Ниските температури, особено оние под нулата што беа измерени деновиве на некои повисоки места (Демир Хисар, Берово, Делчево, од -0,8 до -2,3 степени), може да предизвикаат сериозни штети во земјоделството, предупредуваат агрометеоролозите и апелираат, производителите итно да ги соберат сите дозреани плодови на отворено, ако сакаат да го спасат родот.

На удар се, велат, пиперката, доматот и компирот, како и доцните сорти грозје.

– Температурите под нулата во овој дел од септември претставуваат ран есенски мраз кој може да предизвика сериозни штети кај културите кои сè уште се во активна вегетација. Влијаат врз зеленчукот и овошјето кои сè уште не се прибрани. Кај едногодишните култури на кои повеќе им одговара топло време, како пиперката, доматот и компирот, можна е појава на оштетувања на листовите и на плодовите, а доколку грозјето од доцните сорти сè уште не е собрано, овие ниски температури можат да ја намалат содржината на шеќер во зрната. Поради тоа, се советува, земјоделците итно да ги соберат сите дозреани плодови на отворено за да го спасат родот – порачуваат агрометеоролозите од УХМР.

Останатите култури се во период на предсеидбена подготовка.

– На оваа фаза треба да ѝ се посвети посебно внимание. Површината на почвата треба длабоко да се обработи, а по ова да следи дополнителна површинска обработка за да се создаде растресит и иситнет слој во кој правилно ќе се посее семето. Паралелно со обработката, треба да се изведе и основното ѓубрење како клучна агротехничка мерка, бидејќи поголемиот дел од нашите почви се скудни со азот и фосфор, на што мора да се обрне посебно внимание, а со ваквата правилна и навремена обработка се создаваат оптимални услови за акумулирање доволно влага во почвата и се стимулира активноста на корисните почвени микроорганизми, објаснуваат агрометеоролозите.

Се препорачува земјоделските производители да продолжат со активностите и грижата за нивните посеви. 

The post ЗЕМЈОДЕЛЦИТЕ ИТНО ДА СИ ГИ СОБЕРАТ УЗРЕАНИТЕ ПЛОДОВИ Агрометеоролозите алармираат на опасност од мраз appeared first on plusinfo.mk.

Германскиот производител на автомобили Фолксваген повлекува околу четири милиони возила од различни марки, што е најголемата операција од скандалот Дизелгејт, објави денеска весникот Ханделсблат.

Повлекувањето е поради можни проблеми со системот за управување на возилото.

Станува збор за моделите Tiguan, Touran, Golf Variant, Caddy и Golf произведени помеѓу септември 2013 и јули 2024 година. Околу 700.000 возила Audi Q3 произведени помеѓу 2017 и 2024 година се исто така погодени од истиот технички проблем.

Можно е да бидат погодени и возила од компанијата Seat, која исто така припаѓа на Фолксваген, и моделите Ateca и Tarraco произведени помеѓу 2013 и 2024 година.

За другите возила на концернот, како што е Шкода, не се знае дали го имаат истиот технички проблем.

The post ФОЛКСВАГЕН ПОВЛЕКУВА ОКОЛУ 4 МИЛИОНИ ВОЗИЛА Можни се проблеми со системот за управување appeared first on plusinfo.mk.

Со попуст од 15 отсто на апсолутно сѐ, подароци за купувачите и поддршка за локалната заедница, dm drogerie markt вчера (24 септември), повторно ја отвори својата продавница во Градскиот трговски центар во Скопје. По неколкунеделното реновирање, добро познатата dm локација во срцето на градот ги пречека купувачите во обновен, помодерен и уште попријатен продажен простор.

По повод повторното отворање, купувачите можеа да уживаат и во дополнителни изненадувања. Со секоја сметка над 499 денари следуваше подарок Balea гел за туширање, со сметка над 699 денари – торба за пазарување, додека за сметка над 1.999 денари купувачите добиваа подарок пешкир. Подароците беа достапни на денот на отворањето, до истекот на залихите.

Поволностите продолжуваат и во следните денови – до 26 септември купувачите во dm во ГТЦ можат да пазаруваат со 15% попуст на апсолутно сѐ.

Како компанија која континуирано ја негува општествената одговорност и поддршката на локалната заедница, dm и ова важно поглавје за продавницата во ГТЦ го одбележа со донација за ЈУГД „25 Мај“ во вредност од 158.000 денари. На тој начин, компанијата ја продолжува практиката значајните моменти од своето работење да ги поврзува со конкретна поддршка за заедницата.

Во обновената продавница, купувачите повторно можат да ја најдат богатата dm понуда за секојдневните потреби на целото семејство – производи за нега и убавина, нега за мажи и бебиња, природна козметика, органска храна и додатоци во исхрана, како и производи за хигиена во домот и нега на алишта. Дел од препознатливата понуда се и сопствените трговски марки Balea, alverde, dmBio, babylove, Denkmit и многу други, кои комбинираат проверен квалитет со СЕКОГАШ ПОВОЛНО цени.

Реновирањето на продавницата во ГТЦ е дел од континуираните заложби на dm за унапредување на своите продажни простори и создавање уште поквалитетно и попријатно искуство за купувачите. Со обновеното издание на една од своите добро познати локации во Скопје, dm продолжува да го развива препознатливиот концепт на практично пазарување и да одговара на секојдневните потреби на своите купувачи.

The post 📷 СО ПОПУСТИ, ПОДАРОЦИ И ДОНАЦИЈА, DM ПОВТОРНО ЈА ОТВОРИ РЕНОВИРАНАТА ПРОДАВНИЦА ВО ГТЦ appeared first on plusinfo.mk.

Новиот предлог-закон за уредување на пазарите со земјоделски производи предвидува појасна распределба на одговорностите меѓу производителите, откупувачите и преработувачите, како и поголема сигурност за земјоделците при пласманот на нивните производи – истакна министерот за земјоделство, шумарство и водостопанство Борче Серафимовски на денешната јавна расправа во Министерството за земјоделство.

– Земјоделството повеќе нема простор за изнудени и ад хок решенија. Градиме систем што навреме ќе ги препознава ризиците, ќе воспостави ред на пазарите и ќе ја намали неизвесноста со која се соочуваат производителите. Земјоделецот повеќе не смее целиот производствен ризик да го носи сам, а условите за продажба да ги дознава кога производот е веќе набран и неговиот избор е сведен на минимум – рече Серафимовски.

Предлог-законот во една целина ги обединува организираниот откуп и договорните односи, пазарните информации, интервентните мерки при сериозни нарушувања на пазарот, организирањето на производителите, училишните шеми, промоцијата на домашните производи и пазарните стандарди.

Според министерот, решението не предвидува административно утврдување на откупните цени, туку воспоставување прецизни правила, поголема транспарентност и механизми за навремено институционално дејствување.

Писмените договори ќе се склучуваат пред испораката на производите и однапред ќе ги дефинираат количината, квалитетот, цената или начинот на нејзино утврдување, рокот за плаќање и поврзаните трошоци.

Предлог-законот предвидува и инструменти за јавна интервенција и поддршка за приватно складирање во случаи на сериозни нарушувања или ризици на пазарот, како и усогласување со правилата на Европската Унија за заедничка организација на земјоделските пазари.

Според Серафимовски, електронската евиденција и јавно достапните податоци за регистрираните откупувачи ќе придонесат за поголема следливост и контрола во организираниот откуп. Дополнително, земјоделскиот пазарен информативен систем и националната опсерваторија ќе обезбедуваат податоци за производството, понудата и побарувачката, резервите, цените, увозот и извозот, со што институциите ќе може порано да ги препознаваат ризиците на пазарот.

The post ЗЕМЈОДЕЛЦИТЕ ЌЕ ПОТПИШУВААТ ДОГОВОРИ ПРЕД ИСПОРАКА НА ПРОИЗВОДОТ СО ТОЧНИ ЦЕНИ, КОЛИЧИНИ И РОКОВИ НА ПЛАЌАЊЕ Серафимовски го претстави предлогот на законот за уредување на пазарите со земјоделски производи appeared first on plusinfo.mk.

Рударските компании бараат посебен буџет на Европската Унија за критичните суровини поради проблем со финансирање на стратешките проекти, но Европската комисија и земјите-членки на ЕУ за сега не се согласуваат да го обезбедат.

На вчерашниот состанок на министрите за индустрија на ЕУ за политиките за подобрување на конкурентноста, ЕК ги информираше и земјите-членки за моменталната состојба на клучните политики во областа на критичните суровини, но не се познати детали.

– Ги идентификувавме европските стратешки проекти и го забрзуваме нивното финансирање, како и самите процедури – изјави потпретседателот на ЕК за индустриска стратегија, Стефан Сежурне.

Тој додаде дека нема да има посебна буџетска ставка за критичните минерали, а следниот буџет на ЕУ ќе ги одразува „идентификуваните потреби за флексибилност, предвидливост и ефикасност“.

ЕК соопшти дека воспоставила „рамка за мобилизација“ од 1,7 милијарди евра за финансирање на стратешки проекти, но компаниите тврдат дека средствата се тешко достапни.

The post РУДАРСКИТЕ КОМПАНИИ БАРААТ ПОСЕБЕН БУЏЕТ НА ЕУ ЗА ФИНАНСИРАЊЕ СТРАТЕШКИ ПРОЕКТИ Тие тврдат дека со сегашниот модел тешко доаѓаат до парите appeared first on plusinfo.mk.

Согласно податоците за движењето на цените на берзата HUPX во Унгарија за 25 септември 2026 просечната часовна цена на еден мегават час електрична енергија (baseload) изнесува 219,62 евра/mwh, додека на MEMO цената е 211,32 евра/mwh.

Цената на електричната енергија во текот на дневните часови (9:00 – 15:00) (Power solar peak) на HUPX постигна ниво од 169,18 евра за мегават час, а на MEMO 179,16 евра.

Цена на Storage MAX, индекс кој ја покажува разликата помеѓу часовните берзански цени помеѓу 12 и 14 часот наспроти часовните берзански цени во периодот помеѓу 18 и 20 часот, изнесува 140,42 евра за мегават час.

Цената на природниот гас пак на унгарската берза CEEGEX изнесува 63,94 евра, додека цената според индексот на холандската берза, TTF Dutch е 76,03 евра.

Информациите за движењето на цената на електрична енергија и на природниот гас може да помогнат во попрецизно планирање на буџетите за потрошувачката на електрична енергија, да се заштеди на сметките за струја, како и компаниите да носат информирани деловни одлуки со кои што ќе ги намалат своите трошоци и поуспешно ќе ги реализираат своите бизнис планови.

The post КОИ СЕ НОВИТЕ ЦЕНИ НА СТРУЈАТА И НА ГАСОТ НА ЕВРОПСКИТЕ БЕРЗИ? Помогнете си во бизнис планирањето appeared first on plusinfo.mk.

Воведувањето на еврокодовите (збир од европски стандарди за проектирање и градба) како единствени национални стандарди во градежништвото ќе значи побезбедни и посигурни градби, поголема безбедност и подобри услови за работа, оценуваат експертите од секторот.

Тие сметаат дека  овие стандарди треба да се воведат побрзо и по нив во иднина да се проектира и гради.

Сега во земјава паралелно се применуваат постари стандарди од 80-тите и 90-тите години и еврокодовите.

Според деканот на Градежниот факултет Јосиф Јосифовски примената на овие кодови ја подобрува безбедноста во сите фази на градба- од подготовка, проектирање до изградба.

–  Тоа е комплекс на стандарди во кои е преточено европското искуство во изминатите седум или осум децении. Тоа значи апсолутно побезбедни и посигурни градби за граѓаните, подобар квалитет и би се намалиле сите оние проблеми коишто ги согледуваме секојдневно. Тоа е вистинскиот пат по кој треба да се движиме –  вели Јосифовски.

Според него, стандардите од 80-90-тите години кои уште се користат напоредно со еврокодовите треба да се напуштат.

– Ние веќе 10 години се трудиме да ги воведеме еврокодовите. Моментално имаме паралелно користење на старата и новата регулатива меѓутоа сметаме дека треба да се насочиме само кон еврокодовите и по нив во иднината да проектираме и градиме- вели Јосифовски.

Воведувањето на еврокодовите, според Јосифовски, не значи и зголемување на цената на становите по автоматизам.

– Не е нужно, затоа што еврокодовите се флексибилни и дозволуваат трошоците да се дефинираат зависно од потребите. Постои мислење во пошироката јавност дека со воведувањето на еврокодовите се воведуваат поголеми стандарди што можно е да ја зголемат цената на градбата, но не е нужно, а целта секогаш треба да ни биде квалитетот и безбедноста- вели Јосифовски.

Според претседателот на Здружението за градежништво при Стопанската комора Андреа Серафимовски, процесот носи и проблеми, но неопходно е воведувањето на овие еврокодови со цел да се фати чекор со процесите што се одвиваат во Европа.

– Знаеме дека процесот има многу тешкотии кои треба да се преминат, но тука сме да ги преземеме сите наши активности со цел инженерите побрзо да ги совладаат еврокодовите, а државата да ги воведете како национални стандарди за да фатиме чекор кон процесите шти се одвиваат во Европа- изјави денеска Серафимовски пред почетокот на Националната конференција за Еврокодови 2.0 на тема „Од стандардизација до национална имплементација“ што се одржа во Стопанската комора.

The post ВО МАКЕДОНИЈА ПАРАЛЕЛНО СЕ КОРИСТАТ СТАРИТЕ И НОВИТЕ СТАНДАРДИ ЗА ГРАДЕЊЕ Експертите бараат што побрзо да се премине само на европските стандарди appeared first on plusinfo.mk.

Додека „ОпенАИ“, „Антропик“ и „ДипМајнд“ на „Гугл“ повикуваат на поголема соработка во областа на безбедноста на вештачката интелигенција, извршниот директор на „Мета“, Марк Закерберг, верува дека индустријата не е потребна заедничка координација.

– Постојат голем број лаборатории кои работат на развој на напредна вештачка интелигенција и не мислам дека ни е потребна некаква координација низ целата индустрија за да се избегнат проблеми – изјави Закерберг.

Според него, секоја лабораторија треба сама да ги процени можните проблеми и, кога ќе ги види, да одвои доволно време интерно за да обезбеди безбеден развој и имплементација на своите системи.

Дебатата за тоа колку индустријата за вештачка интелигенција треба да го забави развојот и заеднички да ги дефинира безбедносните стандарди се интензивираше во технолошките кругови.

Извршниот директор на „Антроп“, Дарио Амодеи, претходно овој месец повика на забавување на развојот на напредната технологија за вештачка интелигенција и на координиран пристап од страна на индустријата, со поголема улога за американската влада. Неговиот повик беше поддржан од извршниот директор на OpenAI, Сем Алтман, и извршниот директор на SpaceX, Елон Маск, кои предупредија за потенцијално сериозните последици од континуираниот развој со сегашното темпо.

Во меѓувреме, OpenAI објави дека веќе неколку недели работи со Anthropica и DeepMind на Google за прашања поврзани со безбедноста на вештачката интелигенција.

Закерберг верува дека постои и бизнис стимул за одговорен развој. Ако корисниците не му веруваат на производ со вештачка интелигенција, тврди тој, тие нема да го прифатат.

Според него, безбедноста и усогласеноста на однесувањето на системот со вештачка интелигенција се меѓу клучните способности што треба да се развијат. Како пример, тој го наведе моделот Muse на Meta, чие објавување, според него, беше одложено за неколку месеци за да се направи производот подобар за корисниците.

Закерберг сметаа дека и другите компании треба да ги одложат новите изданија ако има нерешени прашања поврзани со безбедноста и усогласеноста на системите со вештачка интелигенција.

Ваквите изјави доаѓаат во контекст на низа контроверзии поврзани со системите со вештачка интелигенција на Meta.

Во август, Мета потврди дека еден од нејзините модели на вештачка интелигенција започнал напад врз системот на друга компанија за време на тестирањето за сајбер безбедност. Порано овој месец, корисниците ја тужеа Мета, тврдејќи дека нивните приватни и интимни снимки биле снимени од паметните очила на Мета и предадени на надворешни соработници во Кенија кои работеле на обука на вештачката интелигенција на Мета. Мета ја припиша одговорноста за тој случај на компанијата Сама, со која соработувала.

Во исто време, OpenAI, Anthropic и Google наводно работат на ново тело за безбедносни стандарди за вештачка интелигенција.

Според извештајот на „The Information“, организацијата моментално го има работното име „Standards Frontier for AI“ (SAFA) и би можела да биде лансирана кон крајот на 2026 или почетокот на 2027 година.

Според досегашните информации, организацијата треба да ги поддржува независните организации кои тестираат модели на вештачка интелигенција пред нивната употреба, да дефинира критериуми за независни ревизори за безбедност и да утврди безбедносни обврски и начини за пријавување инциденти. Некои членови на работната група наводно ја разгледуваат можноста самата организација да спроведува тестови за безбедноста и можностите на моделите на вештачка интелигенција.

The post ЗАКЕРБЕРГ НЕ САКА ДА СОРАБОТУВА СО ДРУГИ ЗА ОГРАНИЧУВАЊЕ НА ВИ Директорот на „Мета“ смета дека секоја компанија сама треба да ги решава проблемите appeared first on plusinfo.mk.

Светска банка ѝ одобри кредит од  од 175 милиони евра на Србија за изградба на првата фаза од гасната инфраструктура низ Србија, објавија српските медиуми кои се повикуваат на изјава на министерката за рударство и енергетика во технички мандат, Дубравка Ѓедовиќ Хандановиќ.

– Проектот вклучува изградба на првата делница од гасоводот Ниш-Велика Плана, отстранување на постојните тесни грла и овозможува пристап до гас од различни насоки на снабдување, односно подобрување на транспортната мрежа и зајакнување на безбедноста и отпорноста на снабдувањето со природен гас.  Енергетската безбедност и зелената транзиција одат заедно, а гасот е транзициско гориво! Неизбежно е дека ќе ни треба повеќе енергија и затоа правиме сè за да им ја обезбедиме на нашите граѓани – се вели таа во објава на Инстаграм.

Гасоводот Ниш – Велика Плана е капитален енергетски проект во Србија чија изградба е во фаза на подготовка и обезбедување финансирање, со поддршка од Светската банка. Парите од кредитот на Светската банка се наменети за реализација на првата фаза, додека целиот проект е со проценета вредност од 1 милијарда евра.

За поврзување на овој гасен коридор со Македонија на Србија ќе треба да изгради уште еден дел до границата со земјава. Во август Македонија и Србија потпишаа договор за проектирање и изградба на меѓусебен интерконектор од Клечовце кај Куманово до Врање во Србија) со цел да биде целосно подготвен до 2028 година.

Гасоводот Ниш- Велика Плана е продолжение на таа рута низ територијата на Србија. Неговата улога е да го прифати гасот што доаѓа од југ (од Грција и Македонија преку Врање и Ниш) и безбедно да го транспортира кон централниот и северниот дел на Србија.

Гасното поврзувањето Грција- Македонија – Србија- Унгарија официјално се развива во рамките на европската регионална иницијатива наречена Вертикален гасен коридор.

The post СРБИЈА ДОБИ КРЕДИТ ОД 175 МИЛИОНИ ЕВРА ЗА ПОЧЕТОК НА ГАСНИОТ КОРИДОР НИШ – ВЕЛИКА ПЛАНА Овој гасовод ќе се поврзе со интерконекторот Клечовце – Врање appeared first on plusinfo.mk.

Полската банка BGK денеска објави дека, заедно со пет развојни институции од Централна и Источна Европа и Европскиот инвестициски фонд (EIF), основала нов фонд за инвестиции во инфраструктура во регионот, Фондот за инфраструктура на иницијативата „Три мориња“ (3SII FoF), со почетен капитал од 360 милиони евра.

Официјалното потпишување на документот за основање на фондот се одржа во Љубљана, а основачки инвеститори на 3SII FoF се развојни институции од шест земји, имено полската BGK, хрватската банка за обнова и развој HBOR, романската BID, литванската ILTE, словенечката SID банка и бугарското Министерство за иновации и раст.

Вкупниот придонес на националните развојни институции изнесува 180 милиони евра, додека EIF го дуплира тој износ, така што почетниот капитал на фондот достигнува 360 милиони евра, наведува BGK на својата веб-страница.

Фондот ќе инвестира во инфраструктурни фондови што работат во земјите што учествуваат во иницијативата „Три мориња“, со фокус на модерна енергетска, транспортна, дигитална и социјална инфраструктура.

Целта е фондот да привлече приватен капитал за инфраструктурни проекти во Централна и Источна Европа и да мобилизира вкупно околу две милијарди евра.

Фондот наведува дека е отворен за приклучување и на други земји од Централна и Источна Европа.

Иницијативата „Три мориња“ е геополитичка и економска платформа која ги поврзува земјите од Централна, Источна и Јужна Европа меѓу Јадранското, Балтичкото и Црното Море.

Македонија не е дел од оваа иницијатива, но се води активна дебата за нејзино приклучување со цел да се  подобрат врските преку транспортните Коридори 8 и 10.

The post ПОЛСКА, СЛОВЕНИЈА, ХРВАТСКА И УШТЕ ТРИ ЗЕМЈИ ФОРМИРАА ФОНД НА ИНИЦИЈАТИВАТА „ТРИ МОРИЊА“ Ќе инвестира во инфраструктурни проекти во земјите од Централна и Источна Европа appeared first on plusinfo.mk.