Вкупно 72.037 работници не ја добиле септемвриската плата во законскиот рок, а за нив не биле платени и придонесите, информира Управата за јавни приходи (УЈП).

Според податоците на УЈП, законската обврска за исплата на плати не ја исполниле 25.343 работодавачи од вкупно 74.782 работодавачи кои имале обврска да исплатат плата на 553.040 работници. До законскиот рок, 15 октомври, обврската ја исполниле 49.439 работодавачи, односно 66,11% од вкупниот број.

Според УЈП, до 15 октомври социјалните придонеси биле платени за 481.003 вработени лица, што претставува 86,97% од вкупниот број вработени за кои постоела обврска.

УЈП информира дека компаниите исто така, навреме не го пријавуваат и плаќаат данокот на додадена вредност (ДДВ).

До законскиот рок за поднесување на ДДВ-пријавите, пријави поднеле 98,5% од регистрираните месечни ДДВ-обврзници и 97% од тримесечните обврзници.

Данокот го пријавиле 21.061 даночен обврзник, а износот е  5,57 милијарди денари. Од нив, само 12.676 обврзници, односно 60,2%, ја исполниле обврската во законскиот рок. Тие уплатиле  2,54 милијарди денари, што претставува 45,6% од вкупно пријавениот долг.

Тоа значи дека околу 3,04 милијарди денари пријавен ДДВ останале неплатени во законскиот рок, односно приближно 49,4 милиони евра.

Истовремено, 8.385 даночни обврзници не ја исполниле навреме обврската за плаќање на пријавениот ДДВ.

Управата за јавни приходи потсетува дека за неисполнување на даночните обврски во законскиот рок се применуваат мерките предвидени со закон.

За неподнесена даночна пријава може да биде изречена глоба, додека за неплатениот даночен долг може да се спроведе постапка за присилна наплата.

The post ПОВЕЌЕ ОД 72.000 РАБОТНИЦИ НЕ ЈА ДОБИЛЕ СЕПТЕМВРИСКАТА ПЛАТА Управата за јавни приходи апелира компаниите да ги почитуваат законските рокови appeared first on plusinfo.mk.

Македонските институции разгледуваат можност за формирање посебен центар за сајбер-безбедност во енергетскиот сектор, а за неговото воспоставување се испитуваат можностите за финансирање преку европските фондови и Реформската агенда.

За ова се разговараше на работен состанок во рамките на програмата „Фалкон“, организиран во соработка со глобалната компанија „БАЕ системс“ (BAE Systems), со поддршка од Амбасадата на САД. На состанокот присуствуваше и министерката за енергетика, рударство и минерални суровини Сања Божиновска, а беа презентирани резултатите од проценката и теренските анализи на ИТ-системите на Министерството.

Идејата е да се воспостави секторски Центар за безбедносни операции (SOC), кој би бил задолжен за следење, препознавање и навремено откривање сајбер-закани, како и за координирање на реакцијата на институциите во енергетиката.

Целта е со ваков центар да се заштити критичната енергетска инфраструктура и да се спречат евентуални дигитални напади што би можеле да го нарушат функционирањето на енергетскиот систем и испораката на услуги за граѓаните и стопанството.

– Заштитата на ИТ-инфраструктурата е клучна за нашата енергетска стабилност. Со градењето на овој секторски центар и со поддршка од нашите стратешки партнери, обезбедуваме современа заштита од дигитални закани и гарантираме непречено функционирање на енергетскиот систем – изјави министерката Божиновска.

На состанокот беа презентирани и наодите од анализата на ИТ-системите на Министерството, при што експертите на „БАЕ системс“ го оценија неговиот ИТ-тим како еден од најподготвените со кои досега соработувале. Тие ја истакнаа посветеноста на тимот на сајбер-безбедноста и примената на меѓународните стандарди.

Од Министерството посочија дека на состанокот повторно беше потврдено стратешкото партнерство со „БАЕ системс“ и заедничката заложба за зајакнување на критичната инфраструктура и енергетската безбедност на земјата.

The post НА МАКЕДОНИЈА Ѝ ТРЕБА ЦЕНТАР ЗА САЈБЕР-БЕЗБЕДНОСТ ВО ЕНЕРГЕТИКАТА Се разгледува можност за негово основање со помош од ЕУ appeared first on plusinfo.mk.

Народната банка продолжува со постепено олеснување на условите за располагање со средствата и користење на банкарските услуги на клиентите на „АЛТА банка“ АД Битола. Во рамките на активностите за обезбедување полесен пристап до средствата и непречено извршување на секојдневните финансиски обврски, клиентите на Банката од денеска, 10 ноември, можат да ги користат услугите на електронското и мобилното банкарство, согласно лимитот од 15.000 денари неделно за клиентите кои поседуваат платежни картички и до 20.000 денари (за две недели) за оние кои не поседуваат.

Лимитот се применува збирно за сите сметки во Банката и ги опфаќа следниве канали: плаќање со картички во трговија или електронска трговија, повлекување готовина од банкомати, повлекување готовина на шалтер во експозитура, како и плаќања преку електронско и мобилно банкарство.

Од утре (11.11.2026) со работа ќе започне и експозитура на „АЛТА банка“ АД Битола во Скопје, поконкретно експозитурата во Трговскиот центар „Бисер“, на адресата бул. Јане Сандански бр. 1/1. Со отворањето на оваа експозитура, клиентите на Банката од Скопје и околината ќе добијат полесен пристап до банкарските услуги, без потреба да патуваат во другите градови.

Продолжуваат со работа и експозитурите во Битола, Струмица и во Тетово, каде што клиентите можат да ги користат услугите коишто им беа овозможени досега, односно подигање готовина на шалтер во рамките на утврдените ограничувања, како и уплати за намирување на комуналните услуги, отплата на кредити и останати потреби.

Народната банка соопшти дека продолжува внимателно да ја следи состојбата во „АЛТА банка“ АД Битола и да презема активности за постепено проширување на достапноста на банкарските услуги, со приоритет да им се овозможи на сите клиенти полесен пристап до сопствените средства и непречено извршување на платежните услуги.

„АЛТА банка“ АД Битола продолжува да работи, а привремената администрација е заштитна мерка којашто се применува до разрешување на сопственичката состојба. Приоритет на Народната банка останува заштитата на интересите на клиентите и зачувувањето на стабилноста на Банката.

The post СЕ ОТВОРА ЕКСПОЗИТУРА НА АЛТА БАНКА ВО СКОПЈЕ Достапни се електронското и мобилното банкарство appeared first on plusinfo.mk.

Македонскиот банкарски сектор има шест претставници меѓу 100-те најголеми банки во Југоисточна Европа, според најновото рангирање на SEE TOP 100. Три од нив – Комерцијална банка, Стопанска банка Скопје и НЛБ Банка се пласирани меѓу првите 50. А НЛБ Банка бележи и најголем скок во рангирањето меѓу домашните банки.

SEE TOP 100 ги рангира најголемите банки во Југоисточна Европа според вкупната актива од неконсолидираните биланси на состојба заклучно со 31 декември 2025 година. Податоците се обезбедени од централните банки, националните трговски регистри, комисиите за финансиски надзор, банкарските здруженија, државни институции, корпоративни интернет-страници и од самите компании. Локалните валути се конвертирани во евра, а активата и нето-добивката или загубата се прикажани во милиони евра.

Трите најголеми македонски банки се групирани во осум позиции – од 41. до 48. место. Највисоко рангирана е Комерцијална банка, која го задржала 41. место на табелата. На крајот од 2025 година имала актива од 3,131 милијарда евра, проследена со раст од 7,79 насто на годишно ниво. Нето-добивката се зголемила од 80,1 милион евра во 2024 година на 82,6 милиони евра во 2025 година.

Кај Стопанска банка Скопје има поместување за две позиции – од 49. на 47. место. Нејзината актива достигнала 2,555 милијарди евра, со годишен раст од 9,11 насто. Истовремено, нето-добивката се намалила од 57,7 милиони на 54,3 милиони евра.

Веднаш зад неа, на 48. место, е НЛБ Банка, која во претходното рангирање била 51. и со тоа влегла меѓу првите 50 банки во регионот. Минатата година имала актива во износ од 2,552 милијарди евра. Притоа бележи и висока годишна стапка на раст од 19,58 насто. Нето-добивката, пак, се зголемила од 53,6 милиони на 79,3 милиони евра.

Во вториот дел од листата има уште три македонски банки, две големи и една средна.

Халк банка го задржала 56. место, со актива од 2,094 милијарди евра, која за една година нараснала за 13,17 насто. Освен тоа, кај нето-добивка има позитивно движење од 30,1 милион на 34,9 милиони евра.

Шпаркасе банка е на 62. место, една позиција пониско од претходното 61. место. Активата изнесувала 1,916 милијарди евра, со раст од 10,55 отсто, а нето-добивката се зголемила од 28,2 милиони на 29,2 милиони евра.

Шестиот македонски претставник е ПроКредит банка, која напредувала од 96. на 94. место. Банкарската актива достигнала 918 милиони евра, а зад износот стои годишна промена од плус 8,53 насто. Сепак, нето-добивката се намалила од 14 милиони евра во 2024 година на 10,5 милиони евра во 2025 година.

На вврвот на табелата, на првото место е романската Banca Transilvania, со актива од 41,267 милијарди евра, втора е Banca Comerciala Romana, исто така од Романија, а на трето Zagrebacka Banka.

Во првите 50 банки најмногу претставници има Романија – 12, потоа Бугарија – 9, Србија – 8, Хрватска и Словенија по 6, Македонија и Албанија по 3, Босна и Херцеговина – 2, а Молдавија – 1.

На целата листа од 100 банки најзастапена е Бугарија со 16 банки, следува Романија со 14, а Србија и Босна и Херцеговина имаат по 12. Хрватска и Словенија имаат по девет, Албанија осум, Македонија и Косово по шест, а Молдавија и Црна Гора по четири банки.

The post ТРИ МАКЕДОНСКИ БАНКИ ВО ТОП 50 ВО ЈУГОИСТОЧНА ЕВРОПА Меѓу првите 100, вкупно 6 македонски претставници appeared first on plusinfo.mk.

Дополнетиот ребаланс на Буџетот за 2026 година е навремена реакција на новите економски околности, последиците од глобалната неизвесност и ефектите врз домашната економија. Одговорноста на Владата е навремено да реагира, да ги приспособи економските политики на новите реалности, но притоа да ја зачува стабилноста на јавните финансии и да обезбеди непречено функционирање на државата.

Ова го истакна министерката за финансии Гордана Димитриеска-Кочоска во експозе на Дополнетиот предлог за изменување и дополнување на Буџетот за 2026 година кој што е денеска на дневен ред на собраниска седница.

Со ребалансот, како што потенцира министерката, се прави неопходно приспособување на приходите и расходите.

– Тоа значи поголема буџетска дисциплина, внимателно планирање на расходите и максимална оптимизација на приходите, без да се доведе во прашање редовното исполнување на обврските на државата. Она што е најважно за јавноста и граѓаните е дека Дополнетиот ребаланс не произлезе поради проблеми со ликвидност во Буџетот, туку е последица на преземените мерки од страна на Владата за намалување на ДДВ и акцизата кај бензините и дизелот. Мерки кои имаат директно влијание врз приходната страна на Буџетот, но најзначајно е дека со таквите мерки го поддржавме стандардот на граѓаните и ја помогнавме економијата, односно го спречивме прелевањето на високите цени на нафтата врз останатите производи и услуги – рече министерката.

Таа порача дека до крајот на годината државната каса е стабилна и е обезбедено финансирање на сите обврски – плати, пензии, исплата на социјални надоместоци, обврски кон стопанството, како и отплатата на долгови кои доспеваат.

Со Дополнетиот Ребаланс на Буџетот вкупните приходи се планирани на ниво од 374,2 милијарди денари или пониско за околу 5,3 милијарди денари од проекциите за 2026 година. Истовремено на исто ниво е направена надолна корекција на расходната страна, односно вкупните расходи се планирани на ниво од 420,5 милијарди денари. При тоа нивото на дефицитот во Буџетот останува на ниво од 46,3 милијарди денари.

Со ребалансот обезбедени се дополнителни 3,7 милијарди денари за социјални трансфери, од кои 1,4 милијарди денари за социјални надоместоци и дополнителни 887 милиони денари за здравствена заштита.

За Министерството за социјална политика, демографија и млади се обезбедени дополнителни 1,8 милијарди денари за ранливи категории, социјална помош, народни кујни и социјални услуги. Исто така дополнителни 600 милиони денари и за редовна и навремена исплата на породилните надоместоци.

-Зад овие бројки и ставки стојат нашите граѓани и тие за нас се приоритет, затоа во креирањето на измените опфативме ставки кај кои имаше одложување на реализацијата и користењето на средствата. Оттука направена е корекција кај капиталните расходи, но притоа е задржана развојната компонента и определбата на државата за понатамошна поддршка на економската активност преку јавни инвестиции – рече Димитриеска Кочоска.

Таа додаде дека се продолжува со вложувања во одбраната, патната и железничката инфраструктура, комуналната инфраструктура, животната средина, енергетската ефикасност, образованието, детската и социјалната заштита, земјоделството и локалната инфраструктура.

Со Ребалансот продолжува и финансиската поддршка за општините и капиталните инфраструктурни проекти на локално ниво, како дел од политиката за рамномерен регионален развој.

The post НАВРЕМЕНА РЕКАЦИЈА НА НОВИТЕ ЕКОНОМСКИ ОКОЛНОСТИ Димитриеска-Кочоска оцени дека ребалансот на буџетот ја зачувува стабилноста на јавните финансии appeared first on plusinfo.mk.

До крајот на 2026 година или во текот на 2027 година, би можеле да бидеме сведоци на „Чернобил на вештачката интелигенција“, инцидент од такви размери што конечно ќе ги принуди владите и корпорациите сериозно да ги сфатат ризиците што ги носи оваа технологија, предупредува Џефри Хинтон, добитник на Нобеловата награда за физика за 2024 година и еден од пионерите на модерната вештачка интелигенција.

Тоа е вознемирувачко сценарио, особено по неделата обележана со напади, заплашување и саботажи.

Иако нема докази дека вештачката интелигенција била користена во овие конкретни инциденти, таа веќе е алатка што сајбер-криминалците и хакерите спонзорирани од државата ја користат широко за автоматизирање на нападите, откривање на ранливости, пишување злонамерен код и смислување поверливи измами.

Покрај тоа, Хинтон, кој го напушти Google во 2023 година (на 78-годишна возраст), делумно за да може слободно да зборува за опасностите од технологијата во чие создавање самиот учествувал, во интервју за „The Guardian“ сугерира дека вештачката интелигенција наскоро би можела да еволуира во нешто многу поопасно.

„Чернобил“ е метафора, а не буквална референца за нуклеарна експлозија или катастрофа. Овој научник, на пример, предвидува кибер напад со помош на вештачка интелигенција врз електричната мрежа, што би можело да предизвика големи прекини на електричната енергија.  Или замислете напад што би го парализирал финансискиот систем една недела, спречувајќи милиони луѓе и бизниси да пристапат до банкарски сметки или да вршат плаќања.

– Ќе можеме да се опоравиме – забележува Хинтон, но таков настан конечно би ги принудил владите сериозно да го сфатат овој проблем, сите, прецизира тој, „освен администрацијата на Доналд Трамп, која сè уште се спротивставува на меѓународната регулација на вештачката интелигенција“.

Хинтон како преседан го наведува инцидентот од минатиот јули во кој биле вклучени „нечесни агенти на вештачка интелигенција“ од OpenAI. Тој настан доведе до неколку загрижувачки епизоди, од кои најсериозен беше нападот врз системите на платформата Hugging Face, која ја користат развивачите на вештачка интелигенција.

Веќе имавме еден инцидент, следен е „Чернобил“?
„Кумот на вештачката интелигенција“ го споредува овој настан со инцидентот во нуклеарната централа Три Мајл Ајленд во Пенсилванија во 1979 година, кога имаше делумно топење на јадрото на реакторот, иако без последиците од обемот на советската катастрофа од 1986 година.
Инцидентот во јули беше момент како оној на „Три Мајл Ајленд“, а научникот предупредува дека по него може да следи „Чернобил“.

Хинтон не штеди критики кон клучните личности од Силиконската долина. Тој вели дека воопшто не му верува на Сем Алтман, извршен директор на OpenAI. Тој им дава иста оценка на Марк Закерберг и Елон Маск, тврдејќи дека тие се целосно свесни за ризиците поврзани со технологиите што ги развиваат, но дека „воопшто не им е грижа“.

– Тие претпочитаат пари – вели тој.

Решението што го предлага овој добитник на Нобелова награда е најнапредните системи да бидат предмет на задолжително, независно следење пред да стигнат на пазарот, слично на регулаторниот процес што се однесува на фармацевтските производи.

Тој го наведува случајот со талидомид, лек што предизвикал тешки вродени дефекти во 1950-тите и 1960-тите, како пример за да ја илустрира својата поента: чекањето производот да предизвика штета, а потоа барањето надомест не е прифатлива стратегија.

Сепак, тој тврди дека токму тоа сакаат да го прават големите технолошки компании со вештачката интелигенција.

И покрај сè, Хинтон не мисли дека катастрофата е неизбежна. Тој објаснува дека неговата интуиција му кажува дека „сè уште ги имаме работите под контрола“. Сепак, за навистина да се одржи таа контрола, би бил потребен огромен напор, и од владата и од истражувачите и деловните субјекти.

Пред неколку недели, Хинтон беше меѓу потписниците на уште еден манифест на академски експерти и експерти, кој повикува на поголема претпазливост и регулатива во областа на вештачката интелигенција, со посебен фокус на сајбер безбедноста.

The post НИ ПРЕТСТОИ АИ „ЧЕРНОБИЛ“ Апокалиптично предупредување на Џефри Хинтон, нобеловец и кум на вештачката интелигенција appeared first on plusinfo.mk.

Фондацијата „Атанас Близнакоф“ ја пречекува новата генерација стипендисти во рамки на програмата „Атанас Близнакоф“ стипендии за студентска извонредност, која ја спроведува Македонија2025. Оваа година 52 студенти од прва година на Универзитетот „Св. Кирил и Методиј“ во Скопје добиваат финансиска поддршка за своето високо образование. Тие се приклучуваат кон заедницата млади таленти што се издвојуваат со академски успех, посветеност и потенцијал.

Фондацијата е основана во 1977 година од Атанас и Славка Близнакоф, а програмата се темели на нивното филантропско наследство. Од 2021 година Македонија2025 е партнер на Фондацијата и ја спроведува стипендиската програма во Македонија. Таа го организира годишниот отворен повик и обезбедува континуирана поддршка за стипендистите.

770 стипендии и инвестиција од 1.925.000 американски долари

Од 2021 година до денес, Фондацијата има обезбедено 770 годишни стипендии во вкупна вредност од 1.925.000 американски долари. Во академската 2026/2027 година таа истовремено поддржува пет генерации стипендисти, со вкупно 151 стипендија во вредност од 377.500 американски долари. Ова е најголемиот број активни стипендии во една година од почетокот на програмата.

Повеќе од финансиска поддршка: долгорочна посветеност кон младите таленти

Програмата „Атанас Близнакоф“ стипендии за студентска извонредност се темели на уверувањето дека образованието е една од најзначајните инвестиции во долгорочниот развој на општеството. Особен приоритет при доделувањето на стипендиите имаат студентите од социјално ранливи семејства, за финансиските ограничувања да не бидат пречка за нивното образование.

Стипендија плус менторство за развој на практични вештини

Покрај финансиската поддршка, стипендистите добиваат можности за менторство, развој на практични вештини и професионално вмрежување преку активностите на Македонија2025. Тие стануваат дел и од заедницата на сегашни и поранешни стипендисти, која поттикнува меѓусебна поддршка и долгорочна соработка. Така влијанието на програмата продолжува и по завршувањето на студиите.

-Особено сме горди што нашата поддршка продолжува да расте и што оваа година достигнуваме рекорден број активни стипендии. Веруваме дека финансиската состојба не треба да го определува образовниот и професионалниот пат на еден млад човек. Нашата цел е младите да веруваат во сопствениот потенцијал и еден ден и самите да создаваат можности за следните генерации – истакнуваат од Фондацијата „Атанас Близнакоф“.

Македонија2025 изразува искрена благодарност до Фондацијата „Атанас Близнакоф“ за довербата и континуираната посветеност на младите таленти во Македонија. На сите 52 нови стипендисти им упатуваме искрени честитки и им посакуваме успешни студии.

Повеќе информации за новата генерација стипендисти, како и целосната листа на добитници, се достапни достапни на веб-страницата на Македонија2025.

The post 770 СТИПЕНДИИ И РЕЧИСИ 2 МИЛИОНА ДОЛАРИ ПОДДРШКА Фондацијата „Атанас Близнакоф“ продолжува да инвестира во иднината на младите во Македонија appeared first on plusinfo.mk.

Европската Унија покрена судска постапка против американскиот технолошки гигант IBM и две други компании одговорни за развојот и одржувањето на новиот систем за контрола на влез во ЕУ, кој се соочи со бројни технички проблеми и долги чекања на границите од неговото спроведување.

Тужбата е поднесена уште минатата година од агенцијата EU-Lisa, задолжена за управување со големи информациски системи во областа на безбедноста и правдата, а за неа се дознава од најновиот годишен финансиски извештај на агенцијата.

Во него се наведува дека EU-Lisa, поради повеќекратните доцнења на конзорциумот во испораката на системот, ги активирала достапните договорни и правни механизми за заштита на своите финансиски интереси.

Покрај IBM, во постапката се вклучени и француската ИТ компанија Atos и италијанската одбранбена компанија Leonardo. Сите три компании беа членови на конзорциумот одговорен за имплементација и одржување на системот за влез и излез од ЕУ (EES).

Системот EES започна да се имплементира во октомври 2025 година, но неговото воведување беше проследено со бројни тешкотии. Аеродромите пријавија дефекти во терминалите за автоматска регистрација на патници и чести прекини на системот. Поради ова, редици се формираа во периодите на шпиц во сообраќајот, а времето на чекање на некои места достигна три часа. Некои патници дури и ги пропуштија своите летови поради доцнења на граничните контроли. Проблемите дополнително беа поврзани со недостатокот на персонал на граничните премини.

Агенцијата EU-Lisa соопшти дека судската постапка се однесува на фазата на развој на системот и дека тоа не влијае на неговото тековно работење. Тие додадоа дека EES е целосно оперативен. Европската комисија потврди дека не е страна во постапката, посочувајќи дека спорот се однесува на доцнења во текот на развојот на системот, а не на неговата тековно спроведување.

EES беше воведен со цел да се зајакне контролата на патниците кои доаѓаат во Шенген зоната од земји надвор од Шенген зоната. Наместо претходното рачно евидентирање на влезовите и излезите, системот собира биометриски податоци на патниците – фотографии од лица и отпечатоци од прсти.

Контролите се однесуваат на граѓани на земји надвор од Шенген зоната (25 членки на Европската Унија и Исланд, Лихтенштајн, Норвешка и Швајцарија, а во овој случај ги вклучува граѓаните на Ирска и Кипар).

The post ТРИ ТЕХНОЛОШКИ ГИГАНТИ НА СУД ПОРАДИ СИСТЕМОТ ЗА ВЛЕЗ И ИЗЛЕЗ ВО ШЕНГЕН Конзорциумот не го испорачал навреме системот appeared first on plusinfo.mk.

Франција го обвини Иран за кибер-нападите на фрижидерите во супермаркетите. Амбасадорот на Иран во оваа земја утрово е повикан на разговори по кибер нападите врз фрижидерите во супермаркетите, соопшти француското Министерство за надворешни работи.

„Тој беше примен од главниот секретар“, објави министерството.

Францускиот министер за надворешни работи Жан-Ноел Баро вчера ја обвини Иранската револуционерна гарда дека стои зад неодамнешниот кибер напад врз француските фрижидери во супермаркетите, велејќи дека тоа ќе има последици за земјата.

Париското обвинителство и националната агенција за кибер-безбедност (ANSSI) утврдија дека нападот е дело на „Шахид Каве“ (Shahid Kaveh), офанзивна кибер-единица поврзана со Центарот за електронски и кибер-операции на иранската Револуционерна гарда. Истражителите успеале да го поврзат Иран со нападот преку следниве докази: Користење на IP адреси кои водат директно до уреди лоцирани во Иран, пронајдени траги и метаподатоци на персиски јазик (фарси) во дигиталната инфраструктура на нападот и препознатлив код и методологија кои совршено одговараат на претходни дигитални напади извршени од истата група.

Канцеларијата на парискиот обвинител соопшти дека побарала меѓународни потерници против лидерот на Шахид Каве, офанзивна кибер-единица поврзана со Револуционерната гарда, и неговите двајца заменици.

Хакерите ја презедоа контролата врз фрижидерите во стотици супермаркети во Франција кон средината на октомври, зголемувајќи ја температурата на 50 степени Целзиусови, предизвикувајќи пожари и расипување на храна, соопшти француската полиција.

Слични инциденти се случија на почетокот на ноември во десетици продавници во Белгија и Луксембург, како и во Шведска и Естонија.

The post ФРАНЦИЈА ОТКРИ КОЈ ГИ НАПАДНА ФРИЖИДЕРИТЕ ВО СУПЕРМАРКЕТИТЕ Распишана е потерница против лидерот на Шахид Каве, офанзивна кибер-единица на Иран appeared first on plusinfo.mk.

Прометот на Македонската берза во октомври изнесувал 219,1 милион денари, што е за 45,56% помалку во однос на септември. Истиот месец е намален и бројот на трансакции, а берзанскиот индекс МБИ10 го завршил месецот со пад од 1,87%.

Ова го покажува месечниот статистички билтен на Македонската берза.

Според него, минатиот месец се реализирани 1.054 трансакции или 33,79% помалку од септември. Податоците покажуваат и пад на прометот кај класичното тргување што се оправдува со намалената понуда на државни хартии од вредност. Прометот со акции во класичното тргување се намалил за 31,6% на 188,2 милиони денари.

Прегледот на движењето на акциите  на компаниите покажува дека најголем раст на вредноста на акцијата има кај компанијата Окта која  бележи месечно зголемување од 14,96 % од 5.175 денари на 5.949 денари.

Носител на вториот по големина раст е Хотели Метропол Охрид. Акцијата на оваа компанија порасна за 8,70% од 230 денари на 250 денари.

Акцијата на градежната компанија Гранит пак порасна од  1.500 на 1.550 денари, што е зголемување од 3,33%, додека пак акцијата на ТИТАН Усје порасна за 2,22%, на 46.000 денари. Раст од 0,20% бележи и акцијата на Алкалоид и таа во октомври достигна цена од  22.152,74 денари.

На спротивната страна пад на вредноста на акцијата во октомври забележаа акцијата на Македонијатурист која се намали за 17,14% , од 7.000 на 5.800 денари.

Акцијата на Македонски Телеком се намали за 6,27%, од 495,01 на 463,96 денари.

Пад забележаа и акциите на банките. Акцијата на Стопанска банка Скопје изгуби  4,85 од вредноста, на НЛБ Банка 3,15% додека на Комерцијална банка 2,79 %.

Кај Макпетрол намалувањето изнесува 2,11%, а кај Реплек 1,93%.

Најголем пад на вредноста на акцијата има кај компанијата Факом од 99,17% од  6.984 денари во септември, вредноста во октомври се спушти на само 58 денари.

Најголем промет со акции на официјалниот пазар во октомври оствари Комерцијална банка, со 73,5 милиони денари. Следуваат Алкалоид со 41,7 милиони и Макпетрол со 21,1 милион денари.

Според пресметката од податоците во билтенот, овие три акции заедно учествувале со околу 72,6% во прометот со акции на официјалниот пазар.

The post ПРОМЕТОТ НА БЕРЗАТА ВО ОКТОМВРИ ПАДНА ЗА 45,5% Највисок раст бележи акцијата на Окта appeared first on plusinfo.mk.