Катарскиот премиер и министер за надворешни работи Мохамед бин Абдулрахман ал Тани изјави дека постои „голема веројатност“ САД и Иран да постигнат договор за завршување на конфликтот.

Тој предупреди дека Ормускиот Теснец не смее да се користи како средство за притисок и порача дека секој договор мора да ги земе предвид интересите на регионот.

Изјавата на катарскиот премиер доаѓа откако портпаролот на иранското Министерство за надворешни работи Есмаил Багаеи потврди дека Техеран ги разгледува американските предлози.

Тој најави дека иранскиот став ќе биде претставен во Пакистан.

„Голем напредок“

Претседателот на САД Доналд Трамп претходно изјави дека е постигнат „голем напредок“ кон сеопфатен договор меѓу Вашингтон и Техеран.

Тој додаде дека операцијата „Проект слобода“ за отворање на Ормускиот Теснец привремено ќе биде суспендирана.

Трамп повторно испрати закана кон Иран.

„Доколку Иранците не се согласат со предлогот, Иран повторно ќе биде бомбардиран многу пообемно и поинтензивно од претходно“, порача Претседателот на САД на својата социјална мрежа.

„Аксиос“ открива 14 точки

„Аксиос“ претходно објави дека Белата куќа верува оти е блиску до потпишување меморандум за разбирање со Техеран.

Според порталот, САД очекуваат одговор од Иран во следните 48 часа.

Меморандумот содржи 14 точки. Во неговата сегашна верзија е предвиден крај на војната и почеток на 30-дневни преговори.

„Па,  тоа е список на САД“

Во меѓувреме стигна и првата реакција од Иран. Портпаролот на Советот за национална безбедност на Иран, Ебрахим Резаи, оцени дека предлогот повеќе личи на „американски список на желби отколку на реалност“.

„Американците нема да го добијат со неуспешно воено сценарио она што не успеаја да го добијат во преговорите лице в лице“, објави Резаи на мрежата Икс.

Женева – следна станица за Виткоф и за Кушнер?

Според „Аксиос“, идните разговори за Ормускиот Теснец, нуклеарната програма и американските санкции би можеле да се одржат во Женева.

Во подготовката на меморандумот, според извештајот, учествувале специјалните пратеници на Трамп, Стив Виткоф и Џаред Кушнер, заедно со ирански претставници.

The post КАТАР ГЛЕДА „ГОЛЕМА ШАНСА“ ЗА ДОГОВОР Иран ги разгледува 14. точки на САД за крај на војната appeared first on plusinfo.mk.