На отворањето на Зимските олимписки игри во Италија, украинската делегација се појави пред очите на светот со својата табла, предводена од личност која ретко би ја очекувале – Русинка. Станува збор за Анастасија Кучерова, која самата изразила желба да ја носи оваа улога.

– Кога чекориш покрај тие луѓе, сфаќаш дека имаат човечко право да чувствуваат омраза кон секој Русин. Но, сметам дека е важно, макар и со најмал гест, да им покажеш дека не сите размислуваме исто – изјави Кучерова.

Таа нагласи дека не се согласува со политиката на рускиот претседател Владимир Путин и дека не го поддржува она што се случува во Украина.

Руската архитектка своето учество го опиша како „мал и личен гест на поддршка кон држава растргната од војна“.

– Украинците не можат да избегаат од мрачните мисли, ниту да се преправаат дека војната не постои. За нив тоа е секојдневна реалност. Се обидуваат да продолжат да се венчаат, да сакаат, да спортуваат, да настапуваат на Олимпијада, но сето тоа се случува во сенката на нешто ужасно – додаде таа.

Интересен детал е дека ниту Меѓународниот олимписки комитет, ниту локалниот организациски одбор не знаеле за нејзиниот идентитет до објавувањето на медиумите. Овој гест на Кучерова, на некој начин, го потсетува светот дека спортот и хуманоста понекогаш можат да стојат над политиката и конфликтите.

The post 📽️ ГЕСТ НА ХУМАНОСТ ВО ВРЕМЕ НА ВОЈНА Русинка ја носеше таблата на украинските спортисти на Олимпијадата appeared first on plusinfo.mk.

Карин Килдоу, сестрата на американската алпска скијачка Линдзи Вон, вчера изјави дека атлетичарката напредува во закрепнувањето од повредата на Олимписките игри во 2026 година и се подготвува да се врати дома во Соединетите Американски Држави.

Вон сподели видео на кое се гледа како пријателки ѝ ја мијат косата, почнува да јаде храна и се подготвува да ја напушти болницата.

Таа напиша на Фејсбук дека е благодарна на пријателите, семејството, тимот и на медицинскиот персонал што ја враќаат во нормала.

„Полека се враќам во живот, на основните и на малите нешта во животот кои многу значат“, напиша Вон.

Таа ѝ се заблагодари на сестра ѝ за снименото видео.

Вод денеска објави дека е невероајтно чувството повторно да биде дома иако не може да гази на нозете.

На 8 февруари, Вон тешко се повреди за време на спустот на Зимските олимписки игри 2026 во Италија. Четириесет и едногодишната скијачка скрши нога и беше подложена на четири операции.

– Беше тешко време, многу време во болница. Но, таа е супер силна, иако имаше многу операции. Работиме на тоа да ја вратиме во САД – изјави вчера Килдоу за „TMZ Sports“.

Сестрата на Вон одговори на критиките кон скијачката за тоа што пристигнала на Олимписките игри со повреда – Американката претрпе скинат преден вкрстен лигамент (ACL) на Светското првенство една недела пред Игрите.

– Секој ќе има свое мислење, но таа е силна и го направи тоа – додаде Килдоу.

Вон е олимписка шампионка во спуст во 2010 година, двократна светска шампионка и четирикратна шампионка на Светското првенство.

The post 🎥 ЛИНДЗИ ВОН ЈА ИЗМИ КОСАТА И ПОЧНА ДА ЈАДЕ Скијачката се врати во Америка appeared first on plusinfo.mk.

Италијанската алпска скијачка Федерика Брињоне победи во денешниот велеслалом на Зимските олимписки игри 2026.

Триесет и петгодишната Брињоне ги заврши двете трки за 2 минути и 13,5 секунди. Ова е втор златен медал за Брињоне на Олимписките игри во Милано/Кортина, откако претходно беше најбрза во супер-велеслаломската трка.

Швеѓанката Сара Хектор и Норвежанката Теа Луиз Стјернесунд се најдоа на делба на втората позиција со време 2 минути и 14,12 секунди.

Македонката Јана Атанасовска не успеа да ја заврши првата трка.

The post ФЕДЕРИКА БРИЊОНЕ СО ВТОРО ЗЛАТО ОД ЗОИ Победи и во велеслалом appeared first on plusinfo.mk.

Македонската скијачка Јана Атанасовска не успеа да ја заврши првата трка во велеслалом на Зимските олимписки игри 2026.

Атанасовска на патеката на денешната трка мина само триесетина секунди и не успеа да се избори за втората трка.

Во првото мерење таа имаше заостанување од 1,45 секунди зад водечката скијачка, на втората контролна станица негативата изнесуваше 2,97, а потоа се откажа.

Следен настап на Атанасовска на Олимпијадата во Италија ќе биде слаломот закажан за 18 февруари.

Водечка по првата велеслаломска трка е Италијанката Федерика Брињоне.

Почетокот на втората трка е закажан за 13:30 часот.

The post ЈАНА АТАНАСОВСКА ЗАОСТАНУВАШЕ ПА СЕ ОТКАЖА Следен настап ѝ е на слалом на 18 февруари appeared first on plusinfo.mk.

Американската алпска скијачка Линдзи Вон објави дека уште една операција по нејзиниот пад за време на натпреварот по спуст на Зимските олимписки игри во Италија во 2026 година била успешна.

„Операцијата помина добро! За среќа, конечно ќе можам да се вратам во САД! Штом се вратам, ќе ви кажам повеќе за мојата повреда… Но, додека седам овде во мојот кревет и размислувам, сакам да споделам неколку мисли… Читам многу пораки во кои се вели дека она што ми се случи ве растажува. Ве молам, немојте да бидете тажни. Со отворено срце ги прифаќам сочувството, љубовта и поддршката, но не тагата или сожалувањето. Наместо тоа, се надевам дека тоа ќе ви даде сила да продолжите да се борите, бидејќи тоа е она што го правам и ќе продолжам да го правам. Секогаш. Кога ќе се сетам на мојот пад, стоев на стартната линија, свесна за можните последици. Знаев што правам. Решив да го преземам ризикот. Секој алпски скијач на стартната линија го презема истиот ризик. Бидејќи дури и да сте најсилната личност на светот, планината секогаш ги држи картите. Бев спремна да преземам ризици, да се борам и да се жртвувам за нешто за кое знаев дека сум апсолутно способна. Секогаш сакам да ризикувам и да паднам откако ќе дадам сè од себе отколку да не го искористам мојот потенцијал и да се каам. Никогаш не сакам да ја преминам целната линија и да прашам: „Што ако?“ И искрено, во тој момент бев физички посилна отколку што сум била често во минатото.
Затоа, ве молам немојте да бидете тажни. Ова патување вредеше за падот. Кога ги затворам очите навечер, не жалам за ништо, а мојата љубов кон скијањето останува. Сè уште се радувам на моментот кога повторно ќе можам да застанам на врвот на планината. И ќе бидам таму“, напиша 41-годишната скијачка на социјалните мрежи.

Вон ја скрши лева нога по падот во спустот и беше евакуирана од патеката со хеликоптер, што го прекина натпреварувањето 25 минути. Скијачката подоцна беше подложена на неколку операции.

Атлетичарката се натпреваруваше на Олимписките игри во 2026 година со скинати вкрстени лигаменти.

The post ОВА ПАТУВАЊЕ ВРЕДЕШЕ ЗА ПАДОТ Линдзи Вон не прифаќа тага и сожалување appeared first on plusinfo.mk.

Скијачката легенда Линдзи Вон доживеа тежок пад за време на спуст трката на Зимски олимписки игри 2026, а првичните информации од лекарите звучат загрижувачки – во моментов најважно е да ѝ се спаси ногата.

41-годишната Американка по несреќата итно била пренесена со хеликоптер во болница, каде што започнала детална проценка на повредите.

Францускиот специјалист за повреди на колено, д-р Бертран Сонери-Коте, објасни дека станува збор за исклучително комплексна повреда, какви што најчесто се гледаат при тешки сообраќајни несреќи.

– Ќе минат неколку месеци пред да може нормално да оди. Нејзината прва цел е да ја задржи ногата и повторно да може да стои. Во овој момент темата за врвно скијање и враќање на патеките не треба ни да се отвора – изјави лекарот.

Тој предупреди дека ваквите повреди можат да остават последици до крајот на животот, а во најтешките случаи исходот може да биде и ампутација.

Вон низ кариерата повеќепати се соочуваше со сериозни повреди, особено на лигаментите на коленото. И покрај тоа, секогаш се враќаше на патеките.

И овојпат таа не се предава. Според нејзините зборови, претходната повреда на лигаментите не била причина за падот во Милано–Кортина, ниту пак влијаела на тежината на сегашната повреда.

Сепак, пред неа сега стои најголемиот предизвик, не борбата за медал, туку борбата за сопственото здравје.

The post БОРБА ЗА НОГАТА НА ЛИНДЗИ ВОН Лекарите предупредуваат на сериозна опасност appeared first on plusinfo.mk.

Олимпиското село во Предацо остана без еден селектор. Финска експресно го врати дома својот тренер во скијачки скокови поради прекршување на тимските правила.

Финскиот олимписки комитет соопшти дека Словенецот Игор Медвед е разрешен од ангажманот на Зимските олимписки игри 2026 поради консумирање алкохол. 44-годишниот тренер веќе го напуштил олимпиското село и се извинил.

– Медвед денеска се врати дома, а прашањето е поврзано со консумирање алкохол. Прекршувањето на правилата на нашиот тим го сфаќаме сериозно и веднаш реагиравме – изјави шефот на Финскиот олимписки комитет, Јане Ханинен.

Финската скијачка асоцијација најави дека случајот ќе добие целосна разрешница по завршувањето на ЗОИ 2026. Од таму посочија дека станува збор за однесување кое ги прекршило правилата и вредностите на тимот.

– Направив грешка. Многу ми е жал. Сакам да му се извинам на целиот тим на Финска, на спортистите и навивачите – рече Медвед.

Тој додаде дека нема дополнително да го коментира случајот.

Медвед ја презеде финската репрезентација на почетокот од минатата сезона. Претходно ја водел словенечката Б-репрезентација во скијачки скокови. Финска сега ќе мора брзо да реагира во пресрет на продолжението на натпреварувањата во Милано и во Кортина.

The post ОД ТРЕНИНГ ПО „ОЛИМПИСКА ЧАШКА“ ДО АВИОН Финска го врати дома селекторот Медвед appeared first on plusinfo.mk.

Со свечена и спектакуларна церемонија на легендарниот стадион „Сан Сиро“ во Милано, официјално беа отворени Зимските олимписки игри 2026, а меѓу над 2.800 спортисти од 93 земји, свое достоинствено место зазеде и македонската олимписка делегација.

Македонија на овие Олимписки игри е претставена со четворица спортисти – алпските скијачи Јана Атанасовска и Виктор Петков, како и нордицјците Ставре Јада и Ана Цветановска, кои продефилираа со македонското знаме на свеченото отворање од повеќе локации, меѓу кои Кортина и Ливињо.

Честа да го носат државното знаме на официјалната церемонија им припадна на Јана Атанасовска и Ставре Јада, симболично означувајќи ново поглавје за македонскиот зимски спорт на најголемата светска сцена.

Атанасовска, најмладата македонска натпреварувачка и рекордерка во алпско скијање, ќе настапи во дисциплините слалом и велеслалом. Виктор Петков, исто така, ќе ги брани македонските бои во алпските дисциплини слалом и велеслалом.

Најискусниот член на делегацијата, Ставре Јада, за кого ова е трето учество на Зимски олимписки игри, ќе се натпреварува во нордиските дисциплини спринт и 10 километри со интервал старт. Ана Цветановска, по настапот на Олимпијадата во Пекинг, повторно ќе ја претставува Македонија во истите нордиски дисциплини.

Зимските олимписки игри 2026 ќе траат нешто повеќе од две недели, а за првпат на зимска олимпијада ќе дебитираат и Бенин, Гвинеја-Бисао и Обединетите Арапски Емирати.

Свеченото отворање беше збогатено со музички настапи – италијанската пејачка Лаура Паузини ја изведе националната химна на Италија, додека ѕвезда на вечерта беше светски познатата Мараја Кери, која настапи пред публиката на „Сан Сиро“.

The post 📽️ МАКЕДОНСКОТО ЗНАМЕ СЕ ВЕЕ НА ЗОИ Четворица спортисти ја претставуваат Македонија на Олимпијадата appeared first on plusinfo.mk.

Со церемонии што ќе се одржат на четири локации, во Милано, Кортина д’Ампецо, Предацо и во Ливињо, вечерва во Италија официјално ќе бидат отворени 25. Зимски олимписки игри (ЗОИ) Милано – Кортина 2026.

На ЗОИ 2026 ќе настапат околу 2.900 спортисти од над 90 земји, а четиричлениот македонски олимписки тим го сочинуваат скијачите Јана Атанасовска и Виктор Петков, како и нордијците Ставре Јада и Ана Цветановска.

Главната церемонија на свеченото отворање ќе почне вечерва во 20 часот на величествениот стадион „Џузепе Меаца“ во Милано. Паралелни церемонии ќе се одржат и во Кортина, каде македонски знаменосец ќе биде Атанасовска, а на церемонијата во Предацо македонското знаме ќе го носи Јада.

Македонскиот олимписки тим во Италија е составен од најдобрите спортисти во своите дисциплини. Најмладата македонска натпреварувачка и рекордерка во алпско скијање, 19-годишната Јана Атанасовска ќе се натпреварува во слалом и велеслалом, а во овие две дисциплини во машката конкуренција ќе настапи и 26-годишниот Петков.

Најискусниот во македонскиот состав, 27-годишниот Јада, кому ЗОИ 2026 ќе му бидат трет олимписки настап, ќе се натпреварува во нордиските трки спринт и 10 км интервал старт, во кои во женска конкуренција ќе се појави и Ана Цветановска (25), на нејзината втора Зимска Олимпијада по Игрите во Пекинг 2022.

Распоредот за настап на македонските нордијци е на 10, 12 и 13 февруари, додека алпските дисциплини ќе се одржат на 14, 15 и 18 февруари.

Натпреварите во хокеј, уметничко лизгање и трките во лизгање ќе се одржуваат во Милано, додека Кортина д‘ Ампецо ќе биде домаќин на натпреварувањата во алпско скијање во женска конкуренција, санкање, боб, скелетон и карлинг.

Трките во биатлон ќе се одржат во Антхолц, а натпреварите во скијачки скокови, нордиска комбинација и крос – кантри скијање во Вал ди Фиеме.

Во Ливињо на олимписката програма ќе бидат натпреварувањата во сноубординг и скијање слободен стил, додека Бормио ќе биде домаќин на трките во алпско скијање во машка конкуренција, како и новата олимписката дисциплина – скијачко планинарење.

Зимските олимписки игри 2026 ќе завршат на 22 февруари со свечена церемонија во античката арена во Верона.

Македонската делегација е предводена од Цветанка Макаровски.

The post ПОЧНУВААТ ЗИМСКИТЕ ОЛИМПИСКИ ИГРИ Ќе се натпреваруваат околу 2.900 спортисти, меѓу кои и четворица Македонци appeared first on plusinfo.mk.

Македонија ќе испише нова страница во својата олимписка историја на Зимските олимписки игри Кортина – Милано 2026, каде што првпат ќе настапи со четворица спортисти, и тоа сите со исполнета олимписка норма.

Македонскиот олимписки комитет денеска им посака среќа и успешни настапи на нашите скијачи, кои во Италија ќе ја претставуваат државата во нордиското и алпското скијање. Тимот ќе настапи со нова официјална зимска опрема од брендот „JOMA“, специјално изработена за настапи во екстремни зимски услови.

Претседателот на МОК, Даниел Димевски, изрази особено задоволство што македонската репрезентација за првпат ќе брои четворица олимпијци.

„Досега не се случило четири македонски натпреварувачи, и тоа сите со исполнета норма, да настапат на Зимски олимписки игри. Македонскиот олимписки комитет ги обезбеди сите потребни услови и комплетна зимска опрема. Имам чувство дека можеме да оствариме добар резултат и да се претставиме во најдобро светло“, истакна Димевски.

Оптимизмот го делат и самите спортисти, кои најавуваат максимална борба и силни настапи на патеките во Италија.

Македонските бои на ЗОИ 2026 ќе ги бранат:

Ана Цветановска, во нордиско трчање – спринт и интервал старт на 10 километри

Ставре Јада, исто така во нордиско трчање – спринт и интервал старт на 10 километри

Јана Атанасовска, во алпско скијање – слалом и велеслалом

Виктор Петков, во алпско скијање – велеслалом.

Настапите на македонските нордиски скијачи се закажани за 10, 12 и 13 февруари, додека Атанасовска и Лазарески ќе ги гледаме на патеките на 14, 15 и 18 февруари.

Ставре Јада е најискусен од нашите претставници, за него ова ќе биде трета Олимпијада по Пјонг Чанг во 2018 и Пекинг во 2022 година и ќе настапи во крос-кантри нордиската дисциплина.

– Сакам да изразам благодарност до МОК и мојата матична федерација, скијачката за тоа што веруваат во моите можности. За мене ова ќе биде трета Олимпијада во низа, вложивме многу за да дојдеме до овој трет настап. На оваа Олмпијада одам со цел да постигнам најдобар резултат кој еден нордиец го постигнал за нашата држава. Се надевам на крајот ќе ја претставам, Македонија во најдобро светло и ќе бидам рамо до рамо со најдобрите – рече Јада.

Ана Цветановска дебитираше во Пекинг, па за неа ова ќе биде втора Олимпијада. Таа беше нашата единствена претставничка на Светското првенство во Трондхејм во нордиско трчање и ја потврди формата со 5-то место на силниот Балкански куп.

– Чест ми е што присуствувам на овој настан и што ќе сум дел од олимпискиот тим. Долгорочноста во овој спорт и интегритетот на нашата работа ќе се обидеме да ги нагласиме на овие Олимписки игри и да се претставиме во најдобро светло – изјави Цветановска.

Младата Јана Атанасовска го држи рекордот за најдобар остварен резултат во историја на македонското алпско скијање во женска категорија со освоени 30,56 ФИС точки.

– За мене ова е голем успех. Настапот на Олимписките игри не е само остварување на сонот на едно младо девојче, туку и голем чекор во мојата кариера. Одам таму максимално подготвена и верувам ќе ја пренесам формата од тренинзите на патката – вели Јана.

Четвриот наш натпреварувач е Виктор Петков, кој последен влезе во ова одбрано друштво.

– Се надевам дека ќе ја претставам Македонија во најдобро светло, ќе го дадам својот максимум. Норматта ја исполнивме и сега останува да дадеме е од себе во Кортина – рече Петков.

Зимските олимписки игри Кортина – Милано 2026 ќе се одржат во периодот од 6 до 22 февруари, а македонскиот тим во Италија оди со историски состав и големи очекувања.

The post ИСТОРИЈА ЗА МАКЕДОНИЈА НА ЗОИ Првпат четворица наши спортисти на Олимпијада appeared first on plusinfo.mk.