БАБА ВАНГА ПРЕДВИДЕЛА ГОЛЕМА ВОЈНА И КАТАСТРОФИ ВО 2026 ГОДИНА Ништо посебно не измислила пророчката од Петрич

Голема војна, разорни природни катастрофи и настан што радикално ќе ја промени сликата за човештвото ВО 2026 година – тоа се најмрачните предвидувања што повторно кружат низ медиумите и социјалните мрежи, а кои му се припишуваат на името на Баба Ванга.

Познатата Баба Ванга починала во 1996 година. Живеела во Петрич, во Бугарија, но била добро позната и на Балканот, вклучително и во Македонија, каде многумина верувале дека погодува. Таа никогаш не оставила сопствена книга со предвидувања. Сè што денес се чита за 2026 година повеќе говори за нашите стравови отколку за нејзините визии.

Приказните за слепата бугарска пророчка за 2026 година повторно добиваат на интензитет. Дел од медиумите зборуваат за глобален конфликт кој би започнал во Европа и би се проширил меѓу големите сили, со последици што би го промениле светскиот поредок.

Паралелно со воените сценарија, во јавноста се пласираат и тврдења за година исполнета со природни катастрофи. Земјотреси, екстремни климатски појави, разорни поплави и пожари се дел од мозаикот што ѝ се припишува на 2026-та. Во време кога климатските промени веќе се реалност, ваквите „предвидувања“ лесно наоѓаат плодна почва.

Една од најсензационалните приказни оди и чекор понатаму – наводен контакт со вонземска цивилизација. Според овие интерпретации, токму во 2026 година човештвото би можело да се соочи со нешто што досега било дел само од научната фантастика.

Интересно е што покрај апокалиптичните сценарија, повремено се провлекуваат и „поблаги“ толкувања: технолошки пробиви, напредок во медицината, па дури и економски подеми за поединци или држави.

Скептиците одамна предупредуваат дека овие предвидувања не постојат во автентична форма. Нема запис, нема документ, нема прецизна временска рамка што директно потекнува од самата Ванга. Повеќето „пророштва“ се реконструкции, прераскажувања и доработки, често прилагодени на актуелниот страв на епохата.