Утринава, на денот на летната долгодневица, министерот за култура и туризам, Зоран Љутков, присуствуваше на археолошкиот локалитет Кокино, каде што го следеше изгрејсонцето – астрономски настан што со векови го привлекува вниманието на научниците, истражувачите и посетителите, соопшти Министерствот за култура и туризам.

На настанот, организиран од Музејот во Куманово присуствуваа и директорката на Музејот во Куманово, Марија Живачки, градоначалникот на Општина Старо Нагоричане, Мирослав Славковски, археологот Дејан Георгиевски, пратеникот Бране Петрушевски, директорот на Национален конзерваторски центар, Александар Јорданоски и бројни гости и посетители.

Локалитетот Кокино, стар околу четири милениуми, е едно од најзначајните археолошки и археоастрономски наоѓалишта во Македонија. Токму овде древните жители внимателно ги следеле движењата на Сонцето и небесните тела, оставајќи сведоштва за нивното извонредно познавање на природните циклуси и нивната улога во секојдневниот живот и духовната култура.

Особено впечатлив е феноменот на летната долгодневица, кога од точно определена точка на локалитетот може да се набљудува изгрејсонцето низ специфичен карпест процеп, што претставува една од најпрепознатливите особености на Кокино. Токму оваа уникатна поврзаност на природата, науката и културното наследство му дава исклучителна вредност на локалитетот.

Посетата е дел од активностите на Министерството за култура и туризам насочени кон афирмација и промоција на културното наследство, како и кон подготовките за одбележување на значајниот јубилеј – 25 години од откривањето на Кокино, кој ќе биде одбележан во 2026 година со повеќе научни, културни и промотивни настани.

Министерството за култура и туризам останува посветено на зачувувањето, валоризацијата и промоцијата на културното наследство како темелна вредност на националниот идентитет и значаен потенцијал за развој на културниот туризам.

The post СПЕКТАКУЛАРНО ИЗГРЕЈСОНЦЕ НА КОКИНО Министерот Љутков и бројни гости ја посетија древната опсерваторија appeared first on plusinfo.mk.

Владата не планира укинување на културните институции, туку нивна реорганизација со цел подобрување на условите за работа и поефикасно користење на ресурсите, истакна денеска во Собранието министерот за култура и туризам Зоран Љутков одговарајќи на пратеничко прашање за состојбата со музичкиот ансамбл во Тетово.

Тој нагласи дека во Националната стратегија за развој на културата 2026–2030 не се предвидува затворање на институции, туку „разумна рационализација“ на установи кои, како што рече, биле формирани во минатото без анализа, без систематизација и без обезбедени кадровски и просторни услови.

– Не ги укинуваме институциите, туку ги реорганизираме во рамки на установи каде што има потреба од кадар. Целта е да им се обезбедат подобри услови за работа – истакна Љутков.

Министерот посочи дека процесот се однесува на вкупно 12 институции, а не само на ансамблот во Тетово, наведувајќи дека во слична состојба се и други установи, како „10 дена Крушевска Република“, Смилевскиот конгрес и Камерниот оркестар во Битола.

Во однос на вработувањата, Љутков негираше дека се стопирани, истакнувајќи дека таква негова изјава не постои. Тој појасни дека со реорганизацијата административниот и техничкиот кадар ќе се преземе од Центарот за култура во Тетово, додека за уметничкиот кадар ќе се овозможи ново вработување.

– Ансамблот ќе се зголеми и ќе функционира во рамките на Центарот за култура во Тетово, каде што и припаѓа – рече министерот.

Тој додаде дека целта на реформите е да се надминат пропустите од минатото и да се воспостави пофункционален систем во културниот сектор, со подобро искористување на капацитетите на постојните институции.

The post ЌЕ СЕ РЕОРГАНИЗИРААТ 12 КУЛТУРНИ ИНСТИТУЦИИ Љутков негира дека се стопирани вработувања appeared first on plusinfo.mk.

Никој нема да биде отпуштен од работа, а дел од националните установи во културата ќе се фузираат и ќе продолжат да функционираат во рамки на други институции, најави министерот за култура и туризам Зоран Љутков.

Тој објасни дека реорганизацијата е дел од Националната стратегија за развој на културата 2026-2030 и има цел подобро функционирање на институциите.

Љутков рече дека постојат манифестации што работат само неколку дена годишно, а имаат систематизирани десетици работни места.

– Имате манифестација што работи три дена во годината, а во планот за вработување, со систематизацијата, некаде 25 до 30 работни места. За нас е многу поважно таа институција да не се угасне, туку да влезе под веќе постоечка институција како одделение или сектор – рече Љутков.

Министерот нагласи дека нема да има гасење на институциите, туку нивно спојување со установи кои имаат капацитет и потреба од таков вид дејност.

– Нема да има укинување на институциите во културата, туку нивна современа реорганизација. Оптимизацијата значи фузирање на одредени институции што немаат капацитет да продолжат да работат со друга установа која има потреба од таков вид услуга – изјави Љутков.

Тој додаде дека фокусот ќе биде ставен врз стручниот кадар, а не врз администрацијата.

– Не се отпуштаат носителите на дејности. Напротив, ќе се зголемува бројот на вработени, посебно кај стручните кадри, а не кај административниот кадар – рече министерот.

Љутков посочи дека дел од институциите биле формирани без доволна анализа и денес функционираат со само еден вработен.

– Неколку од новите институции, формирани во 2023 година, останаа со по еден вработен. Верувајте, ќе функционира многу подобро ако бидат дел од веќе постоечка институција отколку вака независно и самостојно.

Тој нагласи дека реорганизацијата се подготвува во консултација со вработените и директорите на институциите.

Министерот повтори дека сите вработени ќе останат во системот на културата.

– Преобликувањето на мрежата на установите не подразбира укинување на институциите, туку нивна современа реорганизација во функција на мисијата и визијата за која се основани. Ниедно вработено лице во установите од културата нема да го загуби работното место – порача Љутков.

The post НЕМА ДА ИМА ОТПУШТАЊА ВО КУЛТУРАТА Ќе има спојување кај некои институции appeared first on plusinfo.mk.

Протестите на Синдикатот на културните работници имаат за цел да ги штитат неработниците, вели министерот за култура и туризам, Зоран Љутков, во интервју за порталот Курир.

– Едно нешто се договаравме во кабинетот, а пред медиумите излегуваше нешто сосема друго. Нивната тенденција не е да се разберат со Министерството, туку да се штитат неработниците во културата – вели Љутков додавајќи дека и самиот бил дел од синдикалното делување на СКРМ.

– Јас барам законски да потпишеме нов колективен договор во кој ќе се уредат правата на вработените во културата јасно, прецизно, точно. Од другата страна нема слух. За разлика од СОНК, каде што веќе имаат и конкретни предлози. Самите признаа дека во 2024, март, кога сме земале плата по двата колективни договора, тоа било незаконско постапување. Кога ги прашав зошто тогаш не тужевте, зошто не поднесовте жалби против министерот за незаконско постапување, велат затоа што ја добивме платата која ја баравме. Тоа значи дека ние сега добиваме плата незаконска и велиме дека тоа е во ред, бидејќи е малку поголема од очекуваното, тогаш не тужиме. А сега кога добиваме законска плата ама не таква каква што сакале, тоа е незаконски и ќе тужиме. Мислам дека тоа не е фер. Секој колективен договор има рок на траење. Овој имал две години, веќе четири години е истечен. Што е суштината? Дека треба да потпишеме нов – вели Љутков.

Тој е дециден дека платите нема да се скратат.

– Никој не вели дека платите ќе се скратат или дека некој ќе го изгуби правото на плата. Тоа е сосема обратна реторика од таа на раководството на Синдикатот кој ги буцка вработените во културата дека доаѓа министер кој ќе им ги скрати платите. На никого не му се крати платата и ова најодговорно го тврдам – рече Љутков.

The post ПЛАТИТЕ НЕМА ДА СЕ КРАТАТ, СИНДИКАТОТ ГИ ШТИТИ НЕРАБОТНИЦИТЕ Културните работници 4 години земаат плата незаконски и одбиваат нов договор appeared first on plusinfo.mk.

Седум оперски претстави од Пучини и од Верди, од кои две првпат во една вечер, како и еден балет, се на програмата на годинашниот 54. фестивал „Мајски оперски вечери“, кој традиционално се одржува од 9 до 31 мај во Националната опера и балет.

Фестивалот ќе почне в сабота со две оперски претстави од Џакомо Пучини – премиерите на „Сестра Анџелика“ и „Џани Скики“, откако фестивалскиот оган ќе го запали нашата сопранистка со меѓународна кариера Ана Дурловски.

Следниот термин на МОВ е 13 мај, кога ќе биде изведена Вердиевата опера „Риголето“. Потоа на програмата се и: „Тоска“ од Пучини (16 мај), „Мадам Батерфлај“ на Пучини (20 мај) и Вердиевите опери „Травијата“ (27 мај) и „Набуко“ – со која на 31 мај ќе биде затворен фестивалот. На програмата е и балетот „Лебедово езеро“ од Петар Илич Чајовски, кој ќе биде изведен на 22 мај.

Директорот на Националната опера и балет, Оливер Арсовски, на прес-конференција денеска во пресрет на отворањето на фестивалот истакна дека за нив тој не е само уште една сезона и програма со претстави, туку е момент кога Националната опера и балет го покажува својот капацитет, својата визија и одговорност кон културата и публиката.

– Оваа година подготвивме репертоар што внимателно ја спојува традицијата со новата енергија. Секоја од претставите на програмата носи различна емоција и заедно создаваат едно целосно искуство што посакуваме публиката да го памети. „Мајките оперски вечери“ се и огледало на институцијата, кое покажува колку сме подготвени да работиме посветено, да поставуваме стандарди и да создаваме продукција што може достоинствено да стои рамо до рамо со европските сцени – истакна Арсовски.

Успешно фестивалско издание на организаторите им посака министерот за култура и туризам, Зоран Љутков, кој на прес-конференцијата истакна дека „Мајските оперски вечери“ не се само уште еден културен настан во календарот туку симбол на континуитет, квалитет и амбиција, показател за тоа каде се наоѓа македонската култура денес и кон што се стреми. Тој посочи дека публиката доаѓа на овој фестивал со очекување да доживее врвна уметност, а дека сцената возвраќа со емоција, страст и извонредност.

– Токму затоа, Мајските оперски вечери се културна порака дека оваа земја има капацитет, има талент и има визија да создава настани што се рамноправни со европските. Како Министерство за култура и туризам, ние не ја гледаме оваа манифестација само како традиција што треба да се одржи. Ја гледаме како инвестиција во квалитет, во меѓународна видливост и во културен идентитет. Поддршката што ја даваме не е формална, таа е суштинска, стратешка и насочена кон тоа секоја следна година стандардите да бидат уште повисоки. Годинашното издание е доказ за тоа. Внимателно избраниот репертоар, кој ги обединува безвременските дела на Верди и Пучини со нови продукциски пристапи, покажува дека традицијата и современоста може да одат рака под рака. Присуството на врвни уметници од меѓународната сцена, заедно со нашиот извонреден ансамбл, создава продукција што не е само национална, туку европска по својот квалитет – истакна Љутков.

The post ОПЕРИ ОД ПУЧИНИ И ОД ВЕРДИ НА МАЈСКИТЕ ОПЕРСКИ ВЕЧЕРИ Врвна уметност од 9 до 31 мај во Националната опера и балет appeared first on plusinfo.mk.

Mинистерот за култура и туризам Зоран Љутков им го честита 5 Мај, Денот на македонскиот јазик на граѓаните, истакнувајќи ја неговата непроценлива вредност како темел на националниот идентитет и културното наследство.

Љутков нагласи дека македонскиот јазик е жив израз на нашето постоење, историја и духовност, кој се пренесува низ генерациите и ја отсликува силата и истрајноста на народот.

„Денеска го славиме јазикот што дише во нас. Денеска се слави македонскиот збор, чист и бистар како планинско езеро, во кој се огледува нашата вековност. Во него се впишува нашето постоење. Во секој слог трепери нашиот културен бескрај. Во секоја реченица се реди една тивка, но непобитна вистина, дека сме тука, дека говориме и дека траеме. Македонскиот јазик е наш дом. Дом на нашата мисла, нашите чувства, на нашите сеќавања“, вели министерот Љутков во видео честитката.

Македонскиот јазик не се мери со бројот на говорници, додаде тој.

„Тој се мери со длабочината на љубовта што ја носи во себе. Со вербата што ја чува. Со силата што ја изразува. Тој е присутен во секој искрен збор, во секое напишано писмо, во секој стих што го допира срцето. Тој е жив, буден, непореклив. Во него живее цел еден народ. Во него се огледува неговата душа. Во него трае Македонија“ посочува Љутков.

Тој потсети дека на овој ден во 1945 година е кодифициран современиот македонски литературен јазик, со што се поставени темелите на неговиот развој и афирмација.

„На денешен ден 1945 година со одлука на Народната Влада на Македонија е кодифициран современиот македонски литературен јазик, а беше утврдена неговата азбука и правопис. Затоа, да го чуваме и да го развиваме, затоа што во него живее нашето исконско постоење и препознатливост пред светот. Нека ни е честит и вековит Денот на македонскиот јазик“,  се вели во честитката на министерот Љутков

The post ВО МАКЕДОНСКИОТ ЈАЗИК ТРАЕ МАКЕДОНИЈА Во него живее еден народ, тој е нашиот дом appeared first on plusinfo.mk.

Почна обновата на Универзалната сала во Скопје, проект вреден 20 милиони евра.

Премиерот Христијан Мицкоски, кој заедно со министерот за култура Зоран Љутков и со градоначалникот на Скопје Орце Ѓорѓиевски денеска го посети градилиптето очекува изградбата да биде завршена во рамките на рокот и во рамките на предвидениот буџет.

– Проектот „Европска престолнина на културата“ после сите оние застои во минатото, конечно добива некаква динамика, а мораме до 2028 комплетно да ги затвориме сите објекти. Јас сум благодарен од мое име, од името на граѓаните на градот Скопје, што овој објект после сите оние перипетии од минатото ќе добие некаква физиономија. Според она што го видов и што го презентираше проектантот ќе биде навистина прекрасно дело. Па, ајде да не зборуваме што се вели пред време, да го завршиме и потоа сите заедно да се радуваме и да уживаме во културните настани коишто тука ќе се организираат – рече премиерот Мицкоски.

Министерот за култура Зоран Љутков, вели дека Универзалната сала ќе биде готова до крајот на 2027 година, а нејзиното отворање со некаков настан да се означи на почетокот на 2028 година.

– Универзалната сала ќе биде завршена до крајот на 2027 година. Ќе биде дел од „Скопје – европска престолнина на културата во 2028 година“. Имаше правни пречки, имаше поделени стопанисувања меѓу Град Скопје и Министерството за култура, не се знаеше кој е одговорен во овој дел. Кога ги решивме овие пречки, во истиот момент продолживме со целата процедура. Инвеститор е Министерството за култура, преку Владата, а парите, 20 милиони евра, ги обезбеди Владата – изјави министерот Љутков.

Прашан дали се гарантира безбедноста во поглед на пожари, Љутков рече дека се направени  неколку испитувања во врска со тоа, првите две нарачани од самиот изведувач, а потоа уште едно.

– Останува истата челична конструкција, која се покажа дека не е оштетена при пожарот – рече Љутков.

Нека е аирлија, ова е момент кој Скопје долго го чекаше, почнува реконструкцијата на Универзална сала, објави градоначалникот Ѓорѓиевски на Фејсбук.

„Премногу време овој процес беше закочен, премногу време стоеше во место, а скопјани останаа без еден од најпрепознатливите симболи на градот. Универзалната сала е спомен на солидарноста, на пријателството и на човечноста, изградена по разорниот земјотрес, како доказ дека Скопје никогаш не било само и дека секогаш знаело да се издигне“, порача Ѓорѓиевски.

Многумина во минатото имаа можност да го вратат достоинството на овој простор, додаде тој.

„Но, како што е познато, само Влада предводена од ВМРО-ДПМНЕ гради, создава и ја развива државата. Затоа, сакам да упатам искрени честитки и благодарност до премиерот Христијан Мицкоски за силната поддршка, визијата и за одлучноста овој проект конечно да се придвижи.
Благодарност и до министерот за култура, Зоран Љутков, за посветеноста и за конкретниот придонес во реализацијата на оваа важна инвестиција за Скопје и за македонската култура“, вели градоначалникот.

Универзалната сала е дел од колективната меморија на нашиот град, потсети тој.

„Тука се одржувале концерти, фестивали, претстави и настани кои оставиле трага во животот на многу генерации. Речиси секој скопјанец има свој спомен поврзан со ова место. Затоа нејзината обнова не значи само реконструкција на една зграда, туку враќање на еден важен дел од душата на Скопје“, вели градоначалникот Ѓорѓиевски.

Проектот за реконструкција на Универзалната сала ќе се реализира по принципот „клуч на рака“, со што се обезбедува целосна изведба и подготвеност за употреба, без дополнителни интервенции.

„Овој проект претставува еден од клучните чекори во подготовките на Скопје за освојување и за достојно носење на престижната титула Европска престолнина на културата 2028. Со обновениот изглед, Универзалната сала ќе прерасне во модерна, функционална и репрезентативна културна институција, способна да биде домаќин на врвни театарски претстави, концерти, фестивали и други значајни културни настани. По завршувањето на реконструкцијата, објектот ќе биде целосно предаден во владение на Град Скопје, како простор кој повторно ќе им служи на граѓаните, на уметниците, на младите и на сите генерации што ја сакаат културата“, вели Ѓорѓиевски.

Универзалната сала требаше да биде изградена во мандатот на претходната градоначалничка на Скопје, Данела Арсовска. Но, таа не ја градеше, па Министерството за култура ги презеде ингеренциите од Град Скопје и почна да ја гради. За време на изградбата, во април 2024 година,  градилиштето се запали и изградбата беше стопирана.

The post 📷 ОБНОВАТА НА УНИВЕРЗАЛНАТА САЛА ЌЕ ЧИНИ 20 МИЛИОНИ ЕВРА Објектот ќе биде целосно готов до крајот на 2027 година appeared first on plusinfo.mk.

Ревитализација на Калето, конзервација на Аквадуктот, реконструкција на Универзалната сала и отворање нови културни простори, се дел од проектите кои ќе се реализираат во главниот град во пресрет на манифестацијата „Скопје – Европска престолнина на културата 2028“, беше најавено денеска на меѓународната конференција „Обликување на иднината на Скопје: Култура, урбани политики и одржливи европски градови“ .

Министерот за култура и туризам Зоран Љутков посочи дека титулата Европска престолнина на културата претставува можност за ново гледање на градот и неговата историја.

– Кога зборуваме за европската престолнина на културата, не зборуваме само за титула. Зборуваме за приказни, за луѓе, за градови што се менуваат и се отвораат. Зборуваме за можност еден град да се види себеси на нов начин и светот да го види него со нови очи – рече Љутков.

Тој најави дека забрзано се работи на важни културни и историски обележја на градот и дека „Скопје 2028“ е можност да покажеме кои сме, не само пред другите туку и пред самите себеси.

– Проектот за идејно решение за ревитализација на Калето е готов и него го изработи Конзерваторски центар – Скопје кој со забрзана динамика започнува со изработка на основни проекти, по што Град Скопје ќе може да започне со ревитализација на Калето. Министерството за култура е при крај со проектот за реконструкција и опремување на двата музеја на Калето – Музејот на праисторијата и на Отоманскиот музеј и наскоро ќе ги отвори за посетителите – рече министерот.

Скопскиот Аквадукт, додаде Љутков, кој е тивок сведок на минатото, конечно ќе добие шанса да биде виден, заштитен и споделен со светот. Обезбедени се средства за конзервација на објектот и првпат се обезбедени средства за експропријација на околните парцели.

Како што посочи министерот, веќе е започната повторната изградба на Универзална сала, како еден од најпрепознатливите симболи на културниот живот во Скопје, чија реконструкција треба да заврши до 2028 година, по што повторно ќе стане современ центар за културни настани, собири и за концерти.

– Ова што го градиме не е само за 2028 година. Ова е процес што веќе почна и треба да остави трага што ќе се чувствува долго време потоа – посочи Љутков.

Според него, проектот е можност за поврзување со Европа, уметниците и младите, но, пред сè, е проект на луѓето.

– „Скопје 2028“ е можност да покажеме дека знаеме да работиме заедно, дека знаеме да создадеме и дека знаеме да веруваме во нешто што е поголемо од нас. Затоа што, на крајот, ова не е проект на институциите. Ова е проект на луѓето. На сите нас. И токму затоа верувам дека „Скопје 2028“ може да биде нешто навистина посебно – нагласи министерот.

Градоначалникот на Скопје, Орце Ѓорѓиевски порача дека културата мора да стане двигател на урбаната трансформација и трајна основа за развојот на градот.

Тој ја нагласи историската можност што ја носи титулата и повика културата да се разбере како јавна инфраструктура, а не како украс.

– Што навистина значи Скопје да биде европска престолнина на културата? Дали тоа значи само една година исполнета со настани? Или, како што за мене значи, нешто многу подлабоко – можност културата да стане трајна трансформација, јавна трансформација на инфраструктурата на градот, двигател на урбаниот развој, средство за социјална кохезија, извор на нова економија и основа на нов урбан идентитет – истакна Ѓорѓиевски.

Градоначалникот потсети и на солидарноста по земјотресот во 1963 година нагласувајќи дека тоа наследство мора да се претвори во современа сила за обнова на јавниот интерес и довербата во институциите.

Ѓорѓиевски ја нагласи и потребата културата да се поврзе со секојдневниот живот на граѓаните:

– Добар град не е само град со настани. Добар град е град во кој човек сака, пред сè, да остане. Град во кој јавните простори се безбедни, зелени, достапни и креативни. Град во кој културата не е луксуз, туку дел од неговото секојдневие – рече тој.

Ѓорѓиевски истакна дека титулата европска престолнина на културата не смее да биде само едногодишна прослава, туку трајна промена во начинот на кој се разбира, управува и живее градот.

На денешната меѓународна конференција во рамките на „Скопје – европска престолнина на културата 2028“ присуствуваа градоначалници, европски партнери, експерти, претставници на универзитети и на меѓународни организации, со цел да се отвори стратешки дијалог за урбани политики, културен развој и за одржливи европски практики.

РОКАС ДАДЕ ПОДДРШКА ЗА ДОСЕГАШНИОТ НАПРЕДОК НА СКОПЈЕ Титулата Европска престолнина на културата е најсилната иницијатива за поврзување

The post ОТОМАНСКИ МУЗЕЈ И МУЗЕЈ НА ПРАИСТОРИЈАТА ЌЕ СЕ ОТВОРАТ НА КАЛЕТО До 2028 година ќе заживее Аквадуктот, ќе се изгради Универзалната сала appeared first on plusinfo.mk.

Археолошкиот локалитет Стоби претставува едно од најзначајните културни богатства на Република Северна Македонија и важен столб на нашиот културен идентитет, изјави министерот за култура и туризам Зоран Љутков при денешната посета на локалитетот.

Тој нагласи дека државата континуирано ја поддржува Националната установа Стоби, обезбедувајќи значителни буџетски средства за заштита, конзервација и презентација на овој уникатен археолошки комплекс.

– Оваа година Министерството за култура и туризам учествува во финансирањето на Годишната програма на НУ Стоби со вкупно над 10 милиони денари, со што директно ги поддржуваме археолошките истражувања, конзерваторските работи и особено проектот за адаптација на Старата железничка станица во современ Центар за посетители, кој треба да биде отворен во септември – истакна министерот Љутков.

Стоби, како што посочи тој, не е само археолошки локалитет, туку е и стратешка точка за развој на транзитен туризам, особено поради неговата близина до автопатот Е-75 што го прави идеална дестинација за илјадници патници кои минуваат низ нашата земја.

– Со отворањето на новиот Центар за посетители и подобрувањето на услугите за туристите, ние сакаме да го претвориме Стоби во место каде што патниците ќе сакаат да запрат, да го запознаат нашето богато наследство и да го доживеат вистинскиот дух на античкиот свет – истакна Љутков.

Министерот истакна дека потенцијалот на Стоби е препознаен и од меѓународни организации и фондации од САД, Италија и Бугарија. Донациите пристигнуваат од Џ. М. Каплан фонд, како и од Американскиот институт за римска култура во соработка со фондацијата Балканско наследство и НУ Стоби покажуваат дека станува збор за локалитет од меѓународно значење, чија вредност ги надминува границите на нашата држава.

The post СТАРАТА ЖЕЛЕЗНИЧКА ВО СТОБИ ЌЕ СТАНЕ ЦЕНТАР ЗА ПОСЕТИТЕЛИ ВО СЕПТЕМВРИ Локалитетот „плаче“ за транзитен туризам appeared first on plusinfo.mk.

По повеќе од една деценија чекање, започнува реконструкцијата на Универзална сала, најави министерот за култура и туризам Зоран Љутков. Објектот беше затворен 11 години, односно од 2015 година, поради административни пречки и одложувања.

Љутков информира дека постапката за избор на изведувач е успешно завршена, откако надлежната комисија ја одбила жалбата и го потврдила изборот на најповолна понуда.

– По долги години чекање и административни пречки, денес со гордост објавувам: започнува реконструкцијата и модернизацијата на Универзалната сала – еден од најзначајните културни симболи на Скопје и на Македонија – истакна министерот Љутков.

Според него, со ова се отстранува и последната правна пречка за почеток на градежните работи. Проектот ќе се реализира по принципот „клуч на рака“, а реконструкцијата е планирано да заврши до декември 2027 година.

– Со новиот лик на Универзална, Скопје ќе добие модерна, функционална и репрезентативна културна институција, која ќе биде домаќин на врвни театарски претстави, концерти, фестивали и големи културни настани – нагласи Љутков.

Министерот додаде дека проектот е дел од подготовките на Скопје за апликацијата за титулата Европска престолнина на културата 2028.

– Ова е инвестиција во иднината на македонската култура, инвестиција во нашите уметници, во нашата публика и во идните генерации – посочи министерот, додавајќи дека ќе продолжи со транспарентна реализација на капиталните проекти во културата.

The post ПОСЛЕ 11 ГОДИНИ СЕ ОТВОРА ПАТ ЗА УНИВЕРЗАЛНА Љутков најави старт на реконструкцијата appeared first on plusinfo.mk.