Започна ослободувањето на трасата кај мостот „Генерал Михајло Апостолски“, со што се создаваат услови за продолжување на активностите за негово конечно ставање во функција, објави скопскиот градоначалник Орце Ѓорѓиевски.

Тој посочи дека истекол рокот за иселување на семејствата чии имоти биле опфатени со завршената експропријација, по што може да продолжи расчистувањето и пробивањето на трасата.

– Она што со години стоеше заглавено, денес конечно се придвижува. Започна ослободувањето на трасата за ставање во функција на мостот „Генерал Михајло Апостолски“ – напиша Ѓорѓиевски на Фејсбук.

Мостот ги поврзува подрачјата на општините Аеродром и Гази Баба и со години беше неискористен поради нерешените прашања поврзани со трасата. Проблемот со експропријацијата беше една од клучните пречки за воспоставување целосна сообраќајна врска.

Ѓорѓиевски потсети дека мостот во јавноста со години беше нарекуван „мостот што води во дневна соба“ и „мостот за ловење риба“, токму поради тоа што не беше поврзан со целосно функционална сообраќајна траса.

Според него, со расчистувањето на теренот треба да заврши периодот во кој готовиот инфраструктурен објект не можеше да ја исполни својата намена.

– Овој мост предолго беше симбол на застојот и неисполнетите ветувања од моите претходници. Скопјани го нарекуваа „мостот што води во дневна соба“ и „мостот за ловење риба“. Зад тие зборови стоеше оправданото разочарување од проект во кој беа вложени пари, а од кој граѓаните со години немаа корист. На тоа му доаѓа крајот – наведува градоначалникот.

Целта, како што посочува Ѓорѓиевски, е мостот да добие целосна сообраќајна функција, односно да ја поврзе патната мрежа од страната на Аеродром и Гази Баба и да придонесе за олеснување на сообраќајот во Скопје.

Градот во мај годинава соопшти дека експропријациите биле најголемата пречка за пуштање на мостот во употреба, а потоа најави подготвителни активности и воспоставување на функционален сообраќаен проток.

– Кога ја презедов одговорноста да го водам Скопје, ветив дека овој проблем ќе го решиме во текот на мојот четиригодишен мандат. Денес, за помалку од една година, со гордост можам да кажам дека правиме решителен чекор кон исполнувањето на тоа ветување. Со посветена и макотрпна работа го решивме клучниот предизвик за ослободување на овој дел од трасата – експропријацијата. Паралелно продолжува и експропријацијата на преостанатиот дел од булеварот за целосно завршување на оваа важна сообраќајна врска – наведува Ѓорѓиевски.

Тој изрази благодарност до семејствата чии имоти биле опфатени со процесот на експропријација и кои, како што наведува, придонеле за да се создадат услови за продолжување на проектот.

– Знам дека зад секој дом стојат години живот, спомени и длабока приврзаност. Затоа нивното разбирање, доверба и подготвеност за договор заслужуваат почит. Ви благодарам што подадовте рака и што станавте дел од решението кое носи придобивки за цело Скопје – порача градоначалникот.

Мостот „Генерал Михајло Апостолски“ беше изграден како дел од проектот за поврзување на двете страни на Вардар, но неговото целосно ставање во функција со години беше попречено од нерешените имотно-правни прашања и трасата на пристапниот булевар.

Со започнатото расчистување на трасата проектот влегува во нова фаза, но целосното воспоставување на сообраќајната врска ќе зависи и од преостанатите активности на терен и завршувањето на целата траса.

The post „МОСТОТ ЗА ЛОВЕЊЕ РИБА“ ПРЕСТАНУВА ДА БИДЕ СИМБОЛ НА ЗАСТОЈОТ По години чекање почна пробивањето на трасата appeared first on plusinfo.mk.

Почнува уривањето на објектите и пробивањето на трасата кај мостот „Генерал Михајло Апостолски“, најави градоначалникот на Скопје, Орце Ѓорѓиевски, во гостувањето во емисијата „Колегиум“ на телевизија Алфа.

Според најавата, рокот за иселување на жителите на чии имоти е завршена експропријацијата истекол, со што, како што посочи Ѓорѓиевски, се создадени услови за почеток на работите на терен.

Целта е да се пробие трасата која ќе го поврзе мостот со останатата сообраќајна мрежа и конечно да се овозможи негово целосно користење.

Мостот „Генерал Михајло Апостолски“ со години во јавноста беше познат како „мостот што не води никаде“, но и како „мостот за ловење риба“, бидејќи иако беше изграден, немаше целосна сообраќајна врска со патната мрежа. Град Скопје и претходно го опишуваше мостот како врска меѓу булеварот „АСНОМ“ и Ќерамидница.

Ѓорѓиевски во емисијата се осврна и на процесот на експропријација. Тој рече дека граѓаните чии имоти биле опфатени со проектот не требало со години да чекаат за обесштетување.

Според него, надоместоците биле исплатени веднаш по завршувањето на постапките, а Градот им помогнал на семејствата и во процесот на иселување.

– Лично застанав зад овие граѓани и ниту еден човек не беше оставен сам да се справува со проблемот – порача градоначалникот.

Најавата доаѓа откако во изминатиот период веќе започна расчистувањето на делови од трасата во Ќерамидница. Претходно, токму експропријацијата на имотите беше една од главните пречки за поврзување на мостот со новата сообраќајница.

Со пробивањето на трасата треба да се создадат услови мостот да стане вистинска сообраќајна врска, наместо инфраструктурен објект кој со години стои без целосна функција.

Ѓорѓиевски потсети дека првично реализацијата на проектот била предвидена во подолг рок, но тврди дека работите ќе завршат значително порано.

Следниот чекор е расчистување на теренот и пробивање на трасата, по што ќе треба да следат останатите активности за целосно ставање на мостот во функција.

The post ПОЧНУВА УРИВАЊЕТО КАЈ МОСТОТ „ГЕНЕРАЛ МИХАЈЛО АПОСТОЛСКИ“ Ќе се пробива трасата низ Ќерамидница appeared first on plusinfo.mk.

Мостот „Генерал Михајло Апостолски“ конечно се става во функција, напиша попладнево скопскиот градоначалник Орце Ѓорѓиевски на Фејсбук, нагласувајќи дека со години бил симбол на застојот.

„Кај скопјани остана запаметен како ‘мостот што водеше во дневна соба’ или ‘мостот за ловење риба’. Конечно, станува мост што ќе ги поврзува луѓето, ќе го забрзува сообраќајот и ќе го менува секојдневието на граѓаните. Ова е резултат на силна волја, чесен збор и секојдневна, макотрпна работа“, вели градоначалникот во објавата објавувајќи фотографии.

Тој посочи дека кога ја презел одговорноста да го води Скопје, ветил оти овој проблем ќе биде решен во текот на четиригодишниот мандат. Ѓорѓиевски истакна дека со гордост може да каже дека тоа ветување се исполнува за помалку од една година.

Во изминатиот период, посочи тој, решен бил најголемиот предизвик, експропријацијата.

„По истекот на рокот за преселување на семејствата кои живееја на трасата, денес започнуваме со расчистување на булеварот „АСНОМ“, токму од мостот „Генерал Михајло Апостолски“, со што започнува неговото конечно ставање во функција. Паралелно продолжува и процесот на експропријација на преостанатиот дел од булеварот, сѐ до неговото целосно завршување. Од срце сакам да им изразам благодарност на луѓето со кои денес заеднички испишуваме едно ново поглавје. Благодарам на чесните, достоинствени и домаќински семејства кои покажаа разбирање и мудрост, кои подадоа рака таму каде што со години имаше застој. Благодарам за довербата, за човечкиот однос. Денес, тие не се дел од проблемот, туку решението “, додаде Ѓорѓиевски.

Тој им се заблагодари и на неговите колеги, градоначалниците на општините Аеродром и Гази Баба – Дејан Митески и Бобан Стефковски, за нивната посветеност, поддршка и заедничка борба овој долгогодишен проблем конечно да стане минато.

– Но, ова не е единствениот откочен проект. За само неколку месеци ги откочивме „Момин Поток“, булеварот „Борис Трајковски“, мостот на „Љубљанска“ и подземната сообраќајница на булеварот „Македонија“ – проекти кои со години изгледаа како недостижна желба, а денес чекор по чекор стануваат реалност. Тоа е разликата кога има визија. Тоа е разликата кога има храброст да се носат одлуки. Тоа е разликата кога се работи секој ден, без изговори. Тоа е разликата кога дадениот збор пред народот е света обврска, а не празно политичко ветување – подвлече градоначалникот.

Ѓорѓиевски нагласи дека секоја завршена улица, секој откочен проект, секој нов мост е доказ дека Скопје повторно се движи напред.

– Ова е резултат на силна, искрена и неуморна работа. Но, повеќе од сѐ, ова е резултат на довербата што секојдневно ми ја давате вие, мојот народ. Таа доверба е мојата најголема сила и најголема обврска. Кога има искрена намера, кога има чесен пристап и кога постои љубов кон својот град, нема невозможни проекти. Продолжуваме уште посилно. За Скопје што повторно победува. За Скопје какво што го сакаме. За Скопје, какво што го заслужуваме – се додава во објавата на Ѓорѓиевски на Фејсбук.

The post НЕМА ПРЕЧКИ, МОСТОТ „ГЕНЕРАЛ МИХАЈЛО АПОСТОЛСКИ“ ЌЕ БИДЕ ПУШТЕН Експропријацијата е решена со мудрост и разбирање, вели Ѓорѓиевски appeared first on plusinfo.mk.

Со искрено задоволство ја споделувам веста која со години ја чекаа повеќе од 100.000 жители што секојдневно го користат еден од најклучните сообраќајни правци во Скопје булеварот Борис Трајковски, пишува на својот профил на Фејсбук, градоначалникот на Скопје Орце Ѓорѓиевски.

„Денеска остварив средба со стопанствениците долж трасата и постигнавме договор за забрзано спроведување на експропријацијата, процес кој во минатото останал недовршен.

Со тоа, конечно се отвора патот за реализација на овој долгоочекуван, но премногу пати неисполнет проект. Овој булевар е еден од моите најзначајни приоритети, покрај останатите капитални инфраструктурни зафати во градот. Предолго беше заглавен од моите претходници, претворен во вистинска голгота за илјадници граѓани. Тоа време завршува“, порача Ѓорѓиевски по состанокот на кој е постигнат договорот.

Истовремено, тој најави дека во најскоро време ќе биде објавена јавната набавка, а проекциите се дека изградбата ќе биде комплетирана до крајот на оваа календарска година.

„Оние 850 метри голгота, од трафостаницата во Пинтија до кружниот тек во Драчево – заминуваат во минатото. На нивно место ќе никне современ булевар со четири коловозни ленти и безбедна пешачко-велосипедска патека“ – вели скопскиот градоначалник и замолува за уште малку трпение додека траат градежните активности.

The post БУЛЕВАРОТ БОРИС ТРАЈКОВСКИ КОНЕЧНО ЌЕ СЕ „ПРОБИЕ“ ДО ДРАЧЕВО Договорена е забрзана експропријација appeared first on plusinfo.mk.

Рускиот претседател Владимир Путин потпиша закон со кој се овозможува експропријација на неискористени станбени објекти во окупираните украински територии. Со тоа, руските власти добиваат правна рамка за национализирање домови во регионите Доњецк, Луганск, Запорожје и Херсон, области што Москва ги анектираше во 2022 година, спротивно на меѓународното право.

Законот, објавен на државниот портал, наведува дека „станови и куќи кои покажуваат знаци на напуштеност стануваат сопственост на локалните власти“, најчесто на самопрогласените администрации поддржани од Кремљ.

Според одредбите, имотите подоцна може повторно да се продадат или да се дадат на користење на лица што ги изгубиле домовите во украинските напади, како и на државни службеници на руската администрација во окупираните региони.

Од почетокот на инвазијата наредена од Путин, милиони луѓе избегаа од источна Украина за да избегнат уништување и насилство. Некои оттогаш се вратија, вклучително и во области кои сега се окупирани од Русија.

Сепак, многумина се населиле во други делови на Украина или во странство. Овие луѓе, кои мораа да ги напуштат своите честопати приватно поседувани домови при бегството, се засегнати од регулативата.

The post EУ ЗАМРЗНУВА РУСКИ ИМОТ, ПУТИН „ПРЕТОПУВА“ УКРАИНСКИ КУЌИ Нов чекор во анексијата на Донбас appeared first on plusinfo.mk.

Ова прашање, според образложението на законските измени предложени од група пратеници од ВМРО-ДПМНЕ, не било регулирано во Законот за стратешко партнерство за изградба на инфраструктурниот Коридор 8 проектот за автопатот Требеништа – Струга – Ќафасан) и Коридорот 10 д (делница на автопатот Прилеп – Битола).

„Во текот на изградбата односно спроведувањето на Проектот се наметна потребата од уредување и на начинот на исплатата на работите поврзани со експропријацијата што претставува претходен неопходен елемент со цел непречено и забрзано спроведување на Проектот кој е од јавен интерес односно изградбата на Коридорот 8 и Коридорот 10 д“, се наведува во образложението за потребата од измени на законот.

Со измените се предвидува исплатата на парите од буџетот на  стратешкиот партнер поврзани со реализација на проектот и за извршување на работите поврзани со експропријацијата неопходна за спроведување на изградбата на коридорите 8 и 10д да се извршува преку Министерството за транспорт и врски.

„Исплатата на финансиските ресурси за спроведување на Проектот ќе се врши на Стратешкиот партнер во согласност со применливите закони, односно за работите поврзани со експропријацијата во врска со спроведувањето на Проектот ќе се врши на Инвеститорот во форма на трансфер преку Министерството за транспорт“.

Тоа значи дека пресметаниот износ на надоместокот за одземеното земјиште од страна на државата за реализацијата на патните коридори, на сопствениците ќе им се исплаќа преку Министерството за транспорт и врски.

Директорот на Јавното претпријатие „Државни патишта“, Коце Трајановски, при неодамнешниот увидот во работата на „Бехтел и Енка“ на делницата Гостивар – Букојчани, рече деца експропријацијата на земјиштето од целиот проект Коридор 8 и Коридор 10д ќе заврши до Нова година.

– Оваа обврска е преземена од претходната влада, но многу работи се дури закочени. Експропријација не може да се заврши за шест месеци, во август месец не беше ниту започната. Откако сум дојден за неполн месец ние завршивме 2.400 катастарски парцели како експроприрани. Тоа е главниот проблем за изведување на градежните работи. Кога има застој плаќаме пенали во милиони евра. Ние сме тука да ја забрзаме оваа постапка за Македонија да не плаќа пенали – рече Трајановски.

Трајановски рече дека интензивно се работи на експропријации за кои  претходната влада дала рокови да бидат завршени минатата година, а средствата за таа намена се надвор од планираните 1,3 милијарди евра за изградбата на автопатиштата.

The post СЕ ЗАБРЗУВА ИЗГРАДБАТА НА АВТОПАТИШТАТА ШТО ГИ ГРАДИ „БЕХТЕЛ И ЕНКА“ Исплатата на експропријацијата ќе оди преку Министерството за транспорт appeared first on plusinfo.mk.

Се интензивира градбата на автопатите од коридорот 8 и 10д кои ги гради конзорциумот „Бехтел и Енка“ за кои експропријацијата на површините е при крај, изјави денеска министерот за транспорт и врски Александар Николоски.

– Во однос на експропријацијата имаме голем прогрес. До крајот на јануари ќе биде завршена целата експропријација. Како пример можам да кажам дека додека дојдов на министерската позиција, одноsно за 2 години беше завршена 20% од експропријацијата, а за шест месеци ќе биде завршена 75%. што многу зборува за посветеноста. Така за најтешката делница Гостивар-Букојчани до август беа завршени околу 400 постапки за експропријација од вкупно 1.290 кои треба  да се завршат. Останатите ќе ги завршиме за 5 до 6 месеци и до крајот на јануари ќе заврши целокупната експропријација во делот на коридорите 8 и 10д со исклучок на делот од коридорот кој зафаќа во делот од заштитената зона на Охридското Езеро – рече Николоски.

The post Ѝ СЕ ДАВА „ПАС“ НА „БЕХТЕЛ И ЕНКА“ До крајот на јануари ќе заврши целата експропријација за патните коридори appeared first on plusinfo.mk.

Автопатот ќе биде модерен, со вкупно шест ленти, по три во двете насоки и ќе има помошен алтернативен пат.

– Од Градско до влезот на Прилеп ќе се вози по експресен пат, таму ќе има еден кружен тек каде лево ќе се влегува во Прилеп, а десно до Битола ќе се вози по нов автопат. За три години од денес, од Скопје до Битола ќе имаме автопатско решение, што значи дека патувањето од Скопје до Прилеп ќе се намали на еден час и десетина минути, а до Битола на еден час и четириест минути. Тоа значи дека ќе се смени динамиката на развој, ќе има раздвижување на економијата, на бизнисот, бидејќи голем дел од БДП-то доаѓа од овој регион – рече Николоски.

Бенефит ќе имаат и општините во тој дел, Кривогаштани, Крушево, Могила, Новаци, Ресен, додаде министерот.

– Ова е огромен проект, кој не е виден во Централна Македонија и кој целосно ќе ја промени сликата во Пелагонскиот регион – рече тој.

Николоски потенцирше дека во изминатиот период се соочил со бројни предизвици за овој проект, како што е деминирање на бројни експлозивни направи од Првата светска војна. Со помош на Министерството за одбрана се засилила динамиката на деминирање на теренот и се ослободиле 12 километри за работа.

Најголем проблем, како што рече, била експропријацијата. Во минатите три месеци се решени околу 2.400 предемти за експропријација, за три пати повеќе отколку претходно.

Николоски додаде дека активно се работи и на изградба на експресниот пат Градско -Дреново, кој се очекува да се пушти за сообраќај до Нова година. Се гради и експресниот пат од Дреново до Фариш, кој се очекува да се заврши напролет следната година.

– Решивме да не правиме калкулации и да работиме. Експресниот пат беше пред раскинување на договорот, имајќи предвид дека овој патен правец се работи со средства од ЕУ и средства од буџетот. Една и пол година не била формирана комисија со што се соочувале да се раскине договорот, изведувачот да оди на арбитража, со голема можност да ја добие арбитражата. Комисијата ја формиравме, ги надминавме проблемите и активно се работи на изградбата на патот – рече Николоски.

Тој најави дека следната година ЈП за државни патишта ќе избере изведувач за доизградба на експресниот пат од Фариш до Прилеп

The post ЗАДУТРЕ ПОЧНУВА ИЗГРАДБАТА НА АВТОПАТОТ ПРИЛЕП-БИТОЛА Од Скопје до Битола за час и 40 минути, ќе се раздвижи бизнисот во Пелагонија appeared first on plusinfo.mk.

Експропријацијата на имотите низ кои треба да поминуваат автопатите од Коридорите 8 и 10д кои ги гради конзорциумот „Бехтел и Енка“ е во тек и досега половина е завршена. Останати се околу 2.400 предмети, рече директорот на ЈП за државни патишта Коце Трајановски.

– До Нова година ќе ја завршиме ескпропријацијата целосно, а тоа ќе овозможи „Бехтел и Енка“ да работи непречено. За еден месец, расчистивме и два километри траса од дрвна маса, кој не била ни отпочната. Важно е дека работиме како тим и посветено за да се заврши овој проект – рече Трајановски.

Премиерот Христијан Мицкоски оцени дека изминативе четири месеци како Влада и три месеци како раководство во ЈПДП е направено двојно па дури тројно повеќе, споредено со две години претходно.

Амбасадорката на САД Анџела Агелер, напомена станува збор за доказ од одлично партнерство меѓу САД и Северна Македонија.

– Ова е во корист на граѓаните, ќе помогне на трговијата, на инвестициите, а кога други компании, вклучително и големи американски компании ќе гледаат проекти како овој, тоа ќе биде доказот што име потребен, за да знаат дека инвестирањето има смисла, бидејќи може да напредувате – рече амбасадорката Агелер.

The post КОЦЕ ТРАЈАНОВСКИ Ѝ ОТВОРИ ПАТ НА „БЕХТЕЛ И ЕНКА“ До Нова година ќе се расчистат сите имотни прашања на автопатите од Коридорот 8 appeared first on plusinfo.mk.

Како што соопшти денеска Трајановски, интензивно се работи на експропријации за кои претходната влада дала рокови да бидат завршени минатата година, а средствата за таа намена се надвор од планираните 1,3 милијарди евра за изградба на автопатиштата.

– Потпишан е договор којшто е специфичен, којшто е по специјален закон направено и сметам дека, пак ќе кажам претходната влада, поставила рокови за експропријација и дислокација на електрични водови и телекомуникациски водови којшто е во надлежност на Република Македонија и не спаѓа во тие 1,3 милијарди евра, да бидат завршени минатата година. Ние правиме интензивни напори и последниов месец и нешто вложуваме голем напор во експропријацијата. Додека не ја решиме експропријацијата тие не може да влезат. Тие влегуваат откако ќе биде исчистено земјиштето, значи да биде експроприрано, да бидат дислоцирани каблите, да има деминирање. Дури и проектирањето е под надлежност на Република Македонија, не е во тие 1,3 милијарди, така што интензивно работиме за да може што побрзо „Бехтел и Енка“ да почнат да работат. Се надевам дека пред Нова година веќе ќе ги внесеме на терен – изјави Трајановски при посетата на Кавадарци.

Трајановски рече и дека го разгледуваат проблемот на жителите на прилепското село Ореовец кои со блокада на патишта ги спречуваат ископите на „Бехтел и Енка“ за делницата Прилеп-Битола, со образложение дека се нарушува статиката на нивните куќи и ќе се уништат изворите за вода.

– Ние го разгледуваме тој проблем. Сето тоа е од минатата влада и од минатиот градоначалник кој е од април оваа година, така што тоа е наследен проблем којшто ние понатаму треба да го решаваме – изјави Трајановски.

Американско-турскиот конзорциум „Бехтел и Енка“ на 8 март минатата година потпиша Договор со претходната Влада со кој се обврза до 2027 година да изгради четири автпатски делници во должина од 110 километри на коридорите 8 и 10-д. Со договорот се опфатени автопатските делници на Коридорот 8: Требеништа – Струга – Ќафасан (22,5 километри) Гостивар – Букојчани (30,1 километар), Тетово – Гостивар (над 17  километри) и Прилеп – Битола (40 километри) од Коридорот 10д. 

The post БЕЗ ЗАВРШЕНА ЕКСПРОПРИЈАЦИЈА „БЕХТЕЛ И ЕНКА“ НЕМА ДА ПОЧНАТ ДА ГРАДАТ Трајановски се надева дека до Нова година машините ќе излезат на терен appeared first on plusinfo.mk.