И залудно чекам оставка од некој од надлежните, на пример од директорот на Управата за извршување санкции, како чин на морална одговорност. Иако директорот не е виновен, зашто се знае кој во оваа држава решава за Кичевскиот и воопшто, за тоа кој ќе биде зад решетки а кој на слобода…

Да потсетам. Милевски е Ташнаревиќ во аферата „Рекет“. Тој ја носи торбата „Луј Витон“ со еврата што Бојан Јовановски, заедно со поранешната специјална јавна обвинителка Катица Јанева, ги изрекетираа од бизнисменот Орце Камчев.

Се сеќавате на таа снимка? Да не сте ја заборавиле?

Боки е во затвор. Таму закачи и корона.

И Катица е во затвор.

Орце е во притвор. Затоа што мора да му се одмаздат што ја обелодени аферата „Рекет“. И што ги пријави и ги сними рекетарите.

Се сеќавате, нели, на заканата на одмаздникот: „Море мамето мамино ќе му го ебам!“

Само Кичевскиот е на слобода. Поточно, откако се спогоди со обвинителот, казната затвор ја издржува во отвореното одделение во затворот во Струга. Очевидци велат дека казната ја „издржува“ во охридските локали.

И онака, попатно, тера џип, развезува српски ликови и во саботата учествува во жестока сообраќајка на Стража. Еден мртов и неколку повредени. На Кичевскиот, нормално, влакно на главата не му фали.

И не смее да му фали.

Зошто? Затоа што само тој знае каде завршија парите што ги изнесе од куќата на Орце Камчев во торбата „Луј Витон“.

Додуша, од три пати, би можел и јас да погодам каде се парите. Но, ај да си седам мадро…

Медиумите прашуваат што барале на местото на сообраќајката на Стража припадници на Агенцијата за национална безбедност. Ех, што барале… Мекици можеби?

Не верувам дека директорот Виктор Димовски ги испратил да напишат службена белешка дека постоела опасност Кичевскиот да се даде во бегство. Типот добил отсуство од затвор само 30 дена. Што е недоволно за да се подготви за бегство. Кој знае само колку „Луј Витон“ чанти треба да се спакуваат… Можеле да му дадат 60 дена, на пример, тоа би било хумано. Освен тоа, Охрид и Струга се на одалеченост од 2.000 километри од границата со Албанија и на 3.000 километри од границата со Грција. Џип „мерцедес“ не е погодно возило за бегство. „Фиат пунто“, на пример, е нешто друго. И најважно, Кичевскиот вози внимателно, не повеќе од 70 километри на час и почитува сообраќајни знаци и сигнализација.

Мислам, апсолутно не е реално да се помисли дека човекот би бегал. Не бре. На врапците им е јасно дека „разузнавачите“ на Виктор Димовски излегле „на терен“ да ги покријат трагите што морало да се покријат (ако морало), да му се најдат на на пуленот на власта и да го земат во заштита, ако треба.

А и зошто да бега Кичевскиот? Човекот е Ташнаревиќ по вокација, со богато си-ви, со конекции високо во државниот врв, со лајсанс-ту-кил. Никој ништо не му може, појак е од судбината.

Самите слушнавме дека тој е човекот кој го организирал и рекетот врз Миодраг Давидовиќ Дака, во случајот ШИК „Јелак“, каде на контроверзниот српски бизнисмен му џапнал 300.000 евра, а не му дал ништо за возврат. Еј, Дака е тоа, не е некој наш вчера испилен локален ебиветар. Таква манга да закрпиш…

Сами слушнавме како на опозиционерот Христијан Мицкоски овој истиов Кичевски му ги нуди своите услуги, како способен извршител на теренот. Одлично политичко позиционирање. Инвестира човекот во животот и после Заев.

И уште нешто знаеме за овој лик. Велат дека тој е најголемиот од сите наши нелегални сниматели на разговорите со своите собеседници. Сем Пекимпо што ја снима македонската дива орда. Наводно, ги снимал речиси сите свои средби. Дел од тие снимки се даваат и се продаваат на пазарот, служат за манипулации и за закани. Поголемиот дел се чуваат по клауди. Ќе се емитуваат по потреба.

Страшно е што вакви ликови ја тресат македонската политика. А ја тресат!

Погледнете ги изјавите на Зоран Заев и на Бојан Маричиќ за сообраќајката на Стража. Туѓ срам да те изеде!

Го прашавме директорот на Управата за извршување санкции… Ни кажа дека бил на отсуство за лекување… Не знаеме од што бил болен… Не знаеме зошто патрувал кон Скопје… Не знаеме зошто мочал во Зајас…

Камо бе другарот Заев да се провикне – море, мамичето мамино ќе му го ебам!

Е з’ш не мојт! Ете затоа. Ако дојде до мамичето онадење, попрво Кичевскиот ќе заврши работа.

Луѓе мои, после сѐ што се случуваше за време на режимот на Груевски, не верував дека еден ден ќе бидеме сведоци на вакви срамотилаци. За жал, денес сфаќаме дека мафијата во време на поранешниот режим е детска градинка во однос на мафијава што денес владее во Македонија.

А Кичевскиот, внимавајте, баш и не е некој голем штик во таа мафијашка групировка. Можете ли да си замислите што прават и каква државна заштита уживаат големите мафијашки босови?

Ете затоа, драги мои, нема правда, ама има мир. Мирно е ко на гробишта во Бутел…

ПС. А бре стоки низаедни, покажете малку чоештина, дај пуштете ја Гордана Јанкуловска од затвор дома некој ден, да си го види детето. Јас гарантирам дека од Идризово до дома нема никого да убие или да повреди по патот, ќе вози со брзина од 30 километри на час.

The post Не бре, на Кичевскиот, Ташнаревиќ од аферата „Рекет“, не смее влакно да му фали! appeared first on plusinfo.mk.

Обвинителството и судот не го прифатија неговото барање за изземање. Тој на Обвинителството и на одбраната јасно им посочи дека „Меѓународен сојуз“ и ,,Рекет“ се едно исто, односно дека се работи за ист случај кој започнал пред предметот „Империја“ и чија жртва директно и сè уште е тој.

Тој вели дека прв пат есента 2018 му биле понудени два конкретни проекта од Лазар Јанев, синот на Катица Јанева, и од Зоран Милески – Кичеец, a тој ги одбил поради нивна економска неоправданост и рече дека воопшто немал контакт со „Меѓународен сојуз“.

За „Меѓународен сојуз“ имал само некои информации кои ги добил единствено од телефонски разговори со новинарката Оливера Трајковска. Доколку Обвинителството сака потврда дека тоа е сè што тој имал како сознание за „Меѓународен сојуз“, Камчев понудил да се искористи примената на ПИ мерки од неговиот телефон, кој бил следен.

Јордан Камчев рече дека никогаш немал контакт, ниту ги познава Фросина Ременски и Јасна Мандиќ Ерцеговиќ кои се обвинети во „Меѓународен сојуз“.

Обвинетиот Бојан Јовановски – Боки 13 на бизнисменот му нудел да инвестира во старечки домови на локации во Струга и во Охрид и дека за таа инвестиција ќе добие 20 отсто субвенции од државата. Сведокот Камчев посочи дека на сметка на 1ТВ платил 300.000 евра за два договора. Овие средства Камчев рече дека ги уплатил како рекет.

– Зоран Милески и Бојан Јовановски дојдоа кај мене, и на маса ми ги дадоа локациите. Ми кажаа дека Карпош е блокирано, Битола е зафатено. Сето ова чинеше 4 милиони евра – рече Камчев на денешното сведочење во Кривичниот суд за „Меѓународен сојуз“.

Тој додаде дека од тимот на Бојан му биле презентирани копи пејст бројки кои ги дал на неговите директори да ги анализираат.

– Се фалеше со слики со премиерот пред мене. Велеше дека 20 отсто ќе бидат субвенционирани од труд и социјала. Тоа е Бојан, твојот неуспешен договор и откако те откачив, почна твојата приказна. Вака беше изманипулирана власта на која Бојан се повикуваше цело време. Ти понудив 150.000 евра од „Систина“, 150.000 евра преку „Орка“. Тие се платени на твојата телевизија. Јасна Мандиќ може да потврди сѐ. Сето тоа без субвенција и без државата укажуваше на загуба – рече Камчев.

Во однос на улогата на обвинетата Јасна Мандиќ, сведокот Камчев истакна дека таа била само пошта и дека не учествувале во разговорите меѓу него и обвинетиот Јовановски.

– Во овој случај фалат и лицата Зоран Милески, Катица Јанева и нејзиниот син. Првиот нивен предлог не го прифатив бидејќи мислев дека нема економска логика. Вториот предлог за старечки дом исто го одбив. Ми беше кажано дека од ова има интерес синот на Катица Јанева и од тогаш почна тортурата врз мене – рече сведокот Камчев, кој додаде дека во документот било потпишувано лицето Лазар Јанев.

Тој на денешното судење искажа и неколку пикантерии.

– За „Меѓународен сојуз“ знам само дека бил над англиската амбасада и се вртеа бизнисмени со торби. Бојан успеа да направи цел град мајмуни – рече Камчев.

На прашање на Јовановски, со што се занимава, бизнисменот одговори:

– Започнав со сточарство, потоа и со земјоделие. Отворив и фабрики за текстил, за чевли. Направив и центри за дијализа и какви сѐ не здравствени одделенија. Еве, да не бидам и вулгарен, учествував во преработка на арско ѓубриво, односно измет за да се дојде до енергија. Преработував гомна – кажа Камчев.

Тој додаде и дека на Јовановски неколку пати му биле извршувани контролни прегледи за зараснувањето на раната во неговиот дом од медицински лица од „Систина“.

The post Бизнисменот Камчев на телевизијата на Боки 13 ѝ уплатил рекет од 300.000 евра appeared first on plusinfo.mk.

Според најголемата опозициска партија, Заев денес за случајот со дијализите, односно случајот „Рекет 2“, „дава насоки да се забошоти случајот во кој негови блиски соработници, ако не и самиот тој, се директно  фатени во милионски криминал“.

„Токму поврзано со овој случај во јавноста се појавија видео материјали во кои  поранешниот директор на ФЗОМ зема снопчиња пари и ги става во својата чанта. И наместо затвор истиот тој беше награден со апанажа. Во истиот случај со Дијамед длабоко се заглавени и министерот Филипче и омилениот криминалец на власта, Зоран Милевски кои изнудувале пари од оваа фирма. Сега Заев без срам јавно дава насоки на правосудните органи како да го водат случајот, и како да ги амнестираат неговите соработници од криминалот во кој се фатени на дело“, вели ВМРО-ДПМНЕ.

Ова, според партијата, само покажува дека со Заев нема да има ниту правда, ниту правна држава.

„Аболицираниот криминалец се обидува да ги ослободи од одговорност и неговите соработници криминалци. На ова се сведуваат неговите судски реформи во кои амнестија ќе добиваат криминалците од екипата на Заев, а политички прогон ќе има за сите политички неистомисленици. Со Заев нема да има ниту проверка на потекло на имот на функционери од неговата власт, затоа што ако тоа се спроведе милионски евра имот ќе се утврди дека е стекнат со организиран криминал и корупција. Ова само покажува дека Македонија со Заев ќе тоне во криминал и корупција. Ќе стане темен вилает во кој народот ќе осиромашува, а кертелот на Заев ќе се богати“, вели опозициската ВМРО-ДПМНЕ.

The post ВМРО-ДПМНЕ: Заев без срам му дава насоки на Луј Витон судството за криминалот во „Рекет 2“ appeared first on plusinfo.mk.