Фустаните што наликуваат на ноќници станаа еден од најзабележливите модни трендови на крајот од ова лето. Таканаречените „nightie” фустани ја пренесоа естетиката на спалната соба на улиците – лесни материјали, тенки прерамки, чипка, сатен и романтични детали сега се носат како секојдневна облека. Трендот веќе е присутен и во актуелните колекции на модните брендови.

Во мода се две главни варијанти. Првата е минималистичкиот „slip” фустан, инспириран од класичното неглиже, со едноставна силуета, сатен и тенки прерамки. Тој силно потсетува на модата од 1990-тите и почетокот на 2000-тите, која сезонава повторно се враќа. Меѓу познатите личности што го прифатија овој стил е и Хејли Бибер, која неодамна носеше винтиџ модел на „Диор” од 2005 година.

Другата варијанта е уште понежна и поносталгична – бели или пастелни фустани што потсетуваат на старинските памучни спаваќици. Чипка, карнери, машнички, пуф-ракави и везови им даваат романтичен изглед, а токму овие модели добро се вклопуваат во популарната „cottagecore” естетика. Тоа е мода што намерно се навраќа кон едноставноста и романтиката на некое минато време.

Предноста на овие фустани е што со неколку детали можат целосно да го променат карактерот. Со балетанки или рамни сандали, мала чанта и очила за сонце стануваат дневна комбинација, а со потпетици и понагласен накит можат да се носат и навечер. Кожена или велурна јакна создава контраст со нежниот фустан и го прави изгледот помалку „пижамест”, а повеќе урбан.

Трендот е практичен токму за последните топли денови и почетокот на есента. Кога вечерите ќе станат посвежи, врз лесниот фустан може да се облече тенок џемпер, кошула или кратка јакна, а сандалите да се заменат со чизми. Така фустанот што изгледа како да е позајмен од спалната соба станува еден од оние ретки летни парчиња што без проблем продолжуваат да се носат и во првите есенски денови.

The post ВО МОДА СЕ ФУСТАНИТЕ ШТО ИЗГЛЕДААТ КАКО ПИЖАМИ За нежен и носталгичен крај на летото appeared first on plusinfo.mk.