајот на 2026 година пласманот на фармацевтските производи на „Алкалоид“ на британскиот пазар ќе достигне околу 4 милиони евра.

Од 2023 година „Алкалоид“ АД Скопје е член на Британската бизнис-асоцијација (ББА), која, во тесна соработка со Амбасадата на Обединетото Кралство во Скопје, работи на унапредување на конкурентната, транспарентна и современа бизнис-средина. Асоцијацијата се позиционира како препознатлива платформа за промоција на иновации, одговорни деловни практики и нови економски трендови.

The post ПЛАСМАНОТ НА ПРОИЗВОДИТЕ НА „АЛКАЛОИД“ ВО БРИТАНИЈА ЌЕ ДОСТИГНЕ 4 МИЛИОНИ ЕВРА ГОДИНАВА Британскиот амбасадор ја посети скопската компанија appeared first on plusinfo.mk.

Коридорите 8 и 10 се стратешки за Македонија како држава од многу аспекти и затоа тоа е наш најголем приоритет – порача денеска премиерот Христијан Мицкоски при увидот на активностите за изградба на автопатот Гостивар – Букојчани.

– Изградбата на автопатот, модернизацијата на пругата, брзата пруга на Коридорот 10, енергетското поврзување преку далноводи, како и гасното – интензивно се гради гасоводот со Грција. Прилично  се гради гасоводот со грција.Почнуваме неделава со објавување на тендерот за гасоводот со Србија, веќе се добиени сите мислења за оваа цевка, а во функција е и нафтоводот од пристаништето Солун до Скопје. Кога ова ќе биде завршено, тогаш можеме да кажеме дека сме регионален хаб – рече Мицкоски.

Тој најави дека Владата ќе продолжи да ги поддржува овие проекти и оти очекува дека многу бргу ќе може да биде пуштен преостаниот дел од  автопатот Кичево со Охрид, но истовремено и гасоводот со Грција, во првата половина од следната година.

На автопатот Гостивар – Букојачни, кој е дел од пакетот патишта што ги гради „Бехтел и Енка“, се работи на 11 километри од предвидените 31.

The post НЕДЕЛАВА ЌЕ СЕ ОБЈАВИ ТЕНДЕРОТ ЗА ГАСНОТО ПОВРЗУВАЊЕ СО СРБИЈА Мицкоски очекува гасоводот кон Грција да биде завршен во првата половина на следната година appeared first on plusinfo.mk.