Трагедијата на патот Охрид-Кичево му го одзеде животот на младиот кошаркарски тренер Антонио Савески. Автомобилот што го управуваше најпрво удри во кучиња скитници, потоа во металните браници и се запали. Савески последниот тренерски ангажман го имаше во младинските категории на скопскиот клуб Ангели.

Савески, роден во 1993 година, потекнуваше од Охрид. Таму ги направи првите кошаркарски чекори, а подоцна почна да работи и како тренер.

Освен во Ангели, беше дел и од Охрид, Вардар и од Водно Санс. Со млади кошаркари работеше и во школата на Водно Партизан.

Кошарката беше голем дел од неговиот живот и надвор од теренот. Савески беше страстен колекционер, а во својата колекција имаше околу 500 кошаркарски дресови.

Трагичната вест ја објави и неговиот последен клуб Ангели.

Според информациите од Министерството за внатрешни работи, несреќата се случи синоќа на магистралниот пат Охрид-Кичево.

„Хјундаи гец“ со охридски регистарски ознаки најпрво удрил во кучиња скитници. Потоа возилото удрило во металните браници покрај патот и се запалило.

Полицијата ја доби пријавата во 23.30 часот. Пожарникарите го изгаснаа пожарот, а во автомобилот беше пронајдено телото на возачот.

По наредба на јавен обвинител, телото беше предадено на обдукција.

УДРИЛ ВО КУЧИЊА, ПА ВО БАНКИНА, АВТОМОБИЛОТ СЕ ЗАПАЛИЛ Загина возач на патот Охрид-Кичево

The post ОТКРИЕН ИДЕНТИТЕТОТ НА ВОЗАЧОТ КОЈ ЗАГИНА ОТКАКО УДРИ ВО КУЧИЊА Антонио беше тренер и страстен колекционер на дресови appeared first on plusinfo.mk.

Секој што има купено влезница за концертот на Дејвид Гета The Monolith Show на 8 септември, по повод 35 години независност, треба да ја замени за соодветна нараквица, соопшти денеска Авалон продукција. Промената се прави во координација со Министерството за внатрешни работи со цел побезбеден и поефикасен протокол за влез на концертот.

Замената на влезниците за нараквици ќе се одвива во Градски парк – Вембли во Скопје, во специјално поставени куќарки, според следниот распоред:

4 септември: 16:00 – 20:00 часот

5 септември: 12:00 – 20:00 часот

6 септември: 12:00 – 20:00 часот

7 септември: 12:00 – 20:00 часот

При замената, задолжително понесете ја влезницата што сте ја купиле, во физичка или во електронска форма, како и лична карта или документ за идентификација на лицето кое ќе ја носи нараквицата.

Нараквицата ќе биде ставена директно на раката на лицето кое ќе го посетува концертот, при самата замена на влезницата. Нараквицата не може да биде преземена од едно лице, а потоа дадена на друго лице.

Откако ќе биде ставена, нараквицата мора да се чува до денот на концертот и не смее да се отстранува, оштетува или модифицира.

Во случај на оштетување или отстранување на нараквицата, нема да биде возможно добивање нова нараквица и нема да биде дозволен влез на концертот.

Единствениот начин за влез на концертот на 8 септември е да имате исправна нараквица на раката. Влезницата повеќе нема да биде доволна за влез на самиот концерт.

По извршената замена, баркодот на оригиналната влезница автоматски ќе биде блокиран и истиот повеќе нема да може да се користи за влез на концертот или за повторна замена на нараквица.

Авалон ги советува сите посетители да бидат особено внимателни при купување влезници од трети лица и неофицијални извори. Авалон не презема одговорност и се оградува од сите потенцијални проблеми, злоупотреби или последици што може да произлезат од купување или препродажба на влезници преку неофицијални канали.

Доколку имате влезница за нумерирана трибина, задолжително зачувајте ја влезницата и по замената за нараквица. Местата на трибините се нумерирани, па влезницата ќе ви биде потребна за да можете без проблем да го пронајдете и користите вашето резервирано место за време на концертот.

За сите прашања поврзани со концертот, како и со останатите настани во рамки на проектот „35 години независност“, можете да се обратите на info@avalonbooking.mk или да се информирате на www.35nezavisnost.mk.

The post ВЛЕЗНИЦИТЕ ЗА КОНЦЕРТОТ НА ДЕЈВИД ГЕТА ТРЕБА ДА СЕ ЗАМЕНАТ СО НАРАКВИЦИ! Важно известување за сите кои ќе одат на концертот appeared first on plusinfo.mk.

Полицијата разби криминална група која, според истрагата, со години преку лажни извештаи, фиктивно прикажување на финансиски податоци и префрлање пари меѓу сметки на повеќе правни лица проневерила 138,8 милиони денари, односно околу 2,26 милиони евра.

Во полициската акција, спроведена на 2 и 3 септември под раководство на Основното јавно обвинителство за гонење на организиран криминал и корупција, се лишени од слобода три лица – С.С., Ш.С. и З.Ѓ. При претресите на повеќе локации во Скопје се пронајдени и одземени околу 27.735 евра, 38.500 денари, 750 швајцарски франци и 100 долари, како и повеќе мобилни телефони и две патнички возила.

Единицата за финансиски криминал при Одделот за сузбивање на организиран и сериозен криминал поднесе кривична пријава до ОЈО ГОКК против шест физички и три правни лица. Тие, во зависност од наводната улога, се товарат за „проневера во службата“, „перење пари и други приноси од казниво дело“ и „несовесно работење во службата“.

Меѓу пријавените се С.С. (49), сопственик и управител на правно лице од Кучевиште и неизвршен член на одбор на директори во осигурително брокерско друштво, Ш.С. (29) и З.Ѓ. (58), извршни членови на одборот на директори во истото друштво.

За проневера во службата се пријавени и Д.М. (54), раководител на станица за технички преглед, и М.Д. (40), вработен во друштво за книговодствени услуги. Т.М. (64), вработена во Јавното претпријатие за државни патишта како помошник-директор за финансии, е пријавена за несовесно работење во службата.

Полицијата утврди дека главниот механизам на наводната проневера се воспоставува преку правно лице од Кучевиште, кое од 2011 година има овластување за вршење технички преглед на возила.

Според истрагата, С.С., во периодот од 1 јануари 2021 до 20 јануари 2026 година, со намера за себе да прибави противправна имотна корист, изготвувал и доставувал лажни извештаи за наплатените надоместоци при регистрација на возила. Во извештаите, според полицијата, прикажувал неточни податоци, со што се прикрива вистинскиот износ на собраните средства.

Во тоа, според истрагата, му помагал Д.М., кој е овластен за изготвување и потпишување фактури и за доставување извештаи до надлежните институции.

Особено важен дел од шемата, според истрагата, е користењето на сметките на осигурително брокерско друштво. На нив, иако според закон треба да се уплаќаат само средства за полиси за осигурување, се наплаќаат и други надоместоци поврзани со регистрацијата на возилата.

Полицијата тврди дека Ш.С. и З.Ѓ., како извршни членови на одборот на директори и овластени лица, знаат дека дел од средствата што се слеваат на сметките не потекнуваат од осигурителната дејност. Заедно со С.С., според истрагата, тие потоа го прикриваат потеклото на парите со префрлање средства од една на друга сметка на правните лица и нивно мешање со приходите од редовното работење, најчесто преку прикажување на средствата како позајмици.

Според полицијата, дел од така стекнатите средства се користат за купување недвижности во корист на правното лице.

Во истрагата е опфатена и улогата на Т.М., помошник-директор за финансии во Јавното претпријатие за државни патишта. Полицијата тврди дека таа има обврска да ги следи уплатените надоместоци и да ги проверува доставените извештаи, односно да ги споредува реално наплатените средства со износите прикажани во извештаите.

И покрај таа обврска, според истрагата, Т.М. не вршела должен надзор, туку го известувала Д.М. за износите уплатени на сметката на ЈПДП, наместо правното лице од Кучевиште редовно да доставува месечни извештаи. Со тоа, според полицијата, на С.С. му овозможувала да се стекне со противправна имотна корист од 48.434.406 денари по основ на надоместокот за патна такса.

Во шемата, според полицијата, учествувал и М.Д., овластен сметководител во друштво од Скопје. Тој, како што се наведува во пријавата, во сметководствената документација внесувал невистинити податоци кои не соодветствуваат со реалната документација за работењето. Полицијата тврди и дека поднесувал даночни пријави и годишни сметки во кои не е прикажана реалната финансиска состојба на правното лице од Кучевиште.

На тој начин, според истрагата, се овозможило стекнување со противправна имотна корист од 138.877.419 денари по основ на надоместоците што се наплаќаат при регистрација на возила.

Вкупниот износ што полицијата го наведува како противправно стекната имотна корист е 138.877.419 денари, односно околу 2,26 милиони евра. Од нив, најголем дел, 83.371.988 денари, според пријавата, се однесуваат на Буџетот и комуналните такси за општините.

На Јавното претпријатие за државни патишта, според полициските наводи, му е нанесена штета од 48.434.406 денари, на Црвениот крст 1.485.926 денари, а на Министерството за животна средина 5.585.098 денари.

Истрагата ја спроведува Одделот за сузбивање на организиран и сериозен криминал во координација со ОСПО-ЕБР, под раководство на ОЈО ГОКК. За пријавените лица понатаму одлучуваат надлежното обвинителство и судот, согласно законската постапка.

НОЌНА ПОЛИЦИСКА АКЦИЈА ВО СКОПЈЕ Лажни уплатници водат до штета од 13 милиони денари

The post СУЗБИЕНА КРИМИНАЛНА ГРУПА, ПРИЈАВЕНИ ШЕСТ ЛИЦА И ТРИ ФИРМИ Штетата се мери во милиони евра appeared first on plusinfo.mk.

Непосредно по враќањето од својата прва канцеларска посета на Кина, на предизборен собир на ЦДУ во покраината Хесен, во февруари годинава Фридрих Мерц ќе рече: „Едноставно, веќе не сме доволно продуктивни. Секој поединец може да каже – јас веќе правам многу. И тоа можеби е точно. Но, кога ќе се вратите од Кина, дами и господа, некои работи ги гледате појасно. Со рамнотежа меѓу работата и приватниот живот и со четиридневна работна недела, благосостојбата во нашата земја долгорочно не може да се одржи. Едноставно ќе мора да работиме малку повеќе“.

Оваа изјава деновиве повторно е објавена на социјалните мрежи и веќе собира милиони прегледи. Заради нужната прецизност, да спомнам дека изворниот израз на Мерц leistungsfähig – со значење: способни да произведеме економски резултат – меѓународните медиуми го превеле со англискиот збор productive.

Мерц во февруари годинава бил во Пекинг и во Хангџоу, со делегација од 30 германски бизнисмени. Во Хангџоу ги посетил Mercedes-Benz, производителот на роботи Unitree и фабрика на Siemens Energy. По посетите изјавил дека бил импресиониран од кинескиот технолошки стандард, од автономното возење, од роботиката и од брзината на индустрискиот развој.

Интересно е и тоа дека ова не е прва изјава со која канцеларот бара промена на германскиот менталитет. Така, во мај 2025 година, на економски форум на лобистичкиот Економски совет на ЦДУ, тој рекол дека Германија мора „повторно да работи повеќе и поефикасно“ и дека благосостојбата не може да се зачува со четиридневна работна недела и со „work-life balance“. Изјавата тогаш била поздравена со аплауз од повеќе од 4.000 претприемачи и менаџери.

Дали навистина Германците треба да работат повеќе?

Како што е познато, анкетите на Мерц му предвидуваат црна политичка иднина, поради незапирливиот подем на ултрадесничарската АФД. Но, тоа е веќе друга тема. Дилемата што останува отворена е дали работниците во Германија навистина се помалку продуктивни и помалку работат од порано.

За волја на вистината, Германците имаат најмалку одработени часови меѓу економиите што ги споредува ОЕЦД – околу 1.332 часа по вработен во 2025 година. Во Франција биле околу 1.498, во Италија 1.716, а во Полска 1.776 часови. Сепак, тоа не значи дека просечниот германски работник со полно работно време работи само четири дена неделно. Во 2025 година вработените со полно работно време работеле просечно 39,9 часа неделно. Германскиот просек го намалува високата застапеност на скратеното работно време: 31,9 отсто од зависно вработените, меѓу кои повеќе од половината вработени жени.

Без оглед што Мерц точно го препознава проблемот со вкупниот фонд работни часови и со стареењето на нацијата, тој, како изблик на класичен политички опортунизам, сложената индустриска криза во земјата ја сведува на прашањето на работната етика. И тоа е навистина чудно, ако сè уште важи стереотипот за Германецот како највредниот и најпослушниот од сите Европејци…

Она што германскиот канцелар не сака или не може да го види е фактот дека растот на продуктивноста на трудот (вредност на еден работен час), иако во Германија сè уште висока, опаднала за 1,2 отсто во 2023 и за 0,3 отсто во 2024 година, додека во 2025 пораснала само 0,4 отсто. Во исто време, надоместокот по работен час пораснал 4,9 отсто, што ги зголемува трошоците на германските компании.

Освен тоа, Мерцовата „дијагноза“ ги занемарува другите структурни „болки“ на германската економија, бидејќи тука веќе станува збор за политичка тема, која води и кон прашањето на политичката одговорност за управувањето со земјата. На пример, одговорност за тоа зошто германските компании работат со скапа енергија (за разлика од порано, кога беше достапен евтиниот руски гас). Или, одговорност зошто даноците и придонесите се високи, зошто бирократијата е метастазирана, зошто има недостиг од инвестиции, зошто инфраструктура е застарена и зошто производи во некои сектори многу сериозно ја губат трката со Кина. Ова се прашања што германски економисти ги поставуваат отворено, оспорувајќи ја тезата на канцеларот дека спасот за германската економија е Германците да работат „малку повеќе“.

Македонецот работи повеќе од Германецот, ама…

Инаку, да дошол Фридрих Мерц во Македонија и да посетел неколку наши фабрики, веројатно ќе се врател во Германија шокиран од работната етика во нашата земја, поточно од тоа колку повеќе работат Македонците од Германците. Имено, според расположливите податоци и процената врз нивна основа, еден вработен во Македонија работи приближно 45 до 55 отсто повеќе часови годишно од еден вработен во Германија.

За жал, вработениот Македонец создава само околу половина од годишниот производ на неговиот колега во Германија. Светска банка проценува дека во 2024 година македонската економија создала околу 63.535 меѓународни долари БДП по вработен, мерено според паритетот на куповната моќ и во постојани цени од 2021 година. Германскиот резултат бил 123.472 долари. Германскиот работник, значи, во текот на годината создава приближно 1,94 пати поголема вредност.

Производството по еден одработен час во Македонија веројатно е околу една третина од германското. Или, кажано поедноставно, за вредноста што германската економија ја создава за еден час, на македонската економија ѝ се потребни приближно три работни часа.

Освен тоа, Македонија има и друг проблем што не се гледа преку индикаторот продуктивност по вработен. Во 2024 година активни биле околу 52 отсто од жителите на возраст над 15 години. Кај жените стапката била околу 43, а кај мажите 61,5 отсто. Тоа е драстично ниско ниво на учество на населението на пазарот на трудот.

Продуктивноста е клучниот проблем на македонската економија

Без дилеми, клучниот проблем е продуктивноста на трудот. Да не бидеме во заблуда – таа не е мерка на личната вредност, на трудољубивоста или на брзината со која работникот ги движи рацете. Работник што составува високотехнолошка машина вредна 500.000 евра статистички создава поголема вредност од работник што шие текстилен производ, иако вториот може да работи и подолго и физички потешко.

Македонија има голем удел на економски активности со ниска додадена вредност: трговија, текстилно производство, едноставно склопување, земјоделство, угостителство и административни услуги. Дел од извозните компании создаваат висок промет, но увезуваат најголем дел од компонентите, па вредноста што останува во земјата е ограничена.

Шансата за структурни промени на нашата економија е фаќањето приклучок кон бурната технолошката дигитална револуција што се случува пред нашите очи. Тоа подразбира модерни машини, роботи, современа опрема, софтвери, автоматизација, стручна обука, квалитетен менаџмент, напредна инфраструктура, стабилна енергија, пристап до капитал и до големи пазари и бездруго политичка клима што ќе го охрабрува напредокот пред сè на реалниот сектор во економијата.

„Зелените“ наративи и параполитиката

За жал, впечаток на авторот на оваа анализа е дека со години – а можеби најмногу во последните две години, кога се направија почетните охрабрувачки исчекори во насока на зајакнување на инфраструктурата, влез на странски инвестиции во индустријата и дигитализација – во Македонија се негува и дури и политички се артикулира еден неразумен отпор кон идејата за технолошкиот развој како основа на економскиот напредок.

Внимавајте, прецизно е кажано: не велам дека е нападнат остварениот економски напредок, што би нè вовлекло во дебата за тоа дали воопшто има напредок и ако има, колкав е тој. Легитимно е да се дебатира за тоа прашање, но само со бројки и со факти, а не на ниво на перцепции и гола пропаганда. Она што загрижува многу повеќе, сепак, е нападот врз самата идеја за технолошкиот бум како закана врз македонското општество. Уште повеќе загрижува што тој неразумен атак се брани со „аргументи“ од арсеналот на нашето локално и најчесто параполитичко разбирање на „зелените“ политики.

„Не сакаме рудници, сакаме производството на домати и на зелка“. „Не сакаме дата-центри, немаме струја и вода“. „Не сакаме мали, а богами ни големи хидроцентрали, сакаме бистри потоци полни со речна пастрмка“. „Не сакаме странски инвеститори да ни ги трошат домашните ресурси“… Тоа се тие „зелени“ наративи, на македонски начин.

Се шират во земја која во социјализмот беше индустриска периферија на поранешна социјалистичка Југославија (одби да гради нуклеарка, на пример), но во споредба со тоа каква е сега, тоа беше индустриска велесила. Се „продаваат“ поевтино од домати во август, во земја во која доматите се произведуваат главно „со стапче и канапче“. Зборуваме за земја во која најголемата река воопшто не произведува струја, туку само тони и тони пластичен отпад што патува кон Егејското Море. „Бистрите потоци“ се бранат во земја во која секоја втора или трета година нерегулираните водотеци се излеваат и нанесуваат огромни штети. И да, зборуваме за нација на фејсбук-експерти и лажни моралисти, која ги мрази и домашните инвеститори и бизнисмени, која ги стигматизира како „богати и алчни“, па логично е да ги мрази и белосветските „експлоататори“ и нивните „домашни слуги“.

За разлика од Германците, на кои можеби навистина им недостасува „малку повеќе работа“, како што вели Мерц, Македонците доволно работат – во корист на сопствената штета. И тоа, за жал само тоа, го прават со завидна продуктивност на трудот.

The post Македонецот е најпродуктивен кога работи во корист на сопствената штета appeared first on plusinfo.mk.

Две лица од Тајван се пронајдени мртви во стан во скопската населба Црниче, дознава Плусинфо.

Станува збор за 50-годишна жена и 37-годишен маж. Претходно тие двајца биле пријавени за исчезнати од жена, која во полиција дала изјава дека ги нема нејзината мајка и сопругот на нејзината мајка.

Околу зградата попладнево имало зголемено присуство на полициски службеници, што предизвикало вознемиреност и интерес кај соседите.

Тие за Плусинфо раскажуваат дека забележале како телата на починатите биле изнесени од зградата и пренесени во возила на погребални претпријатија. Соседите, сепак, не знаеле што точно се случило во станот ниту поради што полицијата била на местото.

Станува збор за зградата во Црниче која во јавноста е позната и како зградата во која живееше поранешниот премиер Никола Груевски.

Откако ги доби овие информации, Плусинфо побара официјална потврда од Министерството за внатрешни работи.

Од МВР за Плусинфо потврдија дека случајот бил пријавен денеска околу 13:50 часот во СВР Скопје.

Според информациите од полицијата, Н.М. ги пронашла својата мајка Ч.Т.Ј. (50) и сопругот на нејзината мајка Ш.Л.Ф. (37), двајцата државјани на Тајван.

Интересно е што двајцата биле пријавени за исчезнати само неколку часа претходно.

Пријавата за нивното исчезнување била поднесена во 00:49 часот на 2 септември.

По пријавата дека се исчезнати, полицијата започнала со проверка, а подоцна тие биле пронајдени во станот.

Екипа на СВР Скопје излегла на местото, а лекар од Институтот за судска медицина констатирал смрт кај двете лица.

Од МВР велат дека при првичниот преглед немало видливи траги на насилство.

Телата биле предадени на обдукција, која треба да даде повеќе информации за причината и околностите на смртта.

Полицијата продолжува со проверките за да се утврди што точно се случувало во станот и како дошло до смртта на двајцата.

Засега нема официјална информација за причината за смртта.

Случајот го истражуваат надлежните институции, а повеќе детали се очекуваат по завршувањето на обдукцијата и другите проверки.

The post ДВЕ ЛИЦА ОД ТАЈВАН ПРОНАЈДЕНИ МРТВИ ВО СТАН ВО ЦРНИЧЕ Соседите виделе погребални возила, полиција со часови била пред зградата appeared first on plusinfo.mk.

На 71-годишна возраст во Скопје почина човекот кој со децении ги истражуваше македонската историја, меѓународните односи и геополитичките процеси на Балканот

Во Скопје денеска на 71-годишна возраст почина универзитетскиот професор и амбасадор Јован Донев.

Донев зад себе остави долгогодишна академска, научна и дипломатска кариера, во која значаен дел од неговиот професионален ангажман беше посветен на македонската историја, меѓународните односи и политичките и геополитичките процеси поврзани со Македонија и Балканот.

Тој дипломирал на Правниот факултет при Универзитетот „Св. Кирил и Методиј“ во Скопје во 1979 година. Во 1986 година магистрирал, а во 1993 година докторирал, при што значаен дел од неговиот научен интерес бил насочен кон меѓународните политички аспекти на македонското прашање.

Научната кариера ја започнал и ја градел во Институтот за национална историја во Скопје, каде што достигнал звање научен советник и редовен професор.

Покрај научноистражувачката работа, Донев предавал и на повеќе високообразовни институции, меѓу кои Универзитетот „Американ колеџ“ во Скопје и Правниот факултет „Јустинијан Први“.

Во периодот од 1999 до 2012 година бил извршен директор на Институтот за општествени и хуманистички истражувања „Евро-Балкан“.

Претходно бил и директор на Охридскиот летен универзитет, а во текот на 1990-тите години бил претседател и на Управниот одбор на Фондацијата Институт Отворено Општество Македонија, под покровителство на филантропот Џорџ Сорос.

Особено значаен дел од неговата професионална биографија е дипломатската кариера.

Донев беше амбасадор на Република Македонија во Обединетото Кралство на Велика Британија и Северна Ирска, со седиште во Лондон, во периодот од 2013 до 2017 година.

Во истиот период бил акредитиран и како амбасадор во Ирска и Исланд.

Во 2017 година бил и член на Советот за безбедност на Република Македонија.

Јован Донев беше автор и коавтор на бројни научни трудови и публикации од областа на историјата, меѓународните односи и надворешната политика.

Во неговиот научен опус се издвојуваат трудови посветени на Македонија во меѓународните договори, односите на големите сили кон Балканот и македонското прашање во периодот на Балканските војни.

Во последните години беше активен и како колумнист и политички аналитичар, каде што ги коментираше домашните и меѓународните политички случувања, со особен фокус на Македонија и нејзината позиција во меѓународните односи.

Со неговата смрт, македонската јавност се простува од професор, научник, дипломат и аналитичар кој повеќе децении беше присутен во академскиот, дипломатскиот и јавниот живот.

The post ПОЧИНА ПРОФЕСОРОТ И ЕКС-АМБАСАДОР ЈОВАН ДОНЕВ Македонија загуби истакнат научник, дипломат и аналитичар appeared first on plusinfo.mk.

Овој проект не гки решава сите наши проблеми, но е чекор напред во решавање на дел од проблемите се соочуваме во транспортот и посебно во делот на заштитата на животната средина и загадувањето, имајќи предвид дека пред нас е и грејната сезона и предизвиците коишто доаѓаат со неа – изјави премиерот Христијан Мицкоски по денешното промотивно возење со Градскиот воз на релација Скопје-Зелениково, на кое учествуваше заедно со членови на владата, на локалната самоуправа и претставници на ЈП Македонска железница.

Тој ја искористи приликата да се заблагодари и да имм честита на на сите оние коишто беа вклучени во реализацијата на овој проект, на потпретседателот на Влада и министер за транспорт, на луѓето од неговиот кабинет, на луѓето од „Македонска железница, инфраструктура и транспорт”, на директорите, министрите и замениците министри, за реализацијата на проектите коишто се дел од Програмата на Владата.

– Исто така, би сакал да се заблагодарам на секој оној којшто вложил атом енергија од своето време за да може ова денеска да стане реалност. Навистина една година е прилично брз период за да се реализира овој проект, којшто можам вака од лично искуство да кажам дека условите во коишто денеска ја поминавме делницата од Зелениково до оваа Централна железничка станица во центарот на Скопје, се навистина европски – рече Мицкоски.

Тој додаде дека оваа Влада, во соработка со локалната самоуправа, ќе продолжи и понатаму да ги реализира проектите за коишто ја добила довербата од народот.

– Тоа е многу важно, затоа што преку реализацијата на проектите вие стекнувате кредибилитет, а преку кредибилитет ја менувате и перцепцијата за самата држава и за системот којшто го управуваме како Влада.

Тој уште еднаш упати благодарност до сите коишто беа вклучени во овој проект. Повторно ќе кажам, вклучувајќи ги и градоначалникот на Град Скопје, градоначалниците од општините Аеродером Кисела Вода и Зелениково, кои давале несебична поддршка при реализација на овој проект.

– Честитки и за жителите на Општина Зелениково, кои ќе бидат корисници на оваа линија и за многу кратко време од Зелениково ќе стигаат во центарот на Скопје. И уште многу вакви проекти да ни се случуваат – рече Мицкоски.

Вицепремиерот Александар Николоски истакна дека ова е почеток на реализацијата на визија за поефикасен јавен превоз, поголема мобилност и подобра заштита на животната средина.

– Ветивме дека првата линија ќе почне на 1 септември и така се случи, се надевам дека ќе ја користат многумина, се надевам дека многу ќе помогне и на учениците и на средношколците, на сите оние кои што сакаат навреме да стигнат на своите работни места, пензионерите и ќе ја користиме сите ние – рече заменик претседателот на Владата.

The post 📷 УСЛОВИТЕ ЗА ВОЗЕЊЕ СО ГРАДСКИОТ ВОЗ СЕ НАВИСТИНА ЕВРОПСКИ Мицкоски за промотивното патување Скопје-Зелениково appeared first on plusinfo.mk.

Во текот на ноќта од косовска страна навлегол тежок пожар во Македонија, кој се движи во атарот на селото Грачани. Пожарот има голема огнена линија која е долга повеќе од 5 километри, информира денеска директорот на Дирекцијата за заштита и спасување, Стојанче Ангелов.

Скопските пожарникарите се упатени на гаснење, а им помагаат тимови од Дирекцијата за заштита и спасување. Тие се обидуваат да го стават пожарот под делумна контрола за да не се загрозат околните села.

Ангелов засега исклучува таква опасност, но вели дека мирисот од пожарот може да се почувствува во делови од Скопје.

– Повторно има појава на огнени точки на планината Китка во атарот на селата Количани и Цветово каде има нови подметнати пожари. Очекувам набргу да бидат ставени под контрола. На една од локациите теренот е особено непристапен, поради што интервенцијата може да трае подолго – рече Ангелов.

Состојбата со пожарите на отворен простор во земјава и натаму е алармантна. Пожарникарите и другите надлежни служби во текот на вчерашниот ден се соочиле со повеќе од 41 пожар.

Според Ангелов, слабите врнежи што паднале во делови од земјата само делумно ја олесниле работата на екипите на терен.

The post 🎥 ЧАДОТ ОД ПОЖАРОТ ВО ГРАЧАНИ СЕ ОСЕТИ ВО СКОПЈЕ Огнената линија е долга повеќе од 5 километри appeared first on plusinfo.mk.

Кривичниот суд му одреди 30-дневен притвор на 19-годишникот кој завчера учествуваше во крвавата тепачка во скопската населба Чаир, во која тој и неговиот малолетен брат на 13-годишна возраст им нанесоа убодни рани на три лица, од кои двајца малолетни. Од Судот информираат дека притворот му е изречен по сите 3 законски основи: опасност од бегство, можност да влијае врз сведоците и опасност да го повтори делото.

„Судија на претходна постапка при Основниот кривичен суд Скопје, постапувајќи по предлог на Основното јавно обвинителство Скопје за определување мерка за обезбедување присуство против 19-годишниот Б.И. од Скопје, осомничен за насилство врз дете во скопската населба Чаир, по неговото произнесување во однос на предлогот, донесе решение со кое му определи мерка притвор во траење од 30 дена. Б.И. е осомничен за кривичното дело Насилство од член 386 став 6 во врска со став 3 од Кривичниот законик“, соопшти Судот.

13-годишниот брат на притворениот нема кривично да одговара и покрај тоа што, според полициското соопштение, токму тој ги избол трите лица, меѓу кои и 13-годишното дете кое е во животозагрозувачка состојба затоа што го пробол во срцето.

Од Јавното обвинителство вчера соопштија дека 13-годишникот не подлежи на кривична одговорност.

„Осомничениот 19-годишник и неговиот малолетен брат кој е под законската граница за кривична одговорност преземале дејствија на насилство со кои на едно дете и на едно полнолетно лице им биле нанесени тешки телесни повреди со убоди од нож, а полесно било повредено уште едно дете. Во јавноста и кај присутните лица предизвикувале чувство на несигурност, загрозување, страв и вознемиреност. Јавниот обвинител до судијата на претходна постапка достави предлог за определување мерка притвор за осомничениот полнолетник“, се вели во соопштението од Обвинителството.

Од полицијата, пак, вчера информираа дека токму 13-годишникот ги избол трите лица. Тепачката се случила на 31 август околу 22 часот, во која Б.И.(19) и неговиот 13-годишен брат со нож повредиле лица на возраст од 13, 16 и 19 години. 13-годишникот е во критична состојба, а тешко е повреден и 19-годишниот И.З..

„На 1.9.2026 година полициски службеници од Единицата за насилен криминал при СВР Скопје ги приведоа Б.И.(19) и 13-годишник, двајцата од Скопје, постапувајќи по пријава дека на 31.8.2026 околу 22 часот на територија на Чаир, настанала физичка пресметка помеѓу двете лица од една страна и И.З.(19), 13-годишник и 16-годишни, сите од Скопје, од друга страна. Притоа 13-годишникот, кој е приведен, со нож им нанел убодни рани на трите лица од спротивната страна“, соопшти полицијата.

Министерот за здравство Сашо Клековски вчера информираше дека повреденото дете е во критична состојба и има убодна рана во срцето. Тој веднаш е опериран и е на интензивна нега.

Министерот за внатрешни работи Панче Тошковски ги оцени настанот како страшен случај на врсничко насилство.

Според законите во Македонија, 13-годишниот насилник нема кривично да одговара. Може да му изрече одредени мерки Центарот за социјални работи. Надлежните велат дека Центарот за социјални работи е известен за настанот и за улогата на малолетникот во кривичниот настан.

Според Законот за правда за децата во Македонија лице кое во моментот на извршувањето на дејствието не наполнило 14 години не може да биде кривично санкционирано, без оглед на тоа колку е тешко дејствието што го извршило. Законот прецизно предвидува дека кон дете под 14 години „не може да се примени санкција“ за дејствие кое со закон е предвидено како кривично дело или прекршок. Ако во текот на постапката се утврди дека детето било помладо од 14 години во моментот на извршувањето на дејствието, постапката се запира, а за случајот се известува надлежниот центар за социјална работа. Потоа може да се применуваат мерки на помош и заштита, во зависност од процената на ризикот и најдобриот интерес на детето, но тие не претставуваат кривична казна или кривична санкција. Кривичноправниот режим за деца почнува од 14-годишна возраст. За деца од 14 до 16 години законот предвидува воспитни мерки, додека за постарите деца, од 16 до 18 години, под строго определени услови може да се применат и потешки санкции.

Министерот Тошковски вчера изјави дека „ваквите ужасни сцени од аспект на кривични дела претставуваат предизвик не само за држави како нашата, туку и за големите и развиени земји членки на Европската Унија“.

– Станува збор за сторување на ужасно насилни кривични дела од страна на малолетници каде што кривично-правниот општествен одговор е многу поинаков, отколку кога станува збор за одговор насочен спрема полнолетни лица. Овде мораме како општество малку подлабоко да навлеземе и мора да има поширок институционален одговор – и од страна на надлежните министерства, и од сите општествени чинители, од родителите, социјалните центри, МВР, Министерството за социјална политика, демографија и млади, Министерството за образование, здравствените центри и Министерството за здравство. Навистина ова е еден од најужасните предизвици коишто ги имаме пред нас – порача министерот Тошковски.

The post 13-ГОДИШНИКОТ КОЈ ПРОБОДЕ ВРСНИК ВО СРЦЕТО НЕМА КРИВИЧНО ДА ОДГОВАРА Неговиот 19-годишен брат е во 30-дневен притвор appeared first on plusinfo.mk.

Разговори снимени со посебни истражни мерки беа презентирани вчера на судењето против апелацискиот судија Ѓоко Ристов во чија семејна куќа беа најдени 350.000 евра соѕидани во ѕид. Обвинителството објасни дека снимките покажуваат како била договарана средба меѓу судијата Ристов и лица поврзани со двајца обвинети за тешки кривични дела.

Обвинителката Искра Хаџивасилева посочи дека женскиот глас што се слуша во дел од разговорите е на Симона Ристова, сопруга на обвинетиот судија и државна правобранителка за подрачјето на Скопје. Според презентираните разговори, таа комуницирала со Един Шеапи, лице поврзано со предметот „Ориент“ и договарала тој да се сретне со нејзиниот сопруг. Дел од снимките се однесуваат и на комуникацијата на Али Арифи, татко на двајцата обвинети во предметот. Шеапи и Арифи биле следени поради сомнение за давање поткуп на судијата Ристов.

Во тој период Ристов бил судија во Апелацискиот суд Скопје и постапувал по предметот „Ориент“ кој претходно се водел во Кривичниот суд за делата злосторничко здружување, проституција, неовластено држење дрога и перење пари.

Во еден од прислушуваните разговори од 5 мај 2025 година, Шеапи разговара со друго машко лице кое го прашува дали во текот на неделата ќе се сретне со лицето кое во комуникацијата го нарекуваат „нишанот“. Шеапи потврдува дека средбата треба да се случи и кажува дека чека „нишанот“ да му соопшти кога.

„Оваа недела мора да се заврши, со Господ напред“, се слуша во разговорот презентиран пред судот.

Наредниот ден Шеапи стапил во контакт со Симона Ристова и побарал средба. Според презентираната комуникација, тој ѝ кажал дека претходно ѝ пишувал и на Инстаграм, на што таа му одговорила дека целиот ден била во гужва. Истата вечер Шеапи повторно ѝ испратил порака со која ја потсетил за договорот.

„Само да ве потсетам“, ѝ напишал тој.

Ристова му одговорила „да, за утревечер“, на што напишал: „благодарам, се слушаме“.

Комуникацијата продолжила и на 7 мај. Али Арифи, таткото на обвинетите во предметот, во разговор со друго машко лице кажал дека е „на чекање“, а Шеапи во друг разговор навел дека претходниот ден се слушнал со „посредничката“.

Околу 13 часот истиот ден Шеапи повторно ѝ испратил порака на Ристова со зборовите: „Здраво, да ве потсетам“. Потоа во една од пораките Ристова му ја посочила локацијата „кај хрватската амбасада“, а подоцна средбата дополнително била прецизирана со „кај кафичот“.

Овие комуникации се случиле непосредно пред средбата меѓу Шеапи и судијата Ристов на 7 мај 2025 година. За оваа средба претходно во постапката е презентирана и видеоснимка.

Обвинителството со презентираните материјали настојува да ја докаже комуникацијата и начинот на кој била организирана средбата на Ристов со лица поврзани со  „Ориент“.

Според информациите презентирани во постапката, засега против државната правобранителка Ристова нема посебна постапка во врска со овие разговори.

Судењето продолжува на 3 септември, кога треба да бидат изведени нови докази. Одбраната предложила и обвинетиот Ристов да биде сослушан.

МАЈКАТА НА СУДИЈАТА РИСТОВ УПЛАТИЛА 400.000 ЕВРА ЗА 4 СТАНА Соѕиданите 350.000 евра се други пари, инвеститорот не ги вратил парите за становите, иако изградбата доцнела

The post СО МЕРКИ ЗА СЛЕДЕЊЕ Е ОТКРИЕНО КАКО „НИШАНОТ“ РИСТОВ СЕ СРЕЌАВАЛ СО ПОСРЕДНИЦИ НА КРИМИНАЛЦИ Сопругата на обвинетиот судија му договарала средби appeared first on plusinfo.mk.