Државата им дава нов рок на граѓаните кои користат државен или општествен стан да го откупат, да го пренесат од починат родител или да го земат под закуп. Доколку не поднесат барање и не потпишат нов договор по рокот ќе треба да го напуштат станот. Ова го предвидуваат измените на Законот за домување, кои се доставени до Собранието и за кои се предлага да се донесат по скратена постапка.

Рокот за поднесување на барање е 31 декември 2027 година.

Право да поднесат барање за докуп на станот, промена на сопственоста, како и за закуп имаат граѓаните кои живеат во објекти доделени од државата по разни основи, како што се експропријација на имот, уривање на станбени згради или поради тоа што нивните претходни домови биле руинирани и склони кон паѓање. Тие треба да имаат договор за времено користење на станот потпишан пред 16 мај 1998 година. Тие ќе можат да поднесат барање за откуп на станот, да го пренесат правот на користење или да побараат да го земат станот под закуп.

Со овие измени на законот се опфатени и корисниците на општествени станови кои не поднеле барање за откуп или закуп на станот до 31 декември 2024 година.

Новина која ја носат овие измени на законот е тоа што корисниците на државни и општествени станови се категоризираат според нивните материјални можности, односно според остварените приходи во нивното заедничко домаќинство.

Тие се поделени во 4 групи – лица во социјален ризик, односно лицата кои примаат социјална помош или постојана парична помош, лица со ниски приходи – чијшто вкупен приход во заедничкото домаќинство е максимум една и пол просечна нето-плата (според последниот објавен податок од Државниот завод за статистика), лица со просечни приходи – со вкупен приход во заедничкото домаќинство кој изнесува меѓу една и пол просечна нето-плата и две и пол просечни нето плати и лица со високи приходи – со вкупен приход во заедничкото домаќинство кој изнесува над две и пол просечни нето-плати.

Оваа поделба директно го диктира и начинот на кој тие ќе го решаваат своето станбено прашање.

Граѓаните кои спаѓаат во категоријата на лица во социјален ризик ќе можат да поднесат барање само за закуп на станот, додека останатите три категории имаат право на закуп и на откуп на станот.

Измените овозможуваат и лицата кои првично ќе склучат договори за закуп со надлежното правно лице, подоцна да поднесат барање и за целосен откуп на станот, со што трајно се заокружува процесот на приватизација на овој станбен фонд.

Предлог-законот опфаќа и специфични случаи на граѓани кои поседуваат акти или договори за времено користење издадени пред 16 мај 1998 година. На овие лица исто така им се овозможува да го остварат правото на откуп или закуп на станот.

Граѓаните кои користат општествени или државни станови по разни основи кои нема да поднесат никакво барање до надлежните органи до 31 декември 2027 година, прво ќе бидат потсетени дека треба да го решат статусот, а потоа ќе бидат иселени.

„Лицето кое нема да поднесе барање до 31 декември 2027 година, а истото користи стан кој се води во единствената евиденција на станбениот простор, правното лице писмено ќе го извести дека е должно заклучно со 31 март 2028 година да поднесе барање за закуп на стан или барање за откуп на стан. Доколку лицето не поднесе барање по истекот на овој рок истото ќе биде присилно иселено“, пишува во предложените измени на законот.

За да не се случи да бидат иселени лица кои веќе поднеле барање за решавање на статусот на станот, органот надлежен за вршење на работите од станбено-комуналната област кај кој се поднесуваат барањата, ќе го извести АД за изградба и стопанисување со станбен простор и со деловен простор за лицата кои поднеле барање до 31 декември 2027 година.

Законот ги уредува и критериумите и документите кои треба да ги поднесат корисниците на становите и роковите од кои треба да бидат комплетирана документацијата, како и утврдувањето на износот за докуп на станот и износот на закупнината.

Така примателите на социјална или парична помош нема да плаќаат закупнина додека се корисници на овие права. Останатите лица кои ќе го остварат правото на закуп ќе плаќаат закуп во висина од 25 денари по квадратен метар до 190 денари по квадратен метар, зависно од нивниот семеен приход.

Законот предвидува лицата кои имаат заостанат долг за закупнини да го платат долгот пред да потпишат нов договор за закуп или откуп на станот.

Лицата кои го оствариле правото на закуп на станот ќе треба во рок од 15 дена да потпишат договор за закуп, а ако не го сторат тоа ќе треба да го напуштат станот.

Оние пак кои ќе потпишат договор за откуп на станот зависно од категоризацијата според остварените приходи ќе треба да платат минимално учество од 5% до 30% од вкупната вредност на станот, со рок на отплата за сите од максимум 30 години и фиксна каматна стапка од 4% на годишно ниво.

Вредноста на станот се определува согласно со Уредбата за методологија за утврдување на вредноста на станот.

Средствата остварени од продажбата на становите согласно со одредбите на овој член ќе се уплаќаат на посебна наменска сметка, која за оваа намена ќе ја отвори АД за изградба и стопанисување со станбен простор и со деловен простор, а парите од оваа сметка ќе бидат наменети исклучиво за изградба на нови станови во државна сопственост.

Според официјалните податоци и законските регулативи во Македонија, бројот на преостанати општествени и социјални станови кои не се откупени и се користат под закуп изнесува вкупно 879 општествени станови.Процесот на приватизација (откуп) на некогашните станови во општествена сопственост трае веќе со децении, а за преостанатите корисници кои не успеаја или немаа правна документација да ги откупат, статусот беше регулиран преку договори за закуп со Министерството за транспорт и АД за изградба и стопанисување со станбен и деловен простор (АДИССДП).

Под закуп има 372 станови во Скопје, во Битола (100 станови), Струмица (86), Прилеп (84), Кичево (22),Охрид (21), а остатокот е распределен во помал број низ другите градови.

The post НОВ РОК ЗА ЗАКУП ИЛИ ЗА ОТКУП НА ДРЖАВНИТЕ И ОПШТЕСТВЕНИТЕ СТАНОВИ Корисниците ќе треба да потпишат нов договор или да се иселат appeared first on plusinfo.mk.

Падот на вредноста на доларот во однос на еврото на најниско ниво во последните два месеца не влијае директно на девизниот курс на денарот девизните и златните резерви, но може да влијае на увозниците, извозниците, цените на енергијата и во однос на дополнителните трошоци за задолжување.

Ова за Плусинфо го тврдат од Народна банка од каде што додаваат дека промените кај вредноста на доларот речиси и не се чувствуваат, бидејќи поголемиот дел од економската активност се одвива во евра со исклучоци на увоз на стоки потребни за компаниите кои се плаќаат во долари и извоз кој се пресметува во долари. Но големата слика е дека влијанието на падот на вредноста на доларот е незначително во сите сегменти.

Доларот доживува најголем пад во однос на европската валута

Индексот на доларот, кој ја мери неговата вредност во однос на кошница од шест водечки светски валути, се спушти под 99 поени.

Според податоците од валутниот пазар, еврото денеска вреди околу 1,167 долари. Во текот на последните 7 дена, еврото во однос на доларот се движеше помеѓу 1,1573 и 1,1688. Просекот беше 1,1643 долари, додека во текот на последните 30 дена, EUR во однос на USD се движеше помеѓу 1,1369 и 1,1688. Просекот беше 1,1539 долари.

Најважно за Македонија е односот на денарот кон двете светски валути

Македонија има фиксен курс на денарот кон еврото, но ја следи политиката на Европската централна банка во однос на каматите. Но, како и секоја централна банка ги следи и одлуките на Американската федерална резерва, не само поради глобалните финансиски трендови, туку и поради портфолио инвестициите што доаѓаат во Македонија.

Денеска, според средниот курс на Народна банка, 1 евро чини 61,49 денари, а 1 долар чини 52,72 денари.

Од Народна банка велат дека слабеењето на американскиот долар во однос на денарот би имало ограничен директен ефект врз македонската економија, имајќи предвид дека изложеноста на доларот е релативно мала.

– За домашните извозници коишто го наплаќаат својот извоз во американски долари, послабиот американски долар би значел пониска денарска противвредност на остварените приходи. Од друга страна, позитивен ефект би имале увозниците коишто увозот го плаќаат во долари, бидејќи за истата вредност на увезената стока би платиле помалку денари. Сличен позитивен ефект би имале и економските субјекти со обврски по основ на надворешен долг во долари, бидејќи се намалува денарската противвредност на долгот и неговата отплата – објаснуваат од Народна банка.

Сепак, додаваат оттаму значењето на овие ефекти за македонската економија е ограничено.

– Според последните расположливи податоци за трговската размена со странство според фактурирана валута, во 2024 година (податоци на Државна статистика), само 5,5% од вкупниот извоз е фактуриран (извезен) во американски долари, додека учеството на увезените добра во долари изнесува 9,3% од вкупниот увоз на стоки. Дополнително, во 2025 година, делот од бруто надворешниот долг (податоци на НБРМ) во долари изнесува 7,1% и целосно е на приватниот сектор – 5,5% се однесуваат на останатите сектори во економијата (корпоративниот сектор), додека останатите 1,6% се меѓукомпаниски долг. Резимирано, директните ефекти од падот на доларот во однос на домашната валута врз надворешнотрговската размена и надворешниот долг би биле мали и ограничени – велат од НБ.

Како ослабениот долар влијае врз девизните и златните резерви?

Според Народна банка, намалувањето на вредноста на мериканскиот долар има незначително влијание од аспект на вреднување на делот од девизните резерви деноминиран во оваа валута.

– Во согласност со примената на монетарната стратегија на таргетирање на номиналниот девизен курс, еврото има доминантно учество во девизните резерви. Оттука, намалувањето на вредноста на доларот има незначително влијание од аспект на вреднување на делот од девизните резерви деноминиран во оваа валута. Од друга страна, цената на златото, којашто најчесто се изразува во долари вообичаено се движи во спротивна насока од доларот, односно цената на златото има тенденција да расте во услови кога вредноста на американската валута се намалува, или депрецира. Токму поради оваа негативна врска помеѓу цената на златото и вредноста на доларот, вообичаено ограничени се влијанијата од намалувањето на вредноста на доларот врз вреднувањето на девизните резерви и тие на нето-основа се најчесто позитивни со оглед дека произлегуваат од доминантниот придонес на повисоката пазарна цена на златото – велат од Народна банка.

Блискиот Исток ја комплицира ситуацијата

На глобално ниво инвеститорите промената на вредноста на доларот и еврото, очекуваат да го видат на одлуките за каматните стапки на централните банки на САД и на ЕУ. Покрај различните очекувања за дејствувањето на ЕЦБ и ФЕД, односот помеѓу еврото и доларот е силно под влијание на геополитичките тензии, првенствено поради настаните на Блискиот Исток.

Ескалацијата на конфликтот ги зголемува очекувањата за порастот на цените на нафтата и инфлацијата, како во САД, така и во Еврозоната. Ова потоа влијае на одлуките на централните банки и однесувањето на инвеститорите на валутните пазари.

Според очекувањата на пазарите, Европската централна банка би можела да ја зголеми референтната каматна стапка уште еднаш до крајот на годината. Федералните резерви засега се спротивставуваат на понатамошните зголемувања, иако нејзината референтна стапка е веќе повисока од онаа на ЕЦБ.

Народна банка во тој однос води претпазлива политика која во изминатиот период најчесто ги имала предвид и одлуките на ЕЦБ.

Зголемена неизвесност укажува и растот на приносите на долгорочните државни обврзници на големите економии што влијае и на трошоците на нивите задолжувања. Засега инвеститорите очекуваат дека периодот на повисоки каматни стапки и глобална неизвесност би можел да трае подолго од претходно предвиденото.

Дали ќе има промени кај кредитите во евра и во долари?

Од Народна банка смируваат дека промените во односот евро – долар и новите одлуки на ЕЦБ и ФЕД ќе имаат незначително влијание на кредитите во долари, но речиси никакво влијание на кредитите земени во евра.

– Материјализацијата на ефектот од промената на девизниот курс на денарот во однос на американскиот долар би била незначителна поради тоа што кредитите кон нефинансискиот сектор (претпријатија и домаќинства) со доларска компонента (во долари или во денари со доларска клаузула) учествуваат со само 0,2% во вкупните кредити со валутна компонента. Притоа, намалената вредност на доларот во однос на денарот ги става должниците во поповолна положба затоа што нивниот долг изразен во денари е намален. Во однос на кредитите со евро-компонента, коишто имаат преовладувачко учество во вкупните кредити со валутна компонента (од преку 99%), ваквите промени се ограничени поради тоа што Народната банка води политика на одржување стабилен девизен курс на денарот во однос на еврото – велат од Народна банка.

The post ЕВРОТО ПОРАСНА ВО ОДНОС НА ДОЛАРОТ Што значи тоа за македонскиот увоз, извоз и за девизните резерви? appeared first on plusinfo.mk.

Македонските превозници најавуваат протест пред делегацијата на Европската Унија следниот понеделник за да потсетат дека се уште не е решен проблемот со ограничувањето на престојот на професионалните возачи во Шенген-зоната (90 дена во рамки на 180 дена).

Од „Макам-транс“ информираат дека протестот е дел од договорот на балканските превозници одржан на 21 август и ќе се одржи еден ден пред официјалната средба на комисијата на ЕУ која треба да понуди конечно решение на проблемот.

Од „Макам-транс“ посочуваат дека Европската Унија во изминатите седум месеци не покажала доволно волја за решавање на проблемот, иако во визната стратегија професионалните возачи се препознаени како лица кои вршат професионална дејност.

Протестот во Скопје ќе се одржи на 31 август пред седиштето на Делегацијата на Европската Унија, во периодот од 12 до 14 часот, со учество на најмалку 20 возила и поголем број превозници, возачи и други вработени од различни градови во државата.

Истиот ден и во истиот период вакви протести ќе се одржат и во Србија, Босна и Херцеговина и во Црна Гора.

Од „Макам-транс“ велат дека доколку на состанокот не биде постигнато преодно решение, се предлага нов протест на граничните премини, кој би започнал на 14 септември. За неговото одржување потребна е согласност од превозниците во секоја од земјите, како и одобрение од надлежните институции.

Според најавите, овој протест би можел да биде сличен на оној од јануари годинава и да трае подолго од 10 дена. Асоцијациите од четирите држави во моментов собираат поддршка од превозниците за неговата организација.

Во случај на протест на граничните премини, превозниците планираат да побараат да биде овозможено непречено минување на стоки од особен интерес за државата и граѓаните. Меѓу нив се наведуваат нафтата и нафтените деривати, јагленот, потребните орудија и препарати за општините и јавните претпријатија, муницијата и други стоки.

Напоредно со процесот кој го водат превозниците за решавање на проблемот и државата работи на решавање на проблемот. Во изминатиот период министерот за транспорт и врски Александар Николоски информираше дека државата самостојно се обидува да го реши проблемот со превозницитe преку билатерални договори за непречено движење на превозниците. Такви договори веќе се склучени со Хрватска, Швајцарија и Романија, а се очекува да се склучат и со Австрија, Унгарија, Германија и Словенија, со што ќе бидат покриени земјите каде што македонските превозници најчесто транзитираат.

Билјана Муратовска од „Макам-Транс“ вели дека е добро што проблемот се решава и билатерално, со секоја држава, но додава дека процесот е многу бавен, а проблемите на возачите на превозниците веќе кулминирал.

– Само да потсетам дека Хрватска, која прва донесеа измени на законот за странци пред речиси 7 месеци, уште не ги донела подзаконските акти. Што значи дека процесот уште ќе трае, а тоа не е решение за возачите на кои веќе им се пресметува колку време престојувале во Шенген зоната. Повеќето држави од средината на август ги пресметуваат деновите и кај електронската проверка се враќаат до 10 април кога преќутно беше дозволено возачите да престојуваат во зоната. Се бројат и печатите во пасошите. Тоа значи дека во септември и октомври проблемот ќе стане многу видлив бидејќи ќе има масовни застои во транспортот поради недостиг на возачи. Најголемиот дел од возачите нема да можат да возат во Шенген зоната – вели Муратовска.

Таа смета дека Европската Унија има активно решение на проблемот со издавање на професионални визи за турските возачи, но се сомнева дека Унијата се уште не сака да го примени.

– Решение Унијата има бидејќи на турските возачи им се издаваат професионали визи. Токму тоа е решение и за останатите возачи. Само треба Унијата да договори како тоа ќе го примени и за нашите возачи – вели Муратовска.

The post ЗОШТО ЕУ ИМ ДАВА ПРОФЕСИОНАЛНИ ВИЗИ САМО НА ТУРСКИТЕ ВОЗАЧИ? Превозниците ќе протестираат пред делегацијата на ЕУ во Скопје appeared first on plusinfo.mk.

Во Германија главно се прифаќаат дипломите и стручните квалификации од Македонија, но за одредени струки за самостојно работење потребно е да се добијат локални лиценци, вели Зоран Кочоски од Агенцијата Коузон преку која се реализираат дел од вработувањата на македонските државјани во Германија.

Според официјалната статистика, германските власти лани прифатиле 86.600 барања за признавање на странски квалификации или 10% повеќе од 2024 година. Нема точен податок колку од овие барања биле на македонски државјани.

Кочоски вели дека иако Германија генерално ги прифаќа македонските стручни квалификации и дипломи, годинава мали се шансите за вработување бидејќи потребата за странски работници таму е драстично намалена поради големиот пад на економската активност последните години.

– Некаде од 2010 година кога во земјава се воведе дуално образование Германија почна да ги признава стручните квалификации на нашите граѓани, но за самостојна работа како електричар, водоинсталатер или да речеме како лекар, треба да се добие локална лиценца со потврдување на знаењето – вели Кочоски.

При признавањето на дипломата, додава тој, Германија прави споредба дали образованието во странската држава од која доаѓаат работниците е еквивалентно на германскиот образовен процес.

Но, за да се добие работа во Германија, објаснува тој, не е потребна само диплома или стручна квалификација, работодавачите повеќе инсистираат на работно искуство во струката и умешноста најефикасно да се извршат работните задачи на работното место.

– Дипломата е само да се вработите на некое место. Потоа се врши валидација на договорот меѓу странскиот работник и работодавачот за што е потребна легализација на дипломата која генерално се прифаќа, но ако се потребни посебни лиценци треба и да се добијат од локалните власти. За германските работодавачи покрај оваа процедура најважно, сепак, е искуството на тој што го вработуваат и колку тој е умешен во работата – вели Кочоски.

Германското Министерство за образование го олесни процесот на сертифицирање и преку посебна листа на професии за кои не се бара посебно признавање на дипломите и квалификациите.

Но, и покрај олеснувањата во однос на квалификациите и дипломите, во Германија годинава тешко се доаѓа до вработување, бидејќи се намалува побарувачката за странски работници.

– Германската економија е во рецесија и не се знае колку таа ќе трае. Дневно се затвораат стотици фирми, а работодавачите кои вработуваат прво ги вработуваат тамошните невработени, што е логично, бидејќи и да ги преквалификуваат имаат пониски трошоци и побрзо доаѓаат до работници, отколку да чекаат странски работници за кои сега се чека и до 6 месеци – објаснува Кочоски.

Негова пресметка е дека, ако досега во Германија се вработувале до 30.000 Балканци, годинава бројката едвај ќе достигне 12.000 работници.

– Тоа го чувствуваме и ние како агенција. Нашите партнери во Германија го намалија или откажаа вработувањето на македонски државјани, бидејќи е намалена побарувачката на странски работници од германските компании. Ако изминатите години, на пример, сме испраќале по повеќе од 600 работници, сега бројката се сведува на 200. Тоа говори дека кризата во германската економија е голема – вели Кочоски.

Засега, додава тој, најмногу се бараат возачи на камиони, но и за нив се поставени тешки услови за вработување.

Германија годинава значително ја скрати квотата за работници од Западен Балкан од 50.000 на 25.000 лица, враќајќи го системот на старото ниво од пред две години.

Од 2016 година, балканските држави – Македонија, Србија, Босна и Херцеговина, Албанија, Косово и Црна Гора – добија можност за легален влез на нискоквалификувани работници во Германија. Сепак, со најновите измени, можноста за вработување на луѓе од Балканот значително е намалена.

The post СЀ ПОМАЛКУ РАБОТНИЦИ ОД МАКЕДОНИЈА ЗАМИНУВААТ ВО ГЕРМАНИЈА Најмногу се бараат возачи на камиони appeared first on plusinfo.mk.

Министерката за финансии Гордана Димитриеска-Кочоска вели дека официјално не е разговарано, ниту е донесена некаква конечна одлука за спроведување некаква пензиска реформа, иако се размислува во таа насока.

Таа најави дека ММФ и Светка банка ќе прават анализа на пензискиот систем и ќе дадат одредени препораки, кои потоа ќе се разгледуваат без да се има обврска да се прифатат и  спроведат.

– ММФ и Светска банка немаат направено комплетно анализите во државата. Сега побараа и ние се согласивме да направат анализа на пензискиот фонд, по што ќе дадат одредени препорки кои не значи дека ќе бидат прифатени од Владата. Ќе имаме анализа на прв, втор столб, да видиме што се случува таму и какви препораки ќе добиеме. Веројатно ќе кажат да ја зголемиме старосната граница за пензионирање, што е очекувано нешто, а дали Владата ќе прифати или не, ќе видиме. Но, да почекаме да ги направат анализите- рече таа.

Министерката откри и дека од она што го кажале од ММФ засега проблемите за пензискиот фонд произлегуваат од демографските карактеристики на земјата

– ММФ дава некои податоци дека најголемиот проблем со пензискиот фонд, генерално, ќе биде проблемот со демографијата. Премиерот има одредени размислувања околу тоа. Се друго на среден рок ќе се стабилизира, но проблемот со демографијата е сериозен. Ако нема подобрувања, тогаш на подолг рок ќе има сигурно негативни влијанија – рече Димитриеска -Кочоска.

Таа очекува една од препораките на меѓународните финансиски институции да биде зголемување на старосната граница за пензионирање, но вели дека тоа не значи автоматски и промена на законските решенија.

Нејзино, лично мислење, како што рече, за ова прашање е да не се  зголемува границата на пензионирање, туку да им се остави на идните пензионери сами да изберат дали ќе продолжат да работат.

– Во однос на старосната граница лично сметам дека треба да се остави право на избор, да си останат годините и да се даде можност кој сака да продолжи. Треба да се даде опција на секого да одлучува што ќе прави понатаму, бидејќи има професии кои се тешки каде што работниците очекуваат побрзо да одат во пензија и полесни професии каде што тие можат подолго да работат – рече Димитриеска-Кочоска.

Во однос на исплатите од првиот во вториот пензиски  столб, министерката, уверуваше дека во буџетот веќе е испланиран вкупен трансфер од 19,6 милијарди денари за годинава.

The post ММФ И СВЕТСКА БАНКА ЌЕ ПРАВАТ АНАЛИЗА НА ПЕНЗИСКИОТ СИСТЕМ Димитриеска-Кочоска вели дека засега како главен проблем е посочен демографскиот appeared first on plusinfo.mk.

Во јуни е постигнат нов рекорд во наплатата на месечните царински давачки кога е остварена наплата повисока од 20 милиони евра од наплатеното лани, изјави директорот на Царинската управа, Бобан Николовски, на прес-конференцијата за отчетот на министерката за финансии Гордана Димитриеска -Кочоска.

Според него, одлична е наплатата и во периодот јануари – јуни.

-Во јуни поставиме нов рекорд од постоењето на Царинската управа во однос на наплатата на царинските давачки. Поранешниот рекорд на едномесечна наплата на царински давачки беше 12,4 милијарди денари, а сега, во јуни, заклучно со вчера, изнесува 12,8 милијарди денари со што постигнавме нова рекордна наплата на вкупни царински давачки месечно. И кумулативно одлично напредуваме. Во првите 6 месеци оваа година, споредено со истиот период лани, имаме скоро 50 милиони евра поголема наплата, што значи дека сме на вистински пат. Само во јуни, во споредба со јуни 2025-та, наплатата е за нешто над 20 милиони евра повеќе – рече Николоски кој присуствуваше на прес-конференцијата за отчет на министерката за финансии.

The post РЕКОРДНА НАПЛАТА НА ЦАРИНСКИТЕ ДАВАЧКИ ВО ЈУНИ Николоски вели дека скокнала за 20 милиони евра во однос на ланскиот јуни appeared first on plusinfo.mk.

Министерката за финансии Гордана Димитриеска-Кочоска оцени дека јавните финансии се стабилизирани во изминатите две години и дека јавниот долг во првиот квартал од 2026 година изнесува 58,9% од БДП, што, според неа, е пониско од проекциите при преземањето на мандатот и најави дека инвстициите ќе останат приорите и во преостанатиот дел од мандатот.

На отчетната прес-конференција, таа истакна дека Владата го променила пристапот кон јавните инвестиции преку формирањето на Комитет за јавни инвестиции, со цел средствата да се насочуваат кон подготвени и одржливи проекти.

Според министерката, во изминатиот период се зголемила реализацијата на капиталните инвестиции во патната и железничката инфраструктура, енергетиката, образованието, комуналните проекти, како и во одбраната и безбедноста.

– Денес јавните средства се насочуваат кон проекти кои се подготвени, оправдани и носат најголема корист за државата – рече Димитриеска Кочоска.

Во однос на подобрување на бизнис климата и извозот, таа рече дека се усогласени царинските стапки за 70 суровини и репроматеријали со правилата на Европската Унија, а обезбедени се и 250 милиони евра поволни кредити за домашните компании, како и исто толку средства за капитални проекти во општините.

Таа информираше дека Министерството работи на измени на даночните закони и нов Царински закон, како и на дигитализација на финансиските процеси.

Според неа, значајно е и тоа што е воведен и системот OECD Pillar 2, со кој се воведува глобален минимален данок од 15% за големите мултинационални компании.

-Овој систем предвидува 15% минимален ефективен данок за компании со добивка над 750 милиони евра и обезбедува директен буџетски приход и голем структурен ефект во насока на спречување даночна конкуренција – рече министерката.

Министерката за финансии рече и дека е задоволна од приливите од даноците и царинските давачи кои, како што рече, се повисоки од планот и очекувањата.

Во делот на контролата, таа рече дека во изминатите две години биле одземени пет дозволи за работа на финансиски друштва, изречени казни на 18 друштва и преземени повеќе мерки за отстранување на неправилности.

Осврнувајќи се на пазарот на капитал, таа истакна дека третата емисија на граѓански обврзници привлекла 1.543 инвеститори кои вложиле повеќе од 33 милиони евра, што, според неа, е показател за довербата во економските политики.

Димитриеска-Кочоска најави дека ќе продолжат фискалната консолидација, дигитализацијата на јавните финансии, борбата против сивата економија и реформите насочени кон подобрување на деловната клима.

Во однос на Реформската агенда 2024–2027, министерката посочи дека Министерството за финансии реализирало осум од вкупно 22 исполнети реформски чекори, што придонело за одобрување на 142,1 милион евра средства од Планот за раст на Европската Унија.

-Реализиравме осум од вкупно 22-те чекори што досега ги исполни државата, односно 36% од сите исполнети чекори се на МФ, со што придонесовме за одобрување на 142,1 милион евра средства во рамки на Планот за раст на Европската Унија – рече Димитриеска- Кочоска и додаде дека овие реформи не се само исполнување на европските критериуми, туку создаваат поефикасни институции, подобро управување со јавните средства и подобри услови за економски раст и инвестиции.

Во областа на управувањето со средствата од ЕУ, комплетирана е, рече, институционалната рамка за спроведување на ИПА III повеќегодишните оперативни програми и обезбедени се 160 милиони евра неповратни грант средства, преку модалитетот на индиректно управување за ИПА. Дополнително, воспоставено е долгорочно решение за задржување и мотивација на кадарот ангажиран во управувањето со ИПА фондовите, преку обезбеден додаток на плата од 15% до 30% на основната плата.

-Едновремено обезбедивме брзо надминување на прекинот на исплатите во рамки на ИПАРД III преку спроведена серија на мерки и активности од страна на Националните структури и постигнавме рекордно ниво на искористеност на средствата, со 11% реализирани исплати и 29% склучени договори, што ја позиционира државата меѓу најуспешните корисници на ИПАРД средствата – рече Димитриеска-Кочоска.

The post ИНВЕСТИЦИИТЕ ОСТАНУВААТ ГЛАВЕН ПРИОРИТЕT Димитриеска-Кочоска кажа дека за две години се остварени 8 чекори од реформската агенда appeared first on plusinfo.mk.

Превозниците од Македонија, Србија, Црна Гора и Босна и Херцеговина денеска официјално ќе испратат писмо до Европската комисија во кое бараат до 10 август да понуди прифатливо решение за проблемот со ограничувањата за престој на професионални возачи во Шенген зоната.

Ова е одлучено на вчерашната средба на претставниците на превозниците од четирите земји.
Писмото ќе биде испратено и до владите на четирите земји, извозните компании и стопанските комори со цел да се забрза процесот на решавање на проблемот.

– Се согласивме дека во овој момент нема да преземеме никакви конкретни активности, но дека од денешниот состанок ќе испратиме писмо до Европската комисија со рок до 10 август за да се најде прифатливо, ако не конечно, тогаш барем привремено решение за нашите возачи и транспортни компании да можат да работат без пречки – изјави претседателот на Меѓународната асоцијација за транспортен бизнис, Неџо Мандиќ по средбата во Белград.

Тој потсети дека проблемот стана уште поизразен по проширувањето на Шенген зоната кон Хрватска, Романија и Бугарија, поради што земјите од регионот се практично целосно опкружени со земји-членки на Шенген, па возачите голем дел од своето работно време го поминуваат во таа зона.

– Со оглед на тоа што сега има 33 земји во Шенген, тоа значи дека на никаков начин не можеме да прифатиме дека транзитот значи престој. Ако возиме кон земја или дури и кон земја што не е членка на ЕУ, имено Обединетото Кралство, ние сме во Шенген цело време и не престојуваме во ниту еден момент, бидејќи сме или во камионот или на паркингот додека правиме пауза, но тие денови брзо се трошат до моментот кога ќе пристигнеме и ќе се вратиме, па практично се покажува дека престојуваме 90 дена. Сосема е неточно дека професионалец не може да си ја заврши работата – заклучи Мандиќ.

Тој додаде дека превозниците на ваков начин сакаат да одбегнат протести и најави нова средба пред 10 август, ако дотогаш нема решение.

– Во тој случај, ќе објавиме нови конкретни мерки за забрзување на решавањето на овој проблем – рече Мандиќ, без да прецизира кои мерки би можеле да се преземат.

Според, превозниците 10 август е значаен бидејќи тогаш завршуваат 90 дена за престој на возачите во Шенген зоната по ресетирањето на деновите на 10 април по одлука на Комисијата. На 10 април на сите возачи на превозните компании кои возат во Шенген зоната деновите на престој им се вратија на нула.

-Тоа значи дека по овој датум повторно ќе се се јават проблемите со престојот на возачите во Шенген зоната, односно ќе почне надминувањето на границата од 90 дена за престој. Ќе се вратат повторно истите проблеми со опомени, депортации и слично – вели Билјана Муратовска од Макам-транс.

Муратовска додава дека напоредно со ова нашето Министерство за транспорт води билатерални преговори со повеќе земји за да им овозможи на нашите возачи да можат да се движат непречено.

-Хрватска веќе прифати да помогне, доднсе измени на законот за странци с кој се опфатени и нашите возачи, но се уште не се донесени некои подзаконски акти. Значи не е во функција. Има преговори и со Романија, Австрија и други земји. Но нас ни треба трајно решение кое ќе ги опфати сите 33 земји вод Шенген зоната. Решението е во рацете на Европската комисија, а ние сега се трудиме да ги обновиме разговорите тоа да се донесе побрзо – вели Муратовска.

Затоа вели таа треба во периодот до 10 август да се лобира во ЕК да добиеме трајно решение.

-Тоа ќе го постигнеме со заедничко дејствување на сите влади од регионот, компаниите извознички, странските инвеститори и стопанските здруженија, зашто овој проблем не е само на превозниците, туку на економиите на овие земји – вели таа.

Превозниците велат дека сегашното правило според кое државјаните на трети земји можат да останат во Шенген зоната максимум 90 дена во период од 180 дена не е прилагодено за професионалните возачи.
Според анализата која ја направиле нивните здруженија на возачите им се потребни околу 130 дена работа во период од 180 дена за непречено извршување на меѓународен транспорт.

The post КАМИОНЏИИТЕ СО УЛТИМАТУМ ДО БРИСЕЛ Бараат решение на проблемот со престој во Шенген зоната до 10 август appeared first on plusinfo.mk.

Акционерско друштво за пренос на електрична енергија и управување со електроенергетскиот систем, МЕПСО  доцни со реализацијата на инвестициите за изградба и реконструкција на делекуводи, а за дел од нив плаќа казни за неповлечени пари од кредитите земени од странски банки, бидејќи не почнал да ги гради. Друштвото исто така нема целосна сопственост на имотот кој го управува, а има и  слабости во сајбер-безбедноста и спорни вработувања.

Ова покрај другото го наведува Државниот ревизор во извештајот за работењето на МЕПСО во 2024 година.

Заклучно со 2024 година, за земените заеми, платени се провизии за одобрување и неповлечени средства, како и камати во вкупен износ од 8.996.052 евра, што претставува 8,8% од вкупниот износ на одобрени заеми.

АД МЕПСО  користи повеќе кредитни линии од меѓународни финансиски институции за финансирање на инвестиции, при што значителен дел од одобрените средства не е повлечен, што резултира со дополнителни трошоци за провизии и камати.

Вкупниот износ на одобрени тековни заеми изнесува 102.400.000 евра, од кои 52% или 53.434.992 евра не се повлечени, за што во 2024 година платена е провизија во износ од 245.629 евра (2.633.953 евра за периодот откако се одобрени заемите, се до крајот на 2025 година) .

„Ненавременото користење на заемите го зголемува финансискиот товар и ја забавува реализацијата на стратешките проекти за електропреносниот систем“, констатираат ревизорите.

Ревизорите утврдиле дека  степенот на  реализација на инвестициите во МЕПСО се движи од 9% до 62% .

Кај дел од проектите постои зголемување на вредноста на склучените договори, пролонгирање на рокот за нивната реализација, а два договори кои делумно биле реализирани се раскинати. Kај три проекти има зголемување на вредноста на првично склучените договори, при што најголемото зголемување од 51% (1.481.657 евра) е кај проектот „Ревитализација на 110kV далекувод Скопје – Велес” чиј износ по зголемувањето изнесува вкупно 4.393.609 евра, додека најголемото пролонгирањето од пет години и осум месеци е кај проектот „Реконструкција на 110kV Далекуводот Битола – Прилеп”.

Истовремено за проектот „Изградба на далекувод 110 kV  Валандово – Милетково”, иако во јуни 2024 година одобрен е заем од ЕБРД во износ од 26.400.000 евра, сè уште не се започнати активности за изградба, поради што за одобрување на заемот и провизија за неповлечени средства платени се 155.672 евра (22.205 евра во 2024 година).

„Овие состојби негативно влијаат врз модернизацијата и сигурноста на преносната мрежа и упатуваат на потреба од поефикасно управување со инвестициските проекти“, се наведува во извештајот.

АД МЕПСО давал заеми на други државни компании иако тоа не е негова основна дејност, па така сега побарува приближно 9.594,652 евра и истите се повеќе од 10 пати зголемени во однос на 2020 година.

Дел од побарувањата на друштвото (12%) се постари од три години , при што најголем дел од нив се побарувања по основ на предизвикан дебаланс од страна на правни лица – трговци на електрична енергија (БОС), како и на побарувања за користење на прекугранични преносни капацитети.

„Имајќи ја во предвид старосна структура на побарувањата, како и неизвесноста на долготрајните извршни постапки, истакнуваме дека постои неизвесност во однос на нивната наплата“, велат ревизорите.

Дваесет години по приватизацијата на поранешното ЕСМ, МЕПСО сѐ уште, не ја решило сопственоста на  33 трафостаници кои се водат како заедничка сопственост со приватната  ЕВН Македонија.

Сопственоста на овие трафостаници , според ревизорите е запишана само на ЕВН Македонија или се води постапка за преземање.

„Друштвото во повеќе наврати иницирало постапки за решавање на сопственоста на трафостаниците, но таа се уште не е завршена. Во 2025 година формирана е заедничка работна група, која договорила процесот да се реализира во две фази, преку меѓусебен пренос на право на сосопственост (соодветен идеален дел) на трафостаниците запишани на име на секое од друштвата, додека за неизложените трафостаници утврдување на фактичката состојба и конечно уредување на сопственичките права продолжува“ , наведуваат ревизорите.

Во МЕПСО и во 2024 година ја нема регулирано сопственоста на и на  останатата  електропреносна инфраструктура, вклучително и земјиштето, а за дел од имотот нема точна сметководствена  евиденција.

Преносната мрежа на АД МЕПСО Скопје интегрира 112 далекуводи, при што за 53 далекуводи запишано е правото на сопственост во Агенцијата за катастар на недвижности, додека за 59 далекуводи друштвото не располага со имотни листови .

„За овој имот отпочнати се постапки за утврдување на правниот статус, но истите се сложени и долготрајни поради големиот број локации и нерешените имотно-правни односи, а во одредени случаи не може да се утврди основот за стекнување на правото на сопственост“, велат ревизорите.

Дополнително утврдено е дека со расположливите податоци во воспоставената сметководствена евиденција на далекуводите и трафостаниците (евидентирани се по делови, на различни сметки за градежни објекти, постројки и опрема и со неусогласени називи) не е можно да се потврди нивниот број и вредност.

„ Оваа состојба влијае на висината на тарифата за пренос на електрична енергија, која се утврдува со одлука од страна на РКЕ, а врз основа на сметководствените податоци и финансиски евиденции доставени од страна на АД МЕПСО Скопје“, се наведува во извештајот.

Ревизорите утврдиле и дека кај  65% од нововработените лица (45) утврдени се неправилности во однос на исполнувањето на условите од јавниот оглас и актот за систематизација и распределбата на работните места, а кај дел од нив кратко по вработувањето е извршено прераспределување или унапредување.

Со ревизијата утврдени се и други состојби кои се однесуваат на извршениот попис, расходувани средства, пријавената кражба, реализацијата на Годишната инвестициона програма, начинот на финансирање на синдикалните организации при АД МЕПСО Скопје, отчетноста на ангажираните лица преку авторски договори, начинот на доделување спонзорства и донации и други состојби кои имаат влијание врз работењето на друштвото.

The post МЕПСО ЗЕМАЛ КРЕДИТИ, АМА НЕ ГИ ПОВЛЕКУВАЛ ПАРИТЕ НАВРЕМЕ Заклучно со 2024 година за провизии и за камати друштвото потрошило речиси 9 милиони евра appeared first on plusinfo.mk.

Треба ли да бидат загрижени за висината на пензиите работниците кои се опфатени со вториот пензиски столб, откако премиерот Христијан Мицкоски изјави дека голем дел од корисниците од вториот пензиски столб нема да бидат задоволни од она што ќе го видат на своите сметки и дека се сомнева во очекуваните резултати од реформата на пензискиот систем со која е воведен вториот пензиски столб?

Од Владата велат дека во однос на висината на идните пензии, сите анализи и проценки што се изработуваат имаат за цел да обезбедат долгорочна заштита на интересите на осигурениците и пензионерите, а работни групи континуирано ги следат сите домашни и меѓународни трендови и практики поврзани со одржливоста и развојот на пензиските системи.

Од Агенција за супервизија на капитално финансирано пензиско осигурување (МАПАС) смируваат дека приносите во вториот столб растат, а износот на идните пензии зависи од она што поединците ќе го уплатат во пензискиот систем, годините стаж и низа други критериуми кои влијаат на пресметката на пензијата.

Засега нема најава за пензиска реформа, но има најава за законски измени

– Лично мислам дека голем дел од корисниците на вториот столб нема да бидат задоволни од тоа што ќе го видат на своите сметки. Мислам дека очекувањата кај корисниците се многу поголеми. Убеден сум дека тогаш кога е правена оваа реформа имале добри намери, но, за жал, мислам дека сега нема да ги даде очекуваните резултати кога оваа реформа е правена. Жалам што од денешна перспектива воопшто е влезено во правење на оваа реформа, имајќи предвид дека голем дел од европските земји и членки на Европската Унија имаат само еден столб… Не знам дали очекуваните резултати ќе се добијат. Да бидам попрецизен, сигурен сум дека намерата била добра, но од денешната перспектива загрижен сум дека голем дел од корисниците нема да бидат задоволни – изјави Мицкоски во поткастот „Каде се парите?“.

Мицкоски додаде и дека Владата размислува за пензиски реформи, но засега нема ништо искатализирано што ќе се прави.

Сепак, како што рече, земјава би требало да се врати на едностолбен пензиски систем со оглед на економијата што ја има. Притоа посочи дека земјите со слични економии како нашата – Словенија, Унгарија и Полска имаат едностолбен пензиски систем.

Од Владата, додаваат дека континуирано се следат сите домашни и меѓународни трендови и практики поврзани со одржливоста и развојот на пензиските системи.

– Во рамките на надлежните институции и Министерството се формирани работни тела и експертски комисии, Комисии за реформи во пензискиот систем, кои редовно ги анализираат состојбите, демографските движења и финансиските показатели, со цел навремено да се предложат мерки што ќе обезбедат стабилен и праведен пензиски систем – велат од Владата.

Оттаму додаваат дека во однос на висината на идните пензии, сите анализи и проценки што се изработуваат имаат за цел да обезбедат долгорочна заштита на интересите на осигурениците и на пензионерите.

– Токму затоа институциите внимателно ги следат ефектите од постојните решенија и ги разгледуваат сите можни сценарија, за да се избегнат ситуации во кои граѓаните би биле оштетени или би добивале пониски пензиски примања од очекуваните – велат од Владата.

Но, додека се размислува за тоа каква пензиска реформа ѝ е потребна на земјава, владата во својата програма за годинава веќе има испланирано измени на двата закона кои се однесуваат на вториот пензиски столб – законот за доброволно капитално финансирано пензиско осигурување и законот за задолжително капитално финансирано пензиско осигурување чии предлози треба да бидат готови до крајот на годинава.

Според она што е наведено во Програмата на Владата главно ќе се интервенира во деловите на овие закони кои се однесуваат на инвестирање средствата од придонес во задолжително капитално финансирано пензиско осигурување (втор пензиски столб) со предвидување различни инвестициски портфолија за да се зголемат приносите од инвестиции од кои зависи висината на идните пензии.

Со ова се очекува да се обезбедат различни видови инвестициски портфолија согласно возраста на членовите во задолжително капитално финансираното пензиско осигурување (втор пензиски столб).

Реформи на системот се прават постојано, тврдат од МАПАС

Од Агенцијата за супервизија на капитално финансирано пензиско осигурување велат дека има потреба од реформи во пензиското осигурување, но ако под зборот реформа во пензиското осигурување се подразбираат промени во начинот на пресметување, финансирање или исплата на пензии со цел да се подобри неговото функционирање.

Оттаму додаваат дека институциите во пензискиот систем во континуитет имаат формирано работни групи кои даваат предлози за подобрување на системот и сите се под мониторинг на меѓународни консултанти на Светска Банка.

– Моментално функционираат работни групи за единствен регистар на осигуреници, за подобрувања во пензискиот систем, за воведување систем со повеќе портфолија или мулти-фондови и за исплата на пензии –додаваат од МАПАС.

Реформата во пензиското осигурување е постојана, велат од МАПАС, бидејќи во светот нема држави кои имаат идентични пензиски системи туку секоја земја поединечно се прилагодува на својата демографска структура, општествено-социјална структура, економско-финансиска структура, нивото на развој, висина на бруто производ, финансискиот пазар, човечкиот капитал, нивото на платите и развојот на институциите во системот.

– Комбинациите на овие индикатори работните групи ги анализираат со цел да значајно да се подобрат уплатите на приносите во пензискиот систем, приносот на индивидуалните сметки и видовите на производи за исплата на пензија. Очекувањата се дека ваквите унапредувања дополнително ќе придонесат за подобрување на долгорочните резултати на капитално финансираното пензиско осигурување и за поголема адекватност на идните пензиски примања – велат од МАПАС.

Според податоците и анализите со кои располага МАПАС, средствата во задолжителните пензиски фондови континуирано растат, а приносите остварени во изминатиот период во споредба со голем број на земји од ЕУ и светот со повеќестолбен пензиски систем како нашиот се во рамките на долгорочните очекувања за ваков вид штедење.

Како ќе се пресметуваат идните пензии?

Во однос на идните пензии од МАПАС велат дека е важно да се има предвид дека висината на средствата на индивидуалната сметка зависи од повеќе фактори. Пред сѐ од висината и континуитетот на уплатените придонеси, должината на членството во фондот, како и од остварениот принос од инвестирањето на средствата.

– Оттука, очекувањата на поединечните осигуреници треба да се разгледуваат во контекст на нивната вкупна работна кариера и висината на приходите врз основа на кои се уплаќале придонесите. Доколку придонесите се уплаќале на пониска основица или имало прекин во работниот стаж или лицето покасно почнало да работи или лицето работи за странство, природно е акумулираните средства да бидат пониски, што не е последица на самиот модел на втор столб, туку на нивото на придонесите што биле уплатувани и инвестирани во текот на работниот век – велат од МАПАС.

Од МАПАС велат дека континуирано се врши надзор над работењето на пензиските друштва, управувањето со ризиците, инвестициските стратегии и политики и заштитата на интересите на членовите. Истовремено, редовно се следат приносите на пензиските фондови, структурата на инвестициите и нивната усогласеност со законските ограничувања.

Законски придонесите за пензиско осигурување од 18,8% што ги уплаќа еден осигуреник од својата месечна бруто плата се одвојуваат во износ од 12,8% за Фондот на ПИОСМ и 6% од бруто-плата се уплатува на индивидуалната сметка на членот во приватниот пензискиот фонд.

– Тоа значи дека од уплатата на придонесот на индивидуалната сметка на секој член поединечно и од висината на приносот кој го остварил пензискиот фонд што го избрал членот зависи и висината на очекуваните резултати во моментот на исполнување на условите за пензија. Во таа насока потребно е да се нагласи дека пензискиот систем треба да се оценува како целина. Осигурениците кои се членови на вториот столб остваруваат право на пензија од комбинираниот систем, односно од првиот и вториот столб заедно. Поради тоа, оценката за адекватноста на пензиските примања не може да се темели само на средствата акумулирани во вториот столб, туку на вкупниот пензиски приход што ќе го добива осигуреникот – објаснуваат од МАПАС.

Оттаму појаснуваат дека висината на пензијата на еден работник кој е опфатен со вториот пензиски столб е збир на пензија од првиот и вториот пензиски столб, а доколку има уплати и во третиот столб, може да има пензија и од доброволното пензиско осигурување.

– Под претпоставка дека одреден член од вториот столб ќе исполни услови за старосна пензија, во тој момент Решение за старосна пензија издава Фондот на ПИОМ кој прави пресметка и валоризација за неговите плати во изминатиот период до пензионирање и врз основа на заменските стапки дава пресметка за пензија од прв столб, додека вредноста на пензијата од вториот и третиот столб е врз основа на висината и редовноста на уплатата на придонесите во приватните пензиски фондови и приносот што го остварува пензискиот фонд што го избрал членот на капитално финансирано пензиско осигурување. Значи висината на пензијата за членовите од вториот столб е збир на пензија од првиот и вториот пензиски столб, а доколку има уплати и во третиот столб, може да има пензија и од доброволното пензиско осигурување – објаснуваат од МАПАС.

Што ја определува идната пензија?

Меѓу најзначајните фактори од кои зависи висината на пензијата се: висината на платата и придонесите што се уплатувале во текот на работниот век; должината на периодот на членство во вториот столб; прудентниот начин на инвестирање на средствата; остварениот принос на средствата; возраста при пензионирање; избраниот начин на исплата на средствата согласно закон.

– Поради овие причини, разликите меѓу идните корисници може да бидат значителни и не постои универзална најниска или највисока пензија што може однапред да се утврди. За секој осигуреник висината на средствата и пензиските примања во капитално финансирано пензиско осигурување се пресметуваат индивидуално врз основа на неговите лични податоци, и акумулираните средства на придонеси и принос на индивидуалната сметка на членот – појаснуваат од МАПАС.

Растат парите кои се акумулираат во вториот и во третиот столб

Според податоците од последниот извештај на МАПАС кој се однесува на 2024 година, вкупните средства на задолжителните пензиски фондови забележаа раст од 20,45% и достигнаа 162,85 милијарди денари додека пак вкупните средства на доброволните пензиски фондови забележаа поголем раст во однос на вкупните средства на задолжителните пензиски фондови, односно пораснаа за 21,74% и достигнаа 4,36 милијарди денари. Со тоа, и учеството на вкупните средства на пензиските фондови во вториот и третиот столб во бруто-домашниот производ порасна и надмина 17,62% за 2024 година (17,16% – задолжителни пензиски фондови и 0,46% – доброволни пензиски фондови).

Во 2024 година се зголемил и опфатот на населението во вториот столб со намален раст во однос на претходната година (3% во однос на 2023 година) и достигна учество од 77% во вкупното активно население.

Оценка е дека иако има раст од  7%  учеството на населението во третиот столб е сè уште многу мало, односно околу 4% од вкупното активно население се членови со доброволна индивидуална сметка или се учесници во пензиска шема со професионална сметка во доброволен пензиски фонд.

Инвестициското портфолио на задолжителните пензиски фондови во 2024 година се состоело од домашни инвестиции коишто вклучуваат државни хартии од вредност (64,93%), депозити (1,68%), акции (2,02%) и удели во инвестициски фондови (0,43%) како и инвестиции во странство коишто вклучуваат инвестиции во странски државни обврзници (0,90%), корпоративни обврзници (0,15%), удели на инвестициски фондови (25,70%) и акции (3,29%).

Во структурата на инвестициското портфолио на доброволните пензиски фондови се забележува мало зголемување на учеството на инвестициите во странство најмногу заради зголемувањето на учеството во странски државни обврзници.

Земјава има тристолбен пензиски систем: прв столб, односно Фондот на ПИОСМ кој функционира на принцип на дефинирани пензии и вториот и третиот столб кој функционира на принцип на капитално финансирано пензиско осигурување зависи од повеќе фактори.

Вториот пензиски столб е замислен како долгорочен систем на задолжително капитално финансирано пензиско осигурување, чија основна цел е преку индивидуално акумулирање на средства да обезбеди дополнителен извор на приходи во пензија, заедно со пензијата од првиот столб.

Пензискиот систем во земјава со години е финансиски зависен од државните пари, а пензиската реформа направена пред деценија не ја подобри состојбата посебно во првиот пензиски столб кој е солидарен каде што еден работник треба да издржува 1,8 пензионери.

Последните години и најразвиените економии во светот размислуваат за пензиски реформи кои би го подобриле статусот на идните пензионери и би ја подобриле финансиската состојба на пензиските системи. Дел од државите во тие рамки воведуваат и зголемување на годините за одење во пензија.

The post ПЕНЗИИТЕ ОД ВТОРИОТ СТОЛБ ТРЕБА ДА СЕ ГЛЕДААТ ВО КОМБИНАЦИЈА СО ПРИМАЊАТА ОД ПРВИОТ СТОЛБ На пензискиот систем му треба реформа, ама каква? appeared first on plusinfo.mk.