БАЈДЕН ПОТПИША, ТИК-ТОК Е НА ЧЕКОР ОД ЗАБРАНА ВО САД „Бајт денс“ ќе бара правда на суд

Американскиот претседател, Џо Бајден, денеска потпиша неколку нацрт-закони, вклучително и оној со кој Тик-Ток е чекор поблиску до забрана во САД, објави порталот Вајрд.

Бајден потпиша нацрт-закон, неодамна усвоен од американскиот Конгрес, со кој се бара од кинеската компанија „Бајт денс“ да го продаде Тик-Ток или да се соочи со забрана на американскиот пазар.

Оваа продажба мора да се случи во рок од 9 месеци или 1 година доколку Бајден се согласи да го искористи продолжувањето од 90 дена.

Тик-Ток веќе вети дека ќе се бори против мерката.

Загриженоста за потенцијалниот ризик за националната безбедност лежи во фактот што кинеските закони ѝ дозволуваат на владата да бара податоци од компаниите, што може да доведе до загрозување на приватноста на американските корисници.

Иако Тик-Ток тврди дека податоците на американските корисници не се наоѓаат во Кина, туку во Сингапур, постои страв дека кинеската влада би можела да манипулира со платформата.

„Овој неуставен закон значи забрана за Тик-Ток и ние ќе одиме на суд да го оспориме. Ова ќе уништи 7 милиони бизниси и ќе им се одземе гласот на 170 милиони Американци“, соопшти Тик-Ток.

Извршниот директор на Тик-Ток го нарече ова „разочарувачка одлука“ и ја повтори посветеноста на компанијата правно да го оспори законот.