Владата очекува повратен одговор од студентите за предлогот за измена на моделот на субвенционираниот студентски оброк, откако на двочасовна средба биле разгледани и тоа прашање, но и прашањето за полагањето на правосудниот испит и можните решенија за него.

– Имавме конструктивна средба која траеше два часа. Ние им го објаснивме предлогот што го има Владата и цениме дека тој предлог е многу подобро решение од тоа што сега го имаат, за што и тие се согласија. Сега чекаме повратен одговор. Ни беше ветено дека истиот ден, до вечерта, ќе добиеме драфт-верзија на тоа што тие ќе го комуницираат со колегите. Не ја добивме. Денеска е втор ден и се надевам дека ќе ја добиеме – изјави Мицкоски.

Покачување на субвенционираниот студентски оброк од сегашните 3.500 на 4.500 денари месечно, можност за дополнителни попусти при купување храна и воведување посебна дигитална услуга преку апликацијата „М.услуги“, им преложила Владата на претставниците на студентските парламенти, кои завчера се сретнаа со премиерот Мицкоски, министерката за образование и наука Весна Јаневска и други владини претставници.

Според предлогот, во системот би биле вклучени ресторани, маркети, млечни ресторани и други оператори кај кои студентите би можеле да купуваат храна и пијалаци, како вода, јогурт и кисело млеко.

Премиерот вчера објасни дека со системот би се овозможило средствата да се користат за нивната намена, односно за студентски оброк, а не за други производи. За таа цел, како што рече, би се користела и вештачка интелигенција вградена во апликацијата.

Дополнително, вели Мицкоски, Владата би преговарала со трговците за студентите да добиваат попусти при купувањето храна, дури и кога ќе ја потрошат месечната субвенција.

Во однос на полагањето на правосудниот испит, Мицкоски денеска посочи дека решението што го изнело Министерството за правда е предлогот што го изработила Владата, оценувајќи дека досега немало конкретна иницијатива за надминување на ова прашање.

Според Мицкоски, владиниот предлог, кој треба да биде доставен до Венецијанската комисија, треба да овозможи полагање на испитот на јазикот на кој е завршено високото образование, односно остварување на правото на користење на мајчиниот јазик, но истовремено и почитување на принципот на владеење на правото.

– Решението што го нудиме е решение кое од една страна нуди задоволување на правото да се полага испитот на јазикот на кој е завршено високото образование, односно правото на својот мајчин јазик, а од друга страна да имаме владеење на правото, затоа што принципот „франка лингва“, односно еден јазик во правосудството, е практично главната препорака во мислењето што го дава Венецијанската комисија за Законот за употреба на јазиците – рече Мицкоски.

The post ВЛАДАТА ОЧЕКУВА ОДГОВОР ОД СТУДЕНТИТЕ ЗА СТУДЕНТСКИОТ ОБРОК Мицкоски на средбата го објаснил и предлогот за правосудниот испит appeared first on plusinfo.mk.

Покачување на субвенционираниот студентски оброк од сегашните околу 3.500 на 4.500 денари месечно, можност за дополнителни попусти при купување храна и воведување посебна дигитална услуга преку апликацијата М-услуги, ова е предлогот што Владата им го презентирала на претставниците на студентските парламенти на сите универзитети, информираше денеска премиерот Христијан Мицкоски одговарајќи на прашање на пратеничката од ВМРО-ДПМНЕ Драгана Бојковска за младинските политики и студентскиот стандард.

Мицкоски рече дека на вчерашната средба со студентските претставници, на која присуствувале и министерката за образование и наука Весна Јаневска и други владини претставници, отворено се разговарало за проблемите со кои се соочуваат студентите, условите во студентските домови и можностите за подобрување на стандардот.

Тој посочи дека биле разгледани буџетските издвојувања за студентски стандард во 2026 година во споредба со 2022 година, при што, според неговата оценка, средствата се двојно зголемени.

Говорејќи за субвенционираниот студентски оброк, Мицкоски рече дека Владата предложила нов модел со кој средствата би се зголемиле од сегашните околу 3.500 на 4.500 денари месечно, а студентите би можеле да ги користат преку посебна услуга во апликацијата М-услуги.

Според предлогот, во системот би биле вклучени ресторани, маркети, млечни ресторани и други оператори кај кои студентите би можеле да купуваат храна и пијалаци, како вода, јогурт и кисело млеко.

– Ајде вака да направиме, ние на оваа апликација М-услуги да додадеме М-студентски оброк во кој што вашите три и пол илјади денари сега што ги добивате месечно ќе вредат 4.500 денари – рече Мицкоски.

Тој објасни дека со системот би се овозможило средствата да се користат за нивната намена, односно за студентски оброк, а не за други производи. За таа цел, како што рече, би се користела и вештачка интелигенција вградена во апликацијата. Дополнително, Владата би преговарала со трговците за студентите да добиваат попусти при купувањето храна, дури и откако ќе ја потрошат месечната субвенција.

– Имаме чувство, но и делумни информации дека голем дел од корисниците на студентскиот оброк средствата кои што ги добиваат на дебитните картички не ги користат токму за студентски оброк, туку ги користат за нешто друго – рече Мицкоски.

Тој додаде дека со таа апликација би обезбедиле список на ресторани, маркети, млечни ресторани каде што ќе може да купуваат храна, пијалаци, но не и алкохол, цигари, притоа тој попуст којшто ќе им го обезбедат да важи и по искористување на средствата за студентскиот оброк.

– Откако вие ќе го потрошите тој студентски оброк повторно да ви важи до крајот на месецот. Еве ако некој ресторан обезбеди 20, 25 проценти попуст, вие сте го искористиле вашиот студентски оброк до 15-ти во месецот, но на 20-ти со вашите колеги седнувате повторно на појадок, вие ќе го платите, но наместо 100 денари ќе добиете попуст од 25 проценти, ќе го платите 75 денари – појасни премиерот.

Мицкоски нагласи дека предлогот им бил презентиран на студентските претставници како можност за разгледување, без да се бара веднаш да донесат одлука. Тие, додаде тој, треба да разговараат со своите колеги и да се изјаснат за предложениот модел.

Нагласи и дека за реализацијата ќе биде потребна соодветна процедура, вклучително и подготовка на софтверско решение и спроведување тендер.

Во однос на инфраструктурата, премиерот ја посочи изградбата на новиот кампус на Универзитетот „Мајка Тереза“, како и реконструкцијата на студентскиот дом „Стив Наумов“, каде што, како што рече, моментно престојуваат околу 1.150 студенти.

Мицкоски најави дека до крајот на годината треба да биде пуштен во употреба и реконструираниот студентски дом „Кузман Јосифовски – Питу“, а потсети и дека е изгласан закон со кој е започната реконструкција на осум ученички и студентски домови во земјава.

Премиерот оцени дека студентскиот стандард сè уште не е на нивото на условите што ги имаат студентите во некои европски земји, но оти разликата се намалува.

– Дали е најдобро? Не е најдобро. Дали можеби нивните колеги во Германија имаат подобри услови? Најверојатно да, но дали таа разлика е намалена? Исто така ќе кажам да. Тоа е суштината. Дали тешко се живее? Тешко се живее. Дали е тежок студентскиот живот? Да тежок е. Но дали е подобар од пред три, четири, пет години? Подобар е. Тоа е суштината на секоја влада. И дали сè уште студентите во Германија ќе добиваат подобри услови ќе имаат подобри? Најверојатно да. Но дали таа разлика е намалена. Тоа е суштината – рече Мицкоски.

Тој истакна дека подобрувањето на условите за студентите треба да биде проследено и со унапредување на квалитетот на високото образование. Во тој контекст, се осврна на позицијата на најстариот македонски универзитет на Шангајската листа, оценувајќи дека пред две децении бил подобро рангиран отколку денес.

Мицкоски повика на заеднички ангажман за подобрување на позицијата на универзитетите, нагласувајќи дека тоа би придонело за поголемо знаење кај студентите и подобар имиџ на државата.

The post СТУДЕНТСКИОТ ОБРОК МОЖЕ ДА СЕ ЗГОЛЕМИ НА 4.500 ДЕНАРИ МЕСЕЧНО Ќе се користи преку М-услуги и ќе има можност за дополнителни попусти appeared first on plusinfo.mk.

Студентите ќе добијат можност сами да одлучат дали го прифаќаат новиот предложен ваучерски систем за субвенциониран оброк. Националното студентско тело најави отворање дигитална платформа „Студентски референдум“, на која ќе се гласа за предложената промена.

Барањето, пак, дневниот износ да се зголеми од 140 на 200 денари останува отворено.

Претседателката на Универзитетското студентско собрание при УКИМ, Ангела Василевска, соопшти дека платформата треба да биде подготвена до следната недела. Намерата е за прашањето да не одлучуваат само студентските претставници, туку сите студенти што ќе добијат пристап до гласањето.

– Бидејќи секој има поинакво мислење и да не одлучуваат само претставниците, подобро е тоа да биде изгласано на еден студентски референдум – изјави Василевска.

Според најавата, секој студент ќе може да учествува преку дигитален систем поврзан со неговиот индекс и соодветна електронска адреса.

Платформата не е замислена само за субвенционираниот оброк. Студентските претставници сакаат во иднина преку неа да се одлучува и за други прашања што ги засегаат студентите.

Според Василевска, иницијативата е поднесена пред повеќе од месец ипол, но сè уште нема одговор кога би почнало зголемувањето и колку точно би изнесувало.

– Не е спорно дали ќе имаме нов систем, спорно е кога државата ќе го зголеми износот на субвенционираниот студентски оброк – порача таа.

Василевска го поздрави тоа што во новиот систем би останале и маркетите, но посочи дека на вчерашната средба во Владата не се разговарало конкретно за висината на покачувањето.

Студентите најавуваат дека ќе го почекаат одговорот на институциите до следната недела, кога планираат да ја подготват и платформата за референдум.

Министерката за образование и наука Весна Јаневска денеска повтори дека Владата ќе најде решение за барањето за повисок студентски оброк.

– Секако, ќе најдеме решение и верувам дека на крајот сите ќе бидеме задоволни од исходот. Зголемување секако ќе има, која ќе биде сумата – дополнително ќе се договориме – изјави Јаневска.

Таа објасни дека предложениот ваучерски систем, сличен на оној во Словенија, треба да обезбеди државната субвенција да се користи исклучиво за храна.

Според министерката, со сегашните платежни картички студентите можат да купуваат и производи што не се предвидени со намената на субвенцијата.

– Целта на овој систем е да ја користат субвенцијата за здрава храна, а тоа и била намената со законот, односно да не може да се користат за алкохол, цигари и друго нешто – рече Јаневска.

Ваучерите би можеле да се користат кај определени оператори што продаваат храна, а според студентските претставници, во системот би останале и маркетите.

Министерката посочи дека претходното раководство на студентското собрание при УКИМ се согласило да не се зголемува износот, туку да се прошири бројот на студентите што имаат право на субвенцијата.

Според неа, тоа барање веќе е исполнето, а сегашната иницијатива за покачување е ново барање за кое се водат разговори.

The post СТУДЕНТИТЕ ЕЛЕКТРОНСКИ ЌЕ ОДЛУЧУВААТ ЗА ВАУЧЕРИТЕ Не се против новиот систем, но бараат 200 денари за оброк appeared first on plusinfo.mk.

Министерката за образование и наука Весна Јаневска е уверена дека наскоро ќе се најде решение за студентскиот оброк. Продолжуваат разговорите со студентските претставници, а за денеска е предвидена и средба на премиерот и студентите.

Таа потврди дека студентите побарале покачување на износот за студентски оброк.

– Јас не сум рекла дека тие никогаш не побарале, побараа покачување со тоа што ние имаме договор со претходното раководство дека ќе го прошириме опсегот, а нема да ја покачиме сумата. Тоа им беше во тој момент поважно. Опсегот е проширен така како што сме се договориле. Сега тие имаат ново барање. По новото барање сум апсолутно сигурна дека ќе најдеме некакво решение и мислам дека сме блиску до тоа. Им понудивме ваучерски систем сличен на оној во Словенија, што беше барање на претходното раководство. Дури мислам дека нешто слично има и во некои други западноевропски земји. Апсолутно сум сигурна дека ќе најдеме решение, но гледам една мала дисонанца во континуитет на раководството на студентските собранија, а мислам дека не беа сосема доволно информирани за договорите што претходно сме ги имале со студентите – нагласи таа.

Ваучерот ќе може да се користи во провајдери за храна – сендвичари, пекари, ресторани за да се користат средствата како субвенција за храна, а не за цигари, алкохол и други нивни потреби, оти законот е за субвенција на оброк.

– ​Би сакала да кажам дека имаме двојно субвенционирање на оброкот, затоа што студентите кои се сместени во студентски домови веќе имаат храна. Но во ред е, ние сакаме да ги задоволиме потребите на нашите млади кои во иднина ќе ја водат оваа држава и ќе се договараме и понатаму со нив. Ќе видиме до кое решение ќе дојдеме – додаде Јаневска.

Осврнувајќи се на барањата за бесплатен јавен и меѓуградски превоз, Јаневска рече дека јавниот превоз не е во надлежност на Министерството за образование и наука. Таа додаде дека за меѓуградскиот превоз во моментов нема законска можност, но дека ова прашање може да се разгледува во иднина, во консултација со студентите.

– Менито за студентите се прави според калориска вредност. Не знам колку, што, имаат за вечера. Инаку, 20 години не е покачена станарината, односно повторно субвенционира државата оној дел за сместувањето кој студентите треба да го дадат како дел за сместување во домовите. По 20 години, во реновираните студентски домови, ќе биде покачена цената на сместувањето. Тоа е забелешка и од државната ревизија која вели дека студентските домови со таква партиципација не можат да опстојат. ​Досега од партиципацијата се плаќаше одржувањето на домовите, режијата, храната, сместувањето, сè, па и платите. Министерството ги презеде платите на вработените од партиципацијата и дел од партиципацијата, оти не може само со 6.600 денари да опстојат домовите – рече министерката Јаневска.

Таа нагласи дека ако државата не ја партиципира станарината, таа би била двојно или тројно поголема. Министерката најави дека за вториот семестар ќе биде отворен и студентскиот дом „Кузман Јосифовски Питу“.

Таа истакна дека студентите добиваат сериозни услови за да можат нормално да живаат, истакнувајќи дека веќе нема бубашваби и глувци по домовиве.

– Сега го нема тоа. Сега имаат струја, имаат парно, имаат храна, имаат пристојни услови, меѓутоа во две години – толку се може. ​Есенва почнуваме реконструкција на втор лот на нови три студентски домови и веројатно, напролет, на сите останати други студентски домови. Така што полека-полека ги доведуваме работите во ред – соопшти министерката.

Министерката упати апел до студентите да се однесуваат одговорно кон заедничкиот имот, нагласувајќи дека државата вложува средства за да им обезбеди пристојни услови за живот и дека тие треба да придонесат во нивното зачувување.

– Апел до студентите, кога ќе вклучат микробранова да стојат до неа, да не се качуваат на радијаторите, а влажните марамчиња не се разградливи… Ќе ги преземеме сите неопходни мерки за да го зачуваме тоа што го градиме заедно со нив, се разбира. Не би сакала да генерализирам, има многу совесни студенти кои знаат каде се наоѓаат и кои со одговорност се однесуваат кон сè што се наоѓа во студентскиот дом. Ова ќе го сметаме за инцидент во првиот момент, а понатаму, ќе си ја преземат одговорноста – додаде министерката за образование и наука.

Таа повтори дека во домот „Стив Наумов“ имало непријатности направени од невнимание на студентите.

– Во договор со директорот, им рековме дека треба да ги потсетат студентите на куќниот ред. Предвидени се казни, предвидени се опомени за првата грешка, а после тоа – казни до бркање од студентскиот дом, односно забрана за престој во студентски дом. И мислам дека нашите студенти мора да бидат свесни дека општото добро што државата го гради за нив – тие ќе мора поинаку да го гледаат отколку досега, односно ќе треба да водат грижа, затоа што тоа е од нив за нив – рече Јаневска.

The post СТУДЕНТИТЕ ДА НЕ СЕ КАЧУВААТ ПО РАДИЈАТОРИ И ДА ГИ ЧУВААТ ДОМОВИТЕ Јаневска понуди ваучерски систем за студентскиот оброк appeared first on plusinfo.mk.

Министерката за образование и наука Весна Јаневска смета дека 15 процентното намалување на ученичката кошничка е добро и е олеснителна околност за родителите.

Одговарајќи на новинарско прашање денеска на прес-конференција таа нагласи дека процентот е прилично соодветен и ќе биде од корист за родителите.

– Државата го прави тоа што може да го направи. Не заборавајте дека образованието основно и средно е задолжително, но и бесплатно. Учениците добиваат учебници, тоа е помош на родителите, добиваат превоз, што е исто така помош на родителите, општините обезбедуваат електронски уреди, одреден број општини обезбедуваат ужина и храна. Значи, тоа што можеме да го направиме, го правиме. Сметам дека ова е добра олеснителна околност за родителите – истакна Јаневска.

Во врска со висината на студентскиот оброк рече дека во овој момент не планираат зголемување, а немале ниту барање од студентите, бидејќи, според министерката, сумата ја покачиле наеднаш пред две години за 20 денари, наместо предвидените по седум денари годишно.

– Јас сум во постојан контакт со студентските организации. Пред две години во разговор со студентите тие бараа проширување на опсегот и рекоа дека се задоволни од цената. Но пред тие две години ние, наместо да покачуваме по седум денари, односно да се усогласуваме со инфлационата стапка, ние покачивме одеднаш 20 денари. Значи, најмалку за три години однапред ние им дадовме пари на студентите и досега кај мене или во Министерството, поплака за студентскиот оброк не е стигната – изјави Јаневска.

Смета дека студентите се задоволни од износот, но и од проширувањето на опсегот и постдипломците да имаат студенстки оброк.

Во однос на ревизорскиот извештај за работењето на студентските домови, таа подвлече дека е забележано недомаќинско работење од раководството на неколку студентски домови и оти е пријавено во релевантните институции, кои треба да постапат.

The post УЧЕНИЧКАТА КОШНИЧКА Е НАМАЛЕНА ЗА 15 ОТСТО Јаневска откри колку ќе им олесни на родителите appeared first on plusinfo.mk.

Министерството за образование и наука објави повик за остварување на правото на субвенциониран студентски оброк за академската 2026/2027 година и ги повика сите студенти кои ги исполнуваат условите да се пријават.

Тие треба да се државјани на Македонија, да се редовни студенти запишани на прв циклус, односно втор циклус на студии, како и на интегрирани студии на државните и приватните универзитети и да немаат месечен приход по кој било основ поголем од минималната нето-плата во Републиката за тековната година.

Кандидатите треба да се пријават електронски на https://e-uslugi.mon.gov.mk/ и при пријавувањето да ги пополнат обрасците Пријава за стекнување со право на субвенциониран студентски оброк и Изјава за точност на внесените податоци во пријавата за стекнување со право на субвенциониран студентски оброк и потпишани да ги прикачат кон електронската апликација на https://e-uslugi.mon.gov.mk/

Рокот за пријавување за тековните студенти, како и за лицата кои ќе се запишат и ќе се стекнат со статус на студенти во академската 2026/2027 година, е од 26 до 31 август 2026.

„Исто така, почнувајќи од октомври, секој 1. до 5. во месецот за секој месец од академската 2026/2027 година ќе тече рокот за пријавување на студентите кои не го оствариле правото на субвенциониран студентски оброк по Јавниот повик за остварување на правото на субвенциониран студентски оброк или чие право престанало поради неисполнување на некој од критериумите, тогаш кога повторно ќе ги исполнуваат критериумите наведени во овој повик. Сите студенти кои го оствариле правото на студентски оброк ќе почнат да ги примаат средствата во месецот што следува по завршувањето на месецот во кој се пријавиле за правото на студентски оброк“, соопшти МОН.

Субвенциониран студентски оброк е финансиска поддршка во износ од 140 денари, која студентот ја добива од Министерството за образование и наука за купување приготвена храна.

Корисниците имаат право услугата да ја користат од понеделник до сабота. Доколку корисникот на субвенциониран студентски оброк во периодот од понеделник до сабота не го искористи правото на оброк, износот му е достапен на користење на сметката до крајот на тековната седмица, заклучно со сабота. Правото за субвенциониран студентски оброк корисникот не може да го остварува во периодот од 1 јули до 1 октомври во годината во која се стекнал со правото на субвенционирање студентски оброк, како и за време на државни празници и неработни денови.

Министерството за образование и наука склучи договор со Шпаркасе банка АД Скопје за реализација на исплатите за субвенциониран студентски оброк. Оттаму, сите студенти кои ќе се стекнат со ова право , ќе треба да потпишат договор со Шпаркасе банка за отворање посебна сметка, поврзана со наменска платежна картичка за субвенциониран студентски оброк, независно од тоа дали претходно биле клиенти на таа банка. Рокот и начинот на подигање на картичките ќе биде дополнително објавен од Министерството и Шпаркасе банка.

Јавниот повик на МОН содржи повеќе информации за условите за остварување на правото субвенциониран студентски оброк и за начинот на аплицирање. За сите прашања поврзани со пријавувањето на корисниците МОН обезбеди поддршка преку Секторот за ученички и студентски стандард и можност да се контактира по електронска пошта: subvencioniran.obrok@mon.gov.mk

The post СТУДЕНТИТЕ ЌЕ ДОБИВААТ ПО 140 ДЕНАРИ ЗА ОБРОК Објавен повикот за субвенционирање, пријавувањето е од 26 август appeared first on plusinfo.mk.

Владата планира 10 милијарди евра капитални инвестиции во патната и железничката инфраструктура во следната деценија, додека годинава се достигнати рекордни 1,255 милијарди во поновата историја, вели ВМРО-ДПМНЕ во соопштение до јавноста.

Додека СДСМ и ДУИ оставаа кризи, долгови и блокади, ВМРО-ДПМНЕ донесе стабилност, развој и конкретни резултати кои денес ги чувствуваат граѓаните, се наведува во соопштението.

ВМРО-ДПМНЕ споменува дека до крајот на 2027 година треба да бидат завршени 6 нови автопатски делници. Партијата исто така истканува дека биле доделени 55.000 ваучери за електронски уреди во вредност од 250 евра, 10 илјади евра за отпочнување на сопствен бизнис со Оперативниот план за 2025 година, а тоа ќе продолжи и оваа година.

„Доделени беа 10 илјади евра за млади земјоделци, се прошири опсегот за субвенционираниот студентски оброк. Ова се показателите дека Владата се грижи за младите да можат да градат иднина дома“.

Во соопштението се вели и дека во изминатиот период се зголемија платите и пензиите, дека Владата ја зајакнува економијата и дека економијата седум квартали по ред бележи економски раст над 3 проценти.

„Истовремено градиме нови градинки, училишта, здравствени установи, спортски сали и патишта, додека враќаме наследени долгови во просек од над 2 милијарди евра годишно.

ВМРО-ДПМНЕ докажа дека знае како да работи за државата и граѓаните. Докажа дека националните интереси немаат цена и дека Македонија може да има власт која не капитулира кога се во прашање достоинството, идентитетот и интересите на народот.

Денес Македонија не стои во место. Македонија се движи напред. Македонија забрзува“, велат од партијата порачувајќи дека разликата со претходната власт е очигледна.

The post ПЛАНОТ Е 10 МИЛИЈАРДИ ЗА 10 ГОДИНИ И 6 НОВИ АВТОПАТИ ДО 2027 Годинава во инвестиции се вложени рекордни 1,255 милијарди евра appeared first on plusinfo.mk.

Министерството за образование и наука ги информира студентите дека рокот за пријавување за правото на субвенциониран студентски оброк за академската 2025/2026 година трае од денеска до 5 февруари 2026.

Правото на субвенциониран студентски оброк може да го користат сите редовни студенти на додипломски студии кои имаат месечен приход помал од минималната нето плата, но и студентите запишани на постдипломски студии и на интегрирани студии на државните и на приватните универзитети во државата. Студентите кои ги исполнуваат условите, а не аплицирале досега, може да поднесат апликација, електронски преку порталот: https://e-uslugi.mon.gov.mk.

Условите и критериумите за остварување на правото на субвенциониран студентски оброк се достапни на линкот https://mon.gov.mk/mk-MK/konkursi-i-stipendii/konkursi-mon/javen-povik-za-ostvaruvanje-na-pravoto-na-subvencioniran-studentski-obrok-za-akademskata-20252026-godina

За поддршка при аплицирањето, контактирајте преку е-пошта: subvencioniran.obrok@mon.gov.mk

-Студентите на кои им било прекинато правото на субвенциониран оброк, а сметаат дека ги исполнуваат условите, може повторно да аплицираат. Овој рок е, исто така, отворен за студентите кои не аплицирале во претходните активни рокови, информира Министерството за образование и наука.

The post ТЕЧЕ РОКОТ ЗА ПРИЈАВУВАЊЕ ЗА СУБВЕНЦИОНИРАН СТУДЕНТСКИ ОБРОК Последен ден е 5 февруари appeared first on plusinfo.mk.

Националното студентско тело информира дека денеска официјално го испрати до Министерството за образование и наука и Управата за јавни приходи Барањето за разграничување на поимот „приход“ од „прилив“ при примената на мерката за субвенциониран студентски оброк.

– Со ова барање се укажува на потребата институциите да направат јасна разлика меѓу реален приход и прилив на средства на студентските сметки со цел да се спречи неправедното одбивање на студенти од користење на оваа мерка, стои во соопштението од Националното студентско тело.

Оттаму наведуваат дека согласно член 9, став 1 од Законот за субвенциониран студентски оброк („Службен весник на Република Северна Македонија“ бр. 31/20, 150/21, 251/22, 91/23, 30/24 и 74/25), корисници на правото на субвенциониран студентски оброк се редовни студенти запишани на прв циклус, односно втор циклус на студии, како и на интегрирани студии на државните и приватните универзитети во Републиката, државјани на Република Северна Македонија и кои немаат месечен приход по кој било основ поголем од минималната нето-плата во Републиката за тековната година.

– Во пракса, при обработка на пријавите за користење на оваа мерка, се појавува проблем во толкувањето и примената на поимот „приход“, бидејќи институциите користат податоци за „приливи“ на средствата на трансакциските сметки на студентите, без да се направи јасно разграничување меѓу овие два поими. Како резултат на тоа, одреден број студенти се одбиваат од користење на оваа мерка затоа што имале приливи (на пример, семејни парични трансфери, уплати за кирија, студентски надоместоци или други нефискални средства), кои не претставуваат реален приход во смисла на остварен приход по основ на работа, договор или деловна активност, се вели во барањето.

Националното студентско тело во барањето наведува примери од праксата и се осврнува на правната и фискалната аргументација.

„Националното студентско тело бара од Управата за јавни приходи (УЈП) при доставување на податоци до Министерството за образование и наука да врши разграничување на приходите од приливите, односно: да ги евидентира и испраќа само оние средства кои се остварени под шифри на доход што претставуваат реален приход, како што се: плата, хонорар, самостојна дејност и други облици на остварен приход, а не и податоци за приливи по други основи, кои претставуваат нефискални трансакции или парични трансфери меѓу физички лица“, се наведува во барањето.

Во поднесеното барање апелираат Министерството за образование и наука (МОН) при обработка на пријавите за субвенциониран студентски оброк да ја зема предвид оваа разлика и да ја усогласи методологијата за проверка на примањата со реалната дефиниција на поимот „приход“ од Законот.

„Ова барање има за цел да обезбеди еднаква и правична примена на Законот, со што нема да се дискриминираат студенти кои не остваруваат реален приход, туку добиваат семејна или нефискална финансиска поддршка“, се вели во соопштението од Националното студентско тело.

The post БЕСПЛАТНИОТ ОБРОК СТАНА ПРОБЛЕМ ЗА ДЕЛ ОД СТУДЕНТИТЕ Се бара да се разграничат „приход“ и „прилив“ во државната мерка appeared first on plusinfo.mk.

Министерката за образование и наука Весна Јаневска се надева дека постои можност за зголемување на сумата на студентскиот оброк поради инфлацијата, но како што рече – за следната година.

– Искрено се надевам дека постои таква можност. Да, треба да има нивелација на студентскиот оброк со инфлацијата, за следната година зборуваме. За оваа година, тие побараа проширување на квотата, ние ја проширивме квотата. Досега за сè што побарале сме им излегле во пресрет и јас им благодарам, бидејќи тоа тие и го признваат, го промовираат – рече Јаневска.

Таа се надева дека мерката за зголемување на сумата на студентскиот оброк ќе успеат да ја спроведат идната година, со тоа што како што потенцира, тоа не зависи само од неа.

– Зависи од состојбата на буџетот. Но дека ќе ги застапувам нивните барања, кога сметам дека се оправдани, тоа сум и го кажала, ќе си го одржам зборот и ќе ги застапувам нивните оправдани барања сè додека сум министер – изјави Јаневска, која денеска во Скопје заедно со претставници на Универзитетот „Гоце Делчев“-Штип го промовираа прирачникот за Вештачка интелегенција во образованието.

The post ЌЕ СЕ ЗГОЛЕМИ СУМАТА НА СТУДЕНТСКИОТ ОБРОК, АМА СЛЕДНАТА ГОДИНА Јаневска им даде збор на студентите appeared first on plusinfo.mk.