Косовскиот премиер во технички мандат Албин Курти повторно ја отфрли Заедницата на српски општини. Курти предупреди дека таква структура би личела на Република Српска во Босна и Херцеговина и би ја поткопувала функционалноста на Косово однатре.

– Кој сака асоцијација на општини, ние веќе ја имаме. Но, она што Србија го нарекува асоцијација всушност не е за српската заедница, туку против независноста на Косово – изјави Курти во поткаст кај пензионираниот француски генерал и аналитичар Доминик Тринкан.

Според Курти, меѓуопштинската соработка треба да обезбедува подобри јавни услуги во рамките на косовскиот институционален систем.

Курти повтори дека Приштина сака целосна нормализација на односите со Белград. Но, како услов повторно го поставил меѓусебното признавање.

ЗСО е едно од најтешките прашања 

Прашањето за Заедницата на српски општини повеќе од една деценија е едно од најтешките во дијалогот меѓу Белград и меѓу Приштина.

Првиот Бриселски договор беше постигнат во 2013 година. Тогашните премиери Ивица Дачиќ и Хашим Тачи преговараа со посредство на Европската Унија.

Курти потсети и на Основниот договор постигнат во февруари 2023 година. Еден месец подоцна беше договорен и анексот за негово спроведување, кој требаше да биде потпишан во Охрид.

Курти тврди дека Косово ги почитува преземените обврски. Истовремено ја обвинува Србија дека одбила формално да го потпише договорот.

Уставниот суд е вториот аргумент на Курти

Курти се повикува и на одлуката на косовскиот Уставен суд од пред повеќе од една деценија.

Според неговото толкување, судот оценил дека моделот на моноетничка заедница на општини не е во согласност со духот на косовскиот Устав.

Курти прави јасна разлика меѓу косовските Срби и меѓу политиката на Белград.

– Нашата опасност не доаѓа од Србите во Косово.

Тој го обвини Белград за, како што го нарекол, „застарен хегемонистички нагон“. Според Курти, Србија не прифаќа дека Србите можат да бидат малцинство надвор од нејзините граници.

The post КУРТИ ПОВТОРНО ЈА ЗАТВОРА ВРАТАТА ЗА ЗСО Го спореди моделот за општините со Република Српска appeared first on plusinfo.mk.

Премиерот на Албанија Еди Рама, во врска со обвинувањата на косовската Влада кон специјалниот пратеник за дијалог меѓу Белград и Приштина, Мирослав Лајчак, рече дека тоа се работи кои „оставаат без зборови“ и кои предизвикуваат поголема штета, наместо да ја подобрат ситуацијата, наведувајќи дека патот што го избра Албин Курти не е патот до целта.

Во интервју за Еј-Би-Си Њуз Рама изјави дека пристапот на Приштина и помага на Србија, бидејќи, според него, Србија станува жртва во очите на целата меѓународна заедница и на косовските пријатели и партнери.

– Реакцијата на премиерот Курти пред неколку дена беше без преседан. Не се сеќавам на сличен случај, висок претставник на Косово директно да го обвини претставникот на ЕУ и да каже дека испратил писмо со жалба до функционерите,  (германскиот канцелар Олаф) Шолц и (францускиот претседател Емануел) Макрон. Тоа се работи што ве оставаат без зборови и дополнително го оштетуваат она што наводно се обидуваат да го поправат, бидејќи теориите на заговор за соработка што ја откривте меѓу Србија и специјалниот пратеник на ЕУ, не е нешто што е препорачливо да се направи – рече Рама.

Тој потенцира дека не се сомнева во желбата на Курти да го направи најдоброто за Косово, но никогаш не се доволни големата желба и добрата волја, потребна е стратешка визија за да се постигне целта, која овде Рама не ја гледа.

На изјавата дека е малку парадоксално тоа што Албанија претседава со Советот за безбедност, но е немоќна да влијае на Приштина, Рама одговара дека не сака да влијае на Приштина, бидејќи таму има Влада која произлегува од волјата на народот и која има одговорност да го води Косово и да го избере патот до целта.

– Заклучокот е дека мислиме дека патот што го избраа не води до постигнување на таа цел, туку води до судир со САД и ЕУ. Ова е тажно, но верувам дека е привремено – рече Рама.

За него, извесно е дека тоа не го носи посакуваниот резултат за Косово, а тоа е завршување на процесот на нормализација, а потоа и излез од „ќорсокакот на признавањето“, пред се меѓу земјите од ЕУ.

– Тоа е и целта на француско-германскиот план и тоа требаше да биде најголемото можно достигнување, што ќе беше де факто признавање од Србија, без разлика дали Србија формално ќе го признае Косово или не. Косово би го добило своето место, би се ослободило од товарот на конфликтот во продолжувањето на евроинтегративниот процес. ЕУ инсистира на процесот на нормализација бидејќи сакаат да го интегрираат Косово во целата структура на меѓународната организација, и во самата Унија, што никогаш нема да се случи ако Косово не го реши овој проблем – потенцира Рама.

На прашањето дали мисли дека Србија има корист од оваа ситуација, албанскиот премиер вели дека е жално што пристапот на Приштина и помага на Србија, а не на самото Косово, бидејќи ја прави жртва Србија во очите на целата меѓународна заедница.

– Србија игра игра, бидејќи кратковидната политика на Приштина и дава можност за тоа – рече Рама.

На прашањето дали разговарал за независноста на Косово со украинскиот претседател Володомир Зеленски, тој одговори дека „патот до конечното признавање на Косово минува низ Приштина“.

– Несомнено, разговаравме за тоа со претседателот Зеленски и за тоа во секое време разговараме со секој лидер кој претставува земја што не го признала Косово, но од друга страна, ние сме многу јасни и убедени дека патот до конечното признавање на Косово не оди преку Украина или Гана, Нигерија, туку минува низ самата Приштина, која мора да се потруди до крај, да го искористи отворениот пат на голема можност создаден од француско-германскиот план, со поддршка на сојузниците. Приштина е таа што мора да разбере дека не го користи овај темел на пријателство, туку го поткопува со пристап што јас не го разбирам – рече Рама.

Тој оцени и дека залудни се напорите на „Србија и Русија“ повторно да се отвори прашањето за Косово во Обединетите нации.

Косово ја доби војната, вели тој, а Меѓународниот суд го потврди тоа.

– Тоа се залудни, пропагандни напори, но не водат никаде. Косово ја доби војната, Косово доби потврда и од самиот Меѓународен суд и тоа е неповратно. Поентата е дека Косово не е способно да издејствува мир, да го претвори мирот во добро што треба да биде меѓународно потврдено и развиено во сите правци – потенцира Рама во интервјуто за Еј-Би-Си њуз.

The post ПАТОТ ШТО ГО ИЗБРА КУРТИ ВОДИ КОН СУДИР СО ЕУ И САД Рама му забележува на косовскиот премиер дека нема стратешка визија appeared first on plusinfo.mk.

Прво помислив дека веста е лажна. Или можеби сатирична. Ако е таква некаква, камен од срце ќе ми падне.

Потоа си реков, можеби премиерот бил практичен и штедлив, согласно со новата мода што ја наметна глобалнава ситуација. Фрчкоски дреме во Њујорк без работа и редно е да му се најде некаква забава.

Ама, изгледа не било така…

Легендата вели дека Ковачевски таму во Њујорк кажал дека ние сме биле шампиони на Балканот за мирно решавање спорови. „Може да го прашате и нашиот амбасадор во ООН (Фрчкоски), кој е тука во публиката, тој учествуваше во правењето на мировното решение пред 20 години, кога имавме конфликт“, гласи цитатот на исказот на нашиот премиер, што го пренесуваат медиумите.

Што ќе рече, Ковачевски мислел сериозно. Ако навистина рекол така. А досега не одрекол.

Добро, нема да го критикуваме премиерот. Не за толку неважни нешта и персони. Ваму храна струја муја проблем, нема сега ние за Фрчко да се караме. Барем не озбилно…

Освен тоа, Ковачевски уште е неопитен во премиерските работи. И ако мене ме прашате, тоа не му е маана, туку предност. Но сепак, треба да научи некои важни нешта, пред да дава вакви изјави.

На пример, треба да научи дека човек што не добил агреман од американската администрација да стане амбасадор во Вашингтон не може ни да помисли да плетка нешто околу Косово, а камоли да биде некаков посредник или миротворец. Не бива таа работа. Американците имаат посебен стратешки однос кон Косово и има дебели причини зошто е тоа така. Косово е само за „тешкаши“ во дипломатијата, а Фрчкоски не е заведен во ниту една позната категорија и лига.

Нашиот премиер е млад и треба да се потсети и на настаните што му претходеа на конфликтот во 2001 година. Луцидниот Џевдет Хајредини ја фатил таа логичка грешка во неговата изјава – да бевме шампиони по мирно решавање на споровите, немаше да ни се случи војната во 2001 година.

Кога сме кај фактите… Точно е дека Фрчкоски е дел од екипата што го скицираше Охридскиот договор. Но, уште поточно е дека тој беше министер за внатрешни и за надворешни работи во владите од 1991 до 1997 година, одговорни за продлабочување на кризата во меѓуетничките односи, што кулминираше со војната во 2001 година.

Во зенитот на својата моќ, Фрчкоски меѓу пријателите се шегуваше и велеше дека корупцијата е клучен фактор на меѓуетничката стабилност во Македонија. Сите кисело се смеевме на таа негова шега. И не ни текнуваше дека во секоја шега има половина вистина. Во оваа позната Фрчкова дефиниција, за жал, имаше многу повеќе од половина вистина.

А нема ништо шампионско во настаните од 2001 година. Една корумпирана елита мораше да замине од политичката сцена и да дојде до промена на номенклатурата. Тоа бидна со калашникови. За фалење ли е?

Својата политичка кариера спомнатиот Фрчкоски ја заврши неславно. За прв пат се обиде да биде избран од народот на претседателските избори во 2009 година. Катастрофално загуби од Ѓорге Иванов. Во првиот круг освои нешто повеќе од 200.000 гласови. За споредба, Имер Селмани и Љубе Бошковски освоија безмалку по 150.000 гласови секој. Ете, така народот ја измери политичката тежина на „шампионот“ Фрчкоски. Прв и последен пат.

Ако веќе сериозно сакаме на ООН да им понудиме вистински шампион за мирно решавање на кризите, му предлагам на Ковачевски да го номинира Зоран Заев. Несудениот нобеловец Зоран Заев.

Корупцијата на елитите од периодот пред и после 2001 година, во Заевото „опшесво за сите“ прерасна во корупција на широките народни маси. И ако има вистина во онаа шега на Фрчкоски, така и сега се одржува меѓуетничкиот мир во Македонија.

Освен тоа, кај може Фрчковата декаденција со Заевите оџагорени очиња под веѓите поткренати, со она негово руче на срцето, со онаа негова ѓаволеста насмевка, со онаа искреност кога ќе рече „море мамето негово ќе му го…“?

И затоа, апелирам – не Фрчкоски, туку Заев за посредник меѓу Белград и Приштина!

А може бе и двајцата заедно.

Цррррп!

Па да видимо чија мајка црну вуну преде…

The post Паника во Белград и во Приштина, Фрчкоски за посредник, Заев на резервната клупа! appeared first on plusinfo.mk.