Зголемен е бројот на повици во Итната медицинска помош (ИМП) поради топлото време.

Дневно има повеќе од 200 повици кои се однесуваат на интервенции на јавни места поради колапси или во домашни услови поради влошување на здравствена состојба на некои граѓани. Зголемен е и бројот на интервенции на јавни места, најчесто поради колапси од горештините.

– Просечно интервенции во врска со колапси има меѓу 3 и 5 дневно, но во некои денови има и повеќе. Има повеќе повици за симптоми на лошење, гадење, прегревање на телото, топлотен удар. Многу често успеваме и со совет да им помогнеме на граѓаните – вели Даниел Георгиевски од ИМП.

Тој потенцира дека поради топлото време кај хронично болните може да има кардиолошки манифестации, срцеви и мозочни удари и варирање на крвниот притисок.

– Препорачуваме од 11 до 17 часот да се избегнува директно изложување на сонце, да се консумираат доволно течности, најбитно вода, да не се консумира алкохол, ако мора да се излезе надвор да се носи полесна облека и капа на главата. Ако после подолго време изложеност на сонце се почувствуваат симптоми на вртоглавица, гадење, малаксаност треба да се влезе во климатизирани простории и да се консумираат повеќе течности. Потребно е да се внесува полесна храна, готвена храна, со помалку калории. Хронично болните редовно да ја земаат терапијата и да го мерат крвниот притисок, а дијабетичарите да го мерат шеќерот во крвта. За жал, одредена популација не ги применуваат препораките за топлото време – ве ли Георгиевски за МИА.

The post ГОРЕШТИНИТЕ ГО ВЖЕШТИЈА ТЕЛЕФОНОТ ВО БРЗАТА ПОМОШ Над 200 повици дневно appeared first on plusinfo.mk.

Продолжува периодот на исклучително високи температури низ целата земја, при што синоптичарите најавуваат врв на топлотниот бран во петок и сабота, кога максималните температури може да достигнат дури и до 43 степени Целзиусови.

Според прогнозите, времето денеска ќе биде претежно сончево и многу топло, со слаб до умерен ветер од западен и северозападен правец. Максималната температура ќе се движи во интервал од 35 до 42 степени, а слични временски услови се очекуваат и во Скопје.

Од недела се очекува промена на временската состојба, со појава на локална нестабилност, пороен дожд и громови, што ќе придонесе и за опаѓање на температурите.

Поради екстремните температури, Владата излезе со итни препораки за заштита на населението, додека од Министерството за здравство упатуваат апел граѓаните строго да се придржуваат до мерките за самозаштита, кои вклучуваат:

– Престој во разладени простории, особено во периодот од 11 до 17 часот;

– Внесување доволно течности, избегнување алкохол и засладени пијалаци;

– Носење лесна, светла и широка облека;

– Користење заштита за глава и очи;

– Избегнување физичка активност во најтоплите часови од денот.

Надлежните институции најавуваат дека будно ја следат состојбата, а службите за итна помош и здравствените установи се во засилен режим на работа поради зголемениот број интервенции поврзани со топлотниот бран.

The post ПЕКОЛНИ ПЕТОК И САБОТА, ТЕМПЕРАТУРАТА ДО 43 СТЕПЕНИ По жешкото доаѓа невреме со пороен дожд и грмежи appeared first on plusinfo.mk.