Двајца мажи се повредени во обид да изгаснат пожар што избувнал во камп-приколка во авто-камп на охридското крајбрежје.

Пожарот избувнал на 4 октомври околу 22:35 часот, кога во СВР Охрид било пријавено дека гори камп-приколка сопственост на З.К.(44) од Скопје.

При обидот пожарот да биде изгаснат со противпожарни апарати, со повреди се здобиле З.К. од Охрид и И.Ж.(32) од Битола. Двајцата биле пренесени во Општата болница во Охрид.

По овластување на јавен обвинител, полициски екипи извршиле увид на местото. Од МВР велат дека по целосното документирање на настанот ќе следува соодветен поднесок.

The post ПОЖАР ВО КАМП-ПРИКОЛКА КАЈ ОХРИД Двајца повредени при гаснењето appeared first on plusinfo.mk.

Седумнаесет години по трагичното потонување на бродот „Илинден“, Охрид денеска им оддаде почит на 15-те бугарски туристи кои загинаа во несреќата на Охридското Езеро.

Цвеќе беше положено пред спомен-обележјето „Солза на Роза“, а во комеморацијата учествуваа делегација на Општина Охрид, претставници на Амбасадата на Бугарија во Скопје, Генералниот конзулат на Бугарија во Битола, локални институции, здруженија и граѓани.

Генералниот конзул на Бугарија во Битола, Петар Петров, упати благодарност до сите кои учествувале во спасувањето на преживеаните и помошта по несреќата. Меѓу нив ги спомена морнарите Васко Маркоски и Драган Наумовски од екипажот на бродот „Александрија“, Зоран Гилевски, капетанот на „Илинден“ Петар Василев, капетанот на бродот „Кристина“ Васко Јанев, командирот на армиската единица Раде Буџаковски, дежурниот офицер Влатко Димановски и војниците под нивна команда, како и охриѓани кои се вклучиле во спасувачката акција.

Од 15-те жртви, осум биле жители на општина Антон, четворица од Пирдоп, а по еден од Златица, Мирково и Рибарица.

Трагедијата се случи на 5 септември 2009 година во 10:30 часот. Бродот „Илинден“, кој превезувал 57 патници од Охрид кон Свети Наум, потонал на околу 250 метри од брегот кај автокампот „Елешец“.

Во текот на спасувачката акција голем број луѓе од Охрид се вклучиле во извлекувањето на патниците. Несреќата остави трајна трага во Охрид и во односите меѓу македонските и бугарските институции и граѓани.

Подоцна следуваше и судска постапка за утврдување на одговорноста за несреќата. Во јули 2011 година Основниот суд во Охрид ги прогласи за виновни капетанот Сотир Филевски и овластениот претставник на германски „Лојд“, Бранко Баиќ, и им изрече казни од по една година затвор. Според образложението на пресудата, со несовесно постапување придонеле за несреќата.

Две недели по трагедијата, на 19 септември 2009 година, бродот „Илинден“ бил извлечен од Охридското Езеро и одвлечен до каналот Студенчишта, каде што останал како потсетник на трагичниот настан.

Спомен-обележјето „Солза на Роза“, во непосредна близина на Студенчишкиот канал, е поставено во знак на сеќавање на загинатите. Споменикот има форма на капка која се дели на два дела – едниот ја симболизира солзата, а другиот новиот почеток. Во капката се испреплетени 15 рози, симбол за 15-те човечки животи изгубени во несреќата.

И по 17 години, трагедијата со „Илинден“ останува едно од најболните сеќавања поврзани со Охридското Езеро, а секој 5 септември на споменикот „Солза на Роза“ повторно се положува цвеќе во спомен на жртвите.

The post 15 ЖИВОТИ ЗГАСНАА ВО ЕДНО УТРО ВО ОХРИД Седумнаесет години од трагедијата со „Илинден“ appeared first on plusinfo.mk.

Охридското Езеро е најубавото место во Европа за 2026 година според изборот на патописците на познатиот магазин „Тајм аут“. Зад него останале италијанската Сатурнија, Џиновскиот насип во Северна Ирска, Алберобело и норвешките фјордови.

Но, една споредба особено го издвојува Охрид. „Тајм аут“ го става наспроти славното езеро Комо, магнет за познати личности и за огромен број туристи.

Охридското Езеро, според магазинот, нуди помирно и поевтино искуство. Притоа, не губи ништо од спектаклот на пејзажот. „Тајм аут“ ги издвојува сината вода, планините и историските населби покрај брегот.

Историја и ниски цени наспроти гламурот на Комо

Комо го носи гламурот на Ломбардија, вилите и славните гости. Охрид, пак, добива поени за мирот, историјата и за значително попристапните цени.

Магазинот го опишува Охридското Езеро и како едно од најстарите и најдлабоките езера во Европа. Градот Охрид го издвојува како ѕвезда на македонската страна.

Калдрмисаните улички, средновековните цркви и покривите што се спуштаат кон езерото ја градат сликата. Спомената е и познатата легенда за 365 цркви, по една за секој ден во годината.

Посебно место има црквата „Свети Јован Канео“. Посетата рано наутро се препорачува поради мирот и поради помалата гужва.

Лин, па уште 9 места зад убавиот Охрид 

Изборот, сепак, не завршува на македонскиот брег. „Тајм аут“ ја издвојува и албанската страна, со нејзините помирни села и посурови пејзажи.

Посебно го посочува Лин. Малото село се издвојува со остатоците од мозаици и со камповите покрај водата. Така, едно езеро во изборот спојува две различни туристички лица.

Зад Охридското Езеро магазинот бројвуа 9 други места во Европа. На втората позиција е Сатурнија во Тоскана, а трет е Џиновскиот Насип во Северна Ирска. Следуваат Алберобело, Почитељ, норвешките фјордови, Кју Гарденс, каналот Принсенграхт, долината Мозел и „Каса Батљо“.

The post ОХРИДСКОТО ЕЗЕРО Е НАЈУБАВОТО МЕСТО ВО ЕВРОПА Познатиот магазин му даде предност пред гламурозното Комо во Италија appeared first on plusinfo.mk.

Два милиони пастрмка коран беа пуштени овој викенд во Охридското Езеро, кај Поградец, Албанија, како дел од иницијативите за збогатување на водната фауна и заштита на овој ендемски вид од особено значење за екосистемот и економијата на областа – објави Општина Поградец.

– Тоа е во рамките на Фестивалот на коранот, активност што сега стана традиција за градот Поградец и која ги комбинира промоцијата на биодиверзитетот, рибарската традиција и локалната гастрономија – стои во објавата.

Заменик-министерот за земјоделство и рурален развој Арјан Јауплари изјави дека оваа година се пуштени два милиони коран во водите на езерото истакнувајќи ја важноста од продолжување на оваа иницијатива во иднина.

– Иста ваква акција е најавена и од македонска страна, што значи продолжување со збогатување на водите на Охридското Езеро, со цел да се заштити и збогати биодиверзитетот на езерото што се наоѓа помеѓу нашите две земји – рече тој.

Општина Поградец сподели моменти од активностите организирани во рамките на Фестивалот на коранот, каде што претставници на рибарското здружение во Поградец изразија оптимизам за резултатите од оваа иницијатива нагласувајќи дека порибувањето имало позитивни ефекти врз зголемувањето на рибниот фонд.

Како дел од прославата, на шеталиштето покрај езерото беше промовирана и традиционалната гастрономија на Поградец. Рестораните и готвачите им презентираа разни јадења приготвени со локални производи на многуте посетители што го исполнија Поградец оваа летна сезона, а чорбата со коран продолжува да останува меѓу најбараните јадења од туристите во крајбрежниот град.

Фестивалот на коранот има цел да придонесе кон заштитата на природното богатство на Охридското Езеро, зачувувањето на коранот и развојот на гастрономскиот туризам во Поградец.

The post 2 МИЛИОНИ ПАСТРМКИ КОРАНИ ПУШТЕНИ КАЈ ПОГРАДЕЦ Порибување најавува и македонската страна appeared first on plusinfo.mk.

Шеснаесет пливачи од осум држави утре ќе застанат на стартот на 39 Охридски пливачки маратон, кој ќе се плива на традиционалната 25-километарска патека „Климе Савин“, од Свети Наум до Градското пристаниште во Охрид.

На маратонот ќе настапат пливачи од Македонија, Србија, Турција, Канада, Италија, Шпанија, Португалија и Аргентина. Во конкуренција ќе има 11 пливачи во машка и пет во женска конкуренција.

Стартот е закажан за 10 часот кај Свети Наум, додека целта е на Кејот кај Градското пристаниште во Охрид.

Градоначалникот на Охрид, Кирил Пецаков, на прес-конференцијата во пресрет на маратонот истакна дека оваа спортска манифестација одамна го надминала спортското значење и претставува важен дел од охридскиот идентитет и туристичката промоција на градот.

– Охридскиот пливачки маратон не е само трка во светскиот календар во пливање на отворени води, туку и традиција, наша гордост и неизбришлив дел од охридскиот идентитет. Секој испливан метар од маратонот е приказна за силата на човечкиот дух, но и за љубовта кон езерото што нè спојува и поврзува – рече Пецаков.

Тој додаде дека маратонот го става Охрид на светската спортска мапа, но истовремено ја промовира македонската култура и гостопримството.

Пецаков го оцени маратонот како „круна на нашата летна сезона“ и посака учесниците да имаат мирно езеро, добра енергија и фер трка.

– За мене лично, а верувам и за многумина, секој што ќе го исплива овој вистински спортски подвиг е веќе победник – истакна градоначалникот.

Пецаков најави дека Општина Охрид, заедно со Министерството за спорт, планира засилена поддршка за јубилејното 40. издание на маратонот следната година.

Најавено е подигнување на нивото на организацијата, но и зголемување на наградниот фонд.

– Заедно со директорот на трката, пливачките клубови кои учествуваат во организацијата и Пливачката федерација на Македонија, ќе направиме повеќе од спектакуларно 40. издание на Охридскиот пливачки маратон – најави Пецаков.

Директорот на маратонот, Ристе Јанкоски, потврди дека и годинава ќе се плива патеката „Климе Савин“ во должина од 25 километри.

Наградниот фонд изнесува 15.000 долари, а парични награди ќе добијат најдобрите десет пливачи во машка и женска конкуренција, како и најдобрите тројца во генералниот пласман.

Покровители на маратонот се Општина Охрид, Министерството за спорт и претседателот на Република Македонија, додека технички организатор е Пливачкиот клуб „Охридски бранови 2008“.

Организаторите ги повикаа охриѓани и туристите да излезат и да го проследат маратонот од брегот на Охридското Езеро и со своето присуство да придонесат кон продолжувањето на традицијата на една од најзначајните спортски манифестации во Охрид.

The post ШЕСНАЕСЕТ ПЛИВАЧИ ОД ОСУМ ДРЖАВИ УТРЕ НА СТАРТОТ Подготвена патекаа „СВЕТИ НАУМ“ за новото издание appeared first on plusinfo.mk.

Зголемена наплата на увозни давачки за пловни објекти внесени во земјава со привремен увоз е евидентирана во изминатиот период, соопшти денеска Царинската управа.

Од Царината информираат дека Одделението за оперативни работи, во координирана акција со Министерството за внатрешни работи, извршило контрола на 38 пловни објекти на Охридското Езеро.

При контролите бил проверуван царинскиот статус на пловилата, како и лицата кои ги управуваат.

– Во изминатиот период се забележува зголемена активност на платени увозни давачки за пловни објекти кои биле внесени со привремен увоз, што укажува дека контролите даваат ефект – изјави управникот на Царинарница Битола, Ѓоко Трпоски.

Од Царинската управа појаснуваат дека контролите се насочени кон проверка на царинскиот статус на пловните објекти внесени во земјава, особено оние кои се опфатени со режимот на привремен увоз.

 

View this post on Instagram

 

A post shared by Plusinfo.mk (@plusinfo.mk)

Согласно царинските прописи, пловилата внесени со привремен увоз може да се користат во земјава во законски утврден рок. По истекот на тој рок, доколку пловилото не биде повторно извезено и не ја напушти државата, неговиот правен статус треба да се регулира, односно да се спроведе постапка за увоз и да се платат соодветните царински давачки.

Од Царината велат дека продолжуваат со контролите за почитување на царинските прописи.

The post 📽️ ЦАРИНАТА УДРИ ПО ПЛОВИЛАТА НА ОХРИДСКО ЕЗЕРО Контролирани 38 чамци, зголемена наплата на давачки appeared first on plusinfo.mk.

46-годишен турист од Грузија вчера починал во водите на Охридското Езеро кај Пештани, информира СВР Охрид.

Случајот бил пријавен во полицијата околу 14:32 часот, кога било известено дека од водите на езерото кај Пештани било извлечено машко лице.

На местото пристигнала екипа на Итната медицинска помош, која се обидела да го реанимира мажот. Сепак, и покрај укажаната помош, лекарите набргу констатирале смрт.

Според првичните информации, на телото немало видливи повреди.

По извршениот увид било утврдено дека се работи за Б.Д. (46) од Грузија.

На местото извршила увид екипа од СВР Охрид, а по наредба на јавен обвинител телото на починатиот е предадено на обдукција, која треба да ги утврди причините за смртта.

The post СЕ ОБИДЕЛЕ ДА ГО РЕАНИМИРААТ, НО БИЛО ПРЕДОЦНА Турист од Грузија се удавил кај Пештани appeared first on plusinfo.mk.

Полициската станица за граничен надзор „Охридско Езеро“ во текот на јуни и јули спроведе засилени акции против незаконскиот риболов, при што беа реализирани вкупно 44 акциски контроли во водите на Охридското Езеро.

Во рамки на акциите, полициските службеници затекнале две лица при вршење на кривичното дело „незаконит риболов“. Станува збор за лица од охридското село Пештани и од Струга, кои биле приведени во полициска станица, а против нив се поднесени соодветни кривични пријави.

При контролите биле пронајдени и одземени вкупно 25 таканаречени висечки рибарски мрежи, со вкупна должина од четири километри и 900 метри. Станува збор за мрежи кои се строго забранети за користење при риболов во Охридското Езеро.

Освен мрежите, полицијата запленила и 702 парчиња охридска белвица, со вкупна тежина од 97,1 килограм.

Од Министерството за внатрешни работи информираат дека акциските контроли ќе продолжат и во наредниот период, со цел спречување на незаконскиот риболов и заштита на рибниот фонд во Охридското Езеро. Истовремено, ќе се вршат и контроли за почитување на одредбите од Законот за внатрешна пловидба.

The post ЗАПЛЕНЕТИ 702 РИБИ И РЕЧИСИ 5 КИЛОМЕТРИ МРЕЖИ Голема акција на Охридското Езеро appeared first on plusinfo.mk.

Две млади охриѓанки биле спасени од водите на Охридското Езеро откако силен ветер и големи бранови ги оддалечиле од брегот додека пловеле со даски за стоечко веслање (СУП).

Случајот бил пријавен вчера, 28 јули 2026 година, во 19:55 часот во Полициската станица за граничен надзор Охридско Езеро во Охрид. Според пријавата, две лица кои се наоѓале на СУП-даски, на околу 1.000 метри од езерскиот брег, наспроти авто-камп во Охрид, со извикување барале помош.

Веднаш по добиената пријава, полициски службеници од Езерската полиција се упатиле кон посочената локација. При пребарувањето на езерото, на околу 2.000 метри оддалеченост од брегот ги забележале двете лица како се обидуваат да го одржат пловењето и сè уште повикуваат помош.

Полициските службеници веднаш пристапиле кон нив и презеле мерки за безбедно префрлање на полициските чамци. При проверката било утврдено дека станува збор за Е.С. (19) и И.А. (18), двете од Охрид.

Младите девојки им раскажале на полицајците дека поради наглото влошување на временските услови, силниот ветер и големите бранови, постепено биле однесени подалеку од брегот, поради што повеќе не биле во можност сами да се вратат.

Двете девојки биле безбедно пренесени во просториите на Езерската полиција.

Од СВР Охрид и Езерската полиција повторно апелираат до сите капачи и корисници на СУП-даски и педалинки да не се оддалечуваат од означените безбедносни зони и да ги почитуваат препораките за безбедност при престој и движење по вода.

The post ДРАМАТИЧНО СПАСУВАЊЕ НА ДВЕ ДЕВОЈКИ ВО ОХРИДСКО ЕЗЕРО Од силниот ветер и брановите не можеле да веслаат кон брегот appeared first on plusinfo.mk.

Силното невреме што го зафати охридскиот регион предизвика голема материјална штета кај Љубаништа, каде што повеќе од 30 пловни објекти биле откорнати од своите места и исфрлени на брегот.

Како што може да се види на видеото објавено од ОхридСкај, чамците и другите пловни објекти се насукани на песокот, додека дел од нив се превртени поради силниот ветер и високите бранови.

Последиците од невремето се видливи и во Трпејца, каде што силните бранови целосно ја покриле плажата, објави Охрид1 Според снимките, морето – односно езерските бранови – стигнале сè до ѕидовите на куќите кои се наоѓаат во првиот ред покрај брегот, оставајќи зад себе драматични сцени.

The post 📽️ ЧАМЦИ НА БРЕГОТ, БРАНОВИТЕ СТИГНАА ДО КУЌИТЕ Невремето направи хаос кај Љубаништа и кај Трпејца appeared first on plusinfo.mk.