Српскиот тениски ас Новак Ѓоковиќ неочекувано испадна од Мастерсот во Париз, откако загуби од австралискиот квалификант Ринки Хиџиката со 6:2, 3:6, 3:6. По поразот, кој го остави без шанси за настап на завршниот турнир во Торино, српскиот тенисер призна дека целосно ја изгубил контролата врз мечот, иако верувал дека требало да победи.

– Требаше да победам, одиграв добро во првиот сет, но потоа целосно ја изгубив контролата врз мечот – изјави Ѓоковиќ.

Србинот убедливо го доби првиот сет со 6:2 и продолжи со добра игра на почетокот од вториот. Но Хиџиката постепено го презеде водството во размените, го доби вториот сет со 6:3, а со истиот резултат славеше и во решавачкиот трет сет.

Натпреварот траеше нешто повеќе од два часа, а Ѓоковиќ по елиминацијата призна дека противникот заслужено победил.

– Имав чувство дека доминирам во текот на првиот сет и уште неколку гејма во вториот, но потоа тој го подигна нивото на својата игра. Јас не сервирав толку добро, а искрено кажано, тој одигра неверојатно. Речиси и да не промаши удар, ја држеше топката ниско и прикажа извонредна игра – рече Ѓоковиќ.

Career-defining win for Rinky Hijikata

He upsets Novak Djokovic in Paris.

#RolexParisMasters https://t.co/Fy6e6ZKjj7

— Tennis Channel (@TennisChannel) November 4, 2026

Тој жали и за пропуштените можности во решавачкиот сет, но не бара оправдување за поразот.

– Штета што не ги искористив шансите во третиот сет, но мислам дека неговата победа е сосема заслужена – додаде Србинот.

Поразот во Париз значи и предвремен крај на сезоната за Ѓоковиќ. Тој призна дека чувствува замор, но нагласи дека тоа не ја намалува вредноста на победата на Хиџиката.

– Не се чувствувам баш свежо во оваа фаза од сезоната, но тоа не е оправдување за поразот. Планот сега е само да одмарам, навистина ќе се радувам на одморот што следи – изјави Ѓоковиќ.

Од друга страна, Хиџиката вели дека победата над Ѓоковиќ е и прашање на среќа:

– Искрено, не бев сигурен дали ќе можам да излезам на теренот денес, па затоа бев среќен што можев да играм. Се обидов да се држам цврсто, имав среќа во неколку големи поени и го одржав моето ниво онолку долго колку што можев.

На турнирот во Париз претходно беше елиминиран и германскиот тенисер Александар Зверев, со што продолжи серијата изненадувања меѓу фаворитите.

Зверев изгуби од Италијанецот Лоренцо Музети, кој го победи со 7:6 (7:5), 6:2.

The post 📽️ ХИЏИКАТА ГО ИЗНЕНАДИ ЃОКОВИЌ ВО ПАРИЗ „Не сум свеж, но тоа не е оправдување“ appeared first on plusinfo.mk.