Храбрата и брза реакција на скопјанецот Зоран Настески кој на летот на авиокомпанијата Изиџет, од Лондон Лутон до Глазгов го совладал патникот кој се заканувал со бомба извикувајќи „Алаху Акбар“, деновиве е главна тема во медиумите. Настески за Плусинфо вели дека не размислувал за својот потег ниту за миг, туку едноставно, реагирал.

– Не можеш да знаеш кој блефира, не можеш да знаеш со сигурност дали некој има или нема бомба, само ми се вртеа низ глава грди слики. Кога го слушнав тој восклик кој ми оди на нерви, едноставно не размислував. Си реков, ако треба да нè дигнеш во воздух, прво јас ќе те средам тебе – вели Настески.

Тој му го избил телефонот од раката на заканунвачот, мислејќи дека уредот можеби е поврзан со експлозив, а потоа го држел на подот од авионот до крајот на летот.

– Подоцна излезе дека станува збор за некојси проблематичен тип од Индија кој и таму бил апсен и најверојатно сега ќе го депортираат назад во Индија – објасни Настески во телефонскиот разговор за Плусинфо.

Иако видеото од инцидентот го обиколи регионот и многумина го нарекоа херој, Настески тврди дека не направил ништо посебно. На роднините од Скопје и од Белград, како и на сестра му која со своето семејство живее во Германија и дента кога се случил настанот славела роденден на синот, им кажал само дека е добар и дека „нема ништо вредно за раскажување“.

За себе ни раскажа дека е роден во Скопје, во 1976 година, од мајка Србинка и татко Македонец.

– Секогаш сум се чувствувал и како Србин и како Македонец, но кога пцујам секогаш пцујам на јазикот на мајка ми – се смее Настески и додава:

– Оние кои се со една националност не можат да сфатат како некој може да се чувствува и вака и така, но јас гледам на тоа од смешната страна, па смешно ми е и тоа што после настанот некои Бугари велат и дека сум Бугарин.

По образование Настески е графички дизајнер, но во Англија работел како возач. Пред извесно време решил да се врати во родното Скопје, но љубовта го однела во Белград.

– Имам роднини и во Србија и во Македонија, но љубовта превагна, па наместо во родното Скопје, ќе живеам во Белград – вели Настески.

Тој сепак смета дека неговиот потег не бил херојски, туку обична инстинктивна реакција, но останатите патници на летот, јавноста и медиумите кои постојано му се јавуваат и се интересираат за него, имаат поинакво мислење – за нив тој останува херојот кој без размислување го совладал човекот кој заканувајќи се со бомба, предизвикал хаос во авионот.

The post „АКО ТРЕБА ДА НЀ ДИГНЕШ ВО ВОЗДУХ, ПРВО ЈАС ЌЕ ТЕ СРЕДАМ!“ Скопјанецот кој совлада терорист на летот Лондон-Глазгов, не се смета себеси за херој appeared first on plusinfo.mk.

Скопјанецот Зоран Настески кој живее во Англија го соборил на земја патникот кој на летот на „Изиџет“ од Лондон Лутон до Глазгов се заканувал дека има бомба и извикувал „Смрт за Америка, смрт за Трамп“ и „Алаху акбар“. Настески го држел заканувачот на подот до слетувањето на авионот.

Настевски го објави видеото на својот јутјуб канал. 

„Вчера утрото (27 јули) заминав на одмор во Глазгов, и десетина минути пред да слета авинот, покрај мене помина човек кој во рацете држеше кафе и телефон. Прво се исплашив дека ќе ме попари со жешко кафе, па се тргнав настрана. Потоа, почна да вика дека има бомба и дека ќе го собори авионот за да докаже дека политиката на Трамп е погрешна. Патниците се исплашија, особено децата кои почнаа да врескаат, а се исплаши и екипажот. Јасно ми беше дека лажно се заканува и сакав да ги заштитам патниците. Станав, го соборив на земја, му го зедов телефонот, и му ги држев рацете сѐ до слетувањето. Потоа, ми помогна уште еден патник, Англичанец, кој го држеше заедно со мене“, рекол Настески во телефонски разговор за порталот Сакам да кажам.

По слетувањето на аеродромот во Глазгов, 41-годишниот патник кој се заканувал бил уапсен. Настески, за порталот, рекол дека по татко е Македонец, а по мајка Србин.

„СЕДИ ДОЛУ, ПИ*КА ТИ МАТЕРИНА“! Балканец совладал терорист за време на лет до Глазгов

The post 🎥 МАКЕДОНЕЦОТ ЗОРАН НАСТЕСКИ ГО СОБОРИЛ ТЕРОРИСТОТ ШТО СЕ ЗАКАНУВАЛ ВО АВИОН „Јасно ми беше дека лажно се заканува“ appeared first on plusinfo.mk.