На социјалните мрежи се појави фотографија на која се гледа оштетување на часовникот на Музејот на град Скопје, кој е потсетник на катастрофалниот земјотрес кој во 1963 година во погоди главниот град.

Во вчерашното невреме оштетена е стрелката која ги означува минутите. Часовникот покажува време 5 часот и 17 минути, тоа е моментот на земјотресот кога и часовникот запрел со работа.

Во вчерашното невреме, како што информираше МВР, оштетени се и објектите на Основното јавно обвинителство, комплексот „Вила Водно“, Аеродромската полициска база Петровец, објектот „Нова Македонија“, како и објектите на Министерството за финансии, Министерството за земјоделство и Јавното обвинителство.

Според пријавите од граѓани, евидентирани од Министерството оштетени се 117 возила, 35 покриви, паднати се 189 дрва, 7 семафори, пријавени се 5 пожари и 15 повредени лица.

The post ОШТЕТЕН И ЧАСОВНИКОТ КОЈ ЗАСТАНА ЗА ВРЕМЕ НА ЗЕМЈОТРЕСОТ ВО 1963 ГОДИНА Оштетена е стрелката која ги означува минутите appeared first on plusinfo.mk.

Во организација на Здружението „Бадникови поворки“ денеска ќе се одржи Бадниковата манифестација во повеќе од 80 градови и населени места низ Македонија, како и меѓу македонската дијаспора во Словенија, Италија, Австрија, Франција и Соединетите Американски Држави.

Централната Бадникова поворка во Скопје ќе обедини учесници од речиси сите скопски општини, заедно со нивните градоначалници, кои и оваа година активно ќе учествуваат во организацијата на настанот.

Градоначалниците и општинските тимови во претпладневните часови ќе ги пречекаат и даруваат коледарчињата во своите општини. Потоа, со организиран превоз, децата и нивните семејства ќе се упатат кон централната манифестација во Скопје.

Формирањето на поворката ќе започне пред Музејот на Град Скопје од 11:30 до 12:00 часот, каде што на сите деца кои немаат ѕвездичка бесплатно ќе им биде подарена Божикна ѕвезда, а сите учесници ќе добијат и уметнички магнет со божикна порака – симболичен спомен од Бадникови поворки 2026.

За дечињата од Општина Кисела Вода собирот е закажан во 11:15 часот кај локацијата „Рампа“ во Кисела Вода, каде најмладите ќе бидат пречекани со божикни ѕвездички. По собирот, учесниците заедно ќе продолжат кон Музејот на Град Скопје, каде во 12:00 часот ќе се приклучат на поворката исполнета со детска песна.

Точно во 12:00 часот, поворката пеејќи ја песната „Вечниот Бог“ ќе тргне по улицата „Македонија“ и ќе пристигне на плоштадот „Македонија“, пред сцената кај Божикната пештера.

По пристигнувањето на поворката на плоштадот „Македонија“, ќе следува „Божикната авантура“ – голема музичко-сценска изведба во живо, со повеќе од 40 музичари, пејачи, актери и учесници од „Златно славејче“. Мјузиклот е реализиран под уметничко раководство на Владо Дојчиноски, со драматургија на Билјана Крајчевска, и преку музика и сценска приказна ја пренесува пораката за Рождеството Христово.

Традиционално, во претпладневните часови, групи деца и млади од Бадниковите поворки ќе остварат празнични посети кај претседателката на државата Гордана Силјановска-Давкова, архиепископот Охридски и Македонски г.г. Стефан, градоначалникот на Град Скопје Орце Ѓорѓиевски, споделувајќи ја радосната вест за Христовото Рождество.

Здружението „Бадникови поворки“ ги поканува сите граѓани, семејства и деца да се приклучат на Бадниковите поворки 2026, без потреба од претходно пријавување.

Веќе 16 години, Бадниковите поворки претставуваат симбол на светлина, заедништво и достоинствено празнување на Бадник во земјава и пошироко.

Манифестацијата е поддржана од Министерството за култура и од Град Скопје.

The post ПОВОРКИ ЌЕ ИМА ВО ПОВЕЌЕ ОД 80 МЕСТА, ЌЕ ЗАСВЕТАТ БОЖИЌНИТЕ ЅВЕЗДИ На пладне „Вечниот бог“ ќе зазвучи на улица Македонија appeared first on plusinfo.mk.

Скопје денеска одбележува 62 години од една од најголемите трагедии во својата историја, катастрофалниот земјотрес што се случи на 26 јули 1963 година, кога во само 20 секунди животот го загубија 1.070 лица, над 3.000 беа повредени, а градот буквално беше срамнет со земја.

Во пет часот и 17 минути наутро, градот се разбуди во урнатини. Земјотресот со јачина од девет степени според Меркалиевата и шест според Рихтеровата скала, со епицентар токму на плоштадот „Македонија“, разори 15.800 станови и оштети уште 28.000. Над 200.000 жители останаа без покрив над главата.

Во знак на почит, денеска во 10 часот делегации од Собранието и од Градот Скопје положија цвеќе на Споменикот на загинатите на гробиштата Бутел. Традицијата продолжува – како симболично сведоштво дека градот никогаш нема да заборави.

Во Музејот на град Скопје, во 20 часот, ќе биде отворена и изложбата „Скопје за време на земјотресот и потоа“, која ќе биде трајна поставка, достапна за сите идни генерации.

По катастрофата, светот го сврте погледот кон малото Скопје. Меѓународниот Црвен крст, Интерпарламентарната унија, Обединетите нации, и хуманитарни организации од десетици земји се вклучија во обнова на градот.

На 27 септември 1963, Генералното собрание на ОН одлучи за приоритетна меѓународна акција за помош на Скопје, а на 14 октомври беше усвоена Резолуција за реконструкција на градот. Тој ден остана запишан како „Денот на Скопје“ во аналите на Обединетите нации.

Историјата покажува дека Скопје повеќепати било разурнувано. Во 518 година, римскиот град Скупи бил целосно срамнет со земја во земјотрес од 10–11 степени. Втор катастрофален потрес го погоди Скопје во 1555 година.

Третиот, и најдобро документиран, се случи токму на овој ден пред 62 години.

Старата железничка станица, денес претворена во Музеј на град Скопје, останува вечен симбол на трагедијата. Часовникот на нејзината фасада сè уште стои закован на 5:17 – моментот кога времето престана за целиот град.

По земјотресот, Скопје започна нов живот. По плановите на јапонскиот архитект Кензо Танге, започна обнова која од градот направи симбол на солидарноста, истрајноста и надежта.

The post 62 ГОДИНИ ОД СКОПСКИОТ ЗЕМЈОТРЕС Денот кога градот застана во 5:17 и никогаш не беше ист appeared first on plusinfo.mk.

Скопје денес ја одбележува 62-годишнината од катастрофалниот земјотрес што се случи на 26 јули 1963 година, кога животот го загубија 1.070 лица, а над 3.000 беа повредени. Земјотресот ја разурна скоро третина од тогашната македонска престолнина и остави повеќе од 200.000 луѓе без покрив над глава.

Во чест и сеќавање на жртвите, вечерва во 20 часот во Музејот на град Скопје ќе биде отворена трајна изложба насловена „Скопје за време на земјотресот и потоа“, посветена на трагедијата и на периодот на обнова што следеше.

Градот и годинава, како и секоја претходна, организира активности на денот на несреќата која го промени Скопје засекогаш. Земјотресот се случил во 5 часот и 17 минути наутро, а помали потреси траеле до 5:43 часот. Урнати биле 15.800 станови, а оштетени 28.000.

Оваа трагедија, иако разорна, стана симбол на меѓународната солидарност. По апелот на Меѓународниот Црвен крст, многу земји се приклучија со донации на храна, материјали и финансиска помош. Обединетите нации презедоа активности за планска и долгорочна обнова на Скопје.

На 23 септември 1963 година, 35 земји побараа Генералното собрание на ОН да го вклучи Скопје на дневен ред. На 27 септември беше донесена одлука за приоритетна помош за македонската престолнина, а на 14 октомври беше изгласана Резолуција за поддршка на реконструкцијата на Скопје. Тогаш, повеќе од 20 земји од сите континенти зборуваа за трагедијата и значењето на помошта.

Тој ден влезе во историјата како „денот на Скопје“ во Обединетите нации.

Историјата на градот сведочи дека Скопје не еднаш се соочувало со катастрофални земјотреси. Во 518 година, тогашниот римски град Скупи, сместен меѓу денешните Злокуќани и Бардовци, бил целосно уништен од потрес со јачина од 10 до 11 степени. Урнати биле 24 градски тврдини, а земјата била преполна со пукнатини и свлечишта.

Следниот голем земјотрес се случил во 1555 година, со јачина од околу 10 степени, повторно уништувајќи го Скопје.

И конечно, на 26 јули 1963 година, Скопје беше погодено по трет пат со потрес со јачина од девет степени по Меркалиевата скала (шест по Рихтер), со епицентар на плоштадот „Македонија“. Градот беше оставен во урнатини, но и прероден со помошта на целиот свет.

The post 62 ГОДИНИ ОД КАТАСТРОФАЛНИОТ ЗЕМЈОТРЕС Скопје се сеќава на 1.070 загинати и над 3.000 повредени appeared first on plusinfo.mk.

„Во текот на есента 2022 година беа реализирани две резиденции на уметници, една во Каљари, Сардинија и една во Скопје, каде македонски и италијански млади уметници заеднички твореа уметнички дела, инспирирани од културата и природата на околината во која се наоѓаат резиденциите – во Република Македонија тоа беа градот Скопје и Скопската околија, а во Сардинија, градот Каљари и островот Антиоко. Резултатите од овие две уметнички работилници беа прикажани во Музејот на Град Скопје во текот на вчерашниот ден. Уметниците од Сардинија ги прикажаа cвоите импресии од Македонија, а скопските уметници своите импресии од Сардинија. За жал, еден од македонските уметници, Зоран Шеќеров, сакаше да вклучи свои дела кои тематски не се поврзани и не се вклопуваат со проектот, бидејќи не се поврзани со неговиот престој во Сардинија. Но, бидејќи за Музејот од особена важност е стимулирање на критичка уметност го покануваме Зоран Шеќеров да аплицира со овие дела за самостојна изложба. Вратите на Музејот се секогаш отворени за млади и креативни уметници од Македонија со цел промоција на македонската култура“, се вели во соопштението на Музеј на Град Скопје.

ДЕЛА ШТО СЕ БАВАТ СО „СЕВЕРНА“ НЕ МОЖАТ НА ИЗЛОЖБА!? Музеј на град Скопје цензурира уметник

The post ДЕЛАТА НА МЛАДИОТ УМЕТНИК НЕ СЕ ВКЛОПУВАА ВО ПРОЕКТОТ „КАЉАРИ-СКОПЈЕ“ Музејот на Град Скопје му нуди самостојна изложба на Шеќеров appeared first on plusinfo.mk.

Последниов соцреалистички „танц“ со делото на уметникот Зоран Шеќеров доаѓа во вистински час: во времето на одржувањето на фамозниот министерски состанок на ОБСЕ, па Музејот на град Скопје треба да биде вклучен во нивната културна програма како составен дел на запознавањето на учесниците со промоцијата на демократскиот развој на државата. Притоа и директорот на Музејот би можел да им одржи кратко предавање како тоа тие се справуваат со „провокативни“ дела насочени контра демократијата и агресивни уметници кои, ете, решиле да ја уриваат. И тој рецепт ОБСЕ понатаму да го проследи до сите земји членки!

Во тоа запознавање на гостите со успешната ждановистичка борба контра „подземните“ обиди на македонските уметници – веројатно како уште една форма на „руско влијание“ – би требало да им биде посочено што е дозволено а што не е не само во тој Музеј туку и во македонската култура во целина.

Па така, ќе ги просветлиме дека не може туку-така некој, па нека е и уметник, да пишува „пароли“ дека „Уметник од Северна Македонија не е уметник“ и истите да ги нарекува – уметнички дела. Македонските културни институции прифаќаат само дела што се „на линија“, како во стариот добар комунизам, а кому тоа не му се допаѓа нека изложува – надвор, на улица! Што е сосема прифатлива нова „културна политика“, нели?! И нова национална стратегија? Тоа ќе рече дека прифатлива форма на уметничко дело според рецептот на Музејот на град Скопје и македонската култура би била онаа којашто сугерира дека „Само уметник од Северна Македонија е уметник“? А останатото е – што? Ѓубре, не-уметност, кич, шунд…?

Кога историјата утре ќе побара синтетизиран впечаток, израз или одраз за овие две-три децении македонска „демократија“, „независност“ и „сувереност“, што прво паѓа на ум? Што е тоа што впечатливо, како симболика и/или прва асоцијација, ги одбележало овие години? Антиквизацијата и уништувањето на цел еден град? Рачето на срце и колнењето во името, идентитетот и Македонија? Криминалот, корупцијата и непотизмот во највисоките редови на власта? Графиконот на иселувањето на младите од државава? Голиот македонски задник што некој запнал да го покрие „на невидено“ со коридори вредни таинствени милијарда и триста милиони евра… Што?

И дали сето тоа е производ баш на она фамозно „руско влијание“ во државава што ја прави ваква каква што е? Она влијание кое, според еден наш универзитетски „стручњак“, го кочи и го одлага процесот на интегрирање со Западот, а на штета на огнениве борци за демократија?

Сепак, нам не ни треба такво влијание, ние си имаме свое, наследено, комунистичко или посткомунистичко, како сакате. Македонските властодржечки гарнитури, особено последниве петнаесетина години, доминантно црпат „знаења“ од таквото (недемократско) минато,  инкорпорирајќи го во своето секојдневие и практикување на власта. За нив политичкото силеџиство од типичен автократски комунистички происход станува conditio sine qua non за одржувањето на власт. Ама се исплашија дали Лавров ќе дошол во Скопје!

За жал, оваа македонска криенка-миженка со демократијата и континуираното флертување со комунистичкото наследство како репер доаѓа по онаа „незаборавна“ 2017 година како најавувана година на пресврт и ново. Меѓутоа, во овие балкански „демократии“ секогаш го добивате она што не сте го посакувале, уште помалку за коешто сте гласале! Политичкиве силеџии апостериори во игранката внесуваат друга музика и играчи од форматот на извеани „научници“ и анонимни „експерти“, провинциски „министри“ и полуписмени директорчиња како оној во Музејот на град Скопје, кои градат коридори но градските улици ги претворат во ним блиски калливи сокаци. Буквално и метафорично!

Нивниот „систем“ ги штити и комплетните идиоти кога се нивни, а во јавноста ги оспоруваат сите други, дури и потврдените авторитети. Оттука, секоја битка однапред е загубена, а тие ја добиваат (и) оваа (не)културна војна.

Како што наближуваат изборите, политичкото силеџиство и идеолошкото менгеме цврсто стегнато околу нивните вратови, ја поставува и новата политичка односно политикантска сцена. Сега тие јавно, меѓусебе, се убедуваат дека се однапред познати победници, дека тие, сосе него, ќе формирале влада…, а за сите други се поставува нова 1948 година. И клучното прашање, среде ноќ или во црни зори: за кого си, за СДСМ или за ВМРО и Левица? Ако згрешиш, се знае – лепенката те чека, а од неа е тешко да се ослободиш. И да, нема Голи оток, ама нели, помалку или повеќе, целава „држава“ почна многу да заличува на тој екс-југословенски Сибир?

Извор: Теодосиевски уметност

The post Контролори на „демократијата“ appeared first on plusinfo.mk.

Уметникот Зоран Шекеров, чие дело требаше да биде дел од инсталација, дефинитивно не е дел од програмата на изложбата која се отвара денеска, 28. ноември, со почеток од 19:30 часот.

Шеќеров, кој беше дел од шестемина уметници кои предходно заедно изложувале на Сардинија во Италија, не е наведен во официјалната програма на изложбата „A/R Каљари-Скопје“ која ја организира Музејот на град Скопје. Очигледно, менаџментот на Музејот на град Скопје го цензурира Шеќеров затоа што сакал да објави дело во кое се вели дека „Уметник од Северна Македонија, воопшто не е уметник“

Во подготовката на изложбата на Шекеров му било речено дека не може да му бидат објавени дела со тема „северна“ затоа што тоа било политичка порака. Во официјалната програма на изложбата остануваат петте уметници кои предходно како тим изложувале во Италија.

„Запомнете го 28-ми ноември како црн ден за македонската култура и уметност, ден кога се цензурираше уметникот во Македонија. Иако никого лично не повредувам во содржината на моето дело, истото беше забрането со манипулативни оправдувања од типот: ќе ги повредиш колегите во музеј, овака ќе направиш кога ќе се менува политиката, па дури и се впуштија во обид да прават корекција на делото“ – напиша Шекеров на Фејсбук.

The post ДЕЛА ШТО СЕ БАВАТ СО „СЕВЕРНА“ НЕ МОЖАТ НА ИЗЛОЖБА!? Музеј на град Скопје цензурира уметник appeared first on plusinfo.mk.

Имено, предвидена е изложба на тројцата истакнати македонски уметници: Михаил Корубин, Антони Мазневски и Велимир Жерновски. Преку своите дела, тие ќе „зборуваат“ за уметноста во Скопје, за нивната перцепција за овој град и емоциите кој истиот ги буди кај сите нас. Присутните ќе имаат можност да уживаат и во изложбата: „Скопје – градот Феникс“, која ќе се отвори на 26 јули од 20:00 часот.

На мултимедијалниот настан ќе се прикажат и филмовите „Скопје сонува“ и „Мементо“. Исто така, на визуелен начин ќе бидат презентирани сегменти од весници и медиуми кои известувале за постземјотресно Скопје.

Настанот ќе го модерира и води нашиот познат актер и уметник, Игор Џамбазов.

Музичкиот дел ќе биде исполнет со перформанс на Тамара Тодевска и Здружението на џез музичари и слободни уметници. Тие ќе нѐ потсетат на некои од најдобрите македонски поп – песни, кои и денеска будат емоција и се дел од колективната меморија на различни генерации – скопјани.

„Многумина ќе се спротистават на славењето на природна катастрофа, која земала многу животи и уништила илјадници домови, јавни објекти и установи. Но, ние ги истакнуваме вредностите кои се случија по оваа непогода во 1963 година. Солидарноста, хуманоста, емпатијата како основни водилки, кои придонесоа Скопје повторно да се изгради и да стане метропола. Токму овие вредности очајно ни фалат денеска. Токму овие вредности недостасуваат на Скопје, на луѓето, на сите ентитети кои сакаат поубав град и поквалитетен живот“, велат претставниците oд музичката платформа „Терапија“.

Тие ги покануваат сите граѓани, да дојдат на 26 јули во Музејот на град Скопје, од 20:00 часот и сите заедно да зборуваме за чист и урбан град; за град кој е дом на сите генерации; за вистинска култура, сцена и ноќен живот. Да зборуваме и да работиме за Скопје!

Настанот се организира со поддршка на: Министерство за култура, Град Скопје, Делегација на ЕУ во Скопје и BWI.

The post ЗБОРУВАЈ ЗА СКОПЈЕ – 60 ГОДИНИ ОД ЗЕМЈОТРЕСОТ Уникатен настан ќе се одржи следната среда во Музејот на град Скопје appeared first on plusinfo.mk.