Заменик-претседателот на Владата и министер за транспорт денеска во Солун, во рамки на министерскиот Самит на земјите од Западен Балкан оствари билатерална средба со министерката за градежништво, транспорт и инфраструктура на Република Србија, Александра Софронијевиќ.

На средбата беше разговарано за унапредување на регионалната соработка, со посебен акцент на реализацијата на заедничките инфраструктурни проекти кои ќе придонесат за забрзан економски раст, подобра поврзаност и зголемена конкурентност на регионот.

Посебно внимание на средбата беше посветено на изградбата на брзата железничка пруга на Коридорот 10, при што беше истакнато дека станува збор за еден од најзначајните инфраструктурни проекти за развојот на регионот.

Вицепремиерот нагласи дека Македонија интензивно работи на реализацијата на овој проект, кој ќе овозможи побрз, побезбеден и поефикасен железнички транспорт.

На средбата се разговараше и за проектот за изградба на заедничката гранична железничка станица Табановце, која ќе овозможи побрз и поефикасен транспорт на стоки и патници. Николоски информираше дека е избран изведувач и дека изградбата на станицата ќе започне во скоро време.

Соговорниците разменија мислења и за унапредување на трговската и економската соработка меѓу двете земји, како и за натамошно подобрување на ефикасноста на транспортните коридори. Во таа насока беше разговарано за воспоставувањето и проширувањето на системот на зелени ленти на граничните премини, со цел забрзување на протокот на стоки и намалување на времето на чекање.

Во фокусот на разговорите беше и енергетското поврзување меѓу двете држави. Вицепремиерот истакна дека е во тек тендерската постапка за изградба на гасниот интерконектор меѓу Македонија и Србија, проект кој ќе придонесе за поголема енергетска сигурност, диверзификација на изворите на снабдување и поконкурентни цени на природниот гас.

Во духот на традиционално добрите и пријателски односи, двајцата соговорници ја потврдија заедничката заложба за понатамошно продлабочување на соработката и реализација на заеднички проекти што ќе придонесат за економскиот развој, регионалната поврзаност и подобар квалитет на живот на граѓаните во двете земји.

The post МАКЕДОНИЈА И СРБИЈА ЗАЕДНО ЌЕ ЈА ГРАДАТ ЖЕЛЕЗНИЧКАТА СТАНИЦА ТАБАНОВЦЕ Избран е изведувач, изградбата ќе почне наскоро appeared first on plusinfo.mk.