По новите закани упатени кон новинарот на Канал 5, Александар Видиновски, реагираа политички партии, а се бара МВР и Обвинителството итно да ги идентификуваат и санкционираат одговорните.

Нови закани за физичко насилство кон новинарот на Канал 5, Александар Видиновски, се појавија на социјалните мрежи, откако под видео објавено од градоначалникот на Скопје, Орце Ѓорѓиевски, беше оставен коментар со повик за насилство.

Во коментарот, корисник на социјалните мрежи напишал:

„Ај бе преку таквото со тој Видиновски… Што направил корисно, што снимал ѓубре?! […] само газење.“

Според информациите, случајот е пријавен во Министерството за внатрешни работи, а за заканите реагирале и новинарските здруженија.

Во реакцијата се посочува дека заканите кон новинарите претставуваат директен напад врз слободата на медиумите и правото на јавноста да биде информирана.

Од ВМРО-ДПМНЕ најостро ги осудија заканите упатени кон Видиновски, оценувајќи дека во демократско општество новинарите мора да можат слободно и без страв да ја вршат својата работа.

„Заканите, говорот што поттикнува насилство и повиците за физичка пресметка се целосно неприфатливи и претставуваат директен удар врз слободата на медиумите и правото на информирање“, наведуваат од партијата.

Оттаму ги повикаа Министерството за внатрешни работи и Јавното обвинителство без одлагање да ги идентификуваат лицата кои упатуваат вакви закани и да преземат соодветни законски мерки.

„Секој што повикува на насилство мора да сноси одговорност, без разлика на неговата политичка или која било друга припадност“, порачуваат од ВМРО-ДПМНЕ.

Со осуда се огласи и Либерално-демократската партија (ЛДП), од каде оценуваат дека заканите кон новинарите не смеат да се релативизираат.

„Заканите кон новинари не се личен конфликт, туку директен напад врз слободата на медиумите и демократскиот поредок“, наведуваат од ЛДП.

Партијата предупредува дека говорот на омраза и навредливата политичка комуникација создаваат атмосфера во која насилството станува прифатлив начин на пресметка со неистомислениците.

Од ЛДП побараа надлежните институции итно да ги идентификуваат и санкционираат одговорните за заканите и да обезбедат ефикасна заштита за новинарот.

The post „САМО ГАЗЕЊЕ“ ЗА ВИДИНОВСКИ Нови закани кон новинарот, се бара итна реакција од МВР и Обвинителството appeared first on plusinfo.mk.

Премиерот Христијан Мицкоски денеска порача дека правосудниот систем нема да добие дополнителни финансиски средства сè додека, како што рече, не покаже резултати и не почне да испорачува правда за граѓаните.

Коментарот на Мицкоски следуваше по објавувањето на последниот извештај на Европската комисија за состојбите во правосудството, во кој се нотираат и позитивни оценки, но и забелешки за функционирањето на системот.

– Пари повеќе нема да добијат. Пари нема да добијат, иако се бара и во Законот за јавно обвинителство да се стави сума од 0,5 проценти од буџетот. Нема да добијат затоа што не ги заслужиле, затоа што очекуваме дека правдата ќе ја донесат – изјави Мицкоски.

Тој посочи дека Владата ги исполнила барањата на судството во делот на вработувања, самостојност и други услови, но дека понатамошното финансирање, според него, мора да биде поврзано со конкретни резултати.

– Независноста со пари не се обезбедува, туку се обезбедува со работа. Со работа, а не со допишување на работни саати, дежурства и проценти – рече премиерот.

Мицкоски објасни дека извештајот на Европската комисија е редовен документ кој последните години се однесува и на дел од земјите кандидати за членство во Европската Унија.

Според него, анализирани се состојбите во периодот од 2023 до 2025 година, а меѓу кандидатите опфатени се Македонија, Црна Гора, Албанија и Србија.

– Во него има пофалби, констатирани политики кои испорачуваат, но има и критики – рече Мицкоски.

Како клучни забелешки од извештајот, тој ги посочи констатациите за политички притисок врз судството, потребата од повеќе финансиски средства за обвинителите и судиите, но и критиките за нивната работа.

– Од една страна велат судскиот систем не испорачува, а од друга страна Владата да даде повеќе пари. Тие две работи едно со друго не одат. Или ќе почнат да испорачуваат, па да добијат, или нема да добијат – нагласи премиерот.

Тој додаде дека ќе продолжи јавно да ги повикува судиите и обвинителите да покажат поголема ефикасност.

– Јас ќе продолжам во таа насока да испраќам пораки. Со сета политичка одговорност и ризик што ги имам, ќе продолжам сè додека не видиме напредок во испораката на правдата – изјави Мицкоски.

The post ВЛАДАТА НЕ ОТВОРА НОВА КАСА ЗА СУДСТВОТО Премиерот Мицкоски бара прво резултати, па потоа средства appeared first on plusinfo.mk.

Прогласување епидемија во Гостивар засега нема да има, сè додека не се утврди што е причината за зголемениот број граѓани кои во изминатите денови се јавуваат со стомачни тегоби, изјави министерот за здравство Сашо Клековски по посетата на Општата болница во Гостивар.

Тој информираше дека бројот на пациенти кои бараат лекарска помош останува речиси ист како и претходните денови, без значително зголемување или намалување.

– Првите пациенти се јавија во ноќта на 13 јули и од тогаш бројката е прилично константна. Над 200 граѓани дневно се јавуваат во болницата за интервенција. Во последните 24 часа имало 100 побарани интервенции на педијатрија и 160 на инфективното одделение – рече Клековски.

Според него, клиничката слика кај пациентите е слична. Најчесто станува збор за благи стомачни проблеми, дијареја и повраќање, а кај дел од заболени има и покачена температура.

Најголем дел од пациентите, како што посочи министерот, се третираат поради дехидратација, со примена на инфузија, витамини и друга симптоматска терапија, по што се пуштаат на домашно лекување.

Клековски по разговорите со раководството на гостиварската болница оцени дека медицинскиот персонал успешно се справува со состојбата и дека има доволно лекови и медицински материјали за третман на пациентите.

Тој упати апел до граѓаните да соработуваат со епидемиолошките служби и да ги пополнуваат анкетите, бидејќи тие се клучни за откривање на можниот извор на заразата.

– Од вчера се земаат копрокултури и се прават сите неопходни лабораториски анализи. Проширена е можноста да се бараат траги од адено и рота вируси. Вклучени се повеќе институции и се прават повеќе видови истраги – од можност за тешки метали, паразити, вируси и бактерии. Ни требаат многу повеќе епидемиолошки анкети за да го најдеме причинителот и да ги поврземе можните извори – изјави Клековски.

Во однос на изјавите дека храната би можела да биде причина за заболувањата, а не водата, министерот посочи дека конечниот збор треба да го имаат епидемиолозите.

– Ниту јас, ниту директорот на јавно претпријатие можеме да кажеме кој е причинителот. За тоа постојат епидемиолозите, Центарот за јавно здравје и Институтот за јавно здравје. Треба да ја очекуваме нивната оценка – рече Клековски.

Тој додаде дека според неговото лично мислење, можноста толкав број луѓе да се затрујат од ист вид храна е помалку веројатна, особено затоа што симптомите траат веќе неколку дена.

– За мене, логички, храната е помалку веројатен извор, но тоа мора да го потврдат анализите – додаде министерот.

Клековски очекува дополнителни резултати од анализите на водата од гостиварскиот водовод да бидат достапни од понеделник, по што ќе може да се има појасна слика за причините за заболувањата.

The post ПРОДОЛЖУВА МИСТЕРИЈАТА СО СТОМАЧНИТЕ ПРОБЛЕМИ ВО ГОСТИВАР Клековски бара повеќе анализи пред одлука за епидемија appeared first on plusinfo.mk.

Универзитетот „Св. Кирил и Методиј“ (УКИМ) го објави конкурсот за запишување студенти на прв циклус студии за учебната 2026/2027 година.

Идните студенти ќе имаат можност да се пријават во три уписни рокови. Првиот рок е предвиден за 18 и 19 август 2026 година, вториот за 10 и 11 септември, додека третиот рок ќе се одржи на 23 септември.

Од УКИМ информираат дека прелиминарните ранг-листи со резултатите од успехот во средното образование ќе бидат објавени на 24 август за првиот уписен рок и на 15 септември за вториот уписен рок.

Во конкурсот студентите можат да ги најдат сите информации поврзани со условите за запишување, потребната документација, како и бројот на слободни места на секој од факултетите во рамки на Универзитетот.

Од Универзитетот ги повикуваат заинтересираните кандидати навреме да ги подготват потребните документи и да ги следат објавените рокови за пријавување.

The post ЗАПОЧНУВААТ УПИСИТЕ НА УКИМ Објавени трите рокови за новата генерација студенти appeared first on plusinfo.mk.

СДС, Левица и ДУИ ја водат политиката на блокади и се повлекоа од договорот за измените на Изборниот законик, иако претходно учествувале во работните средби и предлагале измени, обвини денеска портпаролот на ВМРО-ДПМНЕ, Валентин Манасиевски.

Според него, претставниците на трите партии со месеци учествувале во подготовката на законските измени, а нивните предлози биле прифаќани.

– Со месеци седеа на работни средби, предлагаа измени, бараа корекции и нивните барања беа прифаќани. Кога дојде време да стават потпис и да покажат одговорност, избегаа од сопствениот договор – изјави Манасиевски.

Тој оцени дека, според ВМРО-ДПМНЕ, проблемот не бил самиот Изборен законик, туку, како што рече, неспособноста на опозициските партии да прифатат нов реформски успех.

– Тоа најдобро покажува дека проблемот никогаш не бил Изборниот законик. Проблемот е што СДС, Левица и ДУИ не можат да поднесат уште еден реформски успех на Македонија – рече Манасиевски.

Портпаролот на владејачката партија додаде дека, според нивната оценка, опозициските партии не се борат за подобрување на изборната регулатива, туку против секое решение што, како што наведе, значи напредок за државата.

– За нив е поважно да создадат политичка криза отколку Македонија да исполни уште една реформска обврска – истакна Манасиевски.

Тој порача дека граѓаните, како што рече, ќе ја оценат ваквата политика на следните избори.

The post ОПОЗИЦИЈАТА ГО ОДБИЛА ИЗБОРНИОТ ЗАКОНИК ШТО САМА ГО КРЕИРАЛА Манасиевски тврди дека СДС, Левица и ДУИ работат на блокади appeared first on plusinfo.mk.

По седум години без учебници по странски јазици и со чести проблеми во наставниот процес, Од ВМРО-ДПМНЕ тврдат дека образованието повторно е еден од државните приоритети. Според соопштението, учениците веќе втора година по ред ги добиваат учебниците уште на првиот училиштен ден, а наставниците имаат предвидлив систем за раст на платите и можност за кариерен напредок.

Од ВМРО-ДПМНЕ велат дека во училиштата се испорачани над еден милион примероци учебници, а со набавките во последните две години се заштедени околу 45 милиони денари. Како една од клучните промени ја посочуваат и повторната набавка на учебници по странски јазици, кои, како што наведуваат, недостасувале во претходниот период.

Во делот на платите, оттаму потсетуваат дека со спогодбата со СОНК е договорено зголемување на примањата во следните четири години, зависно од инфлацијата, при што се предвидува раст од 40 до 60 проценти. Според нивните податоци, во првите две години платите на вработените во образованието веќе се зголемиле за повеќе од 20 проценти.

„Наставниците добија предвидливост и редовно покачување на платите, додека учениците стабилен наставен процес со учебници по сите предмети во своите раце“, се наведува во соопштението.

Паралелно со тоа, над 160 училишта биле опремени со нова ИТ опрема, воведени се електронски дневник и електронски свидетелства, а повеќе од 1.000 наставници поминале обуки за етичка примена на вештачката интелигенција.

Во инфраструктурата само во првата година од мандатот биле инвестирани над 70 милиони евра за изградба на нови училишта, спортски сали, реконструкции и проширување на постојните капацитети.

Дополнително, бројот на образовни асистенти во основното образование е зголемен од 800 на 1.350, а за првпат се воведени 150 асистенти и во средното образование.

Од партијата оценуваат дека овие мерки претставуваат „враќање на достоинството и квалитетот во образованието“ и дека системот постепено се стабилизира по години на проблеми со учебници, инфраструктура и услови за работа.

The post ЕДЕН МИЛИОН УЧЕБНИЦИ НА КЛУПИТЕ Учениците втора година ги добиваат навреме appeared first on plusinfo.mk.

Жешкото летно време продолжува и денеска. Според прогнозата на Управата за хидрометеоролошки работи (УХМР), времето ќе биде сончево и многу топло, со мала до умерена локална облачност.

Во попладневните часови на одделни места ќе има услови за изолирана појава на пороен дожд и грмежи, а ќе дува слаб до умерен ветер од променлив правец.

Утринските температури ќе се движат од 13 до 22 степени, додека дневните ќе достигнат од 33 до 39 степени.

Во Скопје ќе преовладува сончево и многу топло време со мала до умерена облачност. Ќе дува слаб до умерен ветер од северозападен правец, а во попладневните часови во делови од котлината се можни краткотрајни поројни врнежи проследени со грмежи. Температурата ќе се движи од 20 до 38 степени.

Според прогнозата на УХМР, во следните два дена ќе продолжи периодот на сончево и многу топло време, со мала до умерена облачност. На поединечни места дневната температура ќе достигне и 40 степени, а попладне повторно ќе има услови за локален пороен дожд и грмежи.

Промена на времето се очекува во вторник, кога на повеќе места ќе има нестабилно време со пороен дожд, грмежи и засилен ветер. Во среда ќе дува засилен северен ветер, а температурите ќе се намалат за неколку степени.

The post МАКЕДОНИЈА ПОД ЖЕЖОК БРАН Температурите ќе се искачат до 39 степени, а потоа следува пресврт appeared first on plusinfo.mk.

Импресивно шоу со дронови во Њу Џерси го исполнува ноќното небо со знамињата и грбовите на Шпанија и Аргентина, како и со логото на финалето на Светското првенство 2026, додека панорамата на Менхетен служи како спектакуларна позадина.

Овој визуелен спектакл се одржува само неколку дена пред големото финале, кога Шпанија и Аргентина ќе се соочат во недела на стадионот „New York New Jersey Stadium“ во Ист Радерфорд, во борба за најпрестижниот трофеј во светскиот фудбал.

Натпреварот ќе се игра во Ист Радерфорд, Њу Џерси, веднаш до Њујорк, а градот е домаќин на бројни свечености и промотивни настани во пресрет на финалето. Шоуто со дронови е дел од прославите со кои се најавува еден од најгледаните спортски настани во светот. Ова е прво финале што ќе се одигра на Светско првенство организирано од три земји – САД, Канада и Мексико.

The countdown to the World Cup Final is lighting up the New York skyline.

A massive drone show in New Jersey fills the night sky with the flags and crests of Spain and Argentina, plus 2026 World Cup Final logos, with Manhattan serving as the backdrop.

The spectacle comes just… pic.twitter.com/9Kvsr02m0X

— Fox News (@FoxNews) July 17, 2026

The post 🎥 ПОЧНА ОДБРОЈУВАЊЕТО ДО ГОЛЕМОТО ФИНАЛЕ Погледнете ја спектакуларната глетка над Њујорк appeared first on plusinfo.mk.

Семејството на Тоше Проески јавно се огласи по најавите за концертот „Тоше засекогаш – музика која живее“ (Toše Forever – Glazba Koja Živi), кој е закажан за октомври во Сплит, предупредувајќи ги обожавателите да не бидат доведени во заблуда.

Во соопштението, кое на социјалните мрежи го објави сестрата на Тоше, Дора Проеска, а го сподели и нејзиниот син Кристијан Ристески, се наведува дека семејството не стои зад овој настан и дека организаторите немаат нивна согласност.

„Јавно и недвосмислено сакаме да ве известиме дека оваа информација не е точна. Нема да настапат Кристијан, ниту придружниот бенд на Тоше. Организаторите немаат службена дозвола од нас за негово одржување, а ние сме единствените носители на правата“, се вели во објавата.

Семејството истакнува дека ги поддржува сите искрени настани посветени на ликот и делото на Тоше Проески, но дека нема да дозволи, како што наведува, „отворена манипулација со неговото име и неговата публика“.

Во обраќањето до фановите тие апелираат да не наседнуваат на, како што велат, „невистини и комерцијални манипулации“, додавајќи дека токму обожавателите секогаш биле најважниот дел од животот и кариерата на Тоше.

The post СЕМЕЈСТВОТО НА ТОШЕ СЕ ДИСТАНЦИРА ОД НАЈАВЕНИОТ КОНЦЕРТ ВО СПЛИТ Не учествува внукот на Тоше, ниту неговиот бенд, не наседнувајте на манипулации! appeared first on plusinfo.mk.

Основното јавно обвинителство Куманово побара притвор за 41-годишен британски државјанин, осомничен дека со камења нападнал даночни инспектори кои вршеле службена контрола на туристичкиот локалитет „Камени Кукли“ во селото Куклица, кај Кратово.

Според Обвинителството, против осомничениот е поведена постапка за кривичното дело „Спречување службено лице во вршење службено дејствие“, казниво според член 382 став 3 од Кривичниот законик.

Инцидентот се случил на 16 јули, кога двајца даночни контролори од Управата за јавни приходи извршувале службена контрола во врска со претходно поставени обележја за привремена забрана за вршење дејност на локалитетот.

Според обвинителството, британскиот државјанин почнал да фрла камења кон инспекторите и кон нивното службено возило, поради што тие биле принудени да го напуштат местото без да ја завршат контролата.

Од Министерството за внатрешни работи информираат дека истиот ден, во 12:29 часот, полициски службеници од ОВР Кратово го лишиле од слобода А.М.Б. (41) од Велика Британија.

Тој бил приведен во полициска станица, а по целосното документирање на случајот против него ќе биде поднесена соодветна кривична пријава.

Јавниот обвинител, оценувајќи ги околностите на случајот, до судијата на претходна постапка при Основниот суд во Куманово доставил предлог за определување мерка притвор.

Според неофицијални информации, приведениот британски државјанин е сопруг на Стојна Димитровска Бут, која заедно со нејзиниот татко Милош Димитровски во изминатиот период беше поврзувана со користењето на локалитетот Куклица. Оваа информација засега не е официјално потврдена од надлежните институции.

The post ХАОС ВО КУКЛИЦА, БРИТАНЕЦ СО КАМЕЊА НАПАДНАЛ ИНСПЕКТОРИ Полицијата го приведе, Обвинителството бара притвор appeared first on plusinfo.mk.