СВР Струмица поднесе кривични пријави до Основното јавно обвинителство Струмица против три лица од Струмица и струмичко, осомничени за кривични дела „лихварство“, „изнуда“ и „тешка кражба на дрзок начин“.

Кривични пријави се поднесени против Д.К. (48) од Струмица, Л.К. (41) од Струмица и Н.К. (25) од село Василево, поради постоење основи на сомнение за повеќе кривични дела поврзани со незаконско давање парични заеми и присилна наплата.

Според СВР Струмица, осомничените во периодот од 2022 до 2026 година, со умисла за стекнување значителна противправна имотна корист, во повеќе наврати ја искористувале тешката финансиска состојба на лица од Струмица и пошироко.

Тие, како што информира полицијата, им давале парични средства на заем, но за возврат договарале враќање со несразмерно високи камати и неповолни услови, при што барале и дневна камата од 3.000 денари или 50 евра за секој ден задоцнување.

Од СВР Струмица наведуваат дека Л.К. и Н.К. се сомничат и дека со закани ги присилувале оштетените лица да враќаат износи кои повеќекратно ги надминувале првично позајмените суми.

Дополнително, Д.К. се сомничи дека во март 2026 година, откако едно лице му ги вратило позајмените средства, од раце му одзел дополнителни пари, со што, според полицијата, сторил и кривично дело „тешка кражба на дрзок начин“.

Од полицијата информираат дека во изминатиот период биле постапувани повеќе одделни случаи пријавени од оштетени лица, при што биле обезбедени материјални докази кои ги потврдуваат нивните изјави и сомневањата за сторените кривични дела.

The post ЗА ДНЕВНА КАМАТА БАРАЛЕ И ПО 50 ЕВРА Разбиена лихварска шема во Струмица, кривична за три лица appeared first on plusinfo.mk.

Во три одделни полициски акции во Струга, Кичево и Охрид вчера се приведени четири лица поради сомнение за недозволено поседување оружје и дрога, информира Министерството за внатрешни работи.

Во Струга, полициски службеници од Одделението за недозволена трговија со дрога и оружје при ОВР Струга ги лишиле од слобода Л.Р. (19) и неговиот 15-годишен брат. При претрес во нивниот дом, извршен со судска наредба, биле пронајдени и одземени пиштол „Dessert Lort“ калибар 9 мм и празна рамка за пиштолот. Оружјето било поседувано без дозвола, а малолетникот изјавил дека неговите родители не биле запознаени со предметите.

Полициски службеници од Надворешната канцеларија за криминалистички работи Кичево го привеле Б.Б. (52) од Кичево. При претрес во неговиот дом, исто така со судска наредба, била најдени и одземени 23 парчиња муниција со калибар 9 мм.

Во Охрид, полициски службеници од Отсекот за недозволена трговија со дрога и оружје при СВР Охрид го привеле Ш.Ф. (37) од Охрид. При претрес во неговиот дом била пронајдена и одземена марихуана.

Од МВР информираат дека за сите случаи бил известен надлежен јавен обвинител, а по целосно документирање на настаните против лицата ќе бидат поднесени соодветни кривични пријави.

The post ЧЕТИРИ ЛИЦА ПРИВЕДЕНИ ЗА ПОСЕДУВАЊЕ ОРУЖЈЕ И ДРОГА Акции на МВР во Струга, Кичево и во Охрид appeared first on plusinfo.mk.