Колапсот на „Еуростандард банка“ добива судска разврска. Обвинителството за гонење организиран криминал и корупција поднесе обвинение против четири лица, меѓу кои се и бизнисменот Трифун Костовски и неговиот син Коста Костовски. Тројца од обвинетите се товарат за предизвикување стечај на банка, додека за Костовски е поднесен обвинителен предлог за несовесно работење во службата.

Според обвинението, Николчо Петковски, Коста Костовски и Зоран Николовски, како носители на највисоки управувачки функции во банката, во периодот од 2013 до втората половина на 2019 година постапувале спротивно на Законот за банките и на интерните акти. Обвинителството смета дека со таквото работење биле создадени услови што довеле до сериозно нарушување на финансиската состојба на банката и до нејзиниот стечај.

Според обвинителниот акт, првообвинетиот како претседател на Управниот одбор и член на Кредитниот одбор, второобвинетиот како претседател на Кредитниот одбор и третообвинетиот како претседател на Одборот за управување со ризици и член на Управниот одбор, во периодот од 2013 до втората половина на 2019 година, постапувале спротивно на одредбите од Законот за банките и интерните акти на банката.

Со одобрување кредити на кредитно неспособни и поврзани правни лица, без соодветни анализи и обезбедување, со прикривање на реалната финансиска состојба и ризиците, како и со неточно известување до Народната банка, придонеле за значително влошување на финансиската состојба на Еуростандард Банка АД Скопје. Со ваквото постапување придонеле банката да биде доведена во стечај, а доверителите да бидат оштетени во износ од 1.662.417.664 денари.

Според обвинителниот предлог, четвртообвинетиот, во својство на претседател на Надзорниот одбор на Еуростандард Банка АД Скопје, во периодот од 2013 до 2019 година, со несовесно вршење на своите овластувања и пропуштање на должен надзор, постапувал спротивно на обврските утврдени со Законот за банките. Со тоа овозможил одобрување на нефункционални кредити, преземање прекумерни кредитни ризици, неточно прикажување на финансиската состојба на банката и непочитување на законските и интерните процедури при кредитирањето, со што придонел за создавање видлива несолвентност, намалување на сопствените средства на банката и нејзино доведување во стечај по сила на закон.

The post ПОДИГНАТО ОБВИНЕНИЕ ПРОТИВ ТРИФУН КОСТОВСКИ ЗА СТЕЧАЈОТ НА ЕУРОСТАНДАРД БАНКА Обвинети и син му Коста и две други лица appeared first on plusinfo.mk.

Со проектот Чебрен и Галиште драматично ќе се зајакне стратешката позиција на државата, која за жал не излегува на море и тој ќе биде таа предност која ја имаме, имајќи ги предвид климатските промени, потребата за вода, но и туризмот и производството на електрична енергија – рече премиерот Христијан Мицкоски на денешната собраниска седница за пратенички прашања.

– Јас сум убеден дека овој проект Чебрен и Галиште има стратешко значење, не само заради производство на електрична енергија, туку и за други намени. Да споменам дека во април оваа година, за прв пат после не знам колку време, производството на електрична енергија покрива 88,8% од вкупниот конзум кај нас, значи ние се приближуваме веќе до целосно да можеме да го покриваме она кое што го трошиме од аспект на електрична енергија, а рековме цел на оваа влада е во мандатот да имаме година кога ќе бидеме нето извозник, на крај на годината кога ќе се сумираат билансите, тоа што сме го произвеле и тоа што сме го консумирале и тоа што сме го извезле да биде споредливо, односно да извезуваме електрична енергија, тоа беше целта како влада и ценам дека тоа го правиме – посочи премиерот Мицкоски.

Премиерот Мицкоски воедно додаде дека состојбата во ЕЛЕМ е консолидирана од 7-8% акумулации и минус 150 милиони евра сега ќе оди во плус десетина и околу 80% состојба на акумулации и тоа во ек на сезона на наводнување, што значи се работи посветено, а на тоа се додава и фактот дека следната година ќе заврши гасниот интерконектор со Грција, објавен е тендерот за интерконекторот со Србија, пуштен е продуктиводот од солунското пристаниште со ОКТА, а ги заживуваат Штип-Велес гасоводот, гасоводот до Кичево, отсечката за влез до Косово, и го рестартиравме далноводот со Албанија, за да буквално бидеме раскрсница на Балканот.

– Кога ќе се анализира целокупната слика дојдовме до една фаза кога можеме да бидеме горди на тоа што го правиме. Она кое што за нас преставува вистински предизвик и се спремаме, тоа е проектот Чебрен и Галиште и тука имаме два концепти кои се спротивставени од правна гледна точка инаку во суштина не се, тоа е првиот да ние направиме синдикат на заемодаватели, меѓународни финансиски институции кои ќе обезбедат пари со доволен грејс период додека трае градбата, и потоа во одреден период да почнеме со поврат, односно АД ЕСМ. И вториот концепт е да одиме со јавно приватно партнерство. Лично и како човек од фелата и универзитетски професор, а сега и претседател на македонската Влада, ценам дека за првиот концепт треба да ги исцрпиме сите можности за да го реализираме, имајќи ги предвид климатските промени ценам дека не само на нас како држава и на регионот ни се потребни два вакви сериозни проекти кои ќе обезбедат дополнителни количини на вода, не само за производство на електрична енергија, туку и за наводнување да речеме на Тиквешко Поле. Ценам дека еден ваков проект повеќенаменски може да допринесе многу, трето да го заживее тој крај, Мариово, може да се развива како туристички центар. Така што овој проект Чебрен и Галиште треба да се гледа како стратешки проект, а не како проект за енергетика и производство на електрична енергија, тоа е така се сложувам ќе биде драјвер на економијата, ќе допринесе во БДП, една милијарда и 300 милиони до 500 милиони отприлика очекуваме да чини, ќе го подобри капацитетот на електроенергетскиот систем – потенцираше премиерот Мицкоски.

Во однос на чекорите за реализација, премиерот Мицкоски на крај појасни дека се развива концептот, да се ажурираат физибилити студиите во една, како и тоа дека веќе сме во сериозни разговори и АД ЕСМ и ние како влада со потенцијални големи светски финансиски институции, од типот на Светска Банка, Европска инвестициска банка коишто би требало да направат своевиден синдикат, да обезбедат буџет и на тој начин сето тоа ние да го развиваме.

The post ЧЕБРЕН-ГАЛИШТЕ ЌЕ БИДЕ СТРАТЕШКИ ПРОЕКТ ЗА ДРЖАВАТА Ќе го зајакне енергетскиот систем, ќе ја раздвижи економијата, ќе го заживее Мариово appeared first on plusinfo.mk.

Акционерско друштво за пренос на електрична енергија и управување со електроенергетскиот систем, МЕПСО  доцни со реализацијата на инвестициите за изградба и реконструкција на делекуводи, а за дел од нив плаќа казни за неповлечени пари од кредитите земени од странски банки, бидејќи не почнал да ги гради. Друштвото исто така нема целосна сопственост на имотот кој го управува, а има и  слабости во сајбер-безбедноста и спорни вработувања.

Ова покрај другото го наведува Државниот ревизор во извештајот за работењето на МЕПСО во 2024 година.

Заклучно со 2024 година, за земените заеми, платени се провизии за одобрување и неповлечени средства, како и камати во вкупен износ од 8.996.052 евра, што претставува 8,8% од вкупниот износ на одобрени заеми.

АД МЕПСО  користи повеќе кредитни линии од меѓународни финансиски институции за финансирање на инвестиции, при што значителен дел од одобрените средства не е повлечен, што резултира со дополнителни трошоци за провизии и камати.

Вкупниот износ на одобрени тековни заеми изнесува 102.400.000 евра, од кои 52% или 53.434.992 евра не се повлечени, за што во 2024 година платена е провизија во износ од 245.629 евра (2.633.953 евра за периодот откако се одобрени заемите, се до крајот на 2025 година) .

„Ненавременото користење на заемите го зголемува финансискиот товар и ја забавува реализацијата на стратешките проекти за електропреносниот систем“, констатираат ревизорите.

Ревизорите утврдиле дека  степенот на  реализација на инвестициите во МЕПСО се движи од 9% до 62% .

Кај дел од проектите постои зголемување на вредноста на склучените договори, пролонгирање на рокот за нивната реализација, а два договори кои делумно биле реализирани се раскинати. Kај три проекти има зголемување на вредноста на првично склучените договори, при што најголемото зголемување од 51% (1.481.657 евра) е кај проектот „Ревитализација на 110kV далекувод Скопје – Велес” чиј износ по зголемувањето изнесува вкупно 4.393.609 евра, додека најголемото пролонгирањето од пет години и осум месеци е кај проектот „Реконструкција на 110kV Далекуводот Битола – Прилеп”.

Истовремено за проектот „Изградба на далекувод 110 kV  Валандово – Милетково”, иако во јуни 2024 година одобрен е заем од ЕБРД во износ од 26.400.000 евра, сè уште не се започнати активности за изградба, поради што за одобрување на заемот и провизија за неповлечени средства платени се 155.672 евра (22.205 евра во 2024 година).

„Овие состојби негативно влијаат врз модернизацијата и сигурноста на преносната мрежа и упатуваат на потреба од поефикасно управување со инвестициските проекти“, се наведува во извештајот.

АД МЕПСО давал заеми на други државни компании иако тоа не е негова основна дејност, па така сега побарува приближно 9.594,652 евра и истите се повеќе од 10 пати зголемени во однос на 2020 година.

Дел од побарувањата на друштвото (12%) се постари од три години , при што најголем дел од нив се побарувања по основ на предизвикан дебаланс од страна на правни лица – трговци на електрична енергија (БОС), како и на побарувања за користење на прекугранични преносни капацитети.

„Имајќи ја во предвид старосна структура на побарувањата, како и неизвесноста на долготрајните извршни постапки, истакнуваме дека постои неизвесност во однос на нивната наплата“, велат ревизорите.

Дваесет години по приватизацијата на поранешното ЕСМ, МЕПСО сѐ уште, не ја решило сопственоста на  33 трафостаници кои се водат како заедничка сопственост со приватната  ЕВН Македонија.

Сопственоста на овие трафостаници , според ревизорите е запишана само на ЕВН Македонија или се води постапка за преземање.

„Друштвото во повеќе наврати иницирало постапки за решавање на сопственоста на трафостаниците, но таа се уште не е завршена. Во 2025 година формирана е заедничка работна група, која договорила процесот да се реализира во две фази, преку меѓусебен пренос на право на сосопственост (соодветен идеален дел) на трафостаниците запишани на име на секое од друштвата, додека за неизложените трафостаници утврдување на фактичката состојба и конечно уредување на сопственичките права продолжува“ , наведуваат ревизорите.

Во МЕПСО и во 2024 година ја нема регулирано сопственоста на и на  останатата  електропреносна инфраструктура, вклучително и земјиштето, а за дел од имотот нема точна сметководствена  евиденција.

Преносната мрежа на АД МЕПСО Скопје интегрира 112 далекуводи, при што за 53 далекуводи запишано е правото на сопственост во Агенцијата за катастар на недвижности, додека за 59 далекуводи друштвото не располага со имотни листови .

„За овој имот отпочнати се постапки за утврдување на правниот статус, но истите се сложени и долготрајни поради големиот број локации и нерешените имотно-правни односи, а во одредени случаи не може да се утврди основот за стекнување на правото на сопственост“, велат ревизорите.

Дополнително утврдено е дека со расположливите податоци во воспоставената сметководствена евиденција на далекуводите и трафостаниците (евидентирани се по делови, на различни сметки за градежни објекти, постројки и опрема и со неусогласени називи) не е можно да се потврди нивниот број и вредност.

„ Оваа состојба влијае на висината на тарифата за пренос на електрична енергија, која се утврдува со одлука од страна на РКЕ, а врз основа на сметководствените податоци и финансиски евиденции доставени од страна на АД МЕПСО Скопје“, се наведува во извештајот.

Ревизорите утврдиле и дека кај  65% од нововработените лица (45) утврдени се неправилности во однос на исполнувањето на условите од јавниот оглас и актот за систематизација и распределбата на работните места, а кај дел од нив кратко по вработувањето е извршено прераспределување или унапредување.

Со ревизијата утврдени се и други состојби кои се однесуваат на извршениот попис, расходувани средства, пријавената кражба, реализацијата на Годишната инвестициона програма, начинот на финансирање на синдикалните организации при АД МЕПСО Скопје, отчетноста на ангажираните лица преку авторски договори, начинот на доделување спонзорства и донации и други состојби кои имаат влијание врз работењето на друштвото.

The post МЕПСО ЗЕМАЛ КРЕДИТИ, АМА НЕ ГИ ПОВЛЕКУВАЛ ПАРИТЕ НАВРЕМЕ Заклучно со 2024 година за провизии и за камати друштвото потрошило речиси 9 милиони евра appeared first on plusinfo.mk.

Во мај годинава, анализирано на годишно ниво, вкупните депозити бележат раст од 8,6 проценти поради повисоките депозити на двата сектора, со поголем придонес на депозитите на секторот „домаќинства“, додека вкупните кредити се со раст од 13,4 проценти како резултат на повисоките кредити кај двата сектора, со поизразен придонес на корпоративниот сектор, информира Народната банка.

Паричната маса во мај годинава е зголемена за 0,8 проценти на месечна основа, во најголем дел како резултат на растот на готовите пари во оптек, долгорочните депозити до две години и депозитните пари, при остварен раст и на краткорочните депозити. Анализирано на годишно ниво, паричната маса е повисока за 8,6 проценти, поради растот на депозитните пари, краткорочните депозити, готовите пари во оптек и долгорочните депозити до две години.

Во мај, вкупните депозити бележат месечно зголемување од 0,8 проценти, коешто се должи на зголемените депозити на корпоративниот сектор. Годишниот раст на депозитите изнесува 8,6 проценти и во поголем дел произлегува од зголемувањето на депозитите на секторот „домаќинства“.

Депозитите на корпоративниот сектор остварија нагорна месечна промена од 2,5 проценти, во поголем дел поради растот на депозитните пари и долгорочните депозити во денари, при помал раст и на краткорочните депозити во денари и долгорочните депозити во странска валута, а во услови на пад на краткорочните депозити во странска валута. Годишниот раст од 5,8 проценти главно произлегува од зголемувањето на депозитните пари и долгорочните депозити во денари, при забележан пад на краткорочните депозити во денари.

Во мај, депозитите на домаќинствата се речиси непроменети на месечна основа. Во споредба со истиот месец минатата година, депозитите на домаќинствата се повисоки за 9,7 проценти, главно под влијание на зголемувањето на депозитните пари, долгорочните депозити во денари и краткорочните депозити во странска валута.

Кредитите на корпоративниот сектор во мај бележат месечен раст од 0,9 проценти којшто во поголем дел е резултат на повисоките кредити во денари, при помал раст и на кредитите во странска валута. Анализирано на годишна основа, растот изнесува 15 проценти и во целост се должи на зголеменото кредитирање во денари.

Кредитите на домаќинствата, во мај, забележале месечно и годишно зголемување од 1,3 проценти  односно 1 процент поради растот на кредитирањето во денари и во странска валута, со поголем придонес на кредитите во денари.

Во мај, анализирано според намената на кредитите одобрени на физичките лица, најзастапените категории ‒ потрошувачките и станбените кредити, остварија месечно зголемување од 1,1 процент и 1,4 проценти, соодветно, при годишен раст од 11,2 проценти и 16,3 проценти, соодветно. Овој месец, автомобилските кредити се повисоки за 1,7 проценти и 8,4 проценти на месечна и на годишна основа, соодветно.

– Кредитите одобрени на кредитните картички, во мај, бележат месечен раст од 0,2 проценти, во услови на годишен пад од 4,1 процент. Во мај, негативните салда на тековните сметки забележаа месечно и годишно зголемување од 6,1 проценти и 5 проценти, соодветно, додека кредитите одобрени врз други основи се намалени за 0,5 проценти и 10,3 проценти на месечна и на годишна основа, соодветно – информира Народната банка.

The post РАСТ ОД 8,6% НА ВКУПНИТЕ ДЕПОЗИТИ ИМАЛО ВО МАЈ За 13,4% пораснале вкупните кредити appeared first on plusinfo.mk.

Просечната каматна стапка на вкупните депозити на годишна основа бележи намалување од 0,04 п.п., при што во април таа изнесува 2,16%. Во април и просечната каматна стапка на вкупните кредити бележи годишен пад и тоа од 0,41 п.п. и изнесува 4,70%, покажува последниот извештај на Народна банка.

Податоците покажуваат и месечно намалување на каматата на вкупните депозити на  домаќинствата. Таа во во април изнесува 2,10% и е намалена за 0,01 п.п.

„Падот на месечна основа се должи на намалувањето на сите компоненти – каматните стапки на денарските депозити без и со валутна клаузула и каматните стапки на депозитите во странска валута (за 0,01 п.п., соодветно)“, се наведува во извештајот на Народна банка

На годишно ниво, оваа каматна стапка е намалена за 0,04 п.п.

Сепак, мало зголемување од 0,01 процентен поен има на каматната стапка кај  новопримените депозити на домаќинствата. Таа сега 2,31%.

Каматната стапка на вкупните кредити на домаќинствата, во април, изнесува 5,06% и забележа намалување од 0,02 п.п. на месечно ниво, под влијание на намалените каматни стапки на денарските кредити без и со валутна клаузула, додека каматните стапки на кредитите во странска валута се непроменети.

Оваа каматна стапка бележи годишно намалување од 0,42 п.п.

Во април, просечната каматна стапка на новоодобрените кредити на домаќинствата се намали за 0,04 п.п. на месечна основа и изнесува 4,65%.

„Месечниот пад произлегува од намалувањето на каматните стапки на сите компоненти – каматните стапки на кредитите во странска валута (за 0,26 п.п.) и каматните стапки на енарските кредити со и без валутна клаузула (0,06 п.п. и 0,04 п.п., соодветно)“, наведуваат од Народна банка.

Во споредба со истиот месец претходната година, оваа каматна стапка е пониска за 0,02 п.п.

Кога се има предвид корпоративниот сектор, просечната каматна стапка на вкупните депозити на секторот во април е намалена за 0,08 п.п. и изнесува 2,67%.

Овој месец, каматната стапка на новопримените депозити на корпоративниот сектор бележи месечно зголемување од 0,54 п.п. и изнесува 2,74%.

Просечната каматна стапка на вкупните кредити на корпоративниот сектор, во април е повисока за 0,02 п.п. во однос на претходниот месец и изнесува 4,35%.

„Притоа, нагорната промена е резултат на зголемувањето кај сите компоненти, каматните стапки на денарските кредити со валутна клаузула и на каматните стапки на кредитите во странска валута (за 0,03 п.п. и 0,02 п.п., соодветно), како и на каматните стапки на кредитите без валутна клаузула (за 0,01 п.п.). На годишнаоснова, оваа каматна стапка оствари пад од 0,38 п.п “, наведуваат од НБ.

Во април, каматната стапка на новоодобрените кредити на корпоративниот сектор изнесува 4,50%, што претставува месечен раст од 0,25 п.п.

Во споредба со април минатата година, каматната стапка на новоодобрените кредити
на корпоративниот сектор е повисока за 1,08 п.п.

The post ГОДИШЕН ПАД НА ПРОСЕЧНАТА КАМАТА НА ВКУПНИТЕ ДЕПОЗИТИ Во април таа изнесувала 2,16% appeared first on plusinfo.mk.

Се изедначи долгот во кредити на граѓаните и компаниите. Заедно тие во банките должат вкупно  9,35 милијарди евра, а поединечно граѓаните должат 4,655 милијарди евра, а компаниите е 4,659 милијарди евра, покажуваат податоците на Народната банка.

Само во април вкупниот долг на компаниите и граѓаните се зголемил за 1%. На годишно ниво, пак , забележан е вкупен раст од 13,3%, со тоа што кај компаниите растот е од 15% , а кај домаќинствата од 11,9%.

Граѓаните најмногу се задолжувале со потрошувачките и станбените кредити. Во април  во однос на претходниот месеца потрошувачките кредити пораснале за 1,2% , а станбените за 1,3%. На годишно ниво растот е од 11,2% односно од 16,2%.

Овој месец, автомобилските кредити остварија раст од 1,1% на месечна  и од 4,9% на  годишна основа, додека кредитите одобрени на кредитните картички забележаа месечно  намалување од  0,5% и годишен пад од 4,6%.

Негативните салда на тековните сметки бележат месечно намалување од 6,3% во април, во услови на годишен раст од 3,7%.

Во април, кредитите одобрени врз други основи се намалени за 1,4% на месечна и од 11,2% на годишна основа.

Компаниите и граѓаните во април во банките имале депозити во вкупен износ од 10,66 милијарди евра. Од нив на граѓаните се 7,33 милијарди евра.

Според податоците на Народна банка вкупните депозити во април се намалени за 1,4% на месечна основа, во целост како резултат на падот на депозитите на корпоративниот сектор од 9,1%, додека депозитите на секторот „домаќинства“ остварија раст од 1,6%.

Анализирано на годишно ниво, вкупните депозити бележат раст од 9,3%, поради зголемените депозити на двата сектора, со поизразен придонес на секторот „домаќинства“.

Годишниот раст на депозитите на корпоративниот сектор изнесува 6,0%, додека кај домаќинствата депозитите пораснале за 10,5%.

The post ГРАЃАНИТЕ И КОМПАНИИТЕ ДОЛЖАТ 9,35 МИЛИЈАРДИ ЕВРА ВО БАНКИТЕ Нивните депозити се зголемија на 10,66 милијарди евра appeared first on plusinfo.mk.

Во првиот квартал годинава најголема постигната цена на стан по метар квадратен изнесува 177.667 денари (130.000 евра) за вкупна површина од 45 метри квадратни кој се наоѓа на територијата на општина Кисела Вода. За метар квадратен се платени 2.888 евра. Тоа го покажуваат податоците од денеска објавениот Извештај од Регистарот на цени и закупнини на Агенцијата за катастар на недвижности за периодот јануари-март годинава,  според кој бројот на реализирани трансакции на пазарот на недвижности е значително намален.

Табела 7 е со просечни цени само на станови (продажба на стари станови и станови продадени од инвеститор) по административни општини. Во оваа анализа за определување на просечните цени на станови земени се само договори за купопродажба на стан со пп – помошни површини (тераси, балкони, лоѓии).

Во Регистарот на цени и закупнини во првите три месеци од годинава регистрирани се 712 новоизградени станови, односно станови од инвеститор, што е за 292 станови  или -29  проценти помалку во споредба со  четвртиот квартал  од минатата година.   Во Агенцијата за катастар на недвижности досега се запишани 28.013 листови за предбележување на градба што укажува дека  тие објекти се во фаза на градба и наскоро ќе се најдат на пазарот на недвижности.

Компаративно со четвртиот квартал од 2025 година бројот на продадени станови во првиот кавртал од 2026 година е намален за 27 проценти, а нивната вкупна финансиска вредност е намалена за 23  проценти.  За 23 проценти е намален и бројот на продадени куќи, a пад на квартално ниво има и кај продажбата на земјоделско земјиште и шуми, за 8 проценти,  како и кај продадените деловни простори за 11.

Најголем број продадени станови евидентирани во Регистарот на цени и закупнини има во Општина Аеродром,  каде во овој квартал се продадени 193 станови, а најмногу куќи, 54, се продадени во Битола. Во Центар се продадени најмногу деловни простори, 22,  во Кочани најмногу недвижности од типот на земјоделско земјиште и шуми, 83, во Куманово  градежно земјиште, 37 продажби. Во  првиот квартал регистрирани се и продажби на 151 гаражи, и тоа во поголем број општини.

Пазарот на недвижности во првиот квартал 276,3 милиони евра, пад од 12,4 проценти на квартално ниво 

Од 1 јануари до 31 март годинава  регистрирани се вкупно 7.757 трансакции (збир од  купопродажби и закупи) и споредбено со четвртиот квартал од 2025 година, бележи пад од -16,4 проценти што укажува на намалена пазарна активност. Во овој квартал,  регистрирани се 4.311 продажби, 741 продажби од инвеститор и 110 откупи од Република Северна Македонија, како и 12 продажби на недвижности по пат на лицитација, односно вкупно 5.174 купопродажби на недвижности – пад за 16,9 проценти во однос на четвртиот квартал лани.

Регистрирани се и 2.583 закупи на целата територија на државата, каде има пад во однос на закупите од претходниот квартал за 15,4  проценти.

Во првиот квартал преку купопродажби се истргувани недвижности со површина од  7.492.099 метри квадратни, со вкупна достигната цена од 16.924.858.555 денари.  Под закуп пак, се дадени недвижности со површина од 2.728.415 метри квадратни, со вкупна месечна закупнина од 70.064.654 денари.  Вкупната остварена финансиска вредност на пазарот на недвижности за првиот квартал од 2026 изнесува 276,3 милиони евра, што е намалување од 12,4  проценти во споредба со четвртиот квартал од 2025 година.

Најголем број продажби имало во февруари, 1.527, а најмногу закупи, 930, се регистрирани во март. Најголем број продажби од инвеститор – продажба на новоградби (стан, деловен простор, гаража и др.) се регистрирани во март, 297.

Во четвртиот квартал од 2025 година реализирани се 5.084 продажби, додека во првиот квартал од 2026 година бројот е намален на 4.311 продажби. Ова претставува пад од 15,2 проценти. Продажбите од инвеститор бележат значително намалување од 1.094 во четвртиот квартал од 2025 година на 741 во првиот квартал од 2026 година или тоа е пад од 32,3 проценти.Кај продажбите преку лицитација нема промена, во двата квартали се евидентирани по 12 трансакции. Откупот од државата бележи значителен раст од 40 трансакции во четвртиот квартал од 2025 годинана 110 трансакции во првиот квартал од 2026 година.  Тоа претставува зголемување од 175 проценти, што е најголемата позитивна промена во анализираниот период.

Во делот на закупите е забележан пад од 3.053 во четвртиот квартал од 2025 година на 2.583 во првиот квартал од 2026 година, односно намалување од околу 15,4 проценти, што укажува на намалена побарувачка или активност во сегментот на закуп.

Регионалната анализа покажува дека во првиот квартал од 2026 година најголем број трансакции се случиле на територијата на Општина Центар, односно 529 трансакции или за -35  проценти помалку во споредба со четвртиот кавартал од 2025. Во Општина Аеродром 463 трансакции или за -28  помалку, во Карпош 365 трансакции, или за -23  проценти помалку, во Кисела Вода 331 трансакции, или за -9,6  проценти. Во Општина Битола и во Општина Штип се регистрирани по 330 трансакции.

Од општините со најмалку трансакции, Вевчани има една трансакција, Арачиново четири, Центар Жупа пет, Новаци и Пласница по шест, Зрновци осум.

The post ЗА СТАН ОД 45 КВАДРАТИ ВО КИСЕЛА ВОДА ПЛАТЕНИ 130.000 ЕВРА! Пад на пазарот на недвижности во првиот квартал appeared first on plusinfo.mk.

Годишен раст на просечната каматна стапка на вкупните депозити од 0,02 п.п., при што во јануари таа изнесува 2,20%. Просечната каматна стапка на вкупните кредити бележи годишен пад од 0,48 п.п. и изнесува 4,73%, покажуваат податоците на Народна банка.

Според овие податоци, во јануари, просечната каматна стапка на новопримените депозити изнесува 2,33% и оствари месечен пад од 0,03 п.п и годишен пад од 0,15 п.п. Просечната каматна стапка на новоодобрените кредити е повисока за 0,15 п.п. на месечна основа и изнесува 4,40%, додека на годишна основа е намалена за 0,30 п.п.

Кога се имаат предвид просечните каматните стапки на вкупните кредити на домаќинствата, тие во јануари  се намалени за 0,04 процентни поени во однос на декември лани и изнесуваат 5,11%

Од НБ објаснуваат дека тоа се должи на падот на каматните стапки на денарските кредити без валутна клаузула (за 0,05 п.п.), додека каматните стапки на денарските кредити со валутна клаузула и каматните стапки на кредитите во странска валута не остварија месечна промена.

Каматната стапка на вкупните кредити на домаќинствата бележи годишен пад од 0,44 п.п.

Во јануари, просечната каматна стапка на новоодобрените кредити на домаќинствата оствари месечен раст од 0,29 п.п. и изнесува 4,67%. Зголемувањето произлегува од повисоките каматни стапки на денарските кредити без валутна клаузула и на каматните стапки на кредитите во странска валута, при забележан пад на каматните стапки на денарските кредити со валутна клаузула.

Анализирано на годишна основа, оваа каматна стапка е пониска за 0,09 п.п.

Каматната стапка на вкупните депозити на домаќинствата, во јануари, е намалена за 0,01 п.п. на месечно ниво и изнесува 2,13%.

-Надолната промена е резултат на намалените каматни стапки на сите компоненти: каматните стапки на денарските депозити со и без валутна клаузула и каматните стапки на депозитите во странска валута- велат од НБ..

Кај каматната стапка на вкупните депозити на домаќинствата е забележан годишен раст од 0,02 п.п.

The post ПРОСЕЧНАТА КАМАТА НА ДЕПОЗИТИТЕ ИЗНЕСУВА 2,20% Кај кредитите просекот е двојно повисок и изнесува 4,73% appeared first on plusinfo.mk.

Вкупните депозити во јануари на годишно ниво се зголемени за 10,5%, во поголем дел поради порастот на депозитите на секторот домаќинства. Вкупните кредити, пак, бележат зголемување од 13,6% под влијание на растот на кредитирањето кај двата сектора, со поизразен придонес во корпоративниот сектор, соопшти Народната банка.

Според овие податоци, сега компаниите и граѓаните во банките чуваат 10,6 милијарди евра, а нивниот кредитен долг изнесува 9,1 милијарди евра.

Паричната маса во јануари 2026 година е намалена за 1,4 % на месечна основа, во поголем дел како резултат на падот на краткорочните депозити и на депозитните пари при негативен придонес и на готовите пари во оптек и на долгорочните депозити до две години. И сега таа изнесува 11,7 милијарди евра.

На годишно ниво, паричната маса бележи зголемување од 10,7 % поради растот на депозитните пари и краткорочните депозити при помал раст и на готовите пари во оптек и на долгорочните депозити до две години.

Во јануари депозитите на корпоративниот сектор забележаа месечно намалување од 2,1 % како резултат на намалувањето на краткорочните депозити, во услови на остварен раст на депозитните пари и на долгорочните депозити. Споредено на годишна основа, депозитите на корпоративниот сектор бележат зголемување од 9,8 % поради растот на депозитните пари и на краткорочните депозити, во помала мера и на долгорочните депозити во денари, а долгорочните депозити во странска валута забележаа намалување.

Овој месец вкупните депозити на домаќинствата остварија месечен пад од 0,4 % како резултат на намалените депозитни пари, а другите компоненти забележаа раст. Годишниот раст изнесува 11,3 % и во најголем дел се должи на повисоките депозитни пари, долгорочните депозити во денари и краткорочните депозити во странска валута.

Кредитите на корпоративниот сектор во јануари се зголемија за 0,4 % на месечна основа, во поголем дел поради повисоките кредити во денари при помал раст и на кредитите во странска валута. Во споредба со јануари претходната година, забележан е раст од 16,2 %, кој во целост произлегува од зголеменото кредитирање во денари во услови на пад на кредитите во странска валута.

Кредитите на домаќинствата во јануари бележат месечно и годишно зголемување од 0,5 и  од 11,2%, како резултат на зголеменото кредитирање во денари и во странска валута, со поизразен придонес на кредитите во денари.

Анализирано според намената на кредитите одобрени на физичките лица, кај потрошувачките кредити, како најзастапена категорија, е остварен месечен пад од 0,2 % при годишен раст од 10,7 %, а станбените кредити се зголемени за 0,7 и за 16,1 % на месечно и на годишно ниво.

Во јануари автомобилските кредити бележат месечно зголемување од 0,1 и и годишен раст од 0,7 %..

Кај кредитите одобрени на кредитните картички е забележано месечно и годишно намалување од 0,9 и од 5,2%, а кај негативните салда на тековните сметки е остварен месечен и годишен раст од 15,0 и од 0,8%.

Кредитите одобрени врз други основи во јануари се намалени за 1,7 и  од 11,8 % на месечна и на годишна основа.

The post ПОРАСНАА ДЕПОЗИТИТЕ И КРЕДИТИТЕ ВО БАНКИТЕ Граѓаните и компаниите сега чуваат 10,6, а должат 9,1 милијарди евра appeared first on plusinfo.mk.

Во декември лани вкупните депозити забележале годишен раст од 10,1%, додека вкупните кредити пораснале за 13%, покажуваат податоците на Народната банка.

Според овие податоци кај депозитите растот е резултат на растот на депозитите на секторот „домаќинства”, при раст и на депозитите на корпоративниот сектор, а кај кредитите растот го обезбедија двата сектора со малку поизразен придонес на корпоративниот сектор.

Во декември граѓаните и компаниите чувале вкупно 10,7 милијарди евра, а нивниот долг кон банките се искачи на повеќе од 9 милијарди евра.

Граѓаните во банките во декември должеле 4,5 милијарди евра.

Анализата на кредитите што ги подигнале граѓаните покажува дека и натаму се најзастапени потрошувачките кредити и станбените кредити. Тие бележат годишен раст од 10,6% и од 5,8%. Долгот од потрошувачките кредити на граѓаните во декември изнесувал 2,3 милијарди евра, а од станбените кредити 1,7 милијарди евра.

Остатокот од долгот го прават автомобилските кредити, кредитите одобрени на кредитни картички и негативните салда на граѓаните.

Овој месец, автомобилските кредити на годишна основа остварија раст од 1,3%. Кредитите одобрени на кредитните картички бележат годишен пад 5,5%, а негативните салда на тековните сметки и кредитите одобрени врз други основи, бележат годишен пад од 2,5% и од 11,4%.

The post РАСТАТ КРЕДИТИТЕ, АМА И ДЕПОЗИТИТЕ НА ГРАЃАНИТЕ И БИЗНИСИТЕ Долгот на граѓаните во банките порасна на 4,5 милијарди евра appeared first on plusinfo.mk.