Посетата на премиерот Христијан Мицкоски на Соединетите Американски Држави не треба да се набљудува само како уште една дипломатска посета. Таа се случува во период кога повторно се интензивираат разговорите за македонскиот европски пат. Неколку дена пред заминувањето на Мицкоски, евроамбасадорот Михалис Рокас даде една мошне интересна изјава. Тој најави дека претседателката на Европската комисија Урсула фон дер Лајен во следните две до три недели ќе го посети регионот и изрази надеж дека нејзината посета ќе биде „одлучувачки чекор“ кон почнување на пристапните преговори. Запрашан дали се работи на конкретна формула за деблокирање на процесот, тој не откри детали, но нагласи дека во изминатите месеци интензивно се работело на тоа.

Оттука се наметнува логичното прашање: дали посетата на Мицкоски во Вашингтон и претстојната посета на Фон дер Лајен во Скопје се две целосно одвоени дипломатски случувања, или во меѓувреме може да се создава поширока американско-европска усогласеност околу Република Македонија?

Од она што досега е јавно познато, од американската посета би можеле да се издвојат четири можни конкретни резултати.

Прво, посилна политичка поддршка од Вашингтон за македонскиот европски пат. Самата дебата на Атлантскиот совет на 17 септември беше поставена токму околу стратешкото партнерство со САД, економската иднина и патот на Македонија кон Европската Унија. САД не можат правно да гарантираат дека една земја членка на ЕУ никогаш нема повторно да постави услов, но можат да имаат значајна дипломатска и политичка улога во создавањето попредвидлив процес.

Второ, американските инвестиции. Разговорите на Мицкоски со ,,американската развојна финансиска корпорација – DFC’ се однесуваа на можности за инвестиции во енергетиката, високите технологии и други стратешки сектори. Веќе постои и конкретен пример: во април DFC потпиша договор од 5 милиони долари за развој на проектот за антимон во Крстов Дол, што беше прв проект на оваа американска институција во Македонија. Затоа секој нов проект, финансиски пакет или меморандум би бил реален и мерлив резултат од посетата.

Трето, натамошно продлабочување на економското партнерство со САД. На 12 февруари годинава Вашингтон и Скопје договорија рамка за иден договор за реципрочна трговија, кој ги опфаќа трговијата, енергетиката, дигиталната економија и можностите за користење американски течен природен гас (LNG). Во документот експлицитно е наведено дека двете страни ќе продолжат да работат на финализирање и подготовка на договорот за потпис. Оттука, забрзувањето или конкретизацијата на овој договор би била уште една можна придобивка.

Но четвртиот резултат е политички најинтересен: македонско-бугарското прашање и можните гаранции. Токму тука најјасно се спојуваат релациите САД – Македонија – Европска Унија. Македонија знае што се очекува од неа во европскиот процес, додека нашата Влада има јавно и јасно поставени црвени линии во однос на начинот на кој би се продолжило понатаму.

Оттука, САД можат да дадат силна политичка и дипломатска поддршка за деблокирање на процесот, но ЕУ е таа што таа политичка волја треба да ја преточи во јасна, предвидлива и институционално одржлива европска рамка.

Затоа суштинското прашање повеќе не е само што Македонија треба да направи, туку што следува откако тоа ќе го направи. Доколку Вашингтон и Брисел успеат да изградат усогласен пристап, евентуалните уставни измени би можеле да бидат проследени со појасен патоказ за следните чекори и со цврсти политичко-правни гаранции и уверувања за предвидливост на процесот и за непречено продолжување на преговорите.

Токму затоа клучниот збор е гаранции.

Во тој контекст изјавата на евроамбасадорот Михалис Рокас станува уште поинтересна. Тој најави дека Урсула фон дер Лајен треба да го посети регионот во следните две до три недели и изрази надеж дека нејзината посета ќе претставува „одлучувачки чекор“ кон започнувањето на пристапните преговори. Истовремено, запрашан за можни решенија околу уставните измени, не навлезе во детали.

Ако Фон дер Лајен доаѓа само за уште еднаш да ја повтори веќе познатата позиција дека Македонија треба да го измени Уставот, позиција што на 17 септември 2026 година повторно ја изнесе и еврокомесарката за проширување Марта Кос во интервју за бугарската БНТ, тогаш тешко би можело да се објасни што би било „одлучувачкото“ во таа посета.

Ако, пак, зад зборовите на Рокас стои подготовка на дополнителен политички пристап, тогаш посетата на Фон дер Лајен добива сосема поинаква тежина. Оттука, сосема е легитимно да се постави прашањето дали до нејзиното доаѓање во Скопје Вашингтон и Брисел можат дополнително да ги усогласат своите позиции околу начинот на кој би се придвижил македонскиот процес.

Таквата координација не би била преседан. На 9 јули 2022 година тогашниот американски државен секретар Ентони Блинкен и високиот претставник на ЕУ за надворешна и безбедносна политика Жозеп Борел објавија заедничка изјава во поддршка на отворањето на пристапните преговори со Македонија. Во истиот документ САД и ЕУ ја нагласија својата определба за поблиска соработка на Западниот Балкан.

Затоа и денес не е нереално да се размислува за усогласен трансатлантски пристап. Во една таква поставеност, Вашингтон би обезбедил дополнителна политичка тежина и дипломатска поддршка, додека Брисел располага со институционалните механизми преку кои евентуалниот договор би се преточил во конкретни следни чекори на пристапниот пат.

Доколку работите се одвиваат според овие мои предвидувања, посетата на Урсула фон дер Лајен може да биде важна точка на проверка. Тогаш би требало појасно да се види дали Брисел останува само на веќе познатата порака за уставните измени или, пак, се оформува и поширока формула за тоа што следува по нив.

Дали таа формула ќе се нарекува гаранции, прецизен патоказ, политички механизам или поцврста европска обврска, во овој момент не можеме да знаеме. Но наредните десетина дена би можеле да покажат дали по посетата на Мицкоски во Вашингтон ќе следуваат јасни пораки или посуптилни политички сигнали од Вашингтон и Брисел што ќе одат во иста насока.

Оттука, вистинскиот биланс од посетата на Мицкоски во САД нема да се мери само според бројот на средбите, фотографиите и протоколарните изјави. Ќе се мери според тоа дали од Вашингтон ќе донесе посилна политичка поддршка, конкретни инвестиции, продлабочено економско партнерство и, пред сè, американски придонес кон поширок и поусогласен американско-европски пристап кон македонскиот европски пат.

Затоа можеби конечниот одговор на прашањето „Што ќе ни донесе Мицкоски од САД?“ нема да го добиеме веднаш по неговото враќање од Вашингтон. Можно е целосната слика за македонското-бугарско прашање да стане појасна дури со доаѓањето на Фон дер Лајен во Скопје, кога ќе видиме дали Вашингтон и Брисел навистина зборуваат со усогласен политички јазик и, уште поважно, дали покрај јасното барање што се поставува пред Македонија ќе има и јасен одговор што следува по неговото исполнување и каков степен на политички гаранции може да го придружува понатамошниот европски пат.

The post Што ќе ни донесе Мицкоски од САД? appeared first on plusinfo.mk.

Еврокомесарката Марта Кос по денешната средба со премиерот Христијан Мицкоски во Владата уште еднаш повтори дека земјава мора да ги направи уставните измени со внесување на Бугарите како малцинство, за да го продолжи патот кон Европската Унија. Кос рече дека земјава, иако испорачува многу во реформската агенда, сепак за продолжување на пристапните преговори потребни се уставни измени.

– Гледаме напредок во реформската агенда и токму поради тоа сакаме да ја поздравиме зголемената посветеност на Владата во напредувањето на оваа работа. Членство во ЕУ ќе донесе уште поголеми придобивки. Би сакала да го објаснам ова со случајот на Црна Гора. Знаеме дека Црна Гора е предводник и ќе добијат трипати повеќе средства од финансиска помош на ЕУ кога ќе станат членка. Ќе имаат веднаш придобивки, а ние истото го сакаме и за Северна Македонија. Но, усвојувањето на договорените уставни измени останува неопходниот следен чекор за формално започнување на пристапните преговори и затоа уште еднаш ја охрабрувам Владата да го започне процесот којшто наскоро може да донесе измени во Уставот. Имате ваше место во Европската Унија како полноправна земја членка и дозволете ни да работиме заедно – изјави Кос на прес-конференцијата во Владата.

Одговарајќи на новинарско прашање Кос кажа дека Европската Унија не може да дава гаранции однапред и дека ЕУ се темели на доверба, обврски, посветеност, нивно исполнување и работа. Прашана како Македонија да изгради доверба со Бугарија, кога таа не ги признава македонскиот јазик и идентитет, Кос кажа дека Европската унија е изградена токму на доверба.

– Нема рецепт како ќе ја изградиме довербата. Јас не сум онаа која може да ви дава совети за тоа како да изградите доверба со вашите соседи. Но она што го знам е дека колку повеќе доверба имате, толку полесно ќе напредувате низ пристапниот процес – рече Кос.

По средбата со Мицкоски, Кос ќе разговара и со претседателот на Собранието Африм Гаши, а ќе има средба и со вицепремиерот и министер за европски прашања, Беким Сали.

Комесарката Кос заедно со Сали и со министерката за образование и наука ќе го посети студентскиот дом „Стив Наумов“ во Скопје, реновиран со средства од ЕУ. Таа исто така ќе се сретне со младински организации од земјата за да разговараат за можностите што ги нуди поблиската интеграција со ЕУ на младите луѓе, вклучително и преку програми, како што се „Хоризонт Европа“ и „Еразмус+“. Подоцна во текот на денот, комесарката Кос ќе се сретне со претставници на организациите на граѓанското општество и медиумите за да разговара за спроведувањето на клучните реформи поврзани со ЕУ, особено во областа на владеењето на правото.

The post ЕУ НЕ МОЖЕ ДА ДАДЕ ГАРАНЦИИ ДЕКА НЕМА ДА ИМА ИДНИ ПРОБЛЕМИ НА ПАТОТ КОН ЕУ Марта Кос гледа голем напрадок во реформите, но повтори дека уставните измени се услов за напредок appeared first on plusinfo.mk.

Во рамки на панел-дискусија посветен ана односите ЕУ -Западен Балкан, одржана на Дубровник форумот, професорот на Универзитетот „Џонс Хопкинс“ во Вашингтон и долгогодишен експерт за Југоисточна Европа Едвард П. Џозеф оцени дека Европската Унија прави грешка доколку врши притисок врз Скопје да спроведе договор без јасни гаранции дека Софија ќе го почитува неговиот дух и нема да поставува нови барања поврзани со идентитетските прашања.

– Ова е уште една грешка на Европската Унија. Не треба да се врши притисок врз Скопје да спроведе договор за кој не постои никаква гаранција дека Софија ќе го почитува во неговиот дух и дека нема повторно да поставува нови идентитетски барања – истакна Џозеф на трибината под наслов „The EU and the Western Balkans: Resolving Unfinished Business Together“,.

Тој нагласи дека постојат и други можности за надминување на ваквите ситуации во рамките на институционалните механизми на Европската Унија, посочувајќи дека решенија се можни доколку постои политичка волја.

– Бугарија може да излезе од просторијата како што Унгарија излезе од просторијата кога се одлучуваше за Украина – подвлече тој.

На истиот панел, министерот за надворешни работи и надворешна трговија Тимчо Муцунски посочи дека, според 26 земји членки и институциите на Европската Унија, Северна Македонија има две основни обврски за отворање на пристапните преговори: уставните измени и исполнувањето на т.н. отворачки критериуми. Истовремено, нагласи дека една земја членка инсистира и на дополнителен сет билатерални барања, кои вклучуваат прашања поврзани со националната историја, како и други области што, според него, не се дел од европското законодавство и критериумите за членство.

The post НЕ СМЕЕ ДА СЕ ВРШИ ПРИТИСОК ВРЗ СКОПЈЕ БЕЗ ГАРАНЦИИ ДЕКА НЕМА ДА ИМА НОВИ БАРАЊА! Професорот Едвард Џозеф категорично до ЕУ appeared first on plusinfo.mk.

Генералниот секретар на НАТО, Марк Руте, вети континуирана поддршка од алијансата за Украина на четиригодишнината од инвазијата на Русија, која почна на 24 февруари 2022 година.

– НАТО стоеше покрај Украина од почетокот. Стоиме со вас денес и ќе стоиме со вас низ сите предизвици што претстојат – изјави денеска Руте во седиштето на алијансата во Брисел.

Според Руте, од врвно значење е Украина да продолжи да ја добива воената, финансиската и хуманитарната помош што ѝ е потребна.

Руте истакна дека воената помош, вклучително и онаа за противвоздушна одбрана, е „суштинска“, но додаде дека „на Украина ѝ треба повеќе“.

– Бидејќи само ветувањето за помош не ја завршува војната. На Украина ѝ треба муниција денес, и секој ден, сè додека не престане крвопролевањето – нагласи тој.

Шефот на НАТО, исто така, ги повика сојузниците да се обврзат да обезбедат мир во Украина откако ќе престанат борбите, пренесе ДПА.

– Кога борбите конечно ќе престанат, мирот мора да се одржи. Со силни украински сили подготвени да одвратат и да се одбранат, и со ефикасни безбедносни гаранции од партнерите на Украина: Европа, Канада и Соединетите Американски Држави – рече тој.

Генсекот заклучува:

– Украинскиот народ заслужува праведен и траен мир. Нивната безбедност е наша безбедност. Не може да има вистински мир во Европа без вистински мир во Украина.

The post НА УКРАИНА Ѝ ТРЕБА ПОВЕЌЕ ЗА ТРАЕН МИР Руте побара ефикасни безбедносни гаранции за Киев appeared first on plusinfo.mk.

За нашата европска интеграција, прво не треба да има никаква дилема дека наш интерес е да се најде решение за овој спор кој очигледно постои со Бугарија. Ме охрабарува што се повеќе земји членки, а и европските институции развиваат свест и до некој степен и разбирање за нашите позиции. И често ќе го слушнам моментот поврзан со прашањето за предвидливост со контрааргументот дека предвидливоста не е нешто што со сигурност може да се добие по патот на европските интегарции. Но, на сите тоа им го кажувам, дека исто така нашиот случај на европска интеграција не може ниту да се мери, ниту да се споредува со кој било друг случај во поновата историја – рече на денешната прес-конференција министерот за надворешни работи и надворешна трговија Тимчо Муцунски, одговорајќи на новинарско прашање.

Тој посочи дека пред неколку дена на дискусија во Париз премиерот на Хрватска Андреј Пленковиќ потсетил за европскиот пат на нашата земја. Муцунски повтори дека земјава во последните повеќе од 30 години промени устав неколку пати, знаме, име и да не зборуваме за, како што рече, низата национални отстапки кои се направени.

– Сега, условно кажано, можеби најлесниот потег е, барем така перцепциски изгледа, Владата да ги направи уставните измени бидејќи имаме мнозинство во Собранието. Но, што доколку Владата го направи тоа и знаеме дека за шест месеци можеме повторно да се соочиме со истата ситуација? Дали е тоа одговорен, па и европски пристап? Ние велиме мора да има рамка за предвидливост, да знаеме прво што сите толкуваме како решение од 2022 година, да добиеме некоја форма на иниституционални гаранции, дека нашиот идентитет, јазик и национална историја нема да стане предмет на преговори бидејќи во моментот не се чувствуваме комотни, дека таква ни е позицијата. Да знаеме дека другата страна ќе ги почитува меѓународните конвенции, како што се обврзала и ќе ги почитува Македонците што живеат на нејзина територија. Дали овие позиции за кои зборуваше премиерот Мицкоски на Конгресот се јасно пренесени во Брисел, немајте никаква дилема. Подолг период тие се јасно пренесени – рече Муцунски на  заедничката прес – конференција со министерката за Европа и надворешни работи на Република Албанија Елиса Спиропали.

Дали има охрабрување од одредени земји членки и од страна на европските институции и желба за воспостваување дијалог – Муцунски смета дека постои желба за воспоставување дијалог.

– И од наша страна има подготвеност уште утре да седнеме да разговораме, да дискутираме како ќе ја одблокираме оваа непринципиелна блокада која и се прави на нашата држава. Но, доколку некој очекува дека оваа Влада туку така ќе се согласи и ќе направи отстапка, без да има сигурност по иднината и завршетокот на европскиот пат, кој да, фактички ќе зависи од нас и од реформите што ќе ги спроведеме, јавноста добро знае дека таква подготвеност од наша страна нема, бидејќи не планираме да создадеме ќорсокак како што создадоа нашите претходници, посочи Муцунски.

Според него, комплексноста во целата ситуација е внатрешно-политичката состојба во Бугарија и затоа, како што рече, максимално сме внимателни и во сето тоа што ќе го кажеме јавно.

– Без сигурност, извесност и предвидливост по нашиот европски пат, кога се во прашање билатералните прашања, идентитетските и историските прашања, ние не сме подготвени во овој момент да пристапиме кон тоа што се очекува од нас – вели министерот Муцунски.

Тој соопшти дека македонските граѓани треба да бидат сигурни дека има Влада, која мисли на европскиот пат, посебно во делот на внатрешните реформи и додаде оти тоа се гледа и од законите што периодов поминуваат во собраниска процедура.

-Нема да дозволиме повторно да навлеземе во истиот циклус на блокади кои го наметнаа нашите претходници бидејќи најлесно им беше да прифатат се што ќе понуди другата страна. Треба внимателно и трезвено, а нема предизвик на кој доколку има волја од сите страни не може да се најде решение, вели Муцунски.

The post МОРА ДА ИМАМЕ ПРЕДВИДЛИВОСТ И ГАРАНЦИИ НА ПАТОТ КОН ЕУ Министерот Муцунски за можноста за внесување на Бугарите во Уставот appeared first on plusinfo.mk.

Средбата на европските лидери, американската делегација и украинскиот претседател Володимир Зеленски заврши во Берлин, Германија, а американскиот претседател Доналд Трамп се придружи на самитот во Берлин преку телефон, објави Скај њуз. Откако беше информиран за деталите од состанокот, на кој беше договорено дека Украина мора да го предаде Донбас за да добие безбедносни гаранции и брз влез во Европската Унија, американскиот претседател верува дека крајот на војната во Украина е многу блиску.

– Мислам дека сме поблиску до крајот на војната од кога било досега. Имавме добар разговор со европските лидери за војната меѓу Русија и Украина. Работите одат во вистинската насока, иако го кажуваме ова многу долго време. Имаме голема поддршка од европските лидери и тие сакаат војната да заврши. Во моментов, Русија сака конфликтот да заврши. Проблемот е што тие сакаат да заврши, а потоа одеднаш не сакаат. И Украина сака конфликтот да заврши. Проблемот е што тие сакаат да заврши, а потоа одеднаш не сакаат. Мора да ги доведеме на иста страна, мислам дека тоа функционира… Беше многу добар разговор – рече Трамп.

Зеленски по средбите во Берлин изјави дека добил понуда од САД забезбедносни гаранции налик Член 5 од НАТО, под услов Украина да не стане членка на НАТО. За украинскиот претседател проблем останува демилитаризираната зона која Украина се плаши дека Русија би можела да ја искористи во своја полза.

Исто така, Зеленски информираше дека во Берлин не бил направен напредок во однос на територијалните прашања за Украина.

Германскиот канцелар Фридрих Мерц и бројни други европски лидери се залагаат за мултинационални сили кои би обезбедиле можен прекин на огнот во Украина, јави ДПА.

Силите би биле предводена од Европа и поддржани од Соединетите Држави. Тие би им помагале на украинските вооружени сили и би ја обезбедиле безбедноста на воздушниот простор и морињата, се вели во заедничката изјава усвоена вечерва, на состанокот на германскиот канцелар Фридрих Мерц со европските лидери во Берлин.

The post БЛИСКУ СМЕ, СИТЕ САКААТ ДА ЗАВРШИ, ПА ОДЕДНАШ НЕ САКААТ Трамп ги коментираше средбите на делегации во Берлин appeared first on plusinfo.mk.

Владата нема да влезе во процес на уставни измени без исполнување на два клучни услови, изјави премиерот Христијан Мицкоски.

– Важно е две работи да се константа и тие се непроменливи. Прво, мора да имаме јасни гаранции од Европскиот совет, во форма на заклучоци, дека македонскиот идентитет и македонскиот јазик се неприкосновени и дека кога Македонија ќе стане дел од ЕУ, македонскиот јазик ќе биде официјален. Исто така, процесот мора да се води врз основа на копенхагенските критериуми, без нови билатерални прашања – нагласи Мицкоски во Тема на денот на ТВ Сител.

Вториот услов, според него, е исполнување на обврските од источниот сосед.

-Ако ние испорачуваме капитулации од претходни политичари, тогаш барем една работа треба да се исполни – регистрација на невладини организации, како ОМО Илинден Пирин, согласно 14 пресуди на Европскиот суд за човекови права, рече премиерот.

Тој додаде дека нема да прифати процес без извесност за успешен крај.

– Граѓаните се фрустрирани, многу сме дале за интеграцијата – име, знаме, банкноти, неколку промени на Уставот. Секогаш кога ќе се исполни условот, доаѓа нов. Не можам повеќе да се изложам на такво нешто – истакна Мицкоски.

Премиерот посочи дека имало иницијативи од влијателни земји членки на ЕУ за билатерални разговори, но тие биле неуспешни.

– Имаше иницијативи од многу влијателни земји членки на Европската Унија, па и многу влијателни политичари во Брисел, да се договори состанок на којшто на билатерално ниво ќе се разговара помеѓу министрите, еве да речеме за надворешни работи. Тие иницијативи, замислете, беа неуспешни. Од другата страна немаше никаков одговор – истакна Мицкоски.

Според него, ако не може еден таков состанок да се закаже, ако не може на тој состанок да се донесат официјалните лица од соседна Софија, тогаш за какви гаранции ќе се зборува дека ова ќе е последна.

– Други пак велат: „Дали сте се обиделе вие да разговарате на билатерално ниво со официјална Софија. Во ред, луѓе, ајде да расчистиме. Дали е ова билатерален проблем или, како што велите, проблем помеѓу нас – Скопје, Софија и Брисел. Ајде да видиме дали е мултилатерален или билатерален. Ако е билатерален, тогаш ние сме во право. Станува збор за процес на билатерализација, а не копенхагенски критериуми. Ако е така, да знаеме – нагласи премиерот.

The post ВЛАДАТА ИМА 2 КЛУЧНИ УСЛОВИ ЗА УСТАВНИТЕ ИЗМЕНИ Мицкоски од ЕС бара гаранции за јазикот, идентитетот, пресудите од Стразбур appeared first on plusinfo.mk.

Русија ги осуди барањата на Киев за безбедносни гаранции во рамки на мировно решение за конфликтот и ги нарече „гаранции за опасност за европскиот континент“.

– Русија нема планови да разговара за распоредување на странски трупи во Украина во кој било формат и го смета за неприфатливо – изјави денеска портпаролката на руското Министерство за надворешни работи, Марија Захарова.

Според Захарова „тоа не се гаранции за безбедност за Украина, туку гаранции за опасност за целиот европски континент“.

Таа ги отфрли како „лажни“ и тврдењата дека Русија стои зад оневозможувањето на ГПС-сигналот на авионот со кој претседателката на Европската комисија, Урсула фон дер Лајен, во неделата летала за Бугарија.

Нејзиниот коментар дојде откако претседателката на Европската комисија, Урсула фон дер Лајен, изјави дека ќе испрати европски трупи во Украина, идеја што исто така ја отфрли Германија.

Во интервју за „Фајненшл тајмс“ во неделата, Фон дер Лајен рече дека Европа изработува „прилично прецизни планови“ за распоредување на мултинационални сили во Украина како дел од повоените безбедносни гаранции што ќе бидат поддржани и од САД.

– Русија нема да разговара за странска интервенција во Украина во кој било формат, што е фундаментално неприфатливо и ги загрозува сите форми на безбедност – реагираше Захарова на зборовите на Фон дер Лајен.

Од друга страна, германскиот канцелар Фридрих Мерц, исто така, ги отфрли изјавите на Фон дер Лајен во вторник.

– Нема прецизни планови за воена акција, барем не во Германија. Европската Унија не е одговорна за донесување одлуки за воена поддршка за Киев – истакна канцеларот, додавајќи дека ова е прашање за таканаречената коалиција на подготвените, поширока група западни сојузници на Украина.

The post ТОА НЕ СЕ ГАРАНЦИИ ЗА БЕЗБЕДНОСТ, ТУКУ ЗА ОПАСНОСТ Захарова ја отфрли можноста за распоредување странски трупи во Украина appeared first on plusinfo.mk.

Франција, Германија и Велика Британија се меѓу оние кои „сакаат“ да имаат војници на терен, изјави американскиот претседател Доналд Трамп во врска со тоа како би можеле да изгледаат безбедносните гаранции за Украина додавајќи:

– Не мислам дека тоа ќе биде проблем.

Би-Би-Си пренесува што кажал шефот на САД зборувајќи во живо за Фокс-Њуз. На прашањето дали САД ќе имаат војници на терен како дел од безбедносната гаранција за Украина, Трамп е категоричен дека тоа нема да се случи.

– Вие ја имате мојата гаранција и јас сум претседател. Само се обидувам да спречам убивање луѓе – изјави Трамп.

Запрашан за тоа како поминале разговорите со европските лидери во Белата куќа вчера тој ги нарече „добри луѓе“ кои „сакаат да се стави крај на војната“.

Тој вели дека конфликтот во Украина е поблиску до нив затоа што „имаме океан што нè дели“.

– Значи, тоа е поинаква работа за нив. Кога станува збор за безбедноста, тие се подготвени да испратат луѓе на терен – додава тој.

Претседателот вели дека САД се подготвени да помогнат со аспекти на безбедноста, на пример, преку воздушна поддршка, но нагласува дека членството во НАТО не може да биде клучната форма на безбедност на која ќе се потпира Украина.

Tрамп изјави дека се надева дека Зеленски „ќе го направи она што мора да го направи“, но нагласува дека треба да биде „флексибилен“ и во преговорите. Тој вели дека не би рекол дека Зеленски и рускиот претседател Владимир Путин некогаш ќе бидат „најдобри пријатели“, но забележува дека двајцата лидери се оние кои „мораат да ги донесат одлуките“.

Тој вели дека вчера му се јавил на Путин во врска со можна тројна средба заедно со Зеленски и дека се надева дека однесувањето на рускиот лидер „ќе биде добро“. Ако не, ќе биде „тешка ситуација“, додава Трамп.

Потоа Трамп беше прашан дали разговарал за потенцијални договори за „размена на земјиште“ со светските лидери, вклучувајќи го и Зеленски, вчера во Белата куќа.

– Украина ќе си го врати животот. Тие ќе добијат многу земја. Но, ова беше војна и Русија е моќна воена нација… без разлика дали им се допаѓа тоа на луѓето или не.

The post ЕВРОПА САКА, АМЕРИКА НЕМА ДА ИСПРАТИ ВОЈНИЦИ ВО УКРАИНА Трамп вели дека Зеленски ќе го направи тоа што мора appeared first on plusinfo.mk.

Претседателот на Украина Володимир Зеленски, по синоќешната средба со американскиот колега и со европските лидери во Белата куќа изјави дека гаранциите за безбедност на неговата земја веројатно ќе бидат изготвени во рок од 10 дена.

– Подготвени сме за билатерална средба со Путин, а потоа и за трилатерална со Трамп – рече Зеленски истакнувајќи дека прашањето за евентуални територијални отстапки, какви што бара Русија, ќе биде „тема која ќе ја оставиме за разговор меѓу мене и Путин“.

Топла средба, костум и статус кво

Би-Би-Си коментира дека Зеленски ја опишал средбата со Трамп како „топла“, иако „клучното е тоа што Украина купила повеќе време“ и дека во суштина ситуацијата останува статус-кво.

Сепак, на средбата во Белата куќа, оптиката не можеше да биде поразлична овој пат, коментираат западните медиуми. За разлика од конфронтирачката средба од февруари кога Зеленски се појави во зелена маичка алудирајќи на воен костум, овојпат украинскиот лидер носеше костум, иако не од класичен тип.

Трамп го пофали неговиот изглед. Украинскиот претседател исто така постојано кажуваше „благодарам“, што сигурно го задоволи неговиот домаќин, пишува Би-Би-Си во опсежна сторија за тоа како поминала средбата.

Зеленски бил тивок, повеќе слушал отколку што зборувал

На почетокот на средбата во Овалната соба, Зеленски зборувал малку, или можеби не сакал да зборува, плашејќи се дека она што има да го каже е различно од она што Трамп сакал да го слушне. Разликите се покажале подоцна, кога американскиот и украинскиот претседател се појавија пред новинарите заедно со европските лидери.

Германскиот канцелар Фридрих Мерц и францускиот претседател Емануел Макрон рекле дека прекинот на огнот во Украина треба да биде следниот чекор, иако Трамп тврдеше дека тоа не е неопходно пред да се најде потрајно решение.

Зеленски останал забележително тивок по ова прашање.

„Она што го слушнавме од лидерите сугерира дека нивните дискусии зад затворени врати се фокусираа на безбедносните гаранции за Украина и изгледите за средба меѓу Зеленски и Путин. Не беа откриени детали за тоа какви гаранции биле разговарани или како тоа што ќе бидат лице в лице во иста просторија со Путин ќе помогне да се стави крај на војната“, пишува Би-Би-Си за состанокот на Трамп, Зеленски и европските лидери.

90 милијарди за оружје како можна гаранција

На претходна прес-конференција пред Белата куќа, тој рече дека безбедносните гаранции би можеле да вклучуваат договор од 90 милијарди долари (67 милијарди фунти) меѓу Киев и Вашингтон за набавка на американско оружје, вклучително авијациски системи, противракетни системи и други оружја што тој одби да ги открие.

Зеленски, исто така, спомна дека му покажал на неговиот американски колега карта на Украина, нагласувајќи дека Русија успеала да окупира помалку од 1% од украинската територија во последните 1.000 дена.

– Ова беше новост за Белата куќа. И тоа очигледно помогна да се промени расположението на Трамп. Се борев со она што е на таа карта – им рече Зеленски на новинарите, додавајќи дека се спротивставил на она што на картата во Овалната соба териториите биле прикажани како заробени од Русија.

The post ЗЕЛЕНСКИ ОВОЈПАТ НОСЕШЕ КОСТУМ, ГАРАНЦИИ ЌЕ ИМА ЗА 10 ДЕНА? Еве како се одвивала средбата со Трамп во Овалната соба appeared first on plusinfo.mk.