Крајот на учебната година донесе поинаков, возбудлив и едукативен ден за децата поддржани од СОС Детско село. Во рамките на долгогодишното стратешко партнерство, финансиското друштво Flex Credit организираше специјален едукативен час на отворено во Зоолошката градина во Скопје.

Училницата под отворено небо беше поставена токму до новата, неодамна изградена куќичка за желки – проект кој Flex Credit самостојно го финансираше и изгради за потребите на Зоолошката градина. Децата со љубопитност го следеа часот, учејќи за важноста на грижата кон животните и природата.

Но, покрај незаборавното искуство и стекнатите знаења, оваа соработка донесе и конкретна, практична поддршка за секојдневието на децата. Преку својата CSR платформа „Повеќе од финансии – поддршка за заедницата“, Flex Credit обезбеди дополнителни парични средства наменети за СОС Детско село. Оваа донација е наменета за купување и замена на нова бела техника и мали кујнски апарати за куќите во кои се згрижени децата, со цел да им се обезбедат уште подобри, помодерни и покомфорни услови за живот.

– За нас, грижата за заедницата секогаш има две димензии – емотивна и практична. Преку денешниот едукативен час во Скопје ЗОО сакавме да им подариме на децата убави спомени и знаења со кои ќе го започнат летниот распуст. Но, истовремено, свесни сме дека вистинскиот дом значи сигурност и функционалност. Токму затоа, со обезбедувањето средства за нова бела техника во куќите на СОС Детско село, сакавме директно да го олесниме и разубавиме нивното секојдневие. Секоја инвестиција во овие деца е инвестиција во посреќна иднина – изјави Тина Трпковска, маркетинг директор на Flex Credit.

Оваа активност уште еднаш покажа дека партнерството помеѓу Flex Credit и СОС Детско село одамна ги надмина рамките на корпоративна соработка – тоа е жива приказна која континуирано создава реална вредност и придонесува таму каде што е најпотребно.

The post ЕДУКАТИВЕН ЧАС ВО ЗООЛОШКА И ПОДДРШКА ЗА ЗГРИЖУВАЧКИТЕ КУЌИ Нова активност на Flex Credit и СОС Детско село appeared first on plusinfo.mk.

Во согласност со својата општествено одговорна платформа „Повеќе од финансии – поддршка за заедницата“, Flex Credit продолжува да инвестира во проекти кои создаваат трајна вредност за локалната заедница.

По повод големиот јубилеј „100 години Скопје ЗОО“, Зоолошката градина во Скопје доби ново катче – комплетно изградена и опремена куќичка за желки (Centrochelys sulcata). Проектот е реализиран на директно барање на Зоолошката градина, а финансиран и самостојно изграден од финансиското друштво Flex Credit, како дел од нивната долгорочна стратегија за општествена одговорност.

Оваа нова инфраструктура, е дизајнирана да ги подобри условите за живот на животните, но и да стане составен дел од редовната едукативна и забавна програма на Скопје ЗОО. Со ова, посетителите – особено најмладите, ќе добијат можност одблиску да се запознаат со желките во средина која ги исполнува сите современи стандарди.

За менаџментот на Flex Credit, овој проект е потврда дека вистинската грижа за заедницата се мери преку видливи и одржливи дела.

– Овој значаен јубилеј на Зоолошката градина нè потсетува колку е важно да ги негуваме и поддржуваме местата што имаат непроценлива вредност за сите генерации скопјани. Токму затоа, со огромно задоволство одговоривме на барањето на ЗОО Скопје. Нашата цел со оваа инвестиција е директно да придонесеме во подобрување на условите, да го поддржиме развојот на институцијата и да создадеме поубаво и поедукативно искуство за сите посетители – особено за децата. Затоа што за Flex Credit, општествената одговорност никогаш не била само зборови, туку конкретна акција на терен – изјави Тина Трпковска, маркетинг директор на Flex Credit.

Новата куќичка за желки од денеска е официјално отворена за сите посетители, збогатувајќи ја содржината на Скопје ЗОО во годината на нејзиниот голем јубилеј.

The post ЖЕЛКИТЕ ВО ЗООЛОШКА ДОБИЈА НОВ ДОМ Flex Credit донираше опремена куќичка за желки appeared first on plusinfo.mk.

Во присуство на гости, експерти и соработници, градоначалникот на Скопје, Орце Ѓорѓиевски, го најави почетокот на одбележувањето на значајниот јубилеј 100 години од постоењето на Зоолошката градина Скопје.

Тој истакна дека овој јубилеј има посебно значење како симбол на долгогодишна традиција исполнета со спомени, детска радост и трајни вредности, но и како обврска за создавање подобри услови и посигурна иднина за установата.

На настанот присуствуваше и експертот Марјо Худемакер, чија поддршка, заедно со новата енергија и стручност, ќе придонесе кон процесот на модернизација и унапредување на стандардите, со цел повторно приклучување кон Европска асоцијација на зоолошки градини и аквариуми, соопшти Градот.

Најавени се инвестиции, модернизација и нови содржини, со цел Зоолошката градина да стане простор за едукација и подигање на јавната свест. Ќе се спроведат и кампањи за поддршка и грижа за животните, преку кои граѓаните ќе можат активно да се вклучат.

– Да го уредиме просторот што долги години беше запуштен. Во Зоолошката градина денеска е гостин господинот Марјо, кој е претставник на ЕАЗА, асоцијацијата од која за жал пред неколку години нѐ изфрлија, и ќе дадеме сѐ од себе за да ги подобриме впечатоците таму, но и да видат дека ги менуваме работите за да се вратиме повторно во ЕАЗА со што би се вратила можноста да обезбедиме нови видови животни – рече Ѓеорѓиевски.

На овие цели тој работи заедно со директорката на Зоолошката градина.

– Од денес започнува и кампања со која практично ќе дадеме можност и јавните личности да се вклучат во делот на згрижување на одредено животно за да може секој индивидуално да се грижи за некое животно овде, обезбедувајќи храна, просторни услови итн. – додаде градоначалникот.

Директорката на Скопје ЗОО Катерина Костова најави дека најнапред ќе се реновираат најстарите живеалишта на животните, ќе бидат донесени нови животни, а еден од новитетите ќе биде посетителите да можат во одредени денови и часови да гледаат како зоонегователите ги хранат животните и така ќе може да се научи што јадат животните и како се чуваат. Таа апелираше до посетителите да не ги хранат животните со чипс и со смоки бидејќи тие не се гладни, и секогаш имаат храна.

– Ова е само почеток. Сто години сме издржале многу и наредните сто години се надевам дека ќе биде уште поубаво и дека ќе имаме многу, многу поубава едукација за разлика од сега, понатаму нашите деца да доаѓаат постојано, но и возрасните. Ќе почнеме со реновирање на старите живеалишта и ќе направиме нови Хабитат-европски живеалишта, по стандардите на ЕАЗА и, се надевам, ќе донесеме многу нови животни што досега ги немало кај нас – изјави Костова.

Во зоолошката градина има живеалишта стари и по 50 години.

Костова кажа дека здравствената состојба на животните е добра и оти зоолошката исто така има постари животни.

– Во минатото за жал имавме и птичји грип и ТБЦ. Животните се тестирани, значи дека се негативни на ТБЦ. Можеме да бидеме мирни во врска со тоа. Имаме постара колекција на животни, за жал во изминатиов период немавме нови животни да донесеме за да ја подмладиме таа колекција на животни и затоа работиме на тоа да имаме нови и разни полови на животни, да не се само едни исти. На пример, само машка група или само женска група, туку да бидат мешани за да можеме да ги размножувани – рече таа.

Бројот на животни сега во Зоолошката е 500, и има околу сто видови.

Зоолошката градина Скопје е формирана во 1926 година, од страна на тричлена комисија со која раководел д-р Станко Караман, биолог и доктор по зоологија од Сараево. Истата 1926 година е предложено денешното место за локација на Зоолошката градина. Во тоа време опфаќала 4 (четири) хектари површина, а градината располагала со скромен број на животни, кои претежно биле добиени како подарок од други зоолошки градини и поединци од Балканот и Европа. Во исто време бил отворен и Природно-научниот музеј, а тие извесен период функционирале како една организација, биле изградени и Градскиот парк и Ботаничката градина. Со ова Скопје станал првиот град во тогашните Балкански простори, кои имале ваква природно-научна и зоо структура.

The post 100 ГОДИНИ ЗООЛОШКА ГРАДИНА ВО СКОПЈЕ Најавени се инвестиции, модернизација и нови содржини appeared first on plusinfo.mk.

Скопската зоолошка градина објави убава вест за принова. Еден од паровите џуџести мармозети доби близначиња.

„Џуџестите мармозети се сметаат за најмали мајмуни на светот и тежат најмногу до 100 грама. Токму затоа и двете бебиња се уште се тешко видливи со голо око. Тие постојано се не на грбот на својата мајка, а за нив се грижи целата група“, објавија од Скопје ЗОО на Фејсбук.

The post 📷 РЕТКА ПРИНОВА ВО СКОПСКАТА ЗООЛОШКА ГРАДИНА Џуџестите мармозети се сметаат за најмали мајмуни во светот appeared first on plusinfo.mk.

Во срцето на скопската Зоолошка градина, токму на Божиќ, се роди јагне кое веднаш стана миленик на сите. Неговото појавување го претвори обичниот ден во симбол на нов почеток и животна радост.

Од ЗОО Скопје информираа дека малечкото е здраво и полно со енергија, додека мајката нежно се грижи за него. Вработените велат дека ваквите „празнични бебиња“ секогаш носат дополнителна убавина во овој период од годината.

Во следните денови, посетителите ќе можат да го видат новиот член на семејството на ЗОО.

The post 📽️ ПРАЗНИЧНА МАГИЈА ВО ЗООЛОШКАТА ВО СКОПЈЕ Се роди мало јагне, „божиќно бебе“ appeared first on plusinfo.mk.

Зоолошка градина Скопје објави дека со голема пожртвуваност на вработените и со долги непроспиени ноќи успеале да ги спојат гибоните Делфина и Мики, кои сега учат да живеат заедно и самостојно.

„Двата гибона беа отфрлени од мајката како бебиња и чувани со 24/7 нега, љубов и посветеност. Во консултација со експерти од светски организации за заштита на гибоните, како и Зоолошката градина од Перт, Австралија, која имаа слична ситуација, а со максимални напори и труд од вработените во скопската зоолошка градина – гибончињата Делфина и Мики сега се во заедничко живеалиште и одлично се прифатија еден со друг. За овој значаен подвиг на целиот наш тим добивме пофалба од сите експерти со кои соработуваме“ – напишаа Зоолошка градина Скопје на својот профил на Фејсбук.

Особено признание во постот и се одава на вработената по име Зера.

Од Зоолошката истакнуваат дека нивниот зимски дом е привремен, до заедничко навикнување, а вработените веќе го подготвуваат новиот современ простор со отворен дел за нив.

The post 🎥 БЕА ОТФРЛЕНИ ОД МАЈКАТА, МОЖЕА ДА УГИНАТ, А ПОГЛЕДНЕТЕ ГИ СЕГА! Скопската зоолошка со многу пожртвуваност успеа да подигне две младенчиња гибони appeared first on plusinfo.mk.

„Денес во ЗОО Скопје славиме голем јубилеј, 30 години од раѓањето на нашето сакано шимпанзо Коко, еден од најпрепознатливите и најомилените жители во нашата зоолошка“.

Вака велат од ЗОО Скопје споделувајќи видео од мајмунката Коко.

„По тој повод, неговата зоонегувателка Александра му подготви специјална роденденска торта направена исклучиво од здрава, природна храна, како и кутии со изненадувања што Коко со љубопитност и радост ги отвораше заедно со другарот Изи Хартијата во која беа завиткани подароците е од целулоза и е целосно безбедна и нештетна за шимпанзата. Како еден од најинтелигентните примати, Коко секојдневно нè потсетува колку се блиски луѓето и шимпанзата и колку е важно да се грижиме за нив, да ги почитуваме и да ги штитиме. Му посакуваме уште многу здрави, активни и среќни години исполнети со многу грижа и љубов“.

The post 📽️ ШИМПАНЗОТО КОКО ПРОСЛАВИ 30. РОДЕНДЕН ВО ЗОО СКОПЈЕ Доби здрава торта од својата негувателка appeared first on plusinfo.mk.

Зоолошката градина во Скопје ќе прерасне во современ центар за едукација, заштита на природата и хуман третман на животните, најави градоначалникот на Скопје, Орце Ѓорѓиевски, при презентацијата на новата Стратегија за развој на установата.

Според Ѓорѓиевски, стратегијата носи јасна визија за напуштање на концептот на зоолошка градина како исклучиво забавна содржина и нејзино претворање во „училница на отворено“, каде децата и посетителите ќе стекнуваат знаење, еколошка свест и емпатија кон животната средина.

– Нашата цел е Зоолошката градина да стане место каде децата нема да заминуваат само со фотографии, туку и со разбирање за природата и одговорноста кон животните. Едукацијата е најсилната алатка за долгорочна заштита на биодиверзитетот – истакна Ѓорѓиевски.

Клучен сегмент од стратегијата е трансформацијата на Зоолошката градина во функционално прифатилиште за заштитени и ранливи видови, со професионална ветеринарна грижа и безбедни услови за животните кои не можат самостојно да опстанат во дивината.

Во документот е предвидено и целосно усогласување со строгите стандарди на Европската асоцијација на зоолошки градини и аквариуми (EAZA), со цел полноправно членство, што подразбира високи стандарди за благосостојба на животните, активна научна и конзервациска улога, како и највисоки безбедносни и еколошки норми.

Дополнително, стратегијата опфаќа и целосна модернизација на Зоолошката градина, подобрување на условите за животните, посетителите и вработените, воведување енергетски ефикасни решенија, зголемена безбедност и нови содржини, меѓу кои и центар за хипотерапија за деца со посебни потреби.

– Ова е амбициозна, но неопходна визија. Затоа ги повикувам институциите, граѓанскиот сектор и бизнис-заедницата активно да се вклучат во нејзината реализација – порача Ѓорѓиевски.

The post ЗОО СКОПЈЕ ДОЖИВУВА ЦЕЛОСНА ТРАНСФОРМАЦИЈА Ѓорѓиевски најавува едукативен и хуман центар appeared first on plusinfo.mk.