Со повик за масовна излезеност на вториот круг од локалните избори што ќе се одржи задутре Движењето ЗНАМ – за наша Македонија ја заокружи својата изборна кампања што завршува вечерва на полноќ.

– Во недела, на 2 ноември,Ве повикувам сите членови, симпатизери и поддржувачи на Движењето ЗНАМ: излезете масовно и покажете ја вашата енергија, довербата и вербата во нашата визија. Да гласаме за број 2, за Максим Димитриевски во Куманово, број 2 за Мирослав Лабудовиќ во Центар и за број 9 за Орце Ѓорѓиевски за Град Скопје и за сите кандидати на нашите владини партнери каде што нашата заедничка поддршка носи промена. Ве повикувам сите граѓани, без разлика на политичката, етничката или верската припадност: да излеземе заедно и да гласаме за визија, за работа и за систем.
Да гласаме за иднина во која младите остануваат, семејствата живеат достоинствено, а државата функционира како дом за сите – повика генералниот секретар на ЗНАМ, Горан Минчев.

Тој искажа задоволство од резултатите што Движењето ЗНАМ ги постигна во првиот круг а кои, вели, дефинитивно ја потврдија стабилизацијата на гласачкото тели и станаа вистински показател дека политиките што ги водат се во вистинска насока. Се заблагодари и на коалициските партнери во власта – ВМРО-ДПМНЕ И Вреди.

– Граѓаните го препознаа нашиот концепт на чесна, директна и народна политика, која наидува на сè поголема поддршка низ целата држава. Посебна благодарност упатувам и до пријателите од ВМРО-ДПМНЕ, кои ја препознаа нашата искреност и визија, и застанаа рамо до рамо со нас. Ви благодарам за политичката зрелост и за поддршката во оваа заедничка борба за достоинствена, силна и обединета држава. Исто така, искрена благодарност до коалицијата Вреди, за поддршката и вербата дека само преку заедништво можеме да градиме држава во која има место за сите – рече генералниот секретар на ЗНАМ.

Но, потенцираше Горан Минчев, највредното од оваа кампања се средбите очи в очи со граѓаните.

– Отворените врати, искрените насмевки и топлото добредојде што нè пречека и што секојдневно го чувствувавме беше нашата најголема мотивација да истраеме и да покажеме што значи да се работи за народот и за државата – порача Минчев.

Тој упати посебна благодарност до активистите на Движењето ЗНАМ за несебичната пожртвуванос, поддршка и доверба во текот на сите 5 недели од кампањата.

The post ЗА ДИМИТРИЕВСКИ ВО КУМАНОВО, ЗА ЛАБУДОВИЌ ВО ЦЕНТАР, ЗА ЃОРЃИЕВСКИ ВО СКОПЈЕ Движењето ЗНАМ повика во недела масовно да се гласа appeared first on plusinfo.mk.