Шокира фактот дека во 2025 имало 4.745 пријави за семејно насилство и шест случаи на убиство, а за два месеца во 2026 – веќе четири случаи на фемицид. Овие алармантни бројки се слика на општество во коешто е загрозено најосновното човеково право – правото на живот. Не цитирам статистика, туку нотирам пораз на институционалната превенција и навремената акција. Зад бројките се кријат животни приказни, семејни трагедии, неостварени соништа. Ова го нагласи претседателката Гордана Сиљановска Давкова, на пленарната седница во Собранието „Правата и можностите на жените – достигнувања и перспективи“, која секоја година се одржува по повод Меѓународниот ден на жената 8 Март.

– Страшно е секој 8 Март, да броиме нови жртви, да презентираме најнови статистики, да дебатираме за политики, да усвојуваме стратегии, посочувајќи ги истите проблеми, презентирајќи брутални статистики, предлагајќи претходно предложени, но непреземени мерки и активности. И овој 8 Март, непосредно по несфатливата смрт на Ивана и на Катја, тешко ми е да го доживеам како Ден на жената! Симболиката на празникот се изгуби во мракот на суровата, непоимлива и неприфатлива реалност – рече претседателката.

Таа посочи дека кучен момент е оној на пријавувањето и ако жената се соочи со човек којшто ѝ влева разбирање, поддршка, сигурност и надеж, таа ќе се охрабри да се избори за себе, ама ако биде пречекана од профил, за кој навредувањето и тепањето се дел од заедницата, ќе се посомнева во ефектите од преземениот чекор и ќе трпи. Затоа, посочи Сиљановска Давкова, обучените и сензибилизираните полицајци, социјални работници и судии се активни спасители или пасивни соучесници во делото.

– Зарем сè уште не сфативме и не научивме дека фемицидот не е ненадеен изблик на гнев, туку врв и крај на долг, мачен процес на психолошки притисок, манипулација, тортура, страв, неизвесност и малку желби и надеж. До кога post festum ќе ламентираме и ќе тагуваме, наместо навреме да спречуваме и соодветно да санкционираме и да се радуваме со потенцијалните, но спасени жртви? Што стана со уставната обврска за посебната грижа и заштита на семејството? – запраша Сиљановска Давкова.

Претседателката од собраниската говорница запраша како е можно институциите да се имуни на предупредувачките сигнали, зошто системот на социјална заштита, полицијата, обвинителството и судството не реагираат навреме и до кога ќе ги менуваме законите, наместо оние што не ги применуваат?

Таа нагласи дека не е доволно во Кривичниот законик да се предвиди кривично дело фемицид, кога толку често доаѓа до преквалификација, ако надлежните не постапуваат по службена должност, иако измените на Кривичниот законик тоа го овозможуваат, ако се преферира условната казна, наместо највисоката.

– Зошто честопати, владеењето на правото се трансформира во владеење на насилните мажи? Не е доволно да потпишете документ и да го ратификувате, славејќи го достигнувањето – рече Сиљановска Давкова.

Таа потсети дека со ратификацијата на Истанбулската конвенција државата презела обврска да воспостави сеопфатен и функционален систем на превенција, заштита и санкционирање, заснован на разбирањето дека насилството врз жените е поврзано со структурната нееднаквост.

– Не дозволувајте одбележувањето на 8 Март да се сведе на протоколарна форма којашто ќе го исцрпи своето значење во симболични гестови и пригодни зборови. Розите коишто денес ќе ја разубават просторијата, утре тивко ќе почнат да ја губат свежината, а вниманието коешто трае еден ден не е доволно. Жените не очекуваат привремена, празнична галантност, врзана за празничниот ден, туку трајна сигурност што произлегува од стабилен, функционален и правичен систем – нагласи Сиљановска Давкова.

The post ОВА Е ПОРАЗИТЕЛЕН 8 МАРТ Сиљановска Давкова критикуваше дека е недоволна заштитата на жените appeared first on plusinfo.mk.

На денешната собраниска седница се обрати пратеничката од редовите на ВМРО-ДПМНЕ, Емилија Ангелова која истакна дека измените во Кривичниот законик претставуваат суштински чекор за враќање на довербата на граѓаните за правна држава каде криминалот и корупцијата нема да бидат толерирани, туку ќе бидат соодветно санкционирани.

– Овој предлог-закон за изменување и дополнување на Кривичниот законик претставува неопходен и одговорен чекор кон враќање на правната сигурност, владеењето на правото и довербата на граѓаните во институциите. Со него државата јасно ја испраќа пораката дека корупцијата, злоупотребата на службената положба, организираниот криминал и насилството нема да бидат толерирани, ниту релативизирани преку законски празнини и непропорционално благи санкции – рече Ангелова.

Пратеничката посочи дека ќе се постигне подобра заштита на приватноста на граѓаните, безбедност во сообраќајот, посилна заштита на жените од семејно насилство како и јасна правна рамка за гонење на злоупотреби во јавните набавки.

– Со предложеното решение ќе се постигне враќање на превентивната и репресивната функција на казненото право особено кај делата злоупотреба на службена положба, организиран криминал и корупција. Јасна и ефикасна правна рамка за гонење на злоупотреби во јавните набавки, подобра заштита на приватноста и достоинството на граѓаните, посилна заштита на жената од насилство, семејно насилство со гонење по службена должност во согласност со Истанбулската конвенција, подигнување на безбедноста во сообраќајот преку поостри санкции. Се зголемува и јавната безбедност на патиштата – вели Ангелова.

Пратеничката Ангеловска се осврна на клучните поенти за жените истакнувајќи дека со овој предлог-закон жената е заштитена од дигитално насилство, од семејно насилство, а со тоа постигнување на реална заштита и сигурност на жената во државата.

– Посилна институционална заштита од насилство врз жените и семејно насилство со гонење по службена должност државата ја трга одговорноста од жртвата и јасно застанува на страната на жената. Заштита на приватноста и телесниот интегритет на жените, инкриминирање на злоупотребата на интимни снимки директно ги штити жените од уцени, дигитално насилство и јавно понижување. Европски стандарди, европска заштита за жените – законот директно ги имплементира европските и меѓународните обврски и ја позиционира како партнер во борбата за еднакви можности и човекови права – рече Ангелова.

Весна Ѓорѓиева, пратеничка од редовите на ВМРО-ДПМНЕ, обраќајќи се на седницата, рече дека „нашите граѓани ќе ја гледаат сигурноста кога ќе биде сигурен правниот систем во државата“.

Таа се осврна на членот 353 од предлог законот, со кој како што посочи, се враќа суштината на кривичното дело злоупотреба на службена положба.

– Се враќа суштината на злоупотреба на службена положба, пречекорување на овластувањата или неизвршување на службена положба. Со овој закон се распушта претходниот закон во 2023 година кој беше донесен од СДСМ и ДУИ, каде што беше разводенет, односно каде што казните беа намалени, дејствијата беа потешко докажливи, а роковите за застареност беа скратени – истакна Ѓорѓиева.

Според неа, законот не е наосочен против оние кои работат чесно, туку против корупцијата и злоупотребата на службената положба.

– Држава без кривичен закон е како држава без ‘рбет. А држава без рбет секој може да ја скрши. Почитувани граѓани, овој закон е порака до секој што мисли дека државата е приватен бизнис, овој закон е порака дека времето на неказнивост завршува и да, можеби на некому тоа не му одговора, но на народот тоа му одговара, и тоа го бара од нас.

The post ЖЕНИТЕ ДОБИВААТ ПОГОЛЕМА ЗАШТИТА ОД ДИГИТАЛНО И ОД СЕМЕЈНО НАСИЛСТВО Во измените на Кривичниот законик предвидени и поостри сообраќајни казни appeared first on plusinfo.mk.

Мексиканската претседателка Клаудија Шајнбаум повика сексуалното вознемирување да стане кривично дело на национално ниво, откако и самата стана жртва на таков инцидент. Настанот, кој беше снимен и споделен илјадници пати на социјалните мрежи, предизвика огромна реакција во јавноста и отвори сериозна дебата за безбедноста и почитта кон жените во Мексико.

На видеото се гледа како непознат маж, очигледно под дејство на алкохол, ѝ приоѓа на претседателката, се наведнува кон неа и ја допира со рацете, обидувајќи се да ја бакне. Шајнбаум, иако изненадена, останува прибрана – со вкочанета насмевка ги оттргнува неговите раце и му вели само: „Не грижи се“.

Следниот ден, таа поднесе официјална тужба. „Ако ова може да се случи на претседателката, што тогаш им се случува на младите жени во нашата земја?“, порача Шајнбаум, додавајќи дека чувствува морална обврска да реагира – не само за себе, туку во име на сите жени во Мексико.

Градоначалничката на Мексико Сити, Клара Бругада, потврди дека мажот е уапсен, нагласувајќи дека секое вознемирување на жена, особено на највисоката државна функција, е напад врз сите жени.

Во своето дневно обраќање до медиумите, претседателката повика државните власти низ Мексико да ги преиспитаат своите закони и постапки за да им овозможат на жените полесно и побезбедно да пријавуваат случаи на вознемирување.

– Сакаме секој Мексиканец да слушне гласно и јасно, личниот простор на жените не смее да се нарушува – истакна таа.

Шајнбаум откри дека и самата доживеала слични ситуации уште како дванаесетгодишно девојче додека патувала со јавен превоз до училиштето.

– Ова не е само моја приказна. Тоа е реалност за многу од нас – додаде претседателката.

И покрај инцидентот, Шајнбаум нема намера да го промени својот пристап кон народот. Позната по тоа што често се движи меѓу луѓето, сликајќи се и ракувајќи со нив, таа одби да ги зголеми мерките за безбедност.

Инцидентот се случил кога претседателката одлучила да пешачи од Националната палата до Министерството за образование, пат кој инаку би го поминала со автомобил за дваесетина минути.

Сега, овој несреќен настан стана симбол на поширока борба, за достоинство, за безбедност и за општество во кое ниту една жена, без разлика на нејзината положба, нема да мора да го преживее истото.

 

View this post on Instagram

 

A post shared by Plusinfo.mk (@plusinfo.mk)

The post 📽️ АКО ОВА МОЖЕ ДА МИ СЕ СЛУЧИ МЕНЕ… Претседателката на Мексико поднесе тужба против мажот што се обиде да ја бакне appeared first on plusinfo.mk.

Талибанците издадоа нова наредба со која се наложува затворање на сите нелегални салони за убавина што тајно работат низ Авганистан, пренесе „Гардијан“. Жените што ги водат имаат рок од еден месец да ги затворат, во спротивно ќе се соочат со апсење.

Сите официјални салони беа затворени уште во август 2023 година, кога околу 12.000 салони престанаа да постојат, а над 50.000 козметичарки останаа без работа. Сепак, и покрај забраната, многу жени продолжија да работат во тајност.

Сега талибанците најавија целосна акција за „искоренување“ на ваквите салони, при што на локалните лидери и старешини им е наложено да ги идентификуваат и пријават во полицијата за „пороци и доблести“.

Откако талибанците ја презедоа власта во август 2021 година, жените се соочуваат со низа рестрикции:

– забрана за работа во повеќето професии,

– забрана за средно и високо образование,

– ограничување на движењето без машка придружба,

– забрана за посета на паркови, теретани и јавни простори,

– задолжително целосно покривање на телото и лицето при излегување,

– забрана за јавно говорење.

Меѓународните организации за човекови права предупредуваат дека ваквите мерки претставуваат систем на родов апартхејд, кој целосно ги исклучува жените од јавниот живот и им ја одзема секоја можност за независност.

The post 12.000 САЛОНИ ЗАТВОРЕНИ, 50.000 ЖЕНИ БЕЗ РАБОТА Талибанците ја укинуваат последната слобода на жените appeared first on plusinfo.mk.

Маршот, организиран од Платформата за родова еднаквост и активистките за женски права, мобилизираше стотици присутни кои протестираа против нееднаквостите и неправдите кон жените и девојките, подигајќи ја свеста од потребата за унапредување на здравствените, образовните, работничките, културните, политичките и економските права на жените.

Читајќи го прогласот кој зборува за црвените линии кои не смеат да се преминат кога зборуваме за женските права, активистките повикаа на акција, мотивирани од трендот на ерозија на правата на жените и нивното континуирано исклучување од креирањето и донесувањето на одлуките кои директно влијаат врз нивните животи.

„Оваа година, одбележувајќи го Меѓународниот ден на жената, испишуваме осум црвени линии, опишувајќи ги промените што ги бараме:

1.     Моето тело, мој избор – Бараме неограничен пристап до безбеден и легален медицински абортус во секоја општина. Жените имаат право да носат информирани одлуки за своите тела и нивното репродуктивно здравје и тоа треба да биде само нивна и единствена одлука.

2.     Еднаква плата за еднаква работа – Бараме праведен надомест кој реално ќе ја отсликува вредноста на трудот на жената, како на работното место, така и во домот и еднакви плати меѓу мажите и жените. Ниту една жена не смее да остане без работа поради бременост, а родителското отсуство мора да биде задолжително за двајцата родители.

3.     Очекуваме постапување со должно внимание на институциите задолжени за превенирање и заштита од родово базирано насилство. Бараме институциите конечно да покажат решителност и бескомпромисна борба и активност во справување и препознавање на фемицидот кој за жал е мошне присутен во нашето општество. Бараме правда за жртвите и нивните семејства.

4.     Бараме конечно да се транформира статусот на жените работнички во културата кои со години наназад се соочуваат со неизвесност во однос на нивниот работен статус. 

5.     50% застапеност на жените на позициите на моќ треба да стане реалност. Жените треба да бидат подеднакво застапени на лидерски позиции во сите сектори, од владата и корпорациите до одборите и организациите во заедницата. 

6.     Бараме систематско решение за пристап до платено породилно отсуство и боледување за жените земјоделки. 

7.     Бараме државата да преземе енергична акција за жените работнички и да им обезбеди грижа за нивните деца што ќе им овозможи целосно да учествуваат во работниот процес без да ја жртвуваат својата улога како родители.

8.     И на крајот бараме државата да вложува во борбата против митото и корупцијата кои несразмерно ги погодуваат жените и се главна причина за заминување на младите луѓе од земјата.” 

Активистките потенцираа дека овие црвени линии не се само барања – тие се воедно патоказ за мерки кои што можат да доведат до напредок. Оттука, ги повикуваа носителите на одлуки, политичарите и политичките партии сериозно да ги земат предвид овие барања и да преземат конкретни чекори за нивна реализација, со цел да се подобри положбата на жените и родовата еднаквост во Северна Македонија.

Платформата за родова еднаквост порача: Промените нека почнат сега!

The post ПРАВАТА НА ЖЕНИТЕ НЕ СЕ ЗА ПРЕГОВАРАЊЕ Испорачани се 8 црвени линии appeared first on plusinfo.mk.

Заштита, сигурност, социјална и здравствена правда, како и економска сигурност за жените, се дел од барањата упатени од маршот.

– Да се биде жена во Македонија е да се будиш секое утро во страв и да се прашуваш дали ќе го преживееш тој ден. Во 2023 година жените и девојките во државата ги мачат прашања кои ја прикажуваат реалната слика со родовата нееднаквост во земјата – изјави Ана Aврамоска-Нушкова проектна координаторка во Националната мрежа против насилство врз жените и семејното насилство.

„Во 2023 година, жените и девојките сѐ уште се дискриминирани во секој поглед и не остваруваат ниту еднакви права, ниту еднакви можности, ниту дома, ниту на работа, ниту во политиката, ниту во социјалниот живот. Во 2023 година жените се соочени со политики кои не ги препознаваат нивните потреби, со институции кои не ги заштитуваат, механизми кои се слепи кон потребите за унапредување на родовата еднаквост и култура на насилство и мизогинија која постојано се шири“, истакнаа од Платформата за родова еднаквост.

Оттаму потенцираа дека жените и девојките во Северна Македонија се соочуваат со колективна негрижа.

– Да се биде жена значи да прифаќаш краткотрајна работа, работа на црно и под маса, без ресурси за стабилна кариера, без социјална заштита и регулација. Да се биде девојка во Македонија значи да се прашуваш дали ќе го преживееш ова возење со такси без таксистот да те вознемирува, дали ќе добиеш секакви коментари, закани на социјалните мрежи дали твои фотографии ќе бидат користени како порнографија, дали ќе имаш пристап до гинеколог и беспалатно пап тестирање, дали ќе ја преживееше следната лекарска рутинска интервенција дали ќе го преживееш пораѓањето. Да се биде жена во Македонија значи да се прашуваш дали ќе го преживееш секојдневното насилство од партнерот кое веќе си го пријавил, но институциите кои требало да те заштитат само направиле записник и не потапиле, не те запштитиле – истакна Надица Банишка, една од учесниците на маршот.

Маршот заврши во Паркот „Жена Борец“.

The post НЕ САКАМЕ ТАВА, САКАМЕ ПРАВА Жените во Скопје маршираа барајќи заштита, сигурност, социјална и здравствена правда appeared first on plusinfo.mk.

„Импресионирана сум од нивната храброст и посветеност во спречувањето на идните неуспеси во истрагата за злоупотреба“, напиша Џоли на Инстаграм.

Четирите врвни гимнастичарки Мекејла Марони, Али Рајсман, Меги Николс, Кејли Лоринц и Џесика Хауард, се само дел од мрежата од 150 жени-спортистки кои биле манипулирани и злоставувани од нивниот доктор кој ги прегледувал. Пред неколку дена тие се охрабрија и сведочеа пред Конгресот во САД, пишува магазинот „Пипл“.

Погледнете ја оваа објава на Инстаграм.

 

View this post on Instagram

 

A post shared by Angelina Jolie (@angelinajolie)

Силувал 150 жени за 20 години

„Ми беше чест да запознаам некои од храбрите американски гимнастичарки кои вчера се појавија пред Судската комисија на Сенатот“, напиша Џоли во описот на објавата, истакнувајќи дека е импресионирана од нивната храброст.

Анџелина го заврши својот пост со пораката „Стоп за насилството врз жените“.

Да потсетиме, во јануари 2018 година, Насар, кој беше поранешен доктор на Женскиот тим за ритмичка гимнастика во Соединетите држави (УСАГ), беше осуден на 175 години затвор, откако повеќе од 150 жени и девојки тврдеа дека сексуално ги злоупотребувал во период од 20 години.

ФБИ лажело и не ги заштитило жените

Во средата се одржа седница во Сенатот по извештај на главниот инспектор на Министерството за правда, во кој се наведува дека ФБИ не одговорила соодветно на обвинувањата за сексуална злоупотреба од Насар во 2015 година во својата истрага.

За време на сослушувањето, Марони, Рајсман, Николс и олимписката гимнастичарка Симон Билес тврдеа дека ФБИ дала лажни изјави во официјален извештај и не ги документирале наводите на жртвата.

Анџелина во последно време е многу активна за женските права во светот. Таа објави видео од Би-Би-Си на Инстаграм во кое се гледаат катастрофалните последици кои ги чекаат жените во Авганистан по опсадата од талибанците.

 

View this post on Instagram

 

A post shared by Angelina Jolie (@angelinajolie)

„Можевме да поштедиме 100 жени од силување“

– Како што рече Али Рајсман во своето сведочење, повеќе од 100 жртви можеа да бидат поштедени од злоупотреба. Ни требаше само едно лице да ја направи вистинската работа. Почитување и поддршка за нив и за сите што ја поминуваат оваа траума за да може да се случат реформите во системот – продолжи таа.

Џоли додаде дека се сретнала со девојките додека била на Капитол Хил „разговарајќи со сенаторите за повторно одобрување на Законот за насилство врз жените и реформите на ФБИ, кои вклучуваат подобра заштита за малтретираните деца, собирање непристрасни форензички докази, нега на трауми и судска обука“. 

The post АНЏЕЛИНА ЏОЛИ И ЗЛОСТАВУВАНИТЕ ГИМНАСТИЧАРКИ Силувачот конечно доби 175 години затвор appeared first on plusinfo.mk.

Институциите преспаа два страшни случаи како „Јавна соба 1“ и „Јавна соба 2“, додека во исто време кризата од пандемијата и веќе постоечката социјалната нееднаквост драматично ја засилуваат и родовата нееднаквост во нашата земја.

Жените ја плаќаат секогаш најголемата цена.

Оваа негрижа и нееднаквост има негативни реперкусии врз сите аспекти на нашиот национален живот и се закана за какво било економско, социјално, политички или културно заздравување на нашето општествено ткиво.

Правата на жените се правата на сите нас. Ако тие права се кршат, тогаш послаби сме сите ние, ако се почитуваат и применуваат, тогаш сите сме посилни. Ако сите ние сме индиферентни, тогаш сме индиферентни кон самите себе, а потоа и останатите.

Затоа е до сите нас, секојдневно да дадеме придонес. Секој во себе треба да ја втемели еднаквоста и рамноправноста и конкретно да ја практикува или за неа да се бори.

Кога треба да се подигне гласот – тоа да се направи. Кога треба да се просведочи насилството, неправдата или негрижата – тоа да не се премолчи. Нема друг начин, правата и еднаквоста на жената ќе се афирмираат само ако сите се залагаме.

(Фејсбук статус на авторот)

The post Жените ја плаќаат најголемата цена appeared first on plusinfo.mk.