Националниот парк „Шар Планина“ предупредува дека во моментов на планината владее висока опасност од лавини, особено на терени над 1.700 метри надморска височина, каде што снежната покривка е нестабилна и ризикот е сериозен.

Од паркот информираат дека опасноста е резултат на комбинација од временските услови во изминатите денови – температурни промени, силен ветер и нови снежни врнежи, кои заедно со стрмниот планински рељеф создаваат услови за ненадејно активирање на лавини.

Предупредувањето доаѓа откако беше пријавена лавина на подрачјето на паркот од операторот за слободно скијање со ратраци „Ескимо спорт“. По добиената дојава, екипи на Националниот парк излегоа на терен и извршија увид на локацијата. Претходно, операторот направил пребарување со лавински уреди, при што било утврдено дека нема затрупани лица, а досега не се пријавени исчезнати лица. За среќа, инцидентот поминал без човечки жртви.

Паралелно со увидот, била спроведена и експертска анализа на стабилноста на снежната покривка од стручен тим специјализиран за безбедност во планинскиот туризам. Според проценката, лавинската опасност е оценета како степен 4 – висок ризик, според европската скала за лавинска опасност, каде што 5 е највисоко, а 1 најниско ниво на ризик.

Од Националниот парк апелираат посетителите да бидат исклучително внимателни, да избегнуваат движење низ потенцијални лавински зони и да не се упатуваат во повисоките делови на планината без придружба на стручно обучени и искусни водичи. Посетителите се повикуваат и навремено да ја пријават својата посета преку официјалната веб-страница на паркот.

Стручните служби на Националниот парк „Шар Планина“, во соработка со туристичките оператори и лавинските експерти, најавуваат дека состојбата на теренот ќе се следи постојано, а јавноста ќе биде навремено информирана за сите промени.

Од паркот потсетуваат дека иако Шар Планина нуди спектакуларни зимски пејзажи, движењето во вакви услови бара високо ниво на одговорност и информираност, бидејќи лавините се појава која тешко се предвидува и може да има сериозни последици.

The post 📷 ВИСОКА ОПАСНОСТ ОД ЛАВИНИ НА ШАР ПЛАНИНА Апел до планинарите и скијачите да не се движат без водич appeared first on plusinfo.mk.

Трагичната серија лавини на Алпите продолжи и оваа недела, кога 13-годишно момче го загуби животот во австриското скијалиште Спортгаштајн, дел од регионот Бад Гаштајн, во покраината Салцбург.

Погибија на 13-годишно момче во Бад Гаштајн

Несреќата се случила во понеделникот околу пладне, кога момчето, кое било на зимување со семејството, скијало надвор од официјално обележаните патеки. Според првичните информации од локалните служби, лавината се активирала по поместување на нестабилен слој снег, при што детето било затрупано под голема снежна маса.

Спасувачките екипи, во кои учествувале планински спасувачи, хеликоптер и специјално обучени кучиња, пристигнале брзо на терен. И покрај интензивните обиди за реанимација кои траеле повеќе од 40 минути, лекарите можеле само да ја констатираат смртта.

Австриските власти соопштија дека станува збор за исклучително нестабилни снежни услови, со висок лавински ризик, кој бил официјално најавен уште утрото.

„Крвав викенд“ на француските Алпи

Само неколку дена претходно, француските Алпи беа погодени од вистински „крвав викенд”, во кој шест лица загинаа во одделни лавински инциденти, а повеќе други беа повредени.

Најтешката ситуација се разви на 10 и 11 јануари, во услови на обилни снежни врнежи, силен ветер и нагло натрупување нов снег врз нестабилна подлога.
Во Ла План, популарно скијалиште во департманот Савоја, 50-годишен скијач од Велика Британија бил затрупан од лавина додека скијал надвор од патеките.

По речиси еден час потрага, бил пронајден под повеќе од два метра снег, но веќе без знаци на живот. Спасувачите соопштија дека шансите за преживување во такви услови се минимални.

Во исто време, трагедија се случила и во Куршевел, еден од најпознатите француски зимски центри, каде лавина однела уште еден живот. Деталите за жртвата не беа објавени, но беше потврдено дека и овој инцидент се случил надвор од уредените патеки.

Жртви и во најпознати скијалишта

Во Валорсин, во регионот От-Савоја, 32-годишен маж бил зафатен од лавина и фрлен со голема сила во дрво. Иако бил брзо извлечен, повредите биле фатални.

Истовремено, две одделни лавини во Вал д’Изер и во Ареш-Бофор однеле уште три животи, со што бројот на загинати за само два дена достигна шест.

Покрај смртните случаи, лавини беа регистрирани и во Тињ и Орел, каде имаше повредени скијачи, а спасувачките служби мораа повеќепати да интервенираат во исклучително тешки услови.

Француските власти признаа дека ситуацијата била „екстремно опасна”, со лавински ризик оценет со четврто и петто ниво, што значи „висока” до „екстремна” опасност.

Секое скијање надвор од патеките е ризично

Експертите посочуваат дека заеднички именител во речиси сите овие случаи е скијањето надвор од означените патеки, каде снегот не е контролиран ниту стабилизиран. Во такви услови, дури и минимално оптоварување – еден скијач или мала група – може да биде доволно за активирање лавина.

Надлежните служби во Австрија и Франција апелираат туристите строго да ги почитуваат предупредувањата, да избегнуваат терени надвор од пистите во денови со висок ризик и да не ја потценуваат природата, без оглед на искуството или атрактивноста на теренот.

Серијата трагедии од последните денови повторно ја покажува суровата страна на Алпите – планини кои нудат спектакуларна убавина, но и смртоносна опасност кога условите се игнорираат.

The post ЛАВИНИ „ГОЛТААТ“ НЕВНИМАТЕЛНИ СКИЈАЧИ НА АЛПИТЕ Серија трагедии во Австрија и во Франција за само неколку дена appeared first on plusinfo.mk.

Најновата празнична честитка од Националниот парк Галичица, снимена вчера, прикажува стадо европски елени како се движи низ снежниот планински предел, создавајќи впечаток дека животните излегле на својствена празнична прошетка.

Видеото, споделено од паркот, овозможува ретка можност да се види сегмент од секојдневниот живот на овие диви животни, кои подолг период опстојуваат во репродуктивниот центар на Галичица. Центарот е изграден во 2018/2019 година со цел да се зачува и одржи европскиот елен, еден од највредните видови диви животни во регионот.

Во 2019 година, во центарот беа донесени 30 единки, од кои 24 женки и шест мажјаци, кои од тогаш успешно се размножуваат и ги зачувуваат природните популации на овој вид. Празничното видео е уште еден поттик за посетителите да ја посетат Галичица и да се запознаат со богатството на македонската флора и фауна.

 

View this post on Instagram

 

A post shared by Plusinfo.mk (@plusinfo.mk)

The post 📽️ ПРАЗНИЧНА ЧЕСТИТКА ОД ПРИРОДАТА Елени се прошетаа низ снегот на Галичица appeared first on plusinfo.mk.

Ски Центарот „Попова Шапка“ ги прави последните подготовки за отворање на ски-сезоната 2026, најавувајќи нова зима исполнета со снег, спорт и планинска забава. На официјалната фејсбук-страница на центарот беше објавено видео кое ги прикажува интензивните активности на терен, со порака дека сè е подготвено за пречек на љубителите на зимските спортови.

На видеото може да се видат ратраците како ги уредуваат и подготвуваат ски-патеките, додека Попова Шапка е целосно прекриена со снег. Вработените во ски-центарот ги тестираат патеките пред пристигнувањето на гостите, проверувајќи ја безбедноста и условите за скијање, а воедно упатуваат и повик до сите љубители на снегот да им се придружат на почетокот на сезоната.

„Ние сме подготвени! Ски-сезоната 2026 во Ски Центарот ‘Попова Шапка’ наскоро се отвора“, стои во објавата на центарот, придружена со импресивни кадри од заснежената планина.

Попова Шапка важи за едно од најпопуларните зимски одморалишта во Македонија, привлекувајќи домашни и странски туристи, професионални скијачи, но и рекреативци. Со најавеното отворање на сезоната, центарот повторно се подготвува да биде едно од главните места за зимски туризам, спорт и забава.

Точниот датум за официјалниот старт на ски-сезоната ќе биде дополнително соопштен, а од ски-центарот ги повикуваат посетителите редовно да ги следат нивните официјални канали за најнови информации за условите на патеките и содржините што ги нуди Попова Шапка оваа зима.

The post 📽️ НАСКОРО СКИЈАЊЕ НА ПОПОВА ШАПКА Снег има, патеките подготвени appeared first on plusinfo.mk.