Премиерот вели дека Владата е фокусирана на проекти, дека ја зголемила борбата против криминалот и дека ги брани државните интереси. За евентуални протести по примерот на Србија вели дека не очекува радикално движење против неговите политики, а за евентуално заминување од власта ќе одлучат граѓаните на избори.

Премиерот Христијан Мицкоски тврди дека во изминатите 28 месеци нема ниту една афера поврзана со неговата Влада и дека политиките што ги спроведува се насочени кон граѓаните, државните интереси и реализацијата на инфраструктурни и други проекти.

Во гостувањето во „Само интервју“ на телевизијата „Канал 5“, Мицкоски рече дека не очекува во Македонија да се појави радикално движење против Владата, по примерот на студентските протести во соседна Србија. Како аргумент ги посочи својата професорска работа и политиките што, според него, се народни и промакедонски.

– Прво, јас сум универзитетски професор кој секој ден е на линија со студентите. Второ, како човек никогаш нема да дозволам да се создаде движење коешто ќе биде радикално против моите политики, затоа што политиките што ги водам се народни, промакедонски – рече Мицкоски.

Тој оцени дека Македонија веќе поминала низ процес што го нарече „обоена револуција“, алудирајќи на политичките случувања во 2017 година и формирањето на владата предводена од Зоран Заев.

– Таков тип на обоена револуција во Македонија се случи во 2017 година. Кога имаше пароли – нема правда, нема мир, кога беше формирана Владата на Заев, а тие ги разочараа граѓаните. И токму тие се луѓето кои донесоа најголемо разочарување – изјави премиерот.

Мицкоски додаде дека, според неговото толкување, политичките промени во регионот започнале во Македонија во 2024 година, а потоа продолжиле и во други земји. Тој не очекува најавите на опозицијата дека владата во Скопје би можела да биде следната што ќе падне, по политичките промени во Унгарија и случувањата во Србија, да ѝ донесат посакуван резултат.

– Мислам дека нема да дојдат до резултатот што го посакуваат, но тоа е нивен проблем, не е наш проблем – рече Мицкоски, додавајќи дека Владата ќе остане фокусирана на својата програма и на проектите.

Како примери за сработеното ги наведе набавката на 100 амбулантни возила, отворањето основно училиште во Гази Баба во кое, според него, учат околу илјада деца кои претходно наставата ја следеле во бараки изградени по земјотресот, како и изградбата на шест автопатски делници, два гасовода и еден далновод. Тој ги спомена и околу 1.500 проекти.

– Ако погрешивме во тоа што донесовме 100 амбулантни возила коишто со децении не биле донесени, ако погрешивме што отворивме основно училиште каде што илјада деца учат, во Гази Баба, коишто претходно учеле во бараките изградени по земјотресот, виновен сум. Ако погрешивме дека имаме шест автопатски делници, два гасовода, еден далновод, 1.500 проекти во ред, виновен сум – изјави премиерот.

На прашањето дали може да им гарантира на граѓаните дека е сменет образецот на коруптивно и лошо функционирање на институциите, Мицкоски повтори дека во изминатите 28 месеци не постои афера поврзана со Владата. Тој рече дека државата се соочува со сложени меѓународни околности, вклучително и енергетската криза и нестабилноста на финансиските пазари, кои, според него, предизвикуваат социјални немири во дел од европските метрополи.

Премиерот оцени дека Владата се однесува дисциплинирано во таквите услови и дека ги брани државните интереси. Неговата изјава за отсуство на афери е оценка што ја изнесе самиот Мицкоски, а не независна потврда за состојбите во институциите.

Во интервјуто тој се осврна и на безбедноста, наведувајќи дека борбата против криминалот е засилена низ државата, особено во Скопје. Според него, биле спроведени повеќе акции со кои бил пресечен криминалот во одредени области.

Мицкоски, сепак, призна дека резултатите не се доволни и дека е потребна уште посилна акција.

– Дали е тоа доволно? Не. Дали треба да биде уште поробусно сето тоа? Да, се согласувам дека треба да биде – рече тој.

Премиерот призна дека има и незадоволство кај граѓаните, но додаде дека постои и задоволство од работата на Владата. Според него, конечната оценка за политиките ја даваат гласачите на избори.

– На крајот од денот ние сме политичари коишто овие два факти ги мерат на избори. И на избори ако победи незадоволството, јас ќе заминам во опозиција, нека дојде некој подобар. Ако ние сме подобри, ќе победиме – порача Мицкоски.

The post НЕМА НИТУ ЕДНА АФЕРА ПОВРЗАНА СО ВЛАДАТА Мицкоски вели дека политиките кои ги води се народни и промакедонски appeared first on plusinfo.mk.

Министерството за внатрешни работи поднесе кривична пријава против 11 лица и една приватна здравствена установа. Според истрагата, Фондот бил оштетен со фиктивни фактури, а меѓу 3.000 и 4.000 пациенти наводно плаќале за услуги што биле наплатувани и од нив и од Фондот.

Осум лица се лишени од слобода во полициска акција поврзана со сомнежи за незаконско работење при наплата на операции на очи, во случај во кој се опфатени поранешни и сегашни функционери на Фондот за здравствено осигурување (ФЗО) и претставници на приватна здравствена установа. Против вкупно 11 физички лица и едно правно лице е поднесена кривична пријава, а сомнителните исплати, според наводите на истрагата, предизвикале штета од повеќе милиони евра.

Полициската акција која беше денеска спроведена, од Одделот за сузбивање на организиран и сериозен криминал при МВР, во координација со Основното јавно обвинителство за гонење организиран криминал и корупција. Со судски наредби биле извршени претреси на повеќе локации во Скопје, како и на по една локација во Тетово и Куманово. При претресите биле пронајдени и одземени околу 50.000 евра и мобилни телефони.

„Одделот за сузбивање на организиран и сериозен криминал до ОЈО за ГОКК поднесе кривична пријава против 11 физички лица, од кои еден албански државјанин и едно правно лице, и тоа: Д.Д.(60) од Скопје, О.Р.(66) од Тетово и С.Б.(59) од Скопје за „злоупотреба на службената положба и овластување“ (чл.353 ст.5) в.в (чл.45) од Кривичниот законик, Р.А.(45) од Куманово за „несовесно работење во службата“ (чл.353-в ст.3) в.в (чл.45) од Кривичниот законик, З.А.(35) од Скопје за „фалсификување или уништување деловни книги“ (чл.280) од Кривичниот законик, В.Ќ. (47) од Скопје, С.А.(40) од Скопје и Г.А.(33) од Р. Албанија за „злоупотреба на службената положба и овластување“ (чл.353 ст.3) в.в (чл.45) и „измама во службата“ (чл.355) од Кривичниот законик, Ц.С.(47) од Скопје, Ж.С.(58) од Скопје и И.П.(49) од Скопје за „несовесно работење во службата“(чл.353-в ст.2) в.в (чл.45) од Кривичниот законик и против приватната здравствена установа од Скопје за „перење пари и други приноси од казниво дело“ (чл.273 ст.12) в.в (чл.22 и чл.45) од Кривичниот законик“, соопшти полицијата.

Но, тежината на случајот не е само во парите. Според пријавата, спорните постапки се однесуваат на здравствени услуги за пациенти, од кои дел можеби плаќале за операции без да знаат дека истите услуги биле фактурирани и кон Фондот.

Според наводите во кривичната пријава, двајца тогашни директори на ФЗО во 2020 година, заедно со претставник на приватната здравствена установа, склучиле договор спротивно на пропишаните постапки и интерните акти на Фондот. Претседателот на Управниот одбор се сомничи за неправилности при одобрувањето на договорот.

Врз основа на тој договор, според истрагата, преку внесување невистинити податоци во електронскиот систем на ФЗО и изготвување фактури со невистинита содржина, установата наплаќала исти здравствени услуги и од Фондот и од пациентите.

На пациентите, покрај законската партиципација, наводно им била наплаќана и приватна цена за операциите. Притоа, според пријавата, не им било соопштено дека услугите биле наплатувани и од Фондот.

Во истрагата се опфатени и лица кои имале контролни и раководни функции во ФЗО.

Пријавениот директор на Секторот за контрола се сомничи дека не ги доставувал извештаите за утврдените неправилности до надлежната комисија и го одложувал спроведувањето редовни контроли. Според сомнежите, на тој начин се избегнувало изрекување дополнителни договорни казни и можноста за раскинување на договорот со здравствената установа.

Две раководителки на Подрачната служба Скопје, пак, се сомничат дека не ја следеле наплатата на веќе изречените казни и не ги известувале надлежните служби. Како последица, според пријавата, исплатите кон установата продолжувале без претходно пребивање на долговите.

Токму овие наводи се меѓу клучните прашања што треба да ги расчисти истрагата: дали контролите биле спроведувани навреме, дали неправилностите биле евидентирани и дали со пропустите се овозможило продолжување на спорните исплати.

Според кривичната пријава, буџетот на ФЗО бил оштетен за 104.818.754 денари, односно околу 1,7 милиони евра, по исплати врз основа на фиктивни фактури. Дополнително, се наведува штета од 525.000 денари поради ненаплатени договорни казни.

Во пријавата се наведува и сомнеж дека во периодот од 2022 до 2025 година здравствената установа се стекнала со противправна имотна корист од 261.271.961 денар, односно околу 4,25 милиони евра.

Истрагата опфаќа и сомнежи за перење пари. Според пријавата, средствата исплатени од ФЗО, за кои овластените лица во установата наводно знаеле дека потекнуваат од кривично дело, биле внесувани во платниот промет, евидентирани на различни сметководствени конта и користени за исплата на плати, набавки и други плаќања.

Најдиректната последица од наводната шема ја почувствувале пациентите. Според пријавата, со двојната наплата биле оштетени меѓу 3.000 и 4.000 лица.

Доколку сомнежите се потврдат, случајот ќе отвори сериозни прашања не само за одговорноста на лицата што ги одобрувале и контролирале исплатите, туку и за заштитата на пациентите и начинот на кој се надгледуваат договорите меѓу Фондот и приватните здравствени установи.

Кривичната пријава опфаќа сомнежи за злоупотреба на службената положба и овластување, несовесно работење во службата, фалсификување или уништување деловни книги, измама во службата и перење пари и други приноси од казниво дело.

ДЕН ДОНЧЕВ, ПРИВАТНА БОЛНИЦА И ВРАБОТЕНИ ВО ФОНДОТ ЗА ЗДРАВСТВО НА УДАР НА ПОЛИЦИЈАТА Направиле штета врз буџетот од 1,5 милиони евра

The post ОПЕРАЦИИ НА ОЧИ, ДВОЈНА НАПЛАТА И ШТЕТА ОД 1,7 МИЛИОНИ ЕВРА Осуммина приведени, 11 кривични и оштетени меѓу 3.000 и 4.000 пациенти appeared first on plusinfo.mk.

Премиерот Христијан Мицкоски на денешната собраниска седница за пратенички прашање ги отфрли обвинувањата на претседателот на опозициска СДСМ, Венко Филипче, укажувајќи му дека обидите за поврзување на актуелните политички случувања во Србија со него и со Владата се засноваат на лаги и политички конструкции.

– Овие прес-конференции кои што вашата политичка партија ги пренесува, а што се однесуваат за изборите во Србија и нивното поврзување со нас во контекст на тој кој чиј и каков ментор бил, нема да ги коментирам. Ќе оставам на времето да даде одговор на сето тоа кое што вие го кажувате денеска и лагите кои ги испраќате. Јас вчера во една моја изјава се извинив на граѓаните за сето она кое што ќе го слушаат во периодот што следи. Тоа е едноставно нивото со кое што вие мислите дека во овој момент ќе добиете гласови. Тоа е ваша одлука, слободно водете политика она како што мислите. Но, ако мене ме прашувате за совет, мислам дека чекорите многу погрешно. Но, тоа е ваша одлука, јас нема тука да се мешам – рече Мицкоски.

Истото го зборувавте и за Виктор Орбан пред 6 месеци, истите прес конференции од А до Ш, додаде Мицкоски.

– И тогаш велевте ќе се откриеле криминалите на Мицко со Орбан, не знам што ќе се случуваше итн. Но, еве поминаа 6 месеци, се откри една работа, дека сме земале добар финансиски кредит од Унгарија. Кредит кој што го употребивме соодветно, а доказ за тоа дали сме го употребиле соодветно е денешниот извештај од Државниот завод за ревизија – рече премиерот.

Тој посочи дека наместо најавуваните скандали од опозициската СДСМ, досегашните информации покажуваат дека средствата од унгарскиот кредит биле искористени за поддршка на економијата и на домашното стопанство, а тоа го потврдил Државниот завод за ревизија.

– Денеска Државниот завод за ревизија вели дека средствата од унгарскиот кредит се наменети за раст на македонската економија, дел дека се наменети за враќање на евро обврзница која што вашата влада ја има подигнато, тоа е половина милијарда и дел се за поддршка на македонското стопанство. Значи во овие 6 месеци нема ни К од криминал, туку потврда дека оваа влада за оваа држава направила добро дело – рече Мицкоски.

Пратеникот Венко Филипче му рече на Мицкоски дека постепено го губел својот систем на поддршка од Србија и дека ќе мора да одговара на прашања за финансиски трансфери, банкарски зделки и други сомнежи за кои, како што посочи, ќе требало да се бараат одговори и пред европските институции.

The post НЕМА НИ „К“ ОД КРИМИНАЛ СО УНГАРСКИОТ КРЕДИТ, ПАРИТЕ СЕ ЗА МАКЕДОНСКАТА ЕКОНОМИЈА Мицкоски одговори на обвинувањата од Филипче appeared first on plusinfo.mk.

Министерот за здравство, Сашо Клековски, откри дека денешната полициска акција е поради двојна наплата на здравствни услуги од страна на болницата Санте плус. За операција на очи услугата еднаш ја плаќал Фондот, а вторпат самиот пациент. И ова се правело масовно. Опфатени биле и други прекршоци, но овој бил најмасовен.

– Станува збор за повеќе видови на прекршоци, една од најмасовните е двојна наплата на пациентите односно земени се пари од Фондот за одредена услуга за која има договор и таа услуга под различни превези и изговори е наплаќана од пациентите. Во акцијата е вклучена една приватна здравствена установа која имаше договор со Фондот за здравствено осигурување и неколку лица од Фондот. Станува збор за злоупотреба на средства од Фондот за здравствено осигурување. Се надевам дека МВР наскоро ќе излезе со повеќе детали. Можам само да ја потврдам акцијата, да ја потврдам соработката и да изразам голема благодарност на истрајноста и упорноста на вработените во МВР и на Јавното обвинителство, што конечно една од ситуациите на кои работевме изминатите две години доаѓа до одредена завршница, барем во однос дека ќе има кривични пријави и судска постапка – рече Клековски.

Одговорајќи на новинарско прашање министерот рече дека токму тој бил иницијатор на истрагата бидејќи станувало збор за здравствена установа која повеќе пати сторувала прекршоци, но не била казнувана.

– Значи, не е еднаш, двапати, трипати. Туку постојано повторување на слични прекршоци за кои не била соодветно казнувана. Јас предложив на Комисијата за прекршоци, и таа прифати да се раскине договорот со таа здравствена установа за да се прекине ланецот на неказнивост. Истовремено побарав да се покрене истрага. МВР заедно со Секторот за контрола на Фондот за здравствено осигурување напорно работеше да се завршат сите работи. Беа вклучени и Државниот санитарен и здравствен инспекторат и Агенцијата за лекови и други установи, за од сите аспекти да се затвори истрагата. И благодарам повторно на истрајноста на вработените во МВР на завршената работа – рече Клековски.

Тој рече дека во истрагата биле вклучени повеќе институции.

– Беа вклучени и ДСЗИ и Агенцијата за лекови и други установи за од сите аспекти да се затвори истрагата. Благодарам на истрајноста на вработените во Министерството за внатрешни работи на завршената работа – рече Клековски.

Во истрагата се опфатени пет лица кои биле вработени во Фондот за здравство и четири од приватната болница.

Првопријавен е Ден Дончев, поранешен директор на Фондот за здравствено осигурување.

Според неофицијални информации, штетата на Буџетот од шемата на оваа приватна здравствена установа е над 1,5 милиони евра. Противправно стекнатата материјална корист за болницата се проценува на околу 4 милиони евра, а оштетени биле голем број пациенти.

The post САНТЕ ПЛУС НАПЛАЌАЛА И ОД ПАЦИЕНТИТЕ И ОД ФОНДОТ Клековски ја открил шемата и побарал да се раскине договорот со болницата appeared first on plusinfo.mk.

Уапсените во врска со двете убиства кои се случија за неколку дена во Ѓорче Петров во Скопје, при распитот во полициска станица ги признале делата, објави ТВ Телма повикувајќи се на извори од истргата.

Телевизијата објави дека во едниот напад учествувале двајца, а во вториот тројца. Четвртиот уапсен бил возачот кој ги превезувал, кој се бранел дека не знае што планирале и правеле неговите патници. Во автомобилот на осомничениот возач се најдени траги поврзани со разбојништвата, односно јакна и други предмети, а во домовите на жртвите се најдени и ДНК траги кои се поврзуваат со уапсените.

„СВР Скопје во текот на 27.10.2026 лиши од слобода четири лица, А.С.(22), Х.Е.(20), К.А.(58) сите од Скопје и М.Р.(26) од Струмица, кои се сомничат за двете кривични дела ‘разбојништво’ со последица смрт по член 237 став 5 од Кривичниот законик извршени на територија на скопски Хром на 22.10.2026 и Ѓорче Петров на 27.10.2026“, соопшти МВР.

На 22 октомври 62-годишник бил пронајден мртов во неговиот дом со знаци на насилство. Според соседите, тој бил социјален случај и бил тешко подвижен. Телма дознава дека осомничените биле снимени на видео камера на една од соседните куќи. Соседите велат дека истиот ден бил направен обид за грабеж и во куќа на соседната улица, во која не живеел никој.

На 27 октомври, 76-годишна жена била пронајдена од нејзината ќерка без знаци на живот со видливи траги на насилство. Од неа, според соседите, бил одземен накитот што го носела. Соседите за Телма изјавиле дека по овие насилни настани се исплашени за својата безбедност.

Уапсените имале и други кривични дела, односно тешки кражби. Од обвинителството потврдиле дека за лицата е побаран краткотраен притвор.

The post ЧЕТВОРИЦАТА УАПСЕНИ ЗА ДВЕТЕ УБИСТВА ВО ЃОРЧЕ ПЕТРОВ БИЛЕ СНИМЕНИ СО КАМЕРА Во полиција ги признале делата appeared first on plusinfo.mk.

Утрово припадници од Одделот за организиран криминал при Бирото за јавна безбедност – МВР спроведуваат претреси на повеќе од 10 локации во Скопје, Тетово и во Куманово.

Под истрага, според првичните информации, се одговорни лица од приватна болница и вработени во Фондот за здравствено осигурување, осомничени за повеќе кривични дела, меѓу кои злоупотреба на службената положба и овластување, несовесно работење во службата, измама и перење пари.

Според неофицијалните информации, штетата врз буџетот надминува 1,5 милиони евра, додека противправно стекнатата материјална корист за болницата се проценува на околу 4 милиони евра. Оштетени се и поголем број пациенти кои се лекувале во болницата.

Како што дознаваат медиумите, првопријавен е Ден Дончев, поранешен директор на ФЗОМ, во време на Владата на СДСМ.

Според првите информации, осомничени се и Р.А. – поранешен претседател на управен одбор на ФЗО, В.Ќ. – поранешен управител на Санте, С.Б. – поранешен сопственик и овластено лице во болницата, С.А. – сегашен управител, Г.А. – поранешен директор на болницата, Ц.С. – поранешен раководител на Сектор за контрола во ФЗО, Ж.С. – поранешен директор на ФЗО подрачна единица Скопје, како и И.П. – сегашен раководител на подрачна единица Скопје.

Повеќе детали се очекуваат во текот на денот.

The post ДЕН ДОНЧЕВ, ПРИВАТНА БОЛНИЦА И ВРАБОТЕНИ ВО ФОНДОТ ЗА ЗДРАВСТВО НА УДАР НА ПОЛИЦИЈАТА Направиле штета врз буџетот од 1,5 милиони евра appeared first on plusinfo.mk.

Околу 2 тона небезбедно свежо и замрзнато месо и подготовки од месо се одземени при вонредни контроли во Радовиш. Одземените количини месо денеска ќе бидат уништени на депонијата „Дрисла“.

Инспекциските служби на Агенцијата за храна и ветеринарство вчера спровеле вонредни инспекциски контроли во малопродажни објекти за месо, подготовки и преработки од месо на подрачјето на Општина Радовиш и кај физичко лице во неготинското село Пепелиште, кое произведувало и преку социјалните мрежи продавало димени месни производи и чварки.

Од лицето кое вршело неодобрена дејност од страна на Агенцијата – производство на димени месни производи и чварки, одземени се дополнителни 50 килограми подготовки од месо (печеница, кулен, димена сланина и сл).

Одземените производи биле без декларација за потеклото и биле чувани и преработувани во несоодветни и нехигиенски услови, што претставува сериозен ризик за безбедноста на храната и здравјето на потрошувачите, соопшти Агенцијата.

The post ПРОДАВАЛ ЧВАРКИ ПРЕКУ СОЦИЈАЛНИ МРЕЖИ, ГИ ПРАВЕЛ ВО НЕХИГИЕНСКИ УСЛОВИ Два тона месо одземени во Радовиш appeared first on plusinfo.mk.

Полицијата нема да ги признава дигиталната лична карта и возачка дозвола додека не се направат законски измени. Затоа граѓаните треба да си ги носат со себе и пластичните документи.

– Доколку денеска нѐ запре сообраќајна полиција не може да се идентификуваме со електронската лична карта бидејќи нема можност како да нѐ провери дали нашиот дигитален паричник е валиден – објасни министерот за дигитална трансформација Стефан Андоновски на вчерашната промоција на мобилната апликација м.Услуги.

– Во моментот кога МВР ќе биде подготвено за тоа, ќе известиме, ќе ги промениме и подзаконските акти во МВР кои се однесуваат на личната карта и на возачката. На пример, во други држави први почнале да ги прифаќаат банки, влегување во локали, купување на услуги од супер маркети – рече Андоновски.

Мобилната апликација м.Услуги е активна и е достапна за сите корисници на „Андроид“ и на ИОС-уредите. Достапни се три електронски услуги, и тоа електронска лична карта, електронска верзија на возачката дозвола, што се преземаат од базите на Министерството за внатрешни работи, како и обрасците М1, М2 и М4.

– Планот е да ги детектираме услугите на порталот uslugi.gov.mk, кои се најкористени и да ги префламе една по една на мобилната апликација. Во моментот ниедна апликација во Македонија нема можност за плаќање и на тоа работиме во периодот што следува. Се надевам дека ќе успееме. Штом успееме во тоа, ќе ги внесуваме апликациите што се со административна такса. Во моментот ќе внесуваме апликации што не бараат од вас да платите – рече Андоновски.

Сите институции што имаат објавено своја услуга на Ннционалниот портал uslugi.gov.mk се подготвени да бидат и на м.Услуги.

– Тие и во моментот не забележуваат од каде им доаѓа барањето за конкретната услуга. Тоа го работиме ние. Оние услуги што немаат внатрешни системи со кои работиме ќе им треба повеќе време да стасаат – рече министерот.

Доколку во апликацијата се појави грешка, граѓаните може да постават прашање на модулот во самата апликација или да се обратат до контакт-центарот на националниот портал uslugi.gov.mk.

– Ниедна апликација не е совршена, не е ни оваа, на ниво е на сите мобилни апликации во државата и пошироко, оценета со одлични оценки и од аспект на кибербезбедност, но секако, доколку постои грешка, и во рамките на апликацијата постои модул за прашања, граѓаните може да се обратат до националниот портал uslugi.gov.mk во контакт-центарот за да им помогнат нашите вработени – рече Андоновски.

Во однос на начинот на воведување и законските основи, министерот посочи дека ќе има процес на адаптација и дека ова е фазно воведување, а во моментот дигиталниот паричник е уреден со Законот за електронските документи и електронска идентификација во членот 20 г.

– Со измените таму се смета дека дигиталниот паричник служи за идентификација на граѓаните, што значи дека со податоците што ќе ги содржи граѓаните ќе може да се идентификуваат. Не се променети законот за лична карта и за безбедност во сообраќајот, но тие не мора да се менуваат. Поважно е да се менуваат правилниците, но има и група на други правилници и закони кои до ден денес бараат и фотокопија од лична карта. Тие ќе треба постапно да ги менуваме и тоа е процес што ќе се одвива во периодот што следи. Многу повеќе ќе биде предизвик техничкото прифаќање на дигиталниот паричник од институциите, најмногу поради нивните внатрешни системи – посочи Андоновски.

– Ние сме една од првите држави во регионот што ова го реализира и обврска ни е до декември 2027 да имаме пристапност до европскиот дигитален паричник што ќе значи прифаќање на електронските документи. Таму се сите и дипломи, и сертификати и уверенија – рече Андоновски.

The post ПОЛИЦИЈАТА ЗАСЕГА НЕМА ДА ПРИФАЌА ДИГИТАЛНА ЛИЧНА КАРТА И ВОЗАЧКА Ќе има период на прилагодување, а ќе се прават и законски измени appeared first on plusinfo.mk.

Само три дена по тешкиот изборен пораз и губењето на власта по 14 години, Александар Вучиќ призна дека дел од луѓето со кои соработувал со години почнале да се тргаат од него. Во видео-обраќање на Инстаграм тој порача дека тоа нема да ја промени неговата волја и дека ќе продолжи политички да им се спротивставува на победниците на изборите.

– Тие мислат дека со закани можат да ги скршат сите луѓе. Многумина скршија, многумина допрва ќе скршат. Гледам како оние со кои работев пет, десет и петнаесет години полека се тргаат – рече Вучиќ, додавајќи дека однесувањето на досегашните соработници нема да ја промени неговата решеност.

Вучиќ рече дека во Србија веќе три дена се спроведува „вистински револуционерен терор”. Како примери ги наведе упадите во телевизии и во „Србијаводе“, како и инцидентот при кој, според него, било спречено свештено лице да прочита молитва на слава. Сегашните случувања ги спореди со политичките превирања во 2000 година.

Посебно остар беше кон социологот Јово Бакиќ, кој изјави дека би ја прифатил функцијата министер за внатрешни работи доколку за тоа добие поддршка од идниот мандатар и парламентарното мнозинство. Вучиќ го обвини Бакиќ дека зборува за враќање на институциите, а истовремено поддржува нивно уривање „вон институциите“.

Поранешниот носител на владејачката листа се наврати и на случајот со наводната употреба на звучен топ за време на протестите, повторувајќи дека такво оружје не било употребено. Тој зборуваше и за постапувањето на обвинителството и проверките што биле спроведувани во врска со овој случај.

Последната порака на Вучиќ покажува дека, и покрај изборниот пораз и првите дистанцирања во неговиот досегашен политички круг, тој нема намера да се повлече од политичката сцена. Веќе во изборната ноќ го призна поразот од Студентската листа, која според неговата тогашна проценка освоила меѓу 135 и 140 пратенички места, но сега најавува дека ќе им се спротивставува на политичките противници „додека дише“, без оглед од која позиција ќе дејствува.

 

View this post on Instagram

 

A post shared by Александар Вучић (@avucic)

The post 📽️ ВУЧИЌ ПРИЗНАВА ДЕКА СОРАБОТНИЦИТЕ СЕ ТРГААТ ОД НЕГО „Мојата волја нема да ја скршат, ќе се борам додека дишам“ appeared first on plusinfo.mk.

Лидерот на Македонски концепт Петар Богојески повторно ја разбранува јавноста со жестока националистичка реторика, овојпат насочена кон Србите и кон споменикот Зебрњак кај Куманово. Во преписка на социјалните мрежи, во која се бара споменикот да биде разнесен со динамит, Богојески напишал: „Македонски концепт планира да минира“!

Повод за преписката е објава на инфлуенсерот Блаже Аризанов. Тој напишал дека како Македонец не го интересира кој победил на изборите во Србија, туку кога ќе биде разнесен споменикот на Зебрњак „со динамит“. На тоа се надоврзал Богојески со тврдењето дека неговиот Македонски концепт „планира да минира“, по што Аризанов одговорил дека доброволно би го „стиснал копчето“.

Зебрњак е спомен-костурница на ридот Зебрњак кај Старо Нагоричане, североисточно од Куманово, подигната во 1937 година во спомен на загинатите српски војници во Кумановската битка од 23 и 24 октомври 1912 година, во која српската војска ја поразила османлиската Вардарска армија. Споменикот првично имал висока кула, но таа била урната за време на бугарската окупација во Втората светска војна и никогаш не била обновена. Во костурницата се чуваат посмртните останки на загинати војници, а местото и денес е центар на српските комеморации за Кумановската битка.

Од Зебрњак до „четниците“

Инцидентот не доаѓа изолирано. Ден претходно Богојески жестоко реагираше на чествувањето на Кумановската битка кај Зебрњак. Македонски концепт оцени дека чествувањето претставува величање на српската победа во 1912 година и на воспоставувањето на српската власт во Вардарска Македонија.

Во расправијата со вицепремиерот Иван Стоилковиќ, Богојески најави и кривична пријава против него за ширење национална омраза и навреди. Стоилковиќ претходно, коментирајќи ги нападите врз чествувањето, напиша дека по изборните резултати во Србија, „Бугарите веднаш се во офанзива“. Богојески возврати дека со тоа Македонците биле претставувани како Бугари.

Политичката пресметка околу Зебрњак во меѓувреме очигледно излезе од рамките на расправата за различните толкувања на историјата. Едно е да се оспорува значењето на споменикот и начинот на кој се одбележува Кумановската битка, а сосема друго јавно да се зборува за негово „минирање“.

Ова не му е прв судир со обвинувања за говор на омраза

Без оглед дали во случајов станува збор за буквална закана, за провокација или за бизарен обид за хумор, јавна комуникација за минирање споменик и за доброволци што би го активирале експлозивот тешко може да се вклопи во нормална политичка дебата. Особено кога во неа учествува лидер на политичка партија.

За Богојески ова не е прв случај неговиот речник на социјалните мрежи да предизвика реакции поради навредлив, дискриминаторски или национално обоен говор. Мрежата за заштита од дискриминација во 2025 година јавно побара да биде повлечено неговото именување за директор на Националната агенција за европски образовни програми и мобилност, наведувајќи повеќе негови претходни изјави кои ги оцени како вознемирувачки говор, навреди, говор на омраза и поттикнување дискриминација, нетолеранција или насилство.

Во август 2024 година коалицијата Вреди поднесе и кривична пријава против Богојески до Основното јавно обвинителство, обвинувајќи го за ширење говор на омраза на Фејсбук. Уште во 2021 година повеќе граѓански организации го пријавија во МВР поради, како што наведоа, расистички и ксенофобични објави и предизвикување национална, расна и верска омраза и нетрпеливост.

Особено необично звучи што самиот Богојески уште во 2021 година, на панел посветен токму на говорот на омраза во политиката, зборуваше за користењето таква реторика како своевиден политички „експеримент”. Тој тогаш објаснуваше дека Македонски концепт намерно употребувал говор на омраза „во блага мера” за да покаже дека таквата комуникација носи политичка популарност.

Последната преписка за Зебрњак затоа отвора прашање каде завршува политичката провокација, а каде почнува говорот што може да се разбере како поттикнување насилство. Засега нема информација дека надлежните институции реагирале на овие објави.

The post ПЕТАР БОГОЈЕСКИ ЌЕ ЛОВЕЛ „ЧЕТНИЦИ“ И ЌЕ ГО МИНИРАЛ СПОМЕНИКОТ ЗЕБРЊАК?! Говор на омраза на човекот којшто се претставува како лидер на Македонски концепт appeared first on plusinfo.mk.