40 МИНУТИ ВО ТИШИНА ДАЛЕКУ ОД ЗЕМЈАТА Астронаутите од Артемис ќе останат без никаков контакт со Земјата

Додека астронаутите од мисијата „Артемис II“ се приближуваат до најоддалечената точка од Земјата што човекот некогаш ја достигнал, тие се соочуваат со момент што го надминува технолошкиот напредок и влегува во речиси егзистенцијално искуство – целосна тишина.

Во вторник околу 00.47 часот по средноевропско време, кога вселенското летало „Орион“ ќе помине зад Месечината, комуникацијата со Земјата ќе биде целосно прекината. Самата маса на Месечината ќе ги блокира сите радио и ласерски сигнали, а четворицата астронаути ќе останат без никаков контакт со контролата на летот во Хјустон.

Ова прекинување ќе трае околу 40 минути. Во тој период, далеку од која било позната форма на живот, екипажот ќе биде оставен сам на себе – на своите мисли, чувства и погледот на вселената што се протега во бесконечност.

Пилотот на мисијата, Виктор Гловер, рече дека се надева дека луѓето на Земјата ќе го доживеат тој момент со нив.

– Кога ќе бидеме зад Месечината, без никаков контакт, нека биде можност… Молете се, надевајте се и испратете ни добри мисли за да можеме повторно да ве контактираме – рече тој.

Астронаутите на Аполо доживеале слична тишина пред повеќе од половина век. Најпознат пример е Мајкл Колинс, кој за време на мисијата Аполо 11 останал сам во командниот модул додека Нил Армстронг и Баз Олдрин оделе по површината на Месечината.

Додека орбитирал над нејзината темна страна, Колинс бил целосно отсечен од комуникација речиси 48 минути. Подоцна го опишал искуството како изолација од „секоја позната форма на живот“, но не толку застрашувачко – напротив, зборувал за чудниот мир што доаѓа со целосна тишина.

Додека астронаутите може да најдат фокус и мир во тишината, на Земјата тие 40 минути ќе бидат исполнети со напнатост.

No days off when you’re Moonbound.@Astro_Christina continues prep for tomorrow’s lunar flyby after completing her workout.
Meanwhile, our entire world watches in anticipation with hope and excitement as the @NASAArtemis II crew presses on toward the Moon. pic.twitter.com/iIiAiXHej0

— NASA (@NASA) April 6, 2026

На Земјината станица Гунхили во Англија, инженерите ќе го следат вселенското летало сè додека сигналот не исчезне.

-Ќе бидеме малку нервозни кога ќе исчезнат зад Месечината, но исто така и пресреќни кога повторно ќе ги „фатиме“ – бидејќи тоа значи дека сите се добро – вели техничкиот директор на станицата, Мет Козби.

Ваквите прекини во комуникацијата би можеле да станат минато во иднина. Со плановите за подолго присуство на луѓе на Месечината, континуираната комуникација станува клучна. Европската вселенска агенција веќе го развива проектот „Месечина“, кој предвидува мрежа од сателити што орбитираат околу Месечината за да се овозможи постојана комуникација, дури и на нејзината далечна страна.

За самите астронаути, тие 40 минути нема да бидат само технички предизвик, туку и ретка можност. Без комуникација и надворешни инструкции, тој ќе може целосно да се посвети на набљудување на Месечината, фотографирање и проучување на нејзината површина.