Јапонски научници уште во 2013 година успеале делумно да откријат што гледаат луѓето во своите соништа, користејќи магнетна резонанца и алгоритми за машинско учење, технологија која претставува гранка на вештачката интелигенција.

Истражувањето, објавено во престижното научно списание „Science“, покажало дека со анализа на мозочната активност може да се предвидат одредени предмети и визуелни елементи што луѓето ги гледаат додека сонуваат.

Во експериментот учествувале тројца доброволци, чија мозочна активност била следена додека спиеле. Научниците повеќепати ги буделе испитаниците и барале од нив да опишат што сонувале непосредно пред будењето.

Потоа ги споредувале нивните описи со податоците добиени од магнетната резонанца, обучувајќи компјутерски алгоритми да препознаваат карактеристични обрасци во мозочната активност.

Резултатите покажале дека системот можел со точност од околу 70 проценти да разликува дали во сонот се појавила една или друга категорија предмети, како луѓе, возила или други објекти.

Сепак, ова не значи дека научниците успеале да ги снимаат соништата или да ги репродуцираат како филм. Технологијата можела само делумно да препознае одредени визуелни содржини, без да ја прикаже целосната приказна или изгледот на сонот.

Ова научно достигнување отвора интересни можности за иднината. Со понатамошниот развој на вештачката интелигенција и технологиите за следење на мозочната активност, се поставува прашањето дали еден ден луѓето навистина ќе можат да ги гледаат сопствените соништа како филм по будењето.

The post ЈАПОНИЈА РАЗВИВА ТЕХНОЛОГИЈА КОЈА ОТКРИВА ШТО СОНУВАТЕ!? Користи магнетна резонанца и вештачка интелигенција appeared first on plusinfo.mk.

Мистериозни лица облечени во одори на калуѓерки, со бели маски на лицата, кои во последните недели се појавуваат на улиците во градовите низ Србија, ги вознемирија граѓаните, особено родителите и децата, пишуваат српски медиуми.

Иако на социјалните мрежи се проширија различни теории за нивното потекло, се покажало дека станува збор за вирален тренд од Тикток, чија цел е да предизвика страв и да собере прегледи и лајкови.

Граѓани пријавувале појава на мистериозните фигури во повеќе градови, меѓу кои Инѓија, Рума, Зрењанин, Ниш, Белград и Чачак. Според сведочењата, маскираните лица се појавуваат ноќе, се кријат на темни места и ненадејно истрчуваат пред минувачите, особено во близина на училишта, градинки и паркови.

За овој феномен за српската телевизијата „Прва“ зборуваше Катарина Јонев, која со години се занимава со безбедноста на децата на интернет. Таа предупреди дека ваквите содржини не се безопасна забава и дека можат да остават сериозни последици кај најмладите.

– Ова навистина ги загрижи родителите низ Балканот, но и во Србија, со оглед на тоа што трендот кај нас доживеа вистинска експанзија. Сè повеќе родители реагираат затоа што млади лица се облекуваат во одори на калуѓерки, ставаат маски, се кријат на темни места, зад контејнери или дрвја, а потоа истрчуваат и ги плашат децата. Тие снимки се достапни на Тикток и се проследени со морничава атмосфера. Децата сè почесто ги гледаат – објасни Јонев.

Се рашири теорија дека станува збор за секта

Дополнителна забуна предизвикаа приказните што се ширеа на социјалните мрежи, според кои зад сето тоа можеби стои некоја мистериозна секта.

– Медиумите почнаа да известуваат кога се појавија „гроки“ или „грокици“, како што ги нарекуваат на социјалните мрежи, со тврдења дека можеби станува збор за секта – рече Јонев.

Таа објасни дека трендот е поврзан со хорор-содржини и имитирање лик од филм, а првично се појавил во Мексико, од каде што се проширил и во другите делови на светот.

– Целиот мит е поврзан со хорор-филм, а пред сè со Мексико, каде што постои култ кон мртвите. Се имитира ликот кој е главен во тој филм. Трендот најпрво се појавил во Мексико, но се проширил низ светот и стигна и кај нас. Морам да нагласам, заради родителите, дека навистина нема никакви докази дека станува збор за дејствување на секта. Тоа, сепак, не го менува фактот дека ваквите снимки ги плашат децата, кај нив предизвикуваат збунетост и страв, а потенцијално можат да остават и трауми – предупреди таа.

Станува збор за имитирање на Валак, демонската калуѓерка од хорор-франшизата „The Conjuring“, која е главен лик во филмот „The Nun“ (Калуѓерката) од 2018 година, како и во неговото продолжение „The Nun II“ од 2023 година. Валак е претставена како застрашувачка фигура во црна монашка облека, со бело лице и темни очи.

Според родителите, доволно е детето да види ваква снимка на телефонот на другарче или во групите во кои разменуваат содржини, па да стане вознемирено и исплашено.

Особено загрозени се помалите деца, кои поради возраста и емоционалниот развој потешко разбираат дека станува збор за инсценирани ситуации. Кај нив може да се појави страв самостојно да излегуваат на улица, да се враќаат од училиште или да престојуваат во паркови.

Децата сакаат и самите да учествуваат во трендот

Еден од проблемите е и тоа што некои деца не го доживуваат овој тренд како закана, туку како забава и можност да станат дел од популарна содржина. Некои дури сакаат и самите да снимат слично видео за да не бидат отфрлени од друштвото.

Јонев смета дека родителите не треба да се концентрираат само на овој тренд, туку да разговараат со децата за сите потенцијално штетни содржини на интернет.

– Кога зборуваме за чувствителни содржини на интернет, „гроке“ се тренд кој е особено актуелен во моментов, но со години се соочуваме со тоа дека децата се изложени на бизарни и застрашувачки содржини. Родителите не треба да се фокусираат само на овој тренд, бидејќи во иднина може да се појави нешто уште побизарно – истакна таа.

Според неа, клучни се комуникацијата и индивидуалниот пристап кон секое дете.

– Важно е родителот да го познава своето дете, начинот на кој реагира, неговата емоционална стабилност и однесување. Врз основа на тоа треба да го осмисли разговорот: Дали ги виде овие снимки? Како се чувствуваше? Дали се исплаши? Родителот треба да најде начин да го смири детето.

Таа додаде дека децата треба да знаат дека во секој момент можат да им се обратат на родителите ако забележат нешто необично или се најдат во ситуација што ги плаши.

– Ако случајно видиш некого во паркот како се крие зад дрво, слободно јави ми се. Важно е децата да знаат дека се безбедни и дека секогаш можат да сметаат на родителите – порача Јонев.

На мета се и деца од седум и осум години

Особено загрижува податокот дека на ваквите содржини се изложени и деца од најниските одделенија во основното образование.

– Ми се јавуваат родители и ми кажуваат дека на вакви содржини се изложени деца на возраст од седум и осум години. Многу деца дури сакаат „гроке“ да дојдат во нивното маало, а причината е што сакаат да бидат дел од трендот кој стана многу популарен – наведе Јонев.

Таа оцени дека во основата на овој феномен е желбата за популарност на социјалните мрежи, собирање лајкови и привлекување внимание, но дека особено проблематично е тоа што во овој случај на мета се децата и младите.

– Ова е класична приказна за трка по лајкови и привлекување внимание. Но, овојпат проблемот е во тоа што на мета се децата и младите. Последиците можат да бидат сериозни, пред сè кога станува збор за нивната емоционална стабилност – предупреди Јонев.

Таа ги повика родителите да разговараат со децата, да следат на какви содржини се изложени и да ги научат да не учествуваат во предизвици што можат да ја загрозат нивната или туѓата безбедност. Нагласи дека ниту еден лајк, преглед или популарност на социјалните мрежи не се вредни за вознемирување на други деца.

The post 🎥 МОРНИЧАВИ „КАЛУЃЕРКИ“ СЕАТ СТРАВ МЕЃУ ДЕЦАТА ВО СРБИЈА Опасен тренд на Тикток за снимање хорор-клипови и собирање „кликови“ appeared first on plusinfo.mk.

Демократот Крис Папас го победи републиканецот Џон Сунуну во трката за Сенат во Њу Хемпшир, станувајќи првиот отворено геј маж избран во историјата на Сенатот на САД.

– Многу сум им благодарен на сите во оваа просторија и пошироко кои ја овозможија оваа победа. Сакам да му се заблагодарам на човекот до мене, мојот неверојатен сопруг, Ван. Во ред, погрешната личност беше на гласачкото ливче, очигледно. Но, тој секогаш беше покрај мене. И погледнете, вечерва, победа, загуба или нерешено, јас сум најсреќниот човек затоа што сум во брак со маж кого го сакам – изјави новоизбраниот сенатор.

И покрај пресвртницата што ја претставува победата на Папас, неговата сексуалност не беше значајно прашање во трката, бидејќи двајцата кандидати избраа наместо тоа да се фокусираат на прашања како што се прифатливоста на цените и други политички несогласувања.

– И покрај сите негативни напади, добро е да се знае дека љубовта и вистината преовладаа вечерва – додава Папас.

 

View this post on Instagram

 

A post shared by WBZ News | CBS News Boston (@wbztv)

The post 📽️ ИЗБРАН ПРВИОТ ОФИЦИЈАЛЕН ГЕЈ СЕНАТОР ВО САД Неговата сексуалност не беше значајно прашање во трката appeared first on plusinfo.mk.

Дознајте што предвидува вашиот неделен хороскоп, што ве очекува во следните седум дена на работа, во љубовта, во вашиот дом и семејство, дали ќе се сложувате со вашето семејство и пријатели, како ќе ви служи вашето здравје.

Овен (21.3 – 20.4)

Работа: Последната Месечева четвртина во куќата на креативноста, на 2 ноември, ви носи успех во уметнички проект или приватен бизнис. Опозицијата со вашиот владетел Плутон, планетата на парите, предупредува на дополнителна претпазливост со финансиите. Со конјункцијата на Сонцето и Меркур, симболите на амбицијата и комуникацијата, во куќата на парите, на 5 ноември, ве очекуваат вонредни трошоци и важни одлуки.

Љубов: Со нагласената куќа на љубовниот живот, во која се наоѓа и вашиот владетел Марс, планетата на страста, но и на конфликтите, на почетокот на периодот може да се најдете пред важна емотивна одлука. Опозицијата меѓу Нептун и Венера, која владее со партнерските односи, ви носи заљубување, но и можност за разочарување.

Здравје: Подложност на повреди.

Бик (21.4 – 21.5)

Работа: Со последната Месечева четвртина во четвртата куќа, на 2 ноември, во опозиција со владетелите на вашите финансии, би требало да почекате подобар момент доколку размислувате за вложување во семеен бизнис или друг вид самостојна дејност. Во вториот дел од неделата можете да очекувате зголемување на приходите преку работи поврзани со недвижности, екологија или органска храна.

Љубов: Почетокот на периодот носи недоразбирања, кавги, расправии и конфликти со членовите на семејството и со саканата личност, кои може да кулминираат на 5 ноември, во време на конјункцијата на ретроградниот Меркур и Сонцето во куќата на партнерството и бракот. Слободните Бикови ги очекува разочарување поради одредени сознанија за личност која им се допаѓа.

Здравје: Чувствителен коскено-зглобен систем.

Близнаци (22.5 – 21.6)

Работа: Владетелот на вашите финансии, Месечината, во фазата на последната четвртина, на 2 ноември, ви носи можност да завршите работа поврзана со пократки патувања или да потпишете исплатлив договор. Со конјункцијата на вашиот владетел Меркур и Сонцето во куќата на работата, на 5 ноември, под влијание на Сатурн од куќата на плановите, ќе мора да вложите повеќе напор за да ги завршите сите обврски.

Љубов: Позицијата на владетелот на вашиот приватен живот, кон крајот на неделата, повторно ги изнесува на површина нерасчистените односи со партнерот, поради што ќе мора да преземете поконкретни чекори. Кон крајот на периодот добивате романтична порака од поранешна симпатија или од некого што се враќа од подолго патување.

Здравје: Чувствителен урогенитален тракт.

Рак (22.6 – 22.7)

Работа: Последната четвртина на вашиот владетел Месечината во астролошката куќа на парите, на 2 ноември, создава напнат аспект со Сатурн во куќата на кариерата, носејќи ви финансиски проблеми и конфликти со претпоставените и авторитетите. Обидете се да го одложите потпишувањето важни договори и спогодби во средината на неделата. Кон крајот на периодот можен е повраток на стара идеја или соработка со поранешни партнери.

Љубов: Конјункцијата на Сонцето и Меркур во вашата куќа на љубовта, на 5 ноември, на слободните Ракови им носи можност за влегување во нова врска, како и поголеми шанси за проширување на семејството. Имате чувство дека брачниот или долгогодишниот партнер крие нешто од вас, а веројатно интуицијата не ве лаже. Добивате порака од еден Јарец.

Здравје: Потребен ви е одмор.

Лав (23.7 22.8)

Работа: Вашиот владетел Сонцето, на 5 ноември, прави конјункција со ретроградниот Меркур, владетелот на вашите финансии и планови, што ве прави подготвени да се вратите на стара деловна идеја или на соработка со стар тим. Ве очекува зголемување на приходите преку соработка со странци, патувања, образование или решавање правни прашања. Кон крајот на неделата можен е конфликт со авторитети.

Љубов: Со нагласената куќа на приватниот живот ве очекуваат кавги, конфликти и расправии со членовите на семејството, особено во средината на периодот. Опозицијата меѓу ретроградната Венера во куќата на комуникацијата и ретроградниот Нептун може да ви донесе романтична средба со некого на патување, но и склоност кон идеализирање и заблуди.

Здравје: Кардиоваскуларни тегоби.

Девица (23.8 – 22,9)

Работа: Со последната Месечева четвртина во куќата на ограничувањата и пречките, на 2 ноември, ве очекуваат недоразбирања со претпоставените и авторитетите. Можно е зголемување на заработката преку соработка со поранешни соработници или реализација на стара деловна идеја. Нагласената куќа на комуникацијата и бизнисот, на 5 ноември, може да ви донесе добивка преку потпишување исплатлив договор и пократки патувања.

Љубов: Ретроградниот Нептун, кој управува со брачните односи, во куќата на вашата интимност прави опозиција со ретроградната Венера во куќата на потсвеста, тајните и романтиката, што ве прави склони кон заблуди, идеализирање и разочарување кога станува збор за партнерот. Слободните Девици во средината на неделата може да запознаат некого на пократко патување.

Здравје: Внесувајте повеќе течности.

Вага (23.9 – 22.10)

Работа: Нагласената куќа на работата и парите ве насочува кон заработката и решавањето финансиски прашања, особено во средината на периодот. Опозицијата меѓу вашиот владетел Венера и Нептун, планетите на парите и измамите, предупредува на претпазливост при вложувањата. Последната четвртина на Месечината, владетелот на вашата кариера, на 2 ноември, ви носи успех преку деловно партнерство, јавна дејност или судски спор.

Љубов: Ретроградниот Меркур, кој управува со вашата потсвест, на 5 ноември прави конјункција со Сонцето во знакот на интуицијата, што ве прави склони кон преиспитување на минатото и односот со саканата личност. Слободните Ваги може да се најдат пред одлука дали да обноват врска со некого што се обидува повторно да влезе во нивниот живот. Послушајте совет од Лав.

Здравје: Чувствителен коскено-зглобен систем.

Шкорпија (23.10 – 22.11)

Работа: Со последната Месечева четвртина во куќата на кариерата, во опозиција со вашиот владетел Плутон, на 2 ноември, можете да очекувате недоразбирања со претпоставените, но и вонредни трошоци. Конјункцијата на Сонцето и ретроградниот Меркур, симболите на амбицијата и комуникацијата, во вашиот знак, во средината на периодот, предупредува да обрнете поголемо внимание на документацијата и вредните ситници.

Љубов: Владетелот на вашата интимност и општествен живот, под влијание на Сатурн, планетата на сомнежите, пречките и ограничувањата, во средината на неделата ве прави склони кон преиспитување на чувствата кон партнерот. Опозицијата меѓу Венера, која управува со емотивниот живот, и Нептун, планетата на романтиката, на слободните им носи љубовен занес.

Здравје: Проблеми со циркулацијата.

Стрелец (23.11 – 21.12)

Работа: Последната четвртина на Месечината, која управува со вашите финансии, на 2 ноември прави тригон со Сатурн и вашиот владетел Нептун во куќата на креативноста, носејќи ви добивки преку уметност, самостојна дејност или работа што има допирни точки со спортот и децата. Во втората половина од неделата можни се недоразбирања со авторитетите или претпоставените. Послушајте ги советите на Вагата и Лавот.

Љубов: Аспектите на Месечината, која управува со вашата интимност, на почетокот на периодот ве прават склони кон преиспитување на односот со саканата личност. Спојот на Сонцето и ретроградниот Меркур, владетелот на партнерските односи, во куќата на романтиката, каде што се наоѓа и ретроградната Венера, планетата на љубовта, на 5 ноември навестува тајна средба.

Здравје: Внесувајте повеќе витамини.

Јарец (22.12 – 20.1)

Работа: Опозицијата меѓу Плутон и последната Месечева четвртина во куќата на парите, на 2 ноември, ве насочува кон важни финансиски прашања, кредит, стипендија или поделба на имот. Спојот на Сонцето и ретроградниот Меркур во куќата на амбициите и плановите, на 5 ноември, под влијание на вашиот владетел Сатурн, носи можност за општествен или политички ангажман. Можни се проблеми со правни постапки или на патување.

Љубов: Со нагласената куќа на општествениот живот, во средината на периодот, ве очекуваат повеќе излегувања и дружења, враќање на стари пријатели, а можна е и љубов што ќе се роди од пријателство. Можно е обновување на комуникацијата со стара симпатија или ново познанство преку интернет. Некој кого долго време не сте го виделе сака повторно да влезе во вашиот живот.

Здравје: Склоност кон интроспекција.

Водолија (21.1 – 19.2)

Работа: Последната Месечева четвртина во куќата на партнерските односи, на 2 ноември, прави опозиција со Плутон во вашиот знак, носејќи ви тешкотии во комуникацијата со другите, особено ако сте родени во првата декада. Во средината на неделата можни се проблеми на пократко патување, со правни прашања или документација. Кон крајот на периодот следува обновување на соработката со стара екипа и решавање на стари правни прашања.

Љубов: Меркур, владетелот на вашиот љубовен живот, на 5 ноември прави конјункција со Сонцето, владетелот на партнерските односи, но и напнат аспект со вашиот владетел Сатурн, планетата на ограничувањата. Ќе мора да вложите повеќе трпение и напор за да ја подобрите комуникацијата со саканата личност.

Здравје: Кардиоваскуларни тегоби.

Риби (20.2 – 20.3)

Работа: Вашиот владетел, ретроградниот Нептун, кој управува и со вашата кариера, во тригон со последната Месечева четвртина во куќата на работата, на 2 ноември, ви носи можност да реализирате стара деловна идеја или да ја обновите соработката со поранешни деловни партнери. Бидете повнимателни доколку планирате вложување во нова работа, поради можност од финансиски измами или манипулации.

Љубов: Ретроградниот Меркур, кој управува со вашите партнерски односи и приватен живот, на 5 ноември, во конјункција со Сонцето, на слободните Риби им носи средба со стара љубов или влегување во нова врска со некого од кого ги дели поголема разлика во годините. Можни се расправии со саканата личност и членовите на семејството.

Здравје: Поминувајте повеќе време во природа.

The post НЕДЕЛЕН ХОРОСКОП ОД 2 ДО 8 НОЕМВРИ Ракот влегува во нова љубовна приказна, Девицата добива деловна шанса appeared first on plusinfo.mk.

Победата на Илијана Јотова на претседателските избори ќе ја доближи Бугарија уште еден чекор кон Москва, оценува британскиот „Фајненшл тајмс“. Мандатот на кандидатката што весникот ја опишува како поблиска до Кремљ ќе ја зацврсти политичката позиција на таборот на премиерот Румен Радев, додека нејзините досегашни изјави не навестуваат попуштање во односите со Македонија.

Јотова и Радев со години дејствуваа како претседателски тандем, а нејзината победа ќе значи политичка усогласеност меѓу претседателството и владата. Тоа би го зајакнало крилото што се залага за обновување на врските со Русија — аналитички заклучок што произлегува од нивните позиции, а не доказ дека Софија автоматски ќе го промени својот меѓународен сојузнички статус.

Москва добива посилен политички табор во Софија

Оценките за Радев како политичар близок до Москва не почнаа со денешниот балотаж. При неговата победа на парламентарните избори во април, „Фајненшл тајмс“ го опиша како поблизок до Русија од другите бугарски премиери во последните години. БНР, пренесувајќи ги западните медиуми, ги посочи неговите критики на европските санкции и противењето на вооружувањето на Украина.

Јотова, во завршницата на претседателската кампања, побара Русија да се врати на преговарачката маса, а Бугарија да помогне како дипломатски канал. Таа се заложи контактите со Владимир Путин да се обновуваат во име на целата Европска Унија. Нејзиниот противкандидат Андреј Ѓуров, пак, побара поцврсто застанување до западните сојузници поради несигурноста во Црното Море.

Сепак, во самата анализа на „Фајненшл тајмс“ постои важна ограда. Руслан Стефанов од софискиот Центар за истражување на демократијата оценува дека претседателот веројатно нема да може значително да ја оддалечи Бугарија од западниот курс, поради членството во ЕУ и во НАТО. Можниот ефект, според таквото читање, е поголема политичка тежина на ставовите блиски до Москва и повеќе спорови со сојузниците, додека формалната припадност останува иста.

За Македонија — продолжување на тврдата линија

Во односите со Македонија, Јотова има јасно документирана позиција: без внесување на Бугарите во Уставот нема напредок во европското пристапување. Тоа го повтори на 13 февруари 2026 година пред претседателот на Европскиот совет Антонио Кошта, во рамките на Минхенската безбедносна конференција. Притоа тврдеше дека станува збор за веќе утврдена европска политика.

На истата средба Јотова го обвини македонското раководство дека бара поддршка меѓу европските држави за заобиколување на обврските. Таа ја отфрли можноста Бугарија да прифати таква промена. Овој став покажува дека нејзиното разбирање на дијалогот со Скопје почнува од спроведување на постојните услови, со мошне тесен простор за нивно преиспитување.

На 10 јуни, на средбата со македонската претседателка Гордана Сиљановска-Давкова, Јотова повторно побара исполнување на компромисот од 2022 година и уставните измени. Според официјалното соопштение од бугарското претседателство, таа ги поставила и прашањата за правата на луѓето што се определуваат како Бугари и за говорот на омраза. Тоа се барања и оценки на Софија, кои остануваат дел од спорот меѓу двете држави.

Нејзините барања опфаќаат и спроведување на Договорот за добрососедство и на протоколите. Во претходни настапи Јотова инсистираше на резултати од историската комисија и мерки против она што го нарекува „антибугарска идеологија“. Истовремено, таа тврди дека Бугарија не поставува дополнителни услови, туку бара исполнување на преземените обврски — формулација што не го отстранува македонското стравување од нови блокади.

Оттука, за Скопје победата на Јотова значи продолжување на позната, тврда политика, сега поткрепена со непосреден изборен мандат. Јакнењето на таборот близок до Москва е посебна геополитичка димензија – достапните факти не докажуваат дека условувањето на Македонија е руска директива, но зепал покажуваат дека политичари кои повикуваат на поголема отвореност кон Русија истовремено цврсто ја бранат бугарската блокада за македонскиот европски пат.

The post СОФИЈА СО ЈОТОВА ПОБЛИСКУ ДО МОСКВА, ПОДАЛЕКУ ОД СКОПЈЕ Што може на Бугарија да ѝ донесе победата на Илијана Јотова? appeared first on plusinfo.mk.

Холивудската актерка Сидни Свини се најде во центарот на жестока дебата во светот на женскиот спорт, откако нејзиното учество во провокативна рекламна кампања предизвика реакции кај професионални спортистки. Тие предупредуваат дека ваквиот маркетинг испраќа погрешна порака – дека физичкиот изглед и сексуалната привлечност се поважни од спортскиот талент, трудот и постигнатите резултати.

Незадоволството на спортистките произлегува од неколку причини. Една од нив е финансиската нееднаквост во женскиот спорт. Додека многу професионални спортистки се соочуваат со недостиг од спонзори, ниски наградни фондови и ограничена финансиска поддршка, големи маркетиншки буџети се насочуваат кон познати личности кои немаат професионална спортска кариера.

Дополнителен проблем е начинот на кој се претставуваат жените во спортот. Критичарките сметаат дека кампањите во кои акцентот е ставен на сексуализираниот изглед ја потиснуваат вистинската слика за спортистките – нивната сила, мускулатура, дисциплина, тренинзи и пожртвуваност.

Тие предупредуваат и дека ваквите пораки можат негативно да влијаат врз младите девојки, создавајќи впечаток дека физичкиот изглед е поважен од талентот, работата и спортските достигнувања.

Контроверзијата се разгоре по рекламата за платформата „Novig“, во која Свини се појавува во провокативни пози, користејќи спортски реквизити. Кампањата предизвика реакции кај спортистки од повеќе земји, кои преку социјалните мрежи ја изразија својата револтираност.

Меѓу критичарите се најдоа и познати спортистки, кои порачаа дека жените во спортот заслужуваат да бидат препознаени по своите резултати, а не да бидат сведени на физичкиот изглед. Дел од нив објавуваа снимки од своите натпревари и тренинзи, нагласувајќи дека зад спортските успеси стојат години работа, пот, болка и дисциплина.

Сепак, критиките не се насочени исклучиво кон актерката, туку и кон маркетиншките стратегии на компаниите кои ја користат популарноста и физичкиот изглед на познатите личности за да привлечат внимание. Случајот повторно ја отвори дебатата за тоа како се промовира женскиот спорт и кој ги добива најголемите комерцијални можности.

 

View this post on Instagram

 

A post shared by Sydney Sweeney (@sydney_sweeney)

Која е Сидни Свини?

Сидни Свини (Sydney Sweeney) е американска актерка и продуцентка, родена на 12 септември 1997 година во Спокејн, во сојузната држава Вашингтон. Таа важи за една од најпопуларните актерки од помладата генерација во Холивуд.

Светската популарност ја стекна со улогата на Кеси Хауард во серијата „Euphoria“, како и со улогата на Оливија Мосбахер во првата сезона на серијата „The White Lotus“. За двете улоги во 2022 година доби номинации за наградата „Еми“.

Нејзината филмска кариера продолжи со остварувањата „Reality“, „Anyone but You“ и „Immaculate“, а се истакна и со улогата на боксерската легенда Кристи Мартин во биографскиот филм „Christy“.

 

View this post on Instagram

 

A post shared by Sydney Sweeney (@sydney_sweeney)

Свини ја основаше и сопствената продукциска куќа „Fifty-Fifty Films“, преку која учествува во развојот и продукцијата на филмски проекти.

Покрај актерството, таа има интерес и за автомобилизам и механика. Лично реставрирала класичен автомобил „Ford Bronco“ од 1969 година, што придонесе и за нејзината соработка со автомобилската компанија „Ford“.

Нејзината популарност и статусот на една од најпрепознатливите холивудски убавици ја направија привлечна за голем број модни, козметички и рекламни брендови. Токму тоа, меѓутоа, ја отвори и пошироката дебата за границата меѓу маркетингот, сексуализацијата и вистинското вреднување на женскиот спорт.

The post 📷 📽️ ПРОВОКАТИВНАТА РЕКЛАМА НА СИДНИ СВИНИ ГИ НАЛУТИ СПОРТИСТКИТЕ Холивудската убавица предизвика бура во женскиот спорт appeared first on plusinfo.mk.

Новата власт во Србија планира брзо да отвори преговори со Москва за долгорочно снабдување со руски гас. Студентската листа, која победи на парламентарните избори, по формирањето на владата ќе испрати делегација во Русија за да преговара за нов гасен аранжман, бидејќи сегашниот договор истекува на 31 декември.

Најавата ја соопшти Радомир Саичиќ, кандидат за пратеник од Студентската листа и член на Српската академија на науките и уметностите. Тој за НИН изјави дека енергетската сигурност ќе биде една од првите задачи на новата влада. Според него, во првите 30 дена треба да се обезбедат стабилен курс на динарот, редовна исплата на платите и пензиите и непречено снабдување со нафта, гас и електрична енергија.

И Москва и Вашингтон на агендата

Москва нема да биде единствената адреса на која ќе патуваат претставници на новата власт. Саичиќ најави и разговори во Вашингтон поради американските санкции кон Нафтената индустрија на Србија – НИС. Така, практично истовремено, Белград ќе мора со Русија да разговара за гасот, а со САД за иднината на компанијата која ја контролира најголемиот дел од српскиот пазар на горива и ја поседува единствената рафинерија во земјата.

Студентската листа веќе порача дека нема намера да воведува санкции кон Русија. Саичиќ претходно изјави дека проблемите треба да се решаваат со дијалог, преговори и договори, а не со санкции. Со тоа новата политичка сила засега не најавува пресврт во досегашната српска политика кон Москва во делот на санкциите, иако ќе мора да ги решава последиците од руската сопственост во НИС во односите со Вашингтон.

Србија во моментов е силно зависна од рускиот гас – околу 90 отсто од нејзините потреби се покриваат со испораки од Русија. Тригодишниот гасен аранжман истече уште на крајот на мај 2025 година, а оттогаш снабдувањето беше продолжувано со анекси и пократки договори. Последното продолжување беше договорено на 30 септември годинава, кога „Гаспром” прифати снабдувањето да продолжи до крајот на 2026 година под истите поволни услови.

Рускиот гас останува клучен за Србија

Белград во изминатите години се обидува да ја намали зависноста од еден снабдувач. Србија развива нови гасни интерконекции, располага со резерви во Банатски Двор и во складишта во Унгарија, а со азербејџанскиот СОКАР се развива и проект за гасна електрана кај Ниш. Сепак, рускиот гас останува убедливо најважен за српскиот пазар, особено поради цената по која Србија го добива.

Директорот на „Србијагас” Душан Бајатовиќ при последното продолжување на договорот потврди дека условите остануваат исти, додека тогашната министерка за рударство и енергетика Дубравка Ѓедовиќ Хандановиќ оцени дека договорот со „Гаспром” обезбедува доволни количества за зимската сезона под значително поповолни услови од оние на европскиот пазар. Србија во тој момент имаше околу 704 милиони кубни метри гас во резервите во Банатски Двор и во Унгарија.

Затоа рокот од 31 декември ќе биде една од првите големи економски задачи за новата влада. Студентската листа најавува дека во Москва нема да оди само по уште едно краткорочно продолжување, туку ќе бара подолгорочен аранжман. Истовремено, делегацијата во Вашингтон ќе треба да бара решение за НИС, со што две од најважните прашања за енергетската стабилност на Србија ќе се решаваат паралелно – едното со Русија, другото со САД.

The post СТУДЕНТСКАТА ЛИСТА ЌЕ ИСПРАТИ ДЕЛЕГАЦИЈА ВО МОСКВА ПО РУСКИ ГАС Договорот за снабдување на Србија истекува на 31 декември appeared first on plusinfo.mk.

Она што требало да биде романтична предсвадбена фотосесија на брегот на Босфор во Истанбул за малку ќе завршело со сериозна несреќа. Идна невеста била подигната од земјата и повлечена неколку метри од силен налет на ветер, кој ги зафатил балоните со хелиум што ги држела за време на фотографирањето.

Инцидентот бил снимен со камера, а видеото за кратко време се проширило на социјалните мрежи.

Според објавените информации, девојката позирала во венчаница, држејќи голем букет од украсни балони. Во еден момент, силен ветер ги повлекол балоните нагоре, а нивната потисна сила, заедно со налетот на ветерот и големата површина на фустанот, ја подигнала невестата од земјата.

Таа почнала да се лизга по бетонската подлога, додека ветерот ја влечел кон потпорниот ѕид и заштитната ограда. На снимката се гледа како очајнички се обидува да ја задржи рамнотежата, додека луѓето околу неа реагираат на опасната ситуација.

Посериозни последици биле избегнати благодарение на брзата реакција на фотографот. Тој ја оставил опремата и веднаш притрчал кон девојката, успевајќи да ја фати пред да удри во бетонската конструкција или да падне од терасата.

 

View this post on Instagram

 

A post shared by News Trial (@news_trial)

Според информациите што го придружуваат видеото, невестата поминала без повреди, иако доживеала голем стрес. По кратка пауза, фотосесијата продолжила, но со побезбедни реквизити.

Снимката предизвика бројни реакции на ТикТок и Инстаграм. Корисниците го пофалија фотографот за неговата брза реакција, која можела да спречи сериозна несреќа.

The post 📽️ ДРАМА НА БОСФОРОТ, БАЛОНИ КРЕНАА НЕВЕСТА ВО ВОЗДУХ Фотографот во последен момент ја спаси од пад appeared first on plusinfo.mk.

Европа нема шанси да ја победи Кина во директна конкуренција на пазарот на електрични автомобили, предупредува хрватскиот претприемач Мате Римац, основач на автомобилската групација „Римац“. Според него, европските производители треба да се насочат кон посебни пазарни сегменти, додека следната голема револуција во автомобилската индустрија ќе ја донесат возилата што се движат без возачи.

– Европа мора да ја пронајде својата ниша. Во директна конкуренција со Кина, не можеме да победиме. Точка – изјави Римац во интервју за германски медиуми, пренесува „Електроауто њуз“.

Тој оценува дека кинеските компании веќе имаат предност во развојот на електричните погонски системи, а нивните производи во иднина ќе стануваат уште подобри и поевтини.

Наместо да се обидува да ги победи во производството на евтини автомобили, Европа, според Римац, треба да се потпре на своите предности во поскапите и специјализирани сегменти.

„Тоа е како Ролекс да се обидува да се натпреварува со Епл“, вели тој.

По електричните автомобили доаѓаат роботаксијата

Римац смета дека автомобилската индустрија е толку сосредоточена на електрификацијата и кинеската конкуренција што недоволно внимание посветува на автономното возење.

– Ако електрификацијата толку многу ја промени индустријата, тогаш е тешко да се замисли какви промени нè очекуваат со роботаксијата и автономното возење – предупредува тој.

Неговата групација веќе работи на такви возила преку компанијата „Верн“, која има околу 150 вработени.

Според Римац, „Верн“ ја започнува првата комерцијална услуга со роботакси во Европа, во партнерство со американската компанија „Убер“.

Станува збор за автомобили што треба да превезуваат патници без човек зад воланот.

– Со Верн можеме да ги промениме животите на многу луѓе, враќајќи им го времето – вели Римац.

Бугати го задржа моторот со 16 цилиндри

Интересно е што Римац, иако изгради репутација со електрични хиперавтомобили, не верува дека целосно електричниот погон е најдобриот избор за секој автомобил.

Тој објаснува дека за новиот „Бугати турбијон“ се одлучил за мотор V16 во комбинација со хибриден погон што може да се полни на приклучок, иако „Фолксваген“ првично сакал целосно електрично возило.

„Тоа беше апсолутно правилна одлука“, вели Римац, наведувајќи дека моделот веднаш бил распродаден.

Според него, купувачите на најскапите автомобили не сакаат производ што станал вообичаен, дури и кога располага со исклучителни перформанси.

„Од комерцијална гледна точка, знам дека чисто електричен автомобил денес би бил погрешна одлука“, објаснува тој.

Римац потсетува дека неговиот електричен хиперавтомобил „Невера“ располага со четири мотори и овозможува управување со секое тркало сто пати во секунда.

Од автомобилска пустина до милијарди евра

Римац ја основал својата компанија во Хрватска, во време кога земјата немала развиена автомобилска индустрија.

– Беше како да основам компанија среде пустина – се сеќава тој.

Денес неговата групација опфаќа четири компании: „Бугати Римац“, „Римац технолоџи“, „Римац енерџи“ и „Верн“.

„Римац технолоџи“, која произведува батерии и погонски системи за други автомобилски компании, има договорени проекти вредни околу пет милијарди евра.

Меѓу нејзините клиенти се „БМВ“ и „Порше“. За „БМВ“ развива технологија што првпат ќе биде вградена во моделот i7, додека за „Порше“ произведува батерија за моделот 911 GTS T-Hybrid.

Римац открива дека соработката со „БМВ“ започнала со необичен потег. Додека договорот сè уште не бил потпишан, тој им покажал на претставниците на германската компанија место на градилиштето на новиот кампус.

– Вашата производствена линија ќе биде тука – им рекол.

Кога го предупредиле дека договорот сè уште не постои, одговорил:

– Тоа не е важно. Јас ќе го изградам за вас во секој случај.

Според Римац, токму таквата одлучност им влеала доверба на претставниците на „БМВ“.

Новиот кампус на групацијата опфаќа 100.000 квадратни метри. Изградбата на првата фаза чинела околу 130 милиони евра, а дополнителни 300 милиони евра биле вложени во производствените капацитети.

The post „ЕВРОПА НЕ МОЖЕ ДА ЈА ПОБЕДИ КИНА И ТОЧКА!“ Доаѓа најголемиот потрес за автоиндустријата? appeared first on plusinfo.mk.

Повеќе од 700 корисници на „Полимаркет“ останале без пари откако хакери успеале да извлечат најмалку 2,6 милиони долари од нивните сметки. Нападот бил извршен преку безбедносен пропуст во надворешна софтверска алатка што ја користела платформата, објави „Волстрит џурнал“.

Компанијата потврдила дека се соочила со безбедносен инцидент и привремено го прекинала тргувањето на својата меѓународна платформа. Подоцна соопштила дека проблемот е решен и ветила целосно обесштетување на погодените корисници.

Според извор запознаен со случајот, напаѓачите искористиле ранливост во „ДебагБер“ (DebugBear), надворешна алатка што служи за следење на брзината и перформансите на веб-страниците.

Тоа значи дека пробивот, според досегашните информации, не започнал со директен напад врз основниот систем на „Полимаркет“, туку преку софтвер што платформата го користела во секојдневното работење.

„ДебагБер“ не одговорил на барањето на весникот  за дополнителен коментар.

„Полимаркет“ соопштил дека го решил проблемот поврзан со надворешниот добавувач на софтвер и дека сите корисници што изгубиле средства ќе бидат целосно обесштетени.

„Полимаркет“ е една од најголемите светски платформи за предвидување реални настани, на која корисниците вложуваат пари во исходи од политиката, економијата, спортот и забавната индустрија.

Наместо класични спортски облози, платформата нуди прашања на кои најчесто се одговара со „да“ или „не“.

Корисниците, на пример, можат да вложуваат пари во тоа кој ќе победи на избори, дали ќе биде донесена одредена политичка одлука, како ќе се движат каматните стапки или кој ќе добие престижна филмска награда.

Цените на понудените исходи се менуваат во зависност од понудата и побарувачката и се користат како показател за веројатноста одреден настан да се случи.

Платформата привлече големо внимание за време на американските претседателски избори, кога нејзините процени често беа споредувани со резултатите од традиционалните анкети.

Но, брзиот раст донесе и сериозни проблеми.

Според „Волстрит џурнал“, „Полимаркет“ годинава веќе се соочил со други безбедносни инциденти и случаи на измама, вклучително и скап пробив во јуни.

Компанијата истовремено води правни битки околу прашањето дали ваквите платформи треба да се третираат како регулирани финансиски пазари или како обложувалници.

Нејзиниот главен американски конкурент „Калши“ исто така се соочува со судски спорови и регулаторни предизвици.

И покрај проблемите, „Полимаркет“ разговарал со инвеститори за можно излегување на берзата следната година и во изминатите месеци го засилил својот менаџерски тим.

The post ИСПРАЗНИЛЕ МИЛИОНИ ОД „ПОЛИМАРКЕТ“ ПРЕКУ АЛАТКА ШТО ТРЕБАЛО ДА ПОМОГНЕ Хакери нашле споредна врата до над 700 кориснички сметки appeared first on plusinfo.mk.