Полициски службеник од Полициската станица Драчево возел автомобил без положен возачки испит, со истечена сообраќајна дозвола. Против него кривична пријава поднела внатрешната контрола на Министерството за внатрешни работи (МВР).

Станува збор за полицаецот Ш.А., кој на 1 октомври управувал автомобил надвор од работното време.

Според МВР, возилото било со истечен рок на важност на сообраќајната дозвола, а полицаецот воопшто немал положено возачки испит.

Внатрешната контрола утврдила и дека тој не ги почитувал прописите за безбедност во сообраќајот.

Против Ш.А. е поднесена кривична пријава до Основното јавно обвинителство поради сомнение за „безобѕирно управување со моторно возило“, според член 297-а од Кривичниот законик.

Одделот за внатрешна контрола поднел и предлог за поведување постапка за утврдување одговорност поради кршење на работниот ред и дисциплина.

The post ПОЛИЦАЕЦ ЗАД ВОЛАН БЕЗ ПОЛОЖЕН ВОЗАЧКИ ИСПИТ Внатрешната контрола открила уште еден прекршок appeared first on plusinfo.mk.

Министерството за внатрешни работи започна проверка по наводите дека две лица биле физички нападнати од полициски службеници во Скопје, при што наводно бил оштетен и нивниот автомобил.

По информациите објавени во дел од медиумите за настанот што се случил на 7 октомври, министерот за внатрешни работи наложил Одделот за внатрешна контрола, криминалистички истраги и професионални стандарди да ги испита сите околности поврзани со случајот.

Целта на проверката е да се утврди што точно се случило и дали постои одговорност кај полициските службеници кои се споменуваат во наводите.

Опозициската партија Демократската унија за интеграција бара целосно расветлување на случајот со двајцата млади на возраст од 21 и 23 години, кои, според нивните изјави, биле брутално малтретирани од полицијата.

Според информациите на партија, во интерниот полициски извештај се тврди дека младите му го одзеле пиштолот на еден полициски службеник, додека, според нивните изјави, оружјето завршило во нивното возило откако полицијата им го скршила стаклото.

„Тие, исто така, изјавуваат дека полицајците пукале со огнено оружје, им ги дупнале гумите на возилото, а потоа ги малтретирале, откако им ги врзале рацете и ги легнале на земја“ – пишува ДУИ во соопштението.

Партијата бара итна, непристрасна и транспарентна истрага за целосно расветлување на настанот, како и одговорност за секое евентуално прекршување на законите од страна на полициските службеници.

Исто така и Алијанса за Албанците побара итно и целосно расветлување на случајот.

„Фактот што самото Министерство за внатрешни работи започнало внатрешна контрола покажува дека тврдењата се сериозни и бараат брза, транспарентна истрага, без никаков обид случајот да се релативизира“ – нагласува Алијанса во соопштение.

Партијата уште вели дека „во оваа ситуација, молкот на ВЛЕН и на заменик-министерот за внатрешни работи Астрит Исени е неприфатлив.

„Кога си дел од раководството на МВР, одговорноста не завршува со политички изјави. Потребни се дејствување, транспарентност и одговорност“ – пишува Алијанса за Албанците.

Од МВР информираат дека се преземаат потребните мерки за целосно расчистување на случајот. По утврдувањето на фактичката состојба, ќе следуваат соодветни постапки во согласност со законските прописи.

„По утврдувањето на фактичката состојба ќе бидат преземени соодветни мерки согласно законските прописи, а јавноста ќе биде навремено известена“, соопштуваат од Министерството за внатрешни работи.

The post ДУИ ОБВИНУВА ЗА ПОЛИЦИСКО НАСИЛСТВО ВРЗ ДВАЈЦА МЛАДИ Внатрешна контрола на МВР ги проверува наводите appeared first on plusinfo.mk.

Вработена во Министерството за внатрешни работи ја користела сопствената шифра за пристап до електронскиот систем на министерствот за незаконско додавање возачки категории, по што биле одобрувани барањата и издавани возачки дозволи.

Т.С. веќе е суспендирана по претходно поднесена кривична пријава, а сега Внатрешната контрола во МВР ќе поднесе и предлог за дисциплинска постапка.

МВР поднесе кривична пријава против вработената и уште пет лица поради сомнение за фалсификување исправи.

„Кривична пријава е поднесена против шест лица, и тоа Т.С., вработена во МВР на работно место ‘помлад советник за патни исправи’ во Одделението за управни работи Скопје, како и против Б.А., С.Н., Ј.А., М.А. и Ф.А.“, објави МВР на Фејсбук.

Според пријавата, шемата функционирала од почетокот на 2025 година до 24 август 2026 година. Вработената Т.С. се сомничи дека интервенирала во постапките за издавање возачки дозволи на четири од пријавените лица.

„Искористувајќи ја својата шифра, во електронскиот систем незаконски извршила промена, односно додавање на возачки категории за кои наведените лица не ги исполнувале законски пропишаните услови за нивно стекнување“, наведува Министерството.

По промените во системот, според МВР, Т.С. ги одобрувала барањата, а потоа биле издавани и возачките дозволи со незаконски додадените категории.

Во случајот, според кривичната пријава, имало и посредник. Б.А. се сомничи дека бил во договор и комуникација со вработената и посредувал при издавањето дозволи за М.А. и Ф.А.

„Иако знаел дека наведените лица не ги исполнувале законски пропишаните услови за нивно стекнување“, Б.А. со умисла посредувал во постапките за фалсификување, соопшти МВР.

Останатите четворица, пак, се сомничат дека знаеле дека не ги исполнуваат условите за конкретните категории, но сепак поднеле барања за возачки дозволи. Потоа, според МВР, во нивните барања биле додавани категории за кои немале законски услови.

Една од спорните дозволи не останала само во системот и документите. Еден од пријавените ја употребил незаконски додадената категорија и надвор од земјата.

„Ја искористило возачката дозвола со незаконски додадена ‘А’ категорија и управувајќи мотоцикл ја преминал државната граница“, наведува МВР, додавајќи дека лицето знаело оти исправата има невистинита содржина.

Против Т.С. се наведени основи на сомнение за четири кривични дела „фалсификување исправа“. Останатите пет лица се опфатени со пријавата за шест кривични дела „фалсификување исправа“ во соизвршителство, а пријавено е и едно дело „употреба на исправа со невистинита содржина“.

Случајот го откри Одделот за внатрешна контрола, криминалистички истраги и професионални стандарди, кој кривичната пријава ја доставил до Основното јавно обвинителство Скопје.

Внатрешната контрола ќе поднесе и предлог за поведување постапка за утврдување дисциплинска одговорност против вработената.

Суспензијата на врботената Т.С. важи до завршувањето на дисциплинската постапка.

The post ЦЕЛА ГОДИНА СО ШИФРА „ДОДАВАЛА“ ВОЗАЧКИ ДОЗВОЛИ ВО МВР Имала и посредник, пријавени се вкупно шестмина appeared first on plusinfo.mk.

Внатрешната контрола на Министерството за внатрешни работи (МВР) истражува случај во кој вработени во управните служби на полоицијата незаконски додавале категории во возачки дозволи на лица што никогаш не полагале за управување камион или автобус, објави ТВ Сител.

Според информации објавени во дел од медиумите, за незаконското додавање на Ц или Д-категорија се наплаќале по 1 400 евра.

„Од страна на Одделот за внатрешна контрола, криминалистички истраги и професионални стандарди при МВР, известено е надлежното Основно јавно обвинителство и во координација со Обвинителството се преземаат соодветни активности за расчистување на случајот“, се вели во соопштението од МВР.

Со случајот е запознаен обвинител од скопското јавно обвинителство, но, според информациите на Сител, постапката засега се води во рамки на МВР. Со неа треба да се утврди колку вработени во управните служби биле вклучени во незаконското додавање категории, како и колку возачки дозволи биле издадени на ваков начин.

Како што пренесува ТВ Сител, лицата што се предмет на истрагата биле затекнати на дело, односно во процесот на додавање категории кои возачите претходно не ги поседувале.

– Постапката функционирала така што лицето пријавувало дека ја изгубило возачката дозвола и поднесувало барање за издавање нова. При фотографирањето за новата дозвола, во системот се додавала повисока категорија, па возачот добивал нов документ со право да управува и со возила за кои немал положено – се вели во објавата на медиумот.

Министерот за внатрешни работи Панче Тошковски во гостувањето на Тема на денот на ТВ Сител рече дека секој за кој ќе се најде каков било доказ дека злоупотребил каква било позиција или пак несовесно работел во службата, ќе се постапи согласно закон и ќе биде најстрого санкциониран, поради тоа што ја злоупотребил довербата на македонските граѓани, на Министерството за внатрешни работи и го оцрнил образот и на колегите свои кои чесно и професионално си ја работат работата.

Тошковски беше прашан дали имало полициски службеници кои за 1.400 евра издавале фалсификувани, односно возачки дозволи со повисоки категории на управување на возила од оние кои ги имале во своите оригинални.

– Во текот на вчерашниот ден имаше така поставено прашање од страна на медиумите во Министерството за внатрешни работи, одговоривме дека се постапува по информации добиени од страна на МВР за конкретни сомнежи за кривично дело, кои информации се споделени со Јавното обвинителство, за коишто дејствија Јавното обвинителство донело наредба за преземање на одредени истражни дејствија од страна на внатрешна контрола во рамки на Министерството – рече Тошковски во гостувањето на ТВ Сител.

Тој рече дека во овој момент не сака да споделува повеќе детали за овој предмет, поради тоа што станува збор за дејствија кои се предмет на оперативна обработка од страна на Внатрешна контрола во МВР, односно постојат основани сомненија дека се сторени одредени незаконитости.

– Кога ќе можеме, секако дека ќе ја информираме јавноста. Ова е битна тема и за Министерството за внатрешни работи и за јавноста, секако, не смееме да дозволиме злоупотреба на службена на службена положба – истакна министерот.

Во однос на тоа дали оваа група е поврзана со аферите од минатото за издавање пасоши, рече дека не сака да навлегува во детали во тој дел, но е убеден дека доколку имало построги казни, тоа не би се случило.

The post ВО МВР СЕ ВОДИ ВНАТРЕШНА ИСТРАГА ЗА НЕЗАКОНСКО ИЗДАВАЊЕ ВОЗАЧКИ ЗА Ц И Д КАТЕГОРИИ Министерот вели, ако се докаже, сите инволвирани најстрого ќе бидат казнети appeared first on plusinfo.mk.

Вработен во Министерството за внатрешни работи од Куманово се соочува со кривична пријава откако било утврдено дека управувал возило без положен возачки испит и со брзина поголема од дозволената.

Одделот за внатрешна контрола, криминалистички истраги и професионални стандарди при МВР поднел кривична пријава против А.Ј. од Куманово поради сомнение дека го сторил кривичното дело „безобзирно управување со моторно возило“.

Според информациите од МВР, случајот се случил на 22 април 2026 година.

А.Ј., кој е вработен во Министерството, според пријавеното, управувал моторно возило иако немал положено возачки испит. Во исто време, возел и со брзина над дозволената.

Покрај кривичната пријава, Одделот за внатрешна контрола поднел и предлог за поведување постапка за утврдување одговорност за кршење на работниот ред и дисциплина.

Постапката за случајот продолжува пред надлежните институции.

The post ПОЛИЦАЕЦ ВОЗЕЛ БЕЗ ВОЗАЧКА И СО ПРЕГОЛЕМА БРЗИНА Кривична пријава против вработен во МВР од Куманово appeared first on plusinfo.mk.

Двајца полициски службеници од Струга се пријавени за сомнение дека при постапување со лице лишено од слобода употребиле прекумерна физичка сила, иако тоа било со лисици на рацете.

Одделот за внатрешна контрола, криминалистички истраги и професионални стандарди при Министерството за внатрешни работи поднел кривична пријава против Т.М., полициски службеник во Полициската станица Струга, и И.Ш., главен полицаец за вршење увиди на сообраќајни незгоди во Полициското одделение за безбедност на патниот сообраќај Струга.

Тие се сомничат за кривично дело „малтретирање во вршење на службата“ според член 143 од Кривичниот законик.

Според пријавата, случајот се случил на 14 мај 2026 година во просториите на Полициската станица Струга, додека било спроведувано лице кое претходно било лишено од слобода.

Иако лицето било со ставени лисици, двајцата полициски службеници, според наводите, употребиле прекумерна физичка сила и физички го нападнале со удари со раце и нозе.

Од МВР информираат дека против двајцата службеници ќе биде поднесен предлог за поведување постапка за утврдување дисциплинска одговорност.

Воедно, до завршување на дисциплинската постапка ќе им бидат изречени задолжителни мерки за одземање на службеното оружје и муниција, како и суспензија од работното место.

The post ГО УДИРАЛЕ СО РАЦЕ И СО НОЗЕ ДОДЕКА ИМАЛ ЛИСИЦИ Двајца полицајци од Струга под сомнение за прекумерна сила appeared first on plusinfo.mk.

Полициски службеник од Полициската станица за граничен надзор Чашка заработи кривична пријава откако за време на семејна прослава испукал повеќе истрели од огнено оружје во присуство на поголем број гости.

Одделот за внатрешна контрола, криминалистички истраги и професионални стандарди при МВР поднесе кривична пријава против З.Р. поради сомнение за кривичното дело „предизвикување општа опасност“, односно опасност по животот и телото на присутните.

Според информациите од МВР, инцидентот се случил на 22 мај годинава во дворот на семејната куќа на полицискиот службеник.

Освен кривичната пријава, против полицискиот службеник ќе биде поведена и постапка за утврдување дисциплинска одговорност.

Од МВР најавија дека ќе му бидат изречени задолжителни мерки, а до завршување на дисциплинската постапка ќе биде отстранет од работното место.

The post 📽️ ПОЛИЦАЕЦ ПУКАЛ СО ПИШТОЛ НА СЕМЕЈНА ПРОСЛАВА Ќе одговара за предизвикување општа опасност appeared first on plusinfo.mk.

Двајца полицајци од Скопје се соочуваат со кривична пријава откако, според МВР, употребиле прекумерна сила врз приведено лице и му нанеле повреди за време на службена интервенција.

Од Одделот за внатрешна контрола, криминалистички истраги и професионални стандарди при МВР информираа дека до Основното јавно обвинителство за гонење организиран криминал и корупција е поднесена кривична пријава против Д.С. и М.С., полициски службеници од Единицата за интервентна полиција при СВР Скопје.

Според информациите, инцидентот се случил на 19 април годинава околу 03 часот, кога при вршење службени задачи, двајцата полицајци наводно примениле прекумерна физичка сила врз лице кое претходно било лишено од слобода.

Од МВР наведуваат дека на лицето му биле нанесени повреди, а случајот бил предмет на внатрешна истрага.

Покрај кривичната пријава, против двајцата полициски службеници ќе биде поведена и постапка за утврдување одговорност поради кршење на работната дисциплина.

Надлежното обвинителство треба да утврди дали и каква одговорност ќе сносат пријавените полицајци.

The post ПРЕТЕПАЛЕ ВЕЌЕ ПРИВЕДЕНО ЛИЦЕ Полицајци осомничени за малтретирање при интервенција appeared first on plusinfo.mk.

Полициски службеници привеле 45-годишен вработен во Министерството за внатрешни работи откако направил серија сообраќајни прекршоци и се заканувал на колега на терен, информираат од МВР.

Настанот се случил на 1 април 2026 година на крстосницата меѓу улиците Јордан Мијалков и Димче Мирчев во Скопје, каде полицијата вршела физичка регулација на сообраќајот. Полициски службеник од СВР Скопје запрел патничко возило „мерцедес“ управувано од С.Р. (45), кој се движел во спротивна насока и претекнувал колона возила.

При контролата, С.Р. се претставил како вработен во МВР, но кажал дека нема документ за лична идентификација. Според соопштението, тој потоа почнал агресивно да се однесува и да му се заканува на полицискиот службеник.

Поради однесувањето, С.Р. бил приведен на лице место, а за случајот бил известен Одделот за внатрешна контрола, криминалистички истраги и професионални стандарди.

Против него се поднесени соодветни поднесоци за повеќе прекршоци, меѓу кои за нарушување на сообраќајните правила, непоседување лична карта и нарушување на јавниот ред и мир, согласно важечката законска регулатива.

The post ВРАБОТЕН ВО МВР СЕ ОДНЕСУВАЛ КАКО ДА Е НАД ЗАКОНОТ Возел во спротивна насока, кога полицајци го запреле, се заканувал appeared first on plusinfo.mk.

Полицаец од Кичево се соочува со кривична пријава за малтретирање на граѓанин, откако наводно употребил физичка сила иако ситуацијата веќе била смирена. Од Министерство за внатрешни работи информираат дека против него е поднесена пријава до Основното јавно обвинителство за гонење на организиран криминал и корупција.

Според информациите, полицаецот М.А., вработен во полициската станица во Кичево, на 12 февруари годинава интервенирал на кружниот тек меѓу булеварот Ослободување и улицата Рудничка, каде имало нарушување на јавниот ред и мир помеѓу две групи граѓани.

Иако ситуацијата била веќе смирена и лицата не давале отпор, полицаецот, според наодите на внатрешната контрола, неовластено употребил физичка сила врз едно лице. Поради тоа е поднесена кривична пријава за „малтретирање во вршење на службата“.

Од внатрешната контрола најавуваат и дисциплинска постапка против полицаецот. Во меѓувреме, му е одземено службеното оружје и муницијата, упатен е на задолжителен психијатриски и психолошки преглед, а исто така е суспендиран од работното место до завршување на постапката.

The post ПОЛИЦАЕЦ ОД КИЧЕВО ПРИЈАВЕН ЗА МАЛТРЕТИРАЊЕ Службеникот е суспендиран и остана без оружје appeared first on plusinfo.mk.