Премиерот Христијан Мицкоски денеска ја оцени вчерашната средба со претседателката на Европската комисија Урсула фон дер Лајен како исклучително пријателска, корисна и содржајна, нагласувајќи дека таа можеби ќе биде клучна за некои процеси во иднина, иако како што рече – не е задоволен од пораките во однос на уставните измени.

– Средбата би ја оценил како исклучително пријателска, корисна, содржајна и ценам дека можеби и ќе биде клучна за некои процеси во иднина. Тие процеси очекувам да почнат веќе следната недела, откако веќе Министерството за надворешни работи и надворешна трговија достави барање до колегите од нашиот источен сосед за билатерална средба. Од друга страна, не можам да кажам дека сум задоволен од пораките коишто ги испрати претседателката. Таа јасно кажа дека стои на маса промената на Уставот, работа којашто е прифатена од претходната влада – рече Мицкоски одговарајќи на новинарско прашање по извршениот увид на градежни активности на мостот што се гради на улица „Љубљанска“ во Општина Карпош.

Тој ја обвини претходната коалиција предводена од СДСМ и ДУИ дека во отсуство на креативност и предлози за надминување на состојбата, се обидува „преку лаги и измислици“ да испраќа пораки дека актуелната Влада ќе ја промени преговарачката рамка.

Мицкоски најави дека Владата ќе продолжи со активностите и порача, но како што додаде потребно е време и трпение.

– Стигнавме до разговори. Порано нешто што не беше возможно еве, се случи. И уште многу работи ќе направиме што тие не можат ниту во најдобриот сон да ги замислат. Само треба време и трпение. Ова се процеси кога имате квислинзи коишто распродаваат и патриотска влада којашто си ја сака државата и којашто треба да го врати тоа што квислинзите го распродале. Зборувам за СДСМ, овие од ДУИ тоа не ги интересирало ниту пак имале било какви чувства кога постигнувале договор за Македонија – рече премиерот.

Според Мицкоски, пораките од Фон дер Лајен сепак создаваат чувство на охрабрување, особено пораката дека личниот ангажман на Владата и споредбата на реформите покажуваат дека земјава е најдобра во регионот.

– Постепената или градуална интеграција е исто така шанса за нас. Сето ова нè охрабрува и нè мотивира да продолжиме по патот на реформите во периодот којшто следи. Јас во ноември месец двапати имам закажано патување во Брисел, првиот кај еврокомесарката за проширување и добрососедска политика, вториот е настан оној регионален самит којшто го имаме со Европската Унија и Западен Балкан. Така што, ќе се бориме. Нема предавање, ќе се бориме, не е лесно, премногу испопродадоа овие претходно, премногу испоуништија, премногу испокрадоа, но не се откажуваме. Украденото ќе го вратиме, тоа што е распродадено ќе се бориме да го повратиме. Тоа е задачата на оваа генерација – истакна премиерот.

Во однос на најавената билатерална средба со бугарската страна, на новинарско прашање дали има повратна информација и што очекува од средбата, како и што би се случило доколку таа биде одбиена, Мицкоски рече дека во таков случај „уште еднаш ќе се потврдат сите оние тези коишто ние ги имаме и за што сме загрижени“, но додаде дека не го очекува тоа.

– Не очекувам, не би било паметно да одбијат, но во ред, тоа е нивна суверена одлука, не е тоа наша одлука. Јас добив, би рекол, конструктивен совет од страна на претседателката, да го замолам министерот за надворешни работи и надворешна трговија да побара средба на маргините на состанокот повод Коридорот 8. Јас тоа го сторив, бидејќи ценам дека претседателката апсолутно беше во право кога го предложи тоа. Министерот побара, сега останува на нашиот источен сосед да одлучи што понатаму – истакна Мицкоски.

The post МИЦКОСКИ НЕ Е ЗАДОВОЛЕН ОД ПОРАКИТЕ НА УРСУЛА ФОН ДЕР ЛАЈЕН „Ние мора да го вратиме она што квислинзите го распродале“ appeared first on plusinfo.mk.

Претседателката на Европската комисија Урсула фон дер Лајен денеска напладне пристигнува во Скопје на средби со премиерот Христијан Мицкоски и со претседателката Гордана Сиљановска-Давкова.

Според агендата, фон дер Лајен прво ќе има тет-а-тет средба со Мицкоски и средба со членовите од владиниот кабинет по што ќе одржи заедничка прес-конференција со премиерот Мицкоски. Потоа, во 14:30 часот е закажана средбата со претседателката Сиљановска-Давкова.

Фон дер Лајен доаѓа во Скопје како дел од нејзината балканска турнеја, во која овој пат не се опфатени Србија и Босна и Херцеговина каде се закажани избори.

Во фокусот на разговорите во Скопје ќе биде европската интеграција на земјава, а се очекува да стане збор и за спорот со Бугарија.

„Политико“ објави дека Европската унија подготвува пакет со планови за забрзување на процесот на пристапување за четири држави меѓу кои не е Македонија. Станува збор за Украина, Молдавија, Албанија и Црна Гора.

Мицкоски во вторникот во изјава за медиумите рече дека објавата на „Политико“ е нелогична затоа што Македонија испорачала најголем дел од реформите.

– Ако е тоа точно треба да ја прашате ЕУ, зошто е тоа така. Таа информација ја објави медиум. Имајќи во предвид дека ние испорачавме најголем дел од реформите што се дел од Реформската агенда и Планот за раст веќе во два извештајни периоди и дека пристапувањето во ЕУ е процес во кој се оценува врз основа на заслуги, за мене ова е нелогично. Затоа треба да видиме дали е така или не е. Моите информации велат дека не е така – изјави Мицкоски

Опозицијата вчера упати остри критики до Владата предводена од Мицкоски предупредувајќи дека Македонија ризикува да остане изолирана во момент кога други земји напредуваат кон ЕУ, а тоа негативно ќе се одрази на севкупниот живот во земјата.

Поради официјалната посета на земјава на претседателката на Европската комисија СВР Скопје – Единицата за безбедност на патниот сообраќај за денеска воведе посебен режим на сообраќајот по сообраќајниците на поширокото централно подрачје на Град Скопје.

МВР апелира до сите граѓани учесници во сообраќајот да се почитуваат наредбите кои ќе ги даваат униформираните полициски службеници.

The post УРСУЛА ФОН ДЕР ЛАЈЕН ДЕНЕСКА ВО СКОПЈЕ Во фокусот евроинтеграциите и реформите appeared first on plusinfo.mk.

Утре, петок, во Скопје ќе има посебен режим на сообраќај во Скопје поради посетата на претседателката на Европската комисија Урсула Фон дер Лајен.

Единицата за безбедност на патниот сообраќај ќе преземе мерки за посебен режим на сообраќајот по сообраќајниците на поширокото централно подрачје на Град Скопје.

МВР апелира до сите граѓани учесници во сообраќајот да се почитуваат наредбите кои ќе ги даваат униформираните полициски службеници

The post ПОСЕБЕН РЕЖИМ НА СООБРАЌАЈ ВО ПЕТОК Во посета доаѓа Урсула Фон дер Лајен appeared first on plusinfo.mk.

Папата Лав XIV ги повика младите генерации во Европа да не се обесхрабруваат поради глобалните кризи и конфликти, упатувајќи ја пораката „Не плашете се од иднината“ на последниот ден од својата четиридневна посета на Франција, за време на обраќањето во градот Мец.

Поглаварот на Католичката црква во својот говор истакна дека односите меѓу луѓето и меѓу државите стануваат сè поварварски, при што не се почитува дадениот збор, а наместо тоа, луѓето се фалат со лаги и измами. Притоа, тој не именуваше конкретни политичари или држави.

Заедно со францускиот претседател Емануел Макрон, поглаварот на Католичката црква ја повика Европа да стави крај на оваа надолна спирала, потсетувајќи дека во изминатите 80 години таа импресивно покажала оти е можно различните мислења, барања и интереси да се застапуваат преку обединување, наместо преку меѓусебна борба.

Папата Лав XIV го избра Мец за последна станица од својата четиридневна апостолска посета бидејќи тој град бил дом на францускиот политичар Робер Шуман (1886-1963), еден од татковците-основачи на Европската Унија. Во годините по Втората светска војна, како министер за надворешни работи на Франција, Шуман ги постави основните темели на современа Европа.

The post „НЕ ПЛАШЕТЕ СЕ ОД ИДНИНАТА“ Порака од Папата Лав до младите генерации appeared first on plusinfo.mk.

Кинескиот претседател Си Џинпинг, по завршувањето на својата тридневна државна посета на САД, го покани американскиот претседател Доналд Трамп да ја посети Кина.

За време на церемонијата со чај во Белата куќа, Си изјави дека двајцата лидери би можеле да имаат уште две можности за средба оваа година: на самитот на Азиско-пацифичката економска соработка (АПЕК) во Кина и на самитот на Г20 во Мајами во декември.

– Ги покануваме претседателот и неговата сопруга да ја посетат Кина – рече Си.

– Ви благодарам многу, ќе дојдеме – одговори Трамп, додавајќи дека тие „многу ќе разговараат“.

Си и неговата сопруга, Пенг Лијуан, пристигнаа во американскиот главен град во средата на тридневна државна посета, во време на високи трговски тензии меѓу двете суперсили, кои беа главна тема на агендата.

Иако двајцата лидери јавно разменија комплименти, од нивните средби „еден на еден“ произлегоа малку конкретни резултати. Се очекува САД во понеделник да објават повеќе детали за евентуалниот напредок постигнат во трговските преговори.

Трамп последен пат ја посети Кина во мај. Овогодишниот самит на АПЕК е закажан за ноември во Шенџен.

Рускиот претседател Владимир Путин исто така најави дека ќе присуствува, што поттикна шпекулации за можна тристрана средба меѓу Си, Трамп и Путин. Трамп и Си се сретнаа на маргините на самитот на АПЕК, како и минатата година во Јужна Кореја, каде што постигнаа пошироко трговско примирје.

The post ДОНАЛД И МЕЛАНИЈА ТРАМП ЌЕ ЈА ПОСЕТАТ КИНА Си Џинпинг ги покани за време на средбата во Белата куќа appeared first on plusinfo.mk.

Во рамки на посетата на САД, македонскиот премиер Христијан Мицкоски, придружуван од министерот за надворешни работи Тимчо Муцунски, вчера присуствуваше на традиционалниот собир на Македонците од регионот на Њујорк и Њу Џерси, јави специјалниот известувач на МИА од Њујорк.

„Денеска присуствував на литургија во црквата „Св. Кирил и Методиј“ во Њу Џерси, каде што остварив средба и со нашата македонска заедница. Благодарност за топлото гостопримство и за посветеноста со која Македонците во дијаспората ја чуваат врската со татковината. Нашата грижа и поддршка за македонските заедници надвор од Македонија останува силна, затоа што каде и да се нашите луѓе, таму е и дел од Македонија“, се вели во објавата на премиерот Мицкоски на неговиот фејсбук-профил.

The post „КАДЕ СЕ НАШИТЕ ЛУЃЕ, ТАМУ Е И ДЕЛ ОД МАКЕДОНИЈА“ Мицкоски на средба со македонската заедница во САД appeared first on plusinfo.mk.

Посетата на премиерот Христијан Мицкоски на Соединетите Американски Држави не треба да се набљудува само како уште една дипломатска посета. Таа се случува во период кога повторно се интензивираат разговорите за македонскиот европски пат. Неколку дена пред заминувањето на Мицкоски, евроамбасадорот Михалис Рокас даде една мошне интересна изјава. Тој најави дека претседателката на Европската комисија Урсула фон дер Лајен во следните две до три недели ќе го посети регионот и изрази надеж дека нејзината посета ќе биде „одлучувачки чекор“ кон почнување на пристапните преговори. Запрашан дали се работи на конкретна формула за деблокирање на процесот, тој не откри детали, но нагласи дека во изминатите месеци интензивно се работело на тоа.

Оттука се наметнува логичното прашање: дали посетата на Мицкоски во Вашингтон и претстојната посета на Фон дер Лајен во Скопје се две целосно одвоени дипломатски случувања, или во меѓувреме може да се создава поширока американско-европска усогласеност околу Република Македонија?

Од она што досега е јавно познато, од американската посета би можеле да се издвојат четири можни конкретни резултати.

Прво, посилна политичка поддршка од Вашингтон за македонскиот европски пат. Самата дебата на Атлантскиот совет на 17 септември беше поставена токму околу стратешкото партнерство со САД, економската иднина и патот на Македонија кон Европската Унија. САД не можат правно да гарантираат дека една земја членка на ЕУ никогаш нема повторно да постави услов, но можат да имаат значајна дипломатска и политичка улога во создавањето попредвидлив процес.

Второ, американските инвестиции. Разговорите на Мицкоски со ,,американската развојна финансиска корпорација – DFC’ се однесуваа на можности за инвестиции во енергетиката, високите технологии и други стратешки сектори. Веќе постои и конкретен пример: во април DFC потпиша договор од 5 милиони долари за развој на проектот за антимон во Крстов Дол, што беше прв проект на оваа американска институција во Македонија. Затоа секој нов проект, финансиски пакет или меморандум би бил реален и мерлив резултат од посетата.

Трето, натамошно продлабочување на економското партнерство со САД. На 12 февруари годинава Вашингтон и Скопје договорија рамка за иден договор за реципрочна трговија, кој ги опфаќа трговијата, енергетиката, дигиталната економија и можностите за користење американски течен природен гас (LNG). Во документот експлицитно е наведено дека двете страни ќе продолжат да работат на финализирање и подготовка на договорот за потпис. Оттука, забрзувањето или конкретизацијата на овој договор би била уште една можна придобивка.

Но четвртиот резултат е политички најинтересен: македонско-бугарското прашање и можните гаранции. Токму тука најјасно се спојуваат релациите САД – Македонија – Европска Унија. Македонија знае што се очекува од неа во европскиот процес, додека нашата Влада има јавно и јасно поставени црвени линии во однос на начинот на кој би се продолжило понатаму.

Оттука, САД можат да дадат силна политичка и дипломатска поддршка за деблокирање на процесот, но ЕУ е таа што таа политичка волја треба да ја преточи во јасна, предвидлива и институционално одржлива европска рамка.

Затоа суштинското прашање повеќе не е само што Македонија треба да направи, туку што следува откако тоа ќе го направи. Доколку Вашингтон и Брисел успеат да изградат усогласен пристап, евентуалните уставни измени би можеле да бидат проследени со појасен патоказ за следните чекори и со цврсти политичко-правни гаранции и уверувања за предвидливост на процесот и за непречено продолжување на преговорите.

Токму затоа клучниот збор е гаранции.

Во тој контекст изјавата на евроамбасадорот Михалис Рокас станува уште поинтересна. Тој најави дека Урсула фон дер Лајен треба да го посети регионот во следните две до три недели и изрази надеж дека нејзината посета ќе претставува „одлучувачки чекор“ кон започнувањето на пристапните преговори. Истовремено, запрашан за можни решенија околу уставните измени, не навлезе во детали.

Ако Фон дер Лајен доаѓа само за уште еднаш да ја повтори веќе познатата позиција дека Македонија треба да го измени Уставот, позиција што на 17 септември 2026 година повторно ја изнесе и еврокомесарката за проширување Марта Кос во интервју за бугарската БНТ, тогаш тешко би можело да се објасни што би било „одлучувачкото“ во таа посета.

Ако, пак, зад зборовите на Рокас стои подготовка на дополнителен политички пристап, тогаш посетата на Фон дер Лајен добива сосема поинаква тежина. Оттука, сосема е легитимно да се постави прашањето дали до нејзиното доаѓање во Скопје Вашингтон и Брисел можат дополнително да ги усогласат своите позиции околу начинот на кој би се придвижил македонскиот процес.

Таквата координација не би била преседан. На 9 јули 2022 година тогашниот американски државен секретар Ентони Блинкен и високиот претставник на ЕУ за надворешна и безбедносна политика Жозеп Борел објавија заедничка изјава во поддршка на отворањето на пристапните преговори со Македонија. Во истиот документ САД и ЕУ ја нагласија својата определба за поблиска соработка на Западниот Балкан.

Затоа и денес не е нереално да се размислува за усогласен трансатлантски пристап. Во една таква поставеност, Вашингтон би обезбедил дополнителна политичка тежина и дипломатска поддршка, додека Брисел располага со институционалните механизми преку кои евентуалниот договор би се преточил во конкретни следни чекори на пристапниот пат.

Доколку работите се одвиваат според овие мои предвидувања, посетата на Урсула фон дер Лајен може да биде важна точка на проверка. Тогаш би требало појасно да се види дали Брисел останува само на веќе познатата порака за уставните измени или, пак, се оформува и поширока формула за тоа што следува по нив.

Дали таа формула ќе се нарекува гаранции, прецизен патоказ, политички механизам или поцврста европска обврска, во овој момент не можеме да знаеме. Но наредните десетина дена би можеле да покажат дали по посетата на Мицкоски во Вашингтон ќе следуваат јасни пораки или посуптилни политички сигнали од Вашингтон и Брисел што ќе одат во иста насока.

Оттука, вистинскиот биланс од посетата на Мицкоски во САД нема да се мери само според бројот на средбите, фотографиите и протоколарните изјави. Ќе се мери според тоа дали од Вашингтон ќе донесе посилна политичка поддршка, конкретни инвестиции, продлабочено економско партнерство и, пред сè, американски придонес кон поширок и поусогласен американско-европски пристап кон македонскиот европски пат.

Затоа можеби конечниот одговор на прашањето „Што ќе ни донесе Мицкоски од САД?“ нема да го добиеме веднаш по неговото враќање од Вашингтон. Можно е целосната слика за македонското-бугарско прашање да стане појасна дури со доаѓањето на Фон дер Лајен во Скопје, кога ќе видиме дали Вашингтон и Брисел навистина зборуваат со усогласен политички јазик и, уште поважно, дали покрај јасното барање што се поставува пред Македонија ќе има и јасен одговор што следува по неговото исполнување и каков степен на политички гаранции може да го придружува понатамошниот европски пат.

The post Што ќе ни донесе Мицкоски од САД? appeared first on plusinfo.mk.

Авион за кој се претпоставува дека го превезува директорот на американската Централна разузнавачка агенција (ЦИА), Џон Ретклиф, денеска полета од Москва, покажуваат податоците на веб-страницата за следење летови „Флајтрадар24“ (Flightradar24).

Американските и руските власти засега не ја коментираа информацијата за летот и не потврдија дали Ретклиф бил во авионот.

Претходно, медиумите „Си-Би-Ес њуз“ и „Аксиос“ известија дека Ретклиф ќе ја посети Русија. Тој ја предводи ЦИА за време на мандатот на американскиот претседател Доналд Трамп, а во неговиот прв претседателски мандат ја вршеше функцијата директор на националното разузнавање. Медиумите не прецизираа со кого се сретнал Ретклиф ниту, пак, за кои теми се разговарало.

Ова би била прва позната посета на шеф на американското разузнавање на руската престолнина откако претходникот на Ретклиф, Вилијам Барнс, разговараше со рускиот претседател Владимир Путин во ноември 2021 година. Околу три месеци по таа средба, Русија ја започна инвазијата врз Украина.

МИСТЕРИОЗЕН АМЕРИКАНСКИ АВИОН СЛЕТА ВО МОСКВА, ПА СЕ ПОЈАВИ И КОНВОЈ НИЗ ГРАДОТ Од Кремљ велат дека не знаат ништо, молчи и Вашингтон

The post ШЕФОТ НА ЦИА ЏОН РЕТКЛИФ ВО РЕТКА И ЗАГАДОЧНА ПОСЕТА НА МОСКВА По последната посета на прв човек на ЦИА на Русија – изби војната во Украина! appeared first on plusinfo.mk.

Република Чешка го поддржува членството на Северна Македонија во Европската Унија и е подготвена да направи сè што е потребно за земјава што поскоро да стане членка на Унијата, порача денеска заменик-претседателот на Владата и министер за надворешни работи на Чешката Република, Петр Мацинка, по средбата со министерот за надворешни работи и надворешна трговија Тимчо Муцунски.

– Членството на Северна Македонија во Европската Унија е приоритет за Република Чешка. Тоа е во наш заеднички интерес, Европската Унија да се прошири со земјите коишто поминуваат низ пристапните преговори, токму на ваков начин како што тоа го прави вашата земја. Нашиот процес за пристапување не беше едноставен, траеше долго. Ние во текот на тој процес не ги направивме сите работи правилно, па имаме многу искуство коешто можеме да го споделиме, за да не ги повторувате грешките коишто ние ги направивме. Но, низ цело тоа време сакавме да ја промениме нашата земја за да биде членка на Европската Унија. Требаше да имаме некој однатре којшто може да зборува со ист јазик, којшто има ист поглед кон светот како нас, кој ги разбира работите во Европската Унија. Сега ние сме во ситуација кога сме членки на Европската Унија, но го уверувам министерот Муцунски и сите останати претставници на Северна Македонија дека ние сме навистина пријателска земја – нагласи Мацинка.

На пленарната средба во Вила „Охрид“ Мацинка порача дека Северна Македонија може да смета на Чешка како пријателска земја и дека Прага ја следи сложеноста на пристапниот процес на земјава.

– Но, морам да ве уверам дека е наша приоритетна цел да ја видиме Северна Македонија во Европската Унија што е можно побргу и сме подготвени да направиме сè што ќе биде потребно. Тоа не е само битно за вас, туку и за нас – рече Мацинка.

Чешка е подготвена да придонесе во процесот за постигнување решение прифатливо за Скопје и за Софија.

– Тоа веќе не е билатерално прашање меѓу Северна Македонија и Бугарија, туку, врз основа на заклучоците на Европскиот совет од 2022 година, стана мултилатерално прашање. Значи, повеќе не е прашање само на две земји, туку прашање на сите земји – рече Мацинка.

Тој истакна дека Европската Унија треба да знае да го вреднува степенот на подготвеност на Северна Македонија за членство, огромната работа што земјата успеа да ја направи, но и отстапките што беше подготвена да ги направи во минатото.

Мацинка оцени дека мора да биде постигнат консензус.

– Чешка застапува став дека не сакаме да го менуваме системот така што некои прашања би се решавале со квалификувано мнозинство, ниту сакаме да го намалуваме бројот на прашањата за кои е потребна едногласност. Затоа нагласуваме дека е неопходно да се постигне консензус – рече Мацинка.

Тој информираше дека чешкиот премиер Андреј Бабиш во следните три недели ќе ја посети Софија, при што прашањето би можело да биде една од темите на разговор.

– Јас сигурно ќе сакам да разговарам со него за ова прашање – додаде Мацинка.

Министерот за надворешни работи и надворешна трговија Тимчо Муцунски истакна дека со чешкиот колега разговарале за продлабочување на политичкиот дијалог, економската соработка, трговијата, инвестициите, миграцијата, како и соработката во културата и образованието.

– Разговаравме за повеќе теми, меѓу кои за продлабочување на политичкиот дијалог, економската соработка, трговијата и инвестициите, миграцијата како тема, но и соработката во културата и образованието. На економски план постои значителен простор за повеќе. Чешката Република веќе се вбројува помеѓу нашите 15 најзначајни трговски партнери, но нашата амбиција е оваа соработка да ја подигнеме на уште повисоко ниво. Гледаме конкретни можности за транспорт и инфраструктура, енергетика, туризам, земјоделство и технолошки инвестиции – рече Муцунски.

Во однос на европската интеграција, Муцунски порача дека таа останува наша стратешка определба и дека земјава е подготвена да ги спроведе реформите и да ги исполни европските стандарди, но очекува процесот да биде кредибилен и предвидлив.

– За нас европската интеграција останува стратешка определба. Ние сме подготвени да ја завршиме нашата работа, да ги спроведеме реформите и да ги исполниме европските стандарди. Но истовремено сме јасни дека процесот мора да биде кредибилен и предвидлив и дека напредокот мора да се вреднува врз основа на резултати, заслуги и однапред утврдени европски критериуми. Во таа смисла, ние не бараме привилегиран третман, ние бараме фер и европски процес – рече Муцунски.

Тој нагласи дека реформите се спроведуваат за граѓаните и оти интеграцијата на Западен Балкан е значајна и од аспект на европската безбедност и стабилност.

– Реформите пред сè ги правиме за нашите граѓани. Тие треба да значат подобри институции, посилно владеење на правото, поконкурентна економија и повисок животен стандард. Но, кога една држава ги исполнува своите обврски, Европската Унија мора да биде подготвена да го препознае тоа и соодветно да го вреднува. Веруваме во Европа која носи одлуки и која ги исполнува своите ветувања и која разбира дека интеграцијата на Западниот Балкан денес не е само прашање на проширување, туку и прашање на европска безбедност, стабилност и геополитичка кредибилност – рече Муцунски.

The post ЧЕШКА Е МЕЃУ 15 НАШИ НАЈЗНАЧАЈНИ ТРГОВСКИ ПАРТНЕРИ Прага ја следи сложеноста на пристапниот процес на Македонија appeared first on plusinfo.mk.

Претседателката на Индија Друпади Мурму, која вчера пристигна во земјава, денеска ќе биде пречекана од претседателката Гордана Сиљановска-Давкова со највисоки државни и воени почести.

Предвидена е тет-а-тет средба на двете претседателки и пленарен состанок на македонската и индиската делегација по што ќе се одржи заедничка прес-конференција.

Предвидено е претседателката на Индија да положи венец на гробот на Гоце Делчев во црквата „Св. Спас“ во Скопје.

Попладнето со почеток во 17 часот ќе се одржи македонско-индиски бизнис форум, организиран од страна на Кабинетот на претседателот во соработка со Директоратот за економска дипломатија при Министерството за надворешни работи и надворешна трговија. На отворањето на бизнис форумот ќе се обратат двете претседателки по што ќе бидат презентирани инвестициските можности на земјава.

На вториот ден од посетата, двете претседателки ќе ги посетат Спомен-куќата на Мајка Тереза и Музејот на град Скопје, кадешто ќе се обратат на церемонија на откривање на биста на Махатма Ганди.

По церемонијата во Музејот на град Скопје, претседателката Сиљановска-Давкова и претседателката Мурму ќе се упатат кон Охрид, кадешто ќе го посетат манастирскиот комплекс Свети Наум, како и манастири и цркви во Стариот град на Охрид.

Друпади Мурму пристигна вчера на скопскиот аеродром каде беше пречекана од министерот за надворешни работи Тимчо Муцунски. Поради посетата на претседателката Мурму, во поширокото централно подрачје на Скопје ќе се применува посебен режим на сообраќај.  СВР Скопје апелира до сите граѓани учесници во сообраќајот да ги почитуваат наредбите кои ќе ги даваат униформираните полициски службеници.

The post ПРЕТСЕДАТЕЛКАТА НА ИНДИЈА ЌЕ ПОЛОЖИ ЦВЕЌЕ ПРЕД ГРОБОТ НА ГОЦЕ ДЕЛЧЕВ Богата агенда на претседателката Друпади Мурму во Македонија appeared first on plusinfo.mk.