Десет милијарди евра во капитални инфраструктурни проекти и инвестиции во наредните 10 години најавува Владата, и тоа во нови автопати, експресни патишта, пруги и обнова на постојните здравствени и енергетски капацитети.

– Кога ќе се соберат сите проекти – автопати, железничка инфраструктура, енергетски капацитети, здравствени установи, индустриски инвестиции, пречистителни станици, експресни патишта и други капитални проекти – вкупната вредност на планираните и на тековните инвестиции достигнува речиси 10 милијарди евра, што треба да се завршат во следните 10 години, или милијарда годишно – посочи Мицкоски на брифинг со новинарите оценувајќу дека ќе се постигне раст на БДП од над 5 проценти.

Сето ова, истакна тој, претставува сериозен развоен потенцијал за државата во наредните години.

– Во текот на втората половина од годината очекуваме истовремено да се градат шест автопатски делници во државата – додава премиерот.

На автопатот Кичево – Охрид (57 километри), што се гради веќе 12 години и од кој пуштени се 34 километри, се очекува делницата од Извор до Врбјани да биде пуштена во употреба најдоцна до септември или октомври оваа година, а делницата од Врбјани до Ботун исто така да биде ставена во функција во согласност со предвидената динамика на градежните работи.

– Очекуваме, според оптимистичкото сценарио, делницата од Извор до Врбјани, вклучувајќи ги и вијадуктите и тунелите, да биде пуштена во употреба до Денот на независноста – 8 Септември. Доколку има дополнителни доработки, рокот би можел да се помести до септември или октомври. Целосното пуштање во употреба на автопатот, од Кичево до излезот кај Охрид, каде што се наоѓа единствената преостаната делница што сè уште не е поврзана со автопатско решение, го очекуваме во првиот квартал од 2027 година. Потоа ќе останат уште приближно три километри, кои во моментот завршуваат кај селото Ботун. Овие три километри треба да се приклучат на делницата од Букојчани, каде што завршува проектот на „Бехтел и Енка“, до точката на поврзување со постојниот автопат. Тоа се приближно 10 километри. Договорот со заемодавачите е потпишан, средствата се обезбедени, тендерската постапка е завршена и избрана е компанија што ќе ги изведува градежните работи. Во моментот се чека конечна согласност од заемодавачите по што ќе следува период за евентуални жалби и за понатамошни процедури – рече Мицкоски.

Тој потсети дека договорот за заем со кинеската Ексим банка за овој проект беше раскинат поради што државата со домашните банки формира банкарски синдикат и обезбеди 175 милиони евра за негово завршување. Со овие средства се предвидува целосно завршување на автопатот Кичево – Охрид вклучувајќи ги и споредните патишта, оградите, рабниците, сигнализацијата, како и целокупната контролна и безбедносна опрема во тунелите. На тој начин се очекува проектот, конечно, да биде комплетиран.

И со дополнителното финансирање, како што посочи Мицкоски, цената за километар останува пониска од цената на делниците на Коридорот 8 и Коридорот 10, што ги реализира конзорциумот „Бехтел и Енка“.

За автопатската делница Букојчани – Кичево, проект што се финансира со заем од Европската банка за обнова и развој, во вредност од речиси 220 милиони евра, веќе е избран најповолен понудувач за изградбата и се очекува банката да даде конечен одговор по завршувањето на целата постапка. Доколку процедурите се одвиваат според планот, се очекува во септември или октомври да почнат градежните активности на терен.

За изградбата на вториот дел од автопатот Блаце – Скопје, пак, завршена е евалуацијата, избран е понудувач, има жалба, која во прв степен е одбиена, во тек е второстепена постапка, и се очекува разврска. Се очекува неделава да има повратна информација и овој месец или во почетокот на следниот да почнат работите на терен. Вкупниот буџет изнесува 215 милиони евра, исто така од ЕБРД.

Од проектот со конзорциумот „Бехтел и Енка“, со кој во тек е изградба на три автопатски делници (Тетово – Гостивар, Гостивар – Букојчани и Прилеп – Битола), кон крајот на месецот треба да стане појасно како ќе се одвиваат активностите на делницата Требениште – Ќафасан.

– Доколку работите се одвиваат според планот, очекуваме првите 11,5 километри од делницата Прилеп – Битола да бидат пуштени во употреба во основно автопатско решение до септември 2027 година – рече Мицкоски повторувајќи дека Владата за проектот со „Бехтел и Енка“ затекнала состојба во која биле исплатени речиси 350 милиони евра авансно, а две години практично немало значителен напредок на терен. Направени се законски измени и обезбедена е поодржлива финансиска конструкција. До крајот на годината финансиската конструкција за проектот е затворена.

– Во консултација со менаџментот на проектот и со изведувачот, предвидено е во 2027, 2028 и во 2029 година да се реализираат по речиси 250 милиони евра годишно. Тоа е приближно 15 милијарди денари годишно и, според нивните процени, претставува реален капацитет за изведба. Доколку останат помали активности по 2029 година, тие би се завршиле во текот на 2030 година. Во моментот се водат разговори за продолжување на роковите за реализација бидејќи во првите две години од потпишувањето на договорот практично немало значителен напредок иако одредени обврски биле на страната на државата – информира претседателот на Владата.

Очекува во наредниот период да се обезбеди целосно финансирање за преостанатите три години од реализацијата на проектот наместо секоја година повторно да се обезбедуваат средства. Тоа би значело дополнителни речиси 900 милиони евра за целосно завршување на проектот.

Се преземаат активности да се работи со домашните компании со цел поголем дел од средствата да остане во македонската економија.

Во делот на експресните патишта, почнато е проектирање на делницата Кочани – Виница – Делчево како дел од пошироката стратегија за модернизација на патната инфраструктура во источниот дел на државата. Проектот е во вредност од приближно 120 милиони евра.

– Со ова, практично, на Коридорот 8 ќе му пристапиме од три страни во источниот дел на државата. Едната делница е кон Крива Паланка, а тука е и експресниот пат, кој треба да овозможи заобиколување на Куманово, односно поврзување на автопатот кај Романовце со Страцин. Овој проект е дел од планот за раст и средствата за него се обезбедени токму преку тој механизам. Во моментот двете делници се во фаза на подготовка и планирање – посочи Мицкоски.

Во железничката инфраструктура клучните проекти се модернизацијата и изградбата на пругата на Коридорот 10 за што премиерот најавува работата на терен да заврши најдоцна до крајот на годината, а на Коридорот 8 изградбата на пругата кон Бугарија, делниците Куманово – Крива Паланка, чија изградба е во тек, како и Крива Паланка – граница со Бугарија, со меѓуграничниот железнички тунел, сѐ уште нема работа на терен. Исто така, и модернизација на пругата Скопје – Кичево на Коридорот 8.

Од пругата кон Бугарија, за втората делница од Куманово до Крива Паланка, изведувачот бара да се продолжи рокот за изградба до 2028 година. Остануваат уште приближно 125 милиони евра за работи што треба да се реализираат поради што најверојатно ќе биде потпишан анекс на договорот. Анексот се однесува на зајакнување на постојните столбови на мостовите, кои со години стојат како споменик на недовршениот проект. Првичните процени биле дека нивно уривање и повторна изградба би чинеле дополнителни 150 милиони евра. Заедно со експерти од Градежниот факултет анализирани се алтернативни решенија и дојдено е до значително поекономичен пристап. Развиена е технологија со која столбовите може да се зајакнат, без да се нарушат носивоста и стабилноста на конструкциите. На тој начин се избегнува непотребен трошок од речиси 150 милиони евра за уривање и повторна изградба.

Добрата вест, вели премиерот, е што тунелите веќе се пробиени и почнуваат работите во нивната внатрешност и делницата од Романовце до Крива Паланка постепено влегува во поинтензивна фаза на реализација.

За третата делница беше потпишан договор со Бугарија, обврската во македонскиот дел е трасата од Крива Паланка до влезот на големиот прекуграничен тунел, а бугарската страна е одговорна за делницата од излезот на тунелот до Софија.

За жал, посочи премиерот, освен потпишувањето на договорите, засега нема значителен теренски напредок на бугарската страна. Европската Унија покажува напредок бидејќи се очекува тунелот да биде финансиран преку ИПА-средствата.

– Ние и Брисел си ја вршиме работата, тие веќе имаа тендер, но од бугарска страна нема прогрес кога станува збор за оваа делница, можеби ќе има, тие сега им даваат приоритет на железничките врски кон Бургас и Варна. Кај нас е активирана техничка асистенција и се работи на финализирање на последните детали од договорната документација. Од тендерот е исфрлен тунелот, како и компонентите за сигнализација и дигитализација. Европската банка за обнова и развој и Европската инвестициска банка треба да дадат согласност за предложените измени. Станува збор за грант-компонента од речиси 150 милиони евра – рече Мицкоски.

Доколку сè се одвива според планот, договорот би требало да биде потпишан најдоцна до ноември годинава, а овој месец или најдоцна следниот да се објави тендерот за изведба.

На западниот дел од Коридорот 8, за модернизација на железничката пруга до Кичево, активностите ќе се одвиваат преку реформската агенда, односно средствата што првично беа предвидени за Коридорот 10 се пренасочени кон западниот железнички крак на овој коридор.
Веќе се подготвува изработка на тендерската документација за модернизација на делницата Скопје – Јегуновце – Тетово – Гостивар. Вредноста на проектот е приближно 284 милиони евра.

Средствата се обезбедени преку планот за раст, а потребно е само да се финализира документацијата за да може да почне тендерската постапка. Со проектот е предвидена целосна модернизација на пругата, замена на шините и електрификација.

Во однос на Коридорот 10, при крај се предфизибилити-студијата и целокупната документација потребна за да почне со реализација договорот потпишан со Обединетото Кралство. На состаноците присуствувале и претставници на банката, која е потенцијален заемодавач и од која има необврзувачка финансиска понуда.

– Доколку сè се одвива според планот, очекуваме најдоцна до крајот на годината да почнат и првите активности на терен. Вкупната вредност на проектот е речиси 1,8 милијарда евра – рече Мицкоски посочувајќи дека со неговата реализација патничките возови на релацијата Табановце – Гевгелија ќе може да сообраќаат со брзина до 160 километри на час, а товарните композиции меѓу 100 и 120 километри на час.

Во исто време, посочи, интензивно се работи на проширување на капацитетите на пристаништето во Солун и, според нивните процени, товарниот сообраќај би можел да се зголеми најмалку петкратно во однос на сегашното ниво.

За хидроенергетскиот проект „Чебрен и Галиште“, сериозно се размислува и блиску е до носење стратешка одлука државата самостојно да го реализира, без приватен партнер.

– Конечната одлука ќе зависи и од состаноците што се одржуваат во рамките на ЕСМ. Нашите пресметки покажуваат дека внатрешната стапка на поврат на инвестицијата е над 10 проценти, што го прави проектот економски оправдан – наведе Мицкоски посочувајќи на придобивките од акумулациите што би се создале со изградбата како значаен ресурс за водоснабдување и управување со водните ресурси имајќи ги предвид климатските промени и глобалното затоплување.

По финализирањето на физибилити-студијата, ќе се избере изведувач по принципот проектирај и изгради. Вредноста на инвестицијата се проценува на речиси една милијарда евра.

Паралелно со овие активности, од Владата посочуваат дека се во преговори со 15-ина компании за инвестиции. Германска мултинационална компанија веќе формирала правно лице во државата и резервирала парцели за изградба на две фабрики. Американска компанија, која се наоѓа на листата Fortune 500, резервирала четири индустриски парцели, исто така основала локална компанија и почнала активности за вработување. Турска компанија, која веќе работи во Технолошко-индустриската развојна зона во Тетово, пак, планира ново проширување преку изградба на дополнителен производствен погон.

– Сите овие инвестиции треба да генерираат градежни активности во вредност од најмалку 300 милиони евра – велат од Владата.

Во здравството, меѓу најважните проекти се Клиничката болница во Штип, новиот медицински факултет со студентски дом, како и Клиничката болница во Тетово и Здравствениот дом во Кичево. Вкупната вредност на овие проекти изнесува речиси 200 милиони евра.

Доколку економските состојби во Европската Унија, нашиот најголем трговски партнер, покажат подобрување и европската економија расте со стапка од 1,5 до 2 проценти годишно, тогаш Македонија има реални можности да остварува економски раст над 5 проценти. Во услови кога растот кај нашите главни трговски партнери е под 1 процент, а во некои случаи изнесува 0,6 или 0,8 проценти, нашата економија бележи раст од речиси 3,5 проценти, а во првиот квартал годинава растот изнесуваше 3,3 проценти.

The post 10 МИЛИЈАРДИ ВО ИНВЕСТИЦИИ ЗА СЛЕДНИТЕ 10 ГОДИНИ Шест автопати ќе се градат истовремено, Владата цели на БДП од 5% appeared first on plusinfo.mk.

Меѓуградскиот воз помеѓу Прилеп и Битола ќе почне да сообраќа на крајот на јуни или почетокот на јули, а наскоро се очекува да стартува и карго железничкиот сообраќај кон двата града. Ова денеска одговарајќи на новинарско прашање го најави заменик-претседателот на Владата и министер за транспорт, Александар Николоски, при посетата на Општина Могила, истакнувајќи дека железницата повторно ќе добие значајна улога и во превозот на патници и во транспортот на стоки.

Според Николоски, воведувањето на железничката линија е резултат на потребата од алтернативен и побрз превоз во периодот кога се реализира изградбата на автопатот Прилеп-Битола.

– Имајќи предвид дека се гради автопатот Прилеп-Битола и дека се користи стариот пат, сметавме дека е добро да се воспостави еден меѓуградски воз. Интензивно работиме со двете железнички претпријатија за да се подготви инфраструктурата и особено патните премини и да се обезбедат возови со соодветна фреквенција. Можам да најавам дека на крајот на јуни, почетокот на јули, како што веќе ветивме, ќе биде воспоставена линијата помеѓу Прилеп и Битола – изјави Николоски.

Тој посочи дека возот ќе сообраќа во термини кои најмногу ќе им одговараат на граѓаните, а цената на билетот ќе биде симболична.

– Ќе има меѓуградски воз помеѓу двата града во соодветни термини кои што најмногу ќе одговараат на граѓаните. Ќе биде тоа една симболична цена од 150 денари, за да можат што повеќе граѓани да го користат – рече Николоски.

Министерот најави и скоро започнување на карго железничкиот сообраќај кон Прилеп и Битола, нагласувајќи дека веќе постои сериозен интерес од компании за користење на железничкиот транспорт.

– Во Прилеп веќе има сериозен интерес од неколку компании да ја користат железницата како можност за сообраќај и транспорт. Тоа прво ќе помогне да се намали загадувањето, второ да ги заштитиме патиштата и трето да ја заживееме железницата – истакна Николоски.

Тој додаде дека од страна на државните институции се преземаат сите неопходни активности за воспоставување на патничкиот и товарниот железнички сообраќај, а наскоро ќе остане компаниите да ја искористат можноста за транспорт на производи и суровини преку железница и да ги намалат своите трошоци.

The post МЕЃУГРАДСКИОТ ВОЗ ПРИЛЕП-БИТОЛА СТАРТУВА ОД ЈУЛИ Билетот ќе чини 150 денари appeared first on plusinfo.mk.

Италијанската влада најави дека дел од запленетите повеќе од 200 милиони евра, кои биле скриени средства на мафијата, ќе бидат пренаменети за зајакнување на безбедноста на железничкиот систем во земјата, со посебен фокус на станиците и заштитата на патниците.

Средствата беа откриени во голема меѓународна истрага на италијанските финансиски и судски власти, кои со години ја следеле мрежата на тајни инвестиции на мафијата во различни земји и сектори.

Според италијанските институции, парите биле скриени преку „даночни раеви“, но и инвестирани во банки, луксузни хотелски синџири, криптовалути и други бизниси низ Европа и пошироко.

Истрагата открила дека станува збор за капитал поврзан со еден од најпознатите водачи на сицилијанската мафија, Матео Месина Денаро, кој со години, според истражителите, преку мрежа на посредници ги вложувал парите во легални бизниси.

Италијанскиот весник „Le Figaro“ и други европски медиуми пишуваат дека по две децении истраги, италијанската држава успеала да ја разоткрие една од најголемите финансиски шеми поврзани со мафијата.

Италијанската јавна телевизија „RAI“ јавува дека операцијата ја водел обвинителот во Палермо, Маурицио де Лучија, а во акцијата учествувале и надлежни институции од повеќе земји, меѓу кои Андора, Гибралтар, Кајманските Острови, Луксембург, Монако, Швајцарија и Шпанија.

Италијанските власти најавуваат дека запленетите средства ќе бидат насочени кон проекти за јавна безбедност, со цел да се зајакне заштитата на железничките станици и патниците во земјата.

The post 200 МИЛИОНИ ОД МАФИЈАТА ОДАТ ВО БЕЗБЕДНОСТ Италија запленетите средства ќе ги инвестира во железничка заштита appeared first on plusinfo.mk.

Изградбата на втората фаза на пругата од Бељаковце до Крива Паланка на источниот дел од Коридорот 8 се реализира со засилена динамика, објави директорот на ЈП Железници Инфраструктура, Синиша Ивановски.

„Градежни активности на изградбата на пругата кон Бугарија. Секција 2, од Бељаковце кон Крива Паланка. Должина 34 километри. Прогрес 35%. Бележиме зголемен интензитет на градежните активности“, објави Ивановски на својот профил на Фејсбук.

Министерството за транспорт соопшти дека е објавен јавниот повик за надзор за третата делница од Крива Паланка до границата со Бугарија. Следниот месец се очекува да се распише и меѓународниот јавен повик за избор на изведувач за делницата Крива Паланка-граница.

„Со ова Владата ја покажува јасната стратегија за изградба на железничкиот Коридор 8, како стратешко економски и безбедносен коридор со посебно значење за Македонија и регионот“, соопшти Министерството за транспорт.

The post 🎥 ИНТЕНЗИВНО СЕ ГРАДИ ПРУГАТА КОН БУГАРИЈА Се оформува делницата од Бељаковце до Крива Паланка appeared first on plusinfo.mk.

Работиме на оперативниот план на ревитализација на железницата и враќање на карго-превозот за што се заинтересирани прилепските големи компании. Планот треба да го реализираме за 6 до 12 месеци, трошоците на компаниите двојно ќе се намалат, а ние ќе ги зачуваме патиштата и животната средина – изјави Александар Николоски, вицепремиер и министер за транспорт, при денешната посета на Прилеп.

Николоски се сретнал и со големите прилепски компании.

– Сериозно работиме на ревитализација на железницата. Денеска се сретнав со најголемите компании од Прилеп и разговаравме повторно да се врати карго-сообраќајот во Прилеп, што ќе значи многу поевтин транспорт за компаниите и ќе значи повеќе работни места. Направивме оперативен план, кој треба да го реализираме во период од 6 до 12 месеци, и целосно да ја заживееме железницата. Ќе помогне за екологијата, но и да се заштитат големите инфраструктурни објекти, автопатиштата – изјави Николоски.

Министерот за транспорт направи увид на работите на уредувањето на патеките на кејот „1 Мај“ во Прилеп, еден од трите проекти што ги финансира Министерството за транспорт. Уредувањето на кејот со патеки и урбана опрема е при крај и е во должина од 700 метри, а во вредност од 7 милиони денари.

Николоски најави дека Прилеп, кој ја има целосната владина поддршка, ќе добие и два големи моста.

– Градот првпат ќе види два големи моста, кои се реализираат на реката. Едниот веќе е во градба, за вториот во тек е тендерска постапка, така што одиме со силна поддршка на Прилеп – рече Николоски.

За обиколницата кај Прилеп, Општината работи на проектирањето. По проектирањето, Владата ќе ја преземе обврската да најде изведувач, а ќе обезбеди и финансии за да се заврши проектот.

The post КАРГО ЖЕЛЕЗНИЧКИОТ ПРЕВОЗ СЕ ВРАЌА ВО ПРИЛЕП Проектот треба да заврши за 6 месеци до една година appeared first on plusinfo.mk.

Кина и Северна Кореја повторно воспоставуваат директна железничка линија меѓу своите главни градови по шестгодишен прекин, што укажува дека двете земји ги затоплуваат односите, јави ДПА.

Првиот патнички воз ќе тргне во четврток на патување кое трае речиси 24 часа, соопшти кинеската државна железница.Кинеската државна железница во соопштение информираше дека првиот патнички воз ќе тргне во четврток на патување кое трае речиси 24 часа.

Железничката врска меѓу Пекинг и Пјонгјанг беше прекината во 2020 година, кога Северна Кореја ги затвори своите граници поради пандемијата на Ковид 19.

Според „Чајна рејлвеј“, линијата ќе придонесе за унапредување на економската соработка и за културната размена меѓу двете земји. Возовите ќе сообраќаат 4 пати неделно во двата правци. Два вагона ќе бидат резервирани за странски патници.

Пред пандемијата, кинеските туристи беа најбројната група посетители во Северна Кореја. Кина, исто така, е еден од најважните економски партнери на земјата.

Северна Кореја и натаму е под опсежни санкции на Обединетите нации поради својата нуклеарна програма и сериозни прекршувања на човековите права.

Севернокорејскиот лидер Ким Џонг-ун минатиот септември го посети Пекинг за воена парада на Народноослободителната армија на Кина, што беше едно од неговите ретки патувања во странство.

The post СЕ ВРАЌА ЖЕЛЕЗНИЧКАТА ЛИНИЈА ОД ПЕКИНГ ДО ПЈОНГЈАНГ Кина и Северна Кореја ги затоплуваат односите appeared first on plusinfo.mk.

Италијанската премиерка Џорџа Мелони денеска ги осуди демонстрантите против Зимските олимписки игри како „непријатели на Италија“ по судирите меѓу демонстрантите и полицијата во Милано, еден од двата града домаќини на ЗОИ, и наводните саботажи на железничката мрежа во близина на Болоња во централна Италија, објавија британските медиуми.

Инцидентите се случија на првиот ден од натпреварите на Зимските олимписки игри, чиј домаќин е Милано, финансискиот главен град на Италија, заедно со алпскиот град Кортина.

Мелони ги пофали илјадниците Италијанци за кои рече дека работат на обезбедување непречено одвивање на Игрите и ја покажуваат позитивната страна на Италија.

„Постојат и оние кои се непријатели на Италија и Италијанците, демонстрираат против Олимписките игри и се грижат овие слики да се емитуваат на телевизиските екрани низ целиот свет. Откако други ги пресекоа железничките кабли за да спречат заминување на возовите“, напиша утринава Мелони на Инстаграм.

Подолува во нејзината објава се вели:

„Уште еднаш, ја изразувам мојата солидарност со полицијата, Милано и сите оние чија работа ќе биде нарушена од овие криминални банди“, додаде италијанската премиерка, која ја предводи десничарската коалиција.

The post ЕДНИ СЕЧЕА КАБЛИ, ДРУГИ ПРОТЕСТИРААТ ПРОТИВ ОЛИМПИЈАДАТА Мелони остро реагира по инцидентите кај Болоња appeared first on plusinfo.mk.

Работата за санирање на дефектот во железничките линии меѓу Евротунелот помеѓу Британија и Франција продолжи и во текот на ноќта, а некои линии на „Еуростар“ и „ЛеШатл“ оттогаш се делумно обновени, но работат со значителни задоцнувања, јавува Би-Би-Си.

Илјадници луѓе останаа заглавени на пероните и терминалите во тунелот поради прекин на електричната енергија, што предизвика хаос во пресрет на новогодишните празници. Патувања биле откажани, семејства останаа во автомобилите натерминалите за поаѓање, а некои дури биле затекнати во подземните линии под Ла Манш не можејќи да го продолжат патот кон Франција.

Се работи за проблем со надземните кабли за струја и дефект на воз на „ЛеШатл“. Според Би-Би-Си, најмалку десет возови на „Еуростар“ помеѓу Лондон, Париз, Брисел и Амстердам биле откажани уште пред пладне. Компанијата се извинила на патниците и понудила враќање на средствата, промена на датумот на патување или е-ваучер.

Патниците чекаа 6 до 7 часа за да се отстрани дефектот.

Очај и солзи на станиците

Меѓу патниците имало и туристи кои патувале со аранжмани планирани месеци претходно. Американките Хејли Адамс и Хана Хагар, кои требало да стигнат во Париз за роденден, биле принудени да платат повеќе од 580 долари за лет од Лондон и дополнителна ноќ во хотел.

– Тука сме веќе пет часа, редиците не се движат, сите сме уморни – изјавила Адамс.

Во исто време, семејство од Мексико, предводено од Монсерат Ернандес, се надевало дека „патувањето на животот“ нема да заврши на станицата Сент Панкрас.

– Велат дека денес нема превоз. Ова изгледа како американски филм – рекла таа, барајќи алтернативен лет за Париз.

Hours spent hardly moving, no communication from @LeShuttle, no food or drink.

Kids losing the will to live and no end in sight. Absolute shambles #bbcnews #skynews #eurotunnel pic.twitter.com/FXzGtxUJo1

— Richard Frewin (@RFrewin) December 30, 2025

Патници заглавени под Ла Манш

Во францускиот град Кале, Бен Кларк со своето семејство бил меѓу стотиците кои останале во „ЛеШатл“.

– Првите часови не беа толку лоши, но децата стануваат немирни. Ги потрошивме сите закуски и немаме план Б – изјавил тој.

Обнова на сообраќајот преку една линија

Компанијата „Гетлинк“, управувач на Евротунелот, соопштила дека дел од сообраќајот е обновен преку еден од двата тунела, со доцнења од пет часа. Оштетениот воз бил извлечен, а патниците биле предупредени да не патуваат кон Сент Панкрас доколку нивниот воз е откажан.

Првата линија на „Еуростар“ тргнала од Лондон кон Брисел нешто по 16 часот. Возилата што чекале да се качат предизвикале метеж и на автопатот М20 кај терминалот Фолкстоун.

The post ТРГНАА ВОЗОВИТЕ ПОД ЛА МАНШ, НО СЕМЕЈСТВАТА УШТЕ ЧЕКААТ Се скрши новогодишната магија за илјадници патници во Европа appeared first on plusinfo.mk.

Поради реконструкција на пругата на делницата Скопје-Зелениково, од 2 јануари 2026 година до крајот на февруари 2026 година ќе има измени во сообраќајот на два воза, информираат од Железници на Република Северна Македонија-Транспорт АД-Скопје.

– Возот број 642 кој ќе сообраќа на релација Битола-Велес време на тргнување предвидено со возниот ред (време на тргнување од станица Битола во 12:46 часот.) Возот број 643 ќе сообраќа на релација Велес-Битола со време на тргнување од станица Велес во 15:25 часот, се наведува во соопштението.

The post ИЗМЕНИ ВО ВОЗНИОТ РЕД ПОРАДИ РЕКОНСТРУКЦИЈА НА ПРУГАТА КАЈ ЗЕЛЕНИКОВО Еве кои возови сообраќаат appeared first on plusinfo.mk.

Директорот на МЖ Инфраструктура, Синиша Ивановски, нa својот Фејсбук профил објави видео од пробивање на 14-от тунел на железничката делница Бељаковце – Крива Паланка која е во изградба.

„Добро е кога на крајот од тунелот ќе се појави светло. Рано изутринава го пробивме претпоследниот од вкупно 15 тунели на железничката делница од Бељаковце до Крива Паланка. Ова е вториот дел од градбата на пругата кон Бугарија“, пишува Ивановски.

Градбата на оваа траса изобилува со предизвици, а еден од поголемите се пробивањето и градбата на тунелите.

„Прогресот на градбата на целиот проект не е на посакуваното ниво, но би го пофалил изведувачот за нивниот успех во градбата на тунелите. Верувам дека и во другите сегменти од градбата за многу скоро од денеска ќе почнат да бележат успех“, напиша Ивановски.

The post 📽️ ПРОБИЕН ПРЕТПОСЛЕДНИОТ, 14. ТУНЕЛ КАЈ КРИВА ПАЛАНКА „Добро е кога има светло на крајот“ appeared first on plusinfo.mk.