Во мало клиничко испитување на персонализирана вакцина против рак на бубрег, кај ниту еден од деветте пациенти кои ја примиле болеста не се вратила. Пациентите биле следени во просек три години и четири месеци по операцијата.

Сепак, поради малиот број учесници, резултатите не можат со сигурност да докажат дека токму вакцината го спречила повторното појавување на ракот.

Научниците развиле експериментална вакцина која има цел да го научи имунолошкиот систем да ги препознава клетките на ракот. Постапката започнува со анализа на туморот на секој пациент, по што се избираат уникатни делови од протеините, познати како неоантигени, кои се користат за изработка на вакцината.

Целта е одбранбениот систем на организмот да се активира и да го нападне ракот специфичен за конкретниот пациент.

Во истражувањето учествувале девет лица со карцином на бубрег со светли клетки, најчестиот тип на рак на бубрег кај возрасните. Седум пациенти биле во трет, а двајца во четврти стадиум на болеста.

Кај сите туморот бил целосно отстранет со операција и во моментот на вакцинацијата немале видливи знаци на болест, но биле под висок ризик таа повторно да се појави.

Научниците се надевале дека со вакцината ќе го „обучат“ имунолошкиот систем да ги уништи преостанатите клетки на ракот, кои се премногу мали за да се откријат со стандардните прегледи.

Кај сите девет пациенти се развил имунолошки одговор. Кај седум од нив, Т-клетките активирани со вакцината успеале да го препознаат и нивниот сопствен тумор. Студијата е објавена во научното списание „Nature“.

Потребна е претпазливост

Истражувачите предупредуваат дека резултатите мора да се толкуваат внимателно.

– Со оглед на ограничениот број пациенти, мора да бидеме внимателни при понатамошното толкување – изјавиле Дејвид Браун од Универзитетот Јејл и Тони Чуеири од Институтот за рак „Дана-Фарбер“, кои го воделе истражувањето.

Студијата немала контролна група, па не може да се утврди кај колку пациенти би се вратил ракот доколку не ја примиле вакцината.

Исто така, истражувањето не може да покаже дали додавањето на имунотерапевтскиот лек ипилимумаб, кој го примиле петмина пациенти, дополнително придонело за резултатот.

Зошто е тешко да се направи вакцина за рак на бубрег?

Изработката на вакцина против рак на бубрег е особено сложена затоа што овие тумори вообичаено имаат помалку мутации од, на пример, меланомите. Тоа значи дека имаат и помал број потенцијални мети за вакцината.

И покрај тоа, научниот тим успеал да произведе персонализирана вакцина за секој од учесниците.

– Нашата цел беше да создадеме траен имунитет кон антигените специфични за туморот, што на крајот би довело до имунолошки одговор против самиот тумор – изјавиле Браун и Чуеири.

Следењето покажало дека имунолошкиот одговор трае со години. Важен чекор било да се потврди дека Т-клетките активирани од вакцината можат да ги препознаат вистинските туморски клетки, а не само нивните делови во лабораторија.

Тоа било потврдено кај седум од девет пациенти. Истражувачите морале за секој пациент да зачуваат живи туморски клетки за да можат да проверат дали Т-клетките активирани со вакцината навистина го препознаваат неговиот тумор.

Немало сериозни несакани ефекти

Студијата била од прва фаза и првенствено била насочена кон безбедноста и подносливоста на вакцината.

Најчестите несакани ефекти биле благи – реакции на местото на убодот и привремени симптоми слични на грип. Ниту еден од учесниците немал сериозни несакани ефекти.

Иако резултатите покажуваат дека е можно за овој тип рак да се создадат персонализирани вакцини кои предизвикуваат долготраен имунолошки одговор, сè уште не е познато дали тие навистина го подобруваат исходот од лекувањето.

„Мора да ги испитаме персонализираните вакцини кај многу поголем број пациенти и да се увериме дека навистина ги подобруваат резултатите во споредба со сегашниот стандард на лекување“, заклучиле Браун и Чуеири.

Во тек е поголемо истражување, INTerpath-004, во кое се тестира друга персонализирана вакцина базирана на мРНК-технологија во комбинација со имунотерапија.

The post ДЕВЕТ ПАЦИЕНТИ ДОБИЛЕ ВАКЦИНА ПРОТИВ РАК Болеста не се вратила кај ниту еден од деветте пациенти со рак на бубрези appeared first on plusinfo.mk.

Кубански научници развија нов терапевтски кандидат за лекување на напреднат меланом, а препаратот наскоро треба да биде испитан и кај луѓе. Станува збор за молекулата 2C12, развиена во Центарот за молекуларна имунологија (CIM) во Хавана.

Првата фаза од клиничкото испитување ќе биде насочена кон пациенти со напреднат меланом, односно кај оние кај кои туморот не може да се отстрани со операција или веќе се проширил на други делови од телото. Во испитувањето ќе учествуваат специјализирани онколошки тимови од болници во Хавана и провинцијата Вила Клара.

Според досегашните информации, 2C12 има слични карактеристики со пембролизумаб, познат имунотерапевтски лек кој се користи и во меѓународната пракса за различни видови рак, вклучително и меланом. Целта на ваквата терапија е да му помогне на имунолошкиот систем подобро да ги препознава и напаѓа клетките на туморот.

Сепак, 2C12 не треба да се меша со веќе одобрена терапија. Во моментов станува збор за кандидат кој треба да ја помине клиничката фаза на испитување. Тоа значи дека допрва треба да се утврди колку е безбеден, колку добро делува кај луѓето и какви несакани ефекти може да предизвика. Нема објавени резултати од клиничко испитување кои би покажале дека лекот го продолжува животот или лекува меланом.

Развојот доаѓа од Центарот за молекуларна имунологија (CIM), една од клучните кубански институции за развој на биотехнолошки и имунотерапевтски производи. Куба веќе има искуство со развој на имунотерапии, меѓу кои е и CIMAvax-EGF, терапевтска вакцина која во Куба се користи кај одредени пациенти со напреднат неситноклеточен рак на белите дробови.

Кубанските власти и научници го претставуваат 2C12 и како начин да се обезбедат попристапни терапии за пациентите, особено поради високите цени на некои современи онколошки лекови на меѓународниот пазар и тешкотиите со кои Куба се соочува при набавката на лекови. Доколку клиничките испитувања покажат дека е безбеден и ефикасен, 2C12 би можел во иднина да стане нова опција за пациентите.

The post КУБА ПОДГОТВУВА НОВ ЛЕК ПРОТИВ МЕЛАНОМ Експерименталниот препарат 2C12 треба да започне со тестирање кај пациенти со напреднат рак на кожата appeared first on plusinfo.mk.

Американската Агенција за храна и лекови (FDA) го одобри Rasonque (дароксонрасиб), нова терапија за возрасни пациенти со метастатски рак на панкреасот кај кои болеста напредувала по претходен третман или кои не можат да примаат одредена комбинирана хемотерапија. Лекот го разви американската компанија Revolution Medicines и се зема еднаш дневно како таблетa.

Одобрувањето доаѓа откако големо клиничко испитување покажа значително подобри резултати од стандардната хемотерапија. Во студијата учествувале околу 500 пациенти со метастатски рак на панкреасот. Во клиничкото испитување, пациентите кои го примале лекот живееле во просек 13,2 месеци, додека кај оние кои примале стандардна хемотерапија просечното преживување било 6,7 месеци, односно, новата таблета речиси го удвојува времето на преживување.

Затоа лекот се опишува како потенцијален голем пресврт во лекувањето на напреднатата болест. Сепак, важно е да се нагласи дека не станува збор за лек кој го излекува ракот, туку за терапија која во клиничкото испитување значително го продолжила преживувањето кај пациенти кај кои болеста веќе била напредната.

Новиот лек делува на RAS, семејство протеини кои во клетките функционираат како своеобразни „прекинувачи“ и учествуваат во контролирањето на растот и делењето на клетките. Еден од нив е KRAS, протеин кој е особено важен кај ракот на панкреасот. Кај повеќето пациенти со овој вид рак постои мутација во KRAS генот, поради која сигналот за раст може да остане постојано „вклучен“ и да придонесува за неконтролиран раст на туморот. Новиот лек е создаден за да ги блокира овие сигнали и така да го забави напредувањето на болеста.

Тоа е важно бидејќи токму KRAS долго време се сметаше за исклучително тежок таргет за лекување. Новата терапија покажува дека е можно директно да се влијае врз овој механизам што го поттикнува растот на туморот.

Првите резултати од третата фаза на клиничкото испитување беа објавени уште во мај и предизвикаа голем интерес во медицинската јавност. Експертите тогаш ги оценија резултатите како исклучително значајни, особено затоа што пациентите со метастатски рак на панкреасот имаат ограничени можности за лекување.

Покрај продолжувањето на преживувањето, лекот во испитувањето имал и поинаков профил на несакани ефекти од хемотерапијата. Меѓу пријавените несакани реакции биле осип на кожата, мачнина, замор и повраќање, но кај дел од пациентите биле помалку изразени од токсичностите што често се поврзуваат со хемотерапијата.

Одобрувањето на FDA е забрзано, што ја покажува важноста што американските регулатори му ја дале на новиот третман. Лекот засега е одобрен во САД, додека неговата достапност и регулаторниот статус во Европа зависат од дополнителните постапки пред европските институции.

Цената е уште еден важен аспект. Според извештаите, 30-дневната терапија во САД чини околу 39.800 долари, иако производителот најавил програми за финансиска помош за пациентите.

Ракот на панкреасот и понатаму е меѓу најсмртоносните видови рак, па резултатите со дароксонрасиб се сметаат за значаен чекор напред.

The post ОДОБРЕН Е ЛЕК ШТО ГО ПРОДОЛЖУВА ЖИВОТОТ КАЈ НАЈСМРТОНОСНИОТ РАК Новата таблета носи надеж за пациентите со напреднат рак на панкреасот appeared first on plusinfo.mk.

Шабани на прес-конференцијата во врска со случајот „Брезев“ и работењето на клиничката болница „Жан Митрев“ на која присуствуваат министерот за здравство Беким Сали, директорката на Државниот санитарен и здравствен инспекторат (ДЗСИ) Ирина Сотировска Бухова, како и претседателката на Лекарската комора Калина Гривчева Старделова, порача дека никој не е над законот и дека тој што згрешил, ќе одговара за своите постапки.

Тој информира дека веќе се закажани две комисии, етичка и комисија за клинички испитувања кои ќе работат на случајот.

– Логично е малку да се даде време за да се утврди сѐ според протоколите, прописите и законите. Сакаме да сме сигурни дека тоа било така како што е објавено. Никој не вели дека имало или немало клиничко испитување. Велиме како што кажува законот – ако некој развива некакво клиничко испитување, тоа се санкционира, а за да се санкционира треба да се потврди. Од голема помош е емисијата на ИРЛ, ги охрабрувам сите други да им помогнат на институциите. Во меѓувреме тече состанокот меѓу претставниците на МАЛМЕД и тимот од „Жан Митрев“, се соочуваат аргументите – истакна Шабани.

Според него, не може ништо да се тврди ад-хок, ако претходно не се докаже.

– Ако вели некој дека нема изјава од пациенти, не можеме да кажеме дали има или нема. Ги викнавме луѓето да достават документација. Агенцијата за лекови прати инспекција пред да се објави документарецот, им даде пет дена рок, до вчера попладне доставија дел од документацијата, денеска се дојдени за објаснување. Закажана е Комисија за клинички испитувања, а ќе заседава и Етичка комисија. Дајте барем малку време да се потврдат наодите. Што и да се утврди, ќе се постапи соодветно – рече Шабани.

Претходно, директорката на ДЗСИ соопшти дека во клиниката „Жан Митрев“ се спроведени три редовни и девет вонредни инспекциски надзори. Министерот Сали, пак, порача дека случајот „Брезев“ ќе се тера до крај.

The post САКАМЕ ДА БИДЕМЕ СИГУРНИ ДЕКА НАВИСТИНА БИЛО ТАКА Директорот на МАЛМЕД побара време за утврдување на наодите за аферата „Жан Митрев“ appeared first on plusinfo.mk.