Речиси 9,5 милиони евра европски средства се изгубени поради неправилности во реализацијата на проектот „Рехабилитација и проширување на канализационата мрежа во Општина Кичево“, соопшти Управата за финансиска полиција.

Поради случајот, до Основното јавно обвинителство во Скопје е поднесена кривична пријава против странски државјанин со иницијали С.Г.О.Б., во својство на сопственик и управител на правно лице, како и против самото правно лице.

Според Финансиската полиција, постојат основи на сомнение за сторено кривично дело „Злоупотреба на постапката за јавен повик, доделување договор за јавна набавка или јавно-приватно партнерство“.

Истрагата покажала дека пријавениот бил должен да обезбеди важечка банкарска гаранција за проектот што се реализирал во рамки на ИПА II програмата на Европската Унија.

Според наводите на Финансиската полиција, тој не ја открил околноста дека азербејџанската банка „Муганбанк“, која ја издала гаранцијата, влегла во стечај, со што гаранцијата повеќе не била валидна.

Истовремено, како што се наведува во пријавата, биле ангажирани подизведувачи без претходно одобрение од Министерството за финансии и надзорниот орган, спротивно на договорните обврски.

Поради утврдените неправилности, договорот бил раскинат. Од Финансиската полиција велат дека со ваквите постапки била предизвикана штета на Буџетот на државата од 127,4 милиони денари.

Дополнително, Македонија останала без 9.474.132 евра од ИПА-фондовите на Европската Унија. Тоа значи дека средствата што биле предвидени преку европската програма сега ќе треба да се обезбедуваат од домашни извори.

Случајот е доставен до Обвинителството, кое треба да утврди дали ќе поведе понатамошна постапка против пријавените.

The post ГО КРИЕЛ СТЕЧАЈОТ НА СТРАНСКАТА БАНКА, ПРОЕКТОТ СЕ РАСПАДНАЛ Државата остана без 9,5 милиони евра од ИПА фодновите appeared first on plusinfo.mk.

Одбраната на Стефан Богоев ја оцени како неочекувана одлуката на скопскиот Основен кривичен да му определи 30-дневен притвор во рамки на истрагата што ја води Обвинителството за гонење организиран криминал и корупција за сомнежи за злоупотреби во постапки за јавни набавки и коруптивни дејствија.

По распитот пред судија на претходна постапка, адвокатката на Богоев, Сања Алексиќ, изјави дека станува збор за предмет од финансиска природа и дека, според одбраната, присуството на осомничените во постапката можело да биде обезбедено и со поблаги мерки.

– Неочекувано, искрено, таква одлука. Особено што станува збор за предмет кој е од финансиска природа, не е насилен криминал. Како што сте запознаени, не само што понудивме ние гаранција, туку и другите бранители за другите осомничени имаат понудено гаранција, со која мислам дека во комбинација со другите мерки на претпазливост можеше да се обезбеди присуството на осомничените – изјави адвокатката.

Одбраната најави дека ќе поднесе жалба на решението во законскиот рок. Алексиќ за медиумите изјави дека одбраната не добила увид во доказите на кои се повикува Обвинителството.

– На одбраната, не ѝ беа презентирани никакви докази во насока на постоење основ на сомневање. Само ни беше соопштено дека докази, според Обвинителството, постојат – изјави бранителката на Богоев.

Обвинителката Искра Хаџи-Василева претходно соопшти дека Обвинителството побарало определување притвор поради опасност од бегство и можност за влијание врз истрагата, која се наоѓа во рана фаза. Судот го прифатил предлогот и определил мерка притвор за Богоев и уште тројца осомничени. Од кривичен информираа дека судија на претходна постапка, постапувајќи по предлог на ОЈО ГОКК, донел решенија со кои се прифаќа барањето за притвор против четирите осомничени лица – С. Б., Д. Г., А. С. и С.М.

„Предлогот за определување мерки притвор против С. Б., Д. Г., А. С. и С. М. се прифаќа и на сите им се определува мерка притвор во траење од 30 дена. Мерката е определена заради постоење на основите од член 165 став 1 точки 1 и 2 од Законот за кривична постапка“, соопшти Судот. Против решенијата странките имаат право на жалба пред Кривичниот совет.

Според Обвинителството, постои основано сомнение дека во периодот од јули 2023 до март 2024 година осомничените ја злоупотребиле постапката за доделување договори за јавна набавка за надворешно одржување на хигиена на гранични премини и царински терминали. Со фаворизирање на одреден економски оператор и ограничување на конкуренцијата, според обвинителството, му овозможиле на правниот субјект да стекне противправна имотна корист во износ од 18.479.692 денари. Осомничените се товарат за кривичните дела злоупотреба на постапката за јавен повик, доделување договор за јавна набавка или јавно-приватно партнерство, примање награда за противзаконито влијание и давање награда за противзаконито влијание.

The post СУДОТ НЕ ПРИФАТИЛ ГАРАНЦИИ ПОНУДЕНИ ОД ОДБРАНАТА НА СТЕФАН БОГОЕВ Неговата адвокатка оцени дека притворот е неочекувана мерка appeared first on plusinfo.mk.

Со еден ваков паметен систем, државата знае каде е жртвата во истиот момент, кои се најблиските полициски службеници што може да се упатат кон жртвата, каде е најбрзата здравствена услуга којашто може да биде дадена, каде е најбрзиот социјален одговор од страна на експерти коjшто може да биде даден и така натаму, изјави министерот за внатрешни работи Панче Тошковски за можноста за воведување паметен систем за жртви од семејно насилство.

Во однос на обвинувањата на СДСМ, кои тврдеа дека со ваквата идеја МВР планира да инсталира шпионски софтвер, Тошковски одговара дека опозицијата има „сулуда имагинација“.

-Ако жртвите на насилство се охрабрат да побараат помош, прашање е како државата најсоодветно да одговори – рече Тошковскиз а идејата за воведување дигитална алатка, преку која, при повик, полицијата ќе може да го преземе аудио и видеосигналот од телефонот од којшто се јавува жртвата.

Таков паметен систем, додава тој, делумно функционира и сега, оти се снима разговорот при вртење на единствениот број за итни случаи 112.

-Една од идеите коишто ги видов практично на терен во Америка беше и еден таков паметен систем којшто делумно го имаме и сега. Односно и сега кога ќе се јавите на 112, ве известуваат „почитувани, разговорот се снима“ и навистина се снима и тоа утре-другиден се користи како доказ во постапка. Е сега, освен можноста да се сними разговорот на 112, со алатки коишто се лесно достапни до безбедносните органи и до, да речам државата, од аспект на ставање во функција на еден попаметен систем, да може да се снима и видеозаписот којшто би можеле да го направиме со секој еден мобилен телефон – рече министерот.

На прашањето дали тоа не е влегување во домот, Тошковски рече дека ако жртвата е загрозена, ако жртвата е во момент на нужна потреба од страна на институциите, правото на живот е посилно од правото на приватност.

-Јас сметам лично, на крајот на денот, правото е и тоа – да утврдите поголеми права согласно нивното општествено значење во рамки на едно здраво нормално општество – додаде тој.

Тој повтори дека откако жртвата ќе даде согласност, институцијата (МВР) ќе ја вклучи камерата.

-Кога говориме, особено за право на живот, не можеш да го компарираш со ниедно друго право. Правото на живот не можеме, пак ќе повторам, да го компарираме со било кое друго право. Така што можноста со еден ваков паметен систем државата да знае каде е жртвата во истиот момент, кои се најблиските полициски службеници што може да се упатат кон жртвата, каде е најбрзата здравствена услуга којашто може да биде дадена, каде е најбрзиот социјален одговор од страна на експерти којшто може да биде даден и така натаму. Да говориме за еден паметен систем којшто, зошто да не, би ги вклучил невладините организации, во делот на одговорот и притоа сето тоа да биде во еден електронски систем којшто ќе треба да биде максимално респонзивен, максимално брзо респонзивен, а притоа секој еден доказ којшто го обезбедуваме веднаш да влезе во рамки на систем кој – не само МВР, и судот, и обвинителството ќе го имаат на дофат на рака – нагласи Тошковски.

Министерот потенцира дека идејата сè уште се разработува, како и дека допрва би следувале меѓуинституционална координација и евентуална јавна расправа.

Во однос на обвинувањата на СДСМ, од каде што тврдеа дека со ваквата идеја МВР планира да инсталира шпионски софтвер, Тошковски одговара дека опозицијата има „сулуда имагинација“.

– Да не употребувам некои несоодветни зборови, опозицијава што глуми дека е опозиција измислува тези коишто не заслужуваат ни одговор од аспект на пукање на балонот во насока на сеење на страв, сега, ќе се слушало, ќе се злоупотребувало и така натаму… Сакам да потенцирам дека она коешто го говореше опозицијата, ај што не е вистина, туку е една сулуда имагинација за нешто коешто они сакале или не можеле или не знам што друго, имале план или немале план да го реализираат во рамки на нивните научнофантастични филмови – нагласи министерот.

The post НАЛУДНИЧАВО Е ДА СЕ МИСЛИ ДЕКА ПОЛИЦИЈАТА ЌЕ ШПИОНИРА ЖРТВИ НА СЕМЕЈНО НАСИЛСТВО Паметниот систем треба да овозможи полицијата побрзо да стигне до жртвата appeared first on plusinfo.mk.

Убава, популарна и успешна, но и длабоко несреќна поради траумата што ја прогонувала поголемиот дел од нејзиниот живот – тоа е животната приказна на познатата актерка Тери Хачер, која му ја откри својата темна тајна на светот дури кога наполни 41 година. Актерката ја раскажа приказната за своето грдо детство во интервју за американското списание Vanity Fair.

Имено, на настанот на Обединетите нации по повод Меѓународниот ден за елиминација на насилството врз жените, таа зборуваше за ужасното искуство со сексуална злоупотреба во детството. Актерката раскажа како нејзиниот вујко ја злоставувал кога имала седум години.

– Бев убедена дека е тоа моја вина и се обвинував себеси за она што ми се случи, па затоа не кажав никому за тоа и сè чував за себе – рече Тери.

Иако молчела за целиот инцидент, нејзината мајка забележала дека се однесува чудно во близина на нејзиниот вујко, па затоа нејзините мајчински инстинкти ја натерале да ја држи ќерка си подалеку од него, иако малата Тери ѝ кажала дека сè е во ред и да не му се лути, поради страв од последиците.

– Сите молчевме, ни беше полесно. Мислев, дали сум луда, дали измислувам? Полесно е жртвите да веруваат дека ова е плод на нивната имагинација отколку да се соочат со вистината – заклучи Тери, објаснувајќи дека злоупотребата се случувала постојано и продолжила сè додека не наполнила осум или девет години.

Иако мислела дека силувањето ќе биде тајна што ќе ја однесе во гроб, дознала дека нејзиниот чичко, Ричард Хејс Стоун, бил обвинет за злоупотреба на две други девојчиња, од кои едното извршило самоубиство како тинејџерка.

Скандалот околу силувањето девојчиња избувна кога Сара Ван Климпут оставила порака пред самоубиството на која пишувало: „Мора да се прашувате зошто нормална тинејџерка би го направила тоа. Па, прашајте го Дик зошто?“

Прекарот „Дик“ ја одвел полицијата до Стоун, кој бил близок пријател на семејството на жртвата. Тогаш актерката конечно проговорила за своето минато.

Ричард Хејс Стоун починал во затвор додека ја отслужувал казната. Тој бил осуден на 14 години затвор, а починал откако отслужил само шест години.

The post ТЕРИ ХАЧЕР БИЛА ЗЛОУПОТРЕБУВАНА КАКО ДЕТЕ Актерката собра сила да проговори за морничавите детали appeared first on plusinfo.mk.

Вработен во Центарот за социјални работи во Тетово и уште едно лице од тетовско се соочуваат со кривични пријави откако, според полицијата, незаконски извлекле над 155 илјади денари од системот за социјална пензија.

СВР Тетово информира дека станува збор за 42-годишен вработен како оператор за внес на податоци и 31-годишен жител на селото Пршовце.

Според истрагата, службеникот во текот на 2022 година, во два наврати, префрлал пари кои биле наменети за друго лице, но ги насочувал кон сметка на второпријавениот. За да го направи тоа, незаконски поврзал социјален број со неговата трансакциска сметка.

На овој начин биле исплатени вкупно 155.500 денари, иако второто лице немало право на тие средства.

Полицијата наведува дека 31-годишникот свесно ги дал своите лични податоци и банкарска сметка за да се реализира исплатата и да се стекне со пари на кои немал законско право.

Против двајцата е поднесена кривична пријава за злоупотреба на службена положба и помагање, а случајот е предаден на понатамошна постапка.

The post СКАНДАЛ ВО ЦЕНТАР ЗА СОЦИЈАЛНИ РАБОТИ Службеник „пренасочил“ 155.000 денари appeared first on plusinfo.mk.

Полицијата поднесе кривична пријава против поранешниот градоначалник на Општина Сарај, Блерим Беџети, како и против уште едно службено лице вработено во Град Скопје, поради сомневање за злоупотреба на службената положба и овластување.

Од МВР информираат дека пријавата е поднесена преку Единицата за корупција при Секторот за криминалистички истраги, до Основното јавно обвинителство во Скопје.

– Единицата за корупција при Секторот за криминалистички истраги во Одделот за сузбивање на организиран и сериозен криминал до ОЈО Скопје поднесе кривична пријава против З.Д. (61) од Скопје, поради постоење на основано сомнение за сторено кривично дело „злоупотреба на службена положба и овластување“ по чл.353 ст.3 во врска со ст.1 од КЗ и Б.Б. (49) од Скопје, поради основано сомневање за сторено кривично дело „злоупотреба на службената положба и овластување“ предвидено и казниво по чл.353 ст.3 во врска со ст.1 во врска со чл.45 од КЗ. Во два одвоени случаи постојат основи на сомнение дека пријавените, искористувајќи службени овластувања, овозможиле противправна имотна корист за правен субјект и постапувале надвор од своите надлежности – наведуваат од полицијата.

Според истрагата, прво пријавениот З.Д. како овластено службено лице, постапувајќи по овластување за потпишување акти, во 2021 година донел решение за режим на сообраќај за правен субјект од подрачјето на Сарај, иако надлежноста за тоа не била во Град Скопје, туку во Општина Сарај.

Со тоа, како што се наведува, било овозможено правниот субјект да добие право за вршење технички преглед и да се стекне со имотна корист од над 3,2 милиони денари.

Во вториот случај, тогашниот градоначалник на Сарај, Б.Б., донел одлуки поврзани со режимот на сообраќај за истиот правен субјект, иако, според полицијата, не бил извршен соодветен надзор над документацијата и урбанистичките услови.

– Постои сомнение дека не биле почитувани законските процедури и дека одлуките се донесени без усогласеност со урбанистичките планови – велат од МВР.

Од таму додаваат дека со ваквите постапки на правниот субјект му била овозможена имотна корист од над 42 милиони денари.

Истрагата продолжува, а по целосно документирање на случајот ќе следуваат дополнителни правни постапки.

The post КРИВИЧНА ЗА БЛЕРИМ БЕЏЕТИ Полицијата откри сомнежи за милионски бенефиции appeared first on plusinfo.mk.

Полицијата поднесе кривична пријава против поранешна директорка и раководителка на оддел во Клиничка болница „Д-р Трифун Пановски“ во Битола, поради сомнение за злоупотреба на службената положба.

Според информациите од СВР Битола, пријавени се Е.И. (53) и М.А.Н. (61), двете од Битола. Првата, како директор на болницата, а подоцна и медицински директор во Министерство за здравство, и втората, како раководител на Одделот за интерни болести, ги пречекориле своите овластувања со намера да прибават противправна имотна корист.

Според полицијата, во периодот од ноември 2023 до јуни 2024 година тие потпишувале листи за исплата на прекувремени часови на 12 лекари од Одделот за интерни болести, за извршени прегледи и визити на пациенти од Одделението за урологија и Одделението за физикална медицина и рехабилитација, иако тоа било спротивно на одлука на Управниот одбор.

Со ваквите постапки, како што наведуваат од полицијата, била овозможена неоснована исплата на надомест за прекувремена работа во вкупен износ од 494.933 денари, со што бил оштетен буџетот на државата.

The post НЕОСНОВАНИ ИСПЛАТИ ВО БИТОЛСКА БОЛНИЦА Кривична за поранешната директорка за штета од 500.000 денари appeared first on plusinfo.mk.

Директор на ученички дом во Крива Паланка заработил прекувремени часови додека бил на годишен одмор, поради што против него е поднесена кривична пријава.

Според информациите од полицијата, пријавениот Б.Т.(66), како директор на Општински ученички дом „Боро Менков“, во текот на 2024 година пријавил 63 часа работа подолга од полното работно време иако во тој период користел годишен одмор.

Со тоа, како што се наведува, се стекнал со противправна имотна корист од 23.945 денари, на штета на буџетот на установата.

Кривичната пријава ја поднела Надворешна канцеларија за криминалистички работи Крива Паланка, поради сомнение за злоупотреба на службената положба.

The post ДИРЕКТОР ЗАРАБОТУВАЛ ДОДЕКА БИЛ НА ОДМОР Кривична за лице од Крива Паланка кое наплатило прекувремени додека бил отсутен appeared first on plusinfo.mk.

Малиот баварски град Румансфелден е потресен од морничава приказна која со години останала незабележана. Во куќа покриена со бршлен и со испукана фасада, полицијата на почетокот на февруари го пронашла мумифицираното тело на жена родена во 1922 година.

Според истражителите, телото било пронајдено во подрумот и било во напредна фаза на распаѓање, што го отежнало утврдувањето на точниот датум и причината за смртта. Засега, обвинителството наведува дека нема индикации за насилна смрт.

Сомневањата се појавиле дури кога соседите, по долгото отсуство на сопственичката, почнале да се прашуваат дали таа повеќе е жива. Тогаш полицијата извршила проверка и ги потврдила најлошите претпоставки.

Но, случајот добива нова димензија, се истражува можноста ќерката на починатата, која има 82 години, да ја примала пензијата на мајка ѝ години по нејзината смрт. Според германскиот таблоид Билд, ќерката цело време живеела во куќата, но била повлечена и ретко комуницирала со соседите. Една сосетка изјавила дека повремено носела храна, но никогаш не ѝ било дозволено да влезе во куќата, намирниците биле оставани пред вратата.

Во меѓувреме, ќерката е сместена во специјализирана медицинска установа, додека баварските власти го третираат случајот како можна долгорочна злоупотреба на државните бенефиции. Доколку се потврди дека пензијата била примена без законска основа, станува збор за долгорочна финансиска измама со сериозни правни последици.

Иако нема докази за насилство, мистеријата околу точното време на смртта и како телото останало неоткриено со години продолжува да вознемирува во овој обично мирен град.

The post МУМИФИЦИРАНО ТЕЛО НА ЖЕНА ОТКРИЕНО ВО ГЕРМАНИЈА Ќерката примала пензија години по нејзината смрт appeared first on plusinfo.mk.

Демократскиот сојуз бара Собранието по скратена постапка да донесе измена на законите со кои ќе се забрани производство на канабис за медициски цели.

„Досега, од 2017 година надлежното Министерство за здравство, во соработка со други институции издало 61 лиценца на фирми кои можеле да произведуваат марихуана за медицински цели. Повеќе од јасно е дека контролата затаила, поради што се случија фингирани кражби, пресметки помеѓу наркомафијата, заплени на канабис од полицијата итн., но криминалниот бизнис продолжи, бидејќи наркомафијата во која беа вклучени и носители на највисоки државни функции од претходната власт се стекнаа со огромна финансиска моќ и политичко влијание“, соопшти партијата.

Демократски сојуз силно ја поддржува акцијата на МВР за заплена на канабисот и инсистира да постапува неселективно, се додава во соопштението.

„Јавно да бидат објавени сопствениците, формални и неформални, на фирмите кои произведуваат канабис, кој и кога ги издал лиценците за производство на канабис итн. Министерството за здравство во соработка со другите надлежни институции да објави колку количини на канабис се произведени, каде се тие количини (продадени, на залиха, украдени итн.) и колку профит е остварен. Запленетите 32 тона канабис (5 во Србија и 27 тони во Македонија), тоа е засега гребење по површината на овој наркобизнис, кој има тешки последици по здравјето на младите генерации, политичката стабилност, владеење на правото и меѓународниот углед на државата“, соопшти ДС.

Бараме да се прошири одговорноста и кон носителите на функции од надлежните министерства кои издавале лиценци и кои затаиле со контролата на спроведување на законите за да се спречат злоупотребите, се додава во соопштението.

„Одземените количини се премногу за Балканот, а не за медицинските потреби на Македонија. Очигледно е дека првобитната хумана цел е злоупотребена и затоа се потребни итни законски промени“, соопшти Демократскиот сојуз.

The post ДЕМОКРАТСКИ СОЈУЗ БАРА ЗАБРАНА НА ПРОИЗВОДСТВОТО НА КАНАБИС Првобитната хумана цел е злоупотребена appeared first on plusinfo.mk.