Претседател на ловечко друштво од Струмица е осомничен дека во период од две години присвоил над 1,3 милиони денари од сметката на здружението што го водел.

Станува збор за 41-годишниот Д.Р. од Струмица, против кого СВР Струмица поднесе кривична пријава до Основното јавно обвинителство, поради сомнение за кривично дело „проневера во службата“.

Според полицијата, осомничениот, како претседател на ловечкото друштво и овластен потписник на неговата трансакциска сметка, во текот на 2024 и 2025 година во повеќе наврати подигнувал поголеми парични износи. Наместо средствата да бидат искористени за потребите на друштвото, тој ги присвојувал за лична корист.

„Подигнатите пари не биле поткрепени со никаква документација, оправдување или сметководствено покритие“, информираат од полицијата.

Со ваквото постапување, како што наведуваат од СВР Струмица, Д.Р. за себе прибавил противправна имотна корист во вкупен износ од 1.326.787 денари, со што директно е оштетено ловечкото друштво.

Случајот е пријавен до надлежното обвинителство, кое треба да одлучи за понатамошниот тек на постапката.

The post ПАРИТЕ НА ЛОВЦИТЕ ЗАВРШИЛЕ ВО НЕГОВ ЏЕБ Претседател на ловечко друштво осомничен дека присвоил над 1,3 милиони денари appeared first on plusinfo.mk.

Полицијата во Гостивар поднесе кривична пријава против 64-годишниот А.С. од селото Ростуше, поради сомнение дека ја злоупотребил службената положба додека ја извршувал функцијата директор на основно училиште.

Според истрагата, во периодот од 2024 до 2025 година, пријавениот овозможил вработување на наставници кои не ги исполнувале законските услови за изведување настава. Станува збор за лица без завршени соодветни студии, кои предавале на ученици во основното училиште во Ростуше, како и на одделенски ученици во селата Велебрдо и Требиште.

Нестручниот кадар бил ангажиран спротивно на Законот за наставници и стручни соработници, со што, како што наведува полицијата, бил загрозен квалитетот на наставниот процес и правото на учениците на соодветно образование.

Неправилностите биле утврдени при инспекциски надзор извршен од Државниот просветен инспекторат на 19 септември 2025 година, по што случајот бил пријавен и до надлежните полициски служби.

По документирањето на настанот, против директорот е поднесена кривична пријава, а предметот ќе го разгледува надлежното обвинителство.

The post НАСТАВНИЦИ БЕЗ ДИПЛОМИ ИМ ПРЕДАВАЛЕ НА ДЕЦА Директор од Ростуше дозволил нестручни лица да држат настава appeared first on plusinfo.mk.

Директорката на Националната установа „Завод и музеј“ – Битола, М.С. (53), сама донела одлука да се унапреди и за себе да отвори повисоко работно место, информираат од полицијата. Притоа, таа го укинала претходното работно место „виш кустос“ и си создала ново „кустос советник“, позиција која е едно ниво повисоко.

Според СВР Битола, ваквата промена на Актот за систематизација била направена спротивно на Законот за вработени во јавен сектор и Законот за работни односи. Со тоа, пријавената, според истрагата, несовесно постапила во извршувањето на своите службени овластувања.

Полицијата ја товари за кривично дело „несовесно работење во службата“, а предметот е доставен до надлежното обвинителство за понатамошна постапка.

The post СИ ЈА УКИНАЛА СТАРАТА ФУНКЦИЈА И СИ ОТВОРИЛА НОВА Директорка од Битола сама си се унапредила, сега ќе одговара пред законот appeared first on plusinfo.mk.