Бугарскиот амбасадор во Македонија Жељазко Радуков се сомнева дека македонските власти не знаеле дека Ива Михаилова ќе ја напушти Македонија.

– Тоа не можам да го тврдам, но би бил исклучително изненаден ако не било координирано – рече Радуков во интервју за бугарската бТВ.

Радуков рече дека Михаилова била на стоп-листа, со одземени пасоши и под полициски надзор. Според него, пред нејзиниот дом имало патрола, а цивилни полицајци ја следеле кога излегувала. Таа му кажувала и за дронови над куќата во ноќните часови.

– И одеднаш сето тоа на некаков начин исчезнува и таа ја преминува границата? Ве молам – изјави Радуков.

Радуков негираше дека тој или бугарската држава однапред знаеле за заминувањето на Михаилова во Бугарија. Амбасадата, според него, дознала од медиумите, додека очекувала продолжување на судската постапка што се води ротив неа за сообраќајната несреча и разгледување на можностите за лекување со учество на бугарски лекари.

Тој наведе дека биле обезбедени адвокатска помош и средства за вештачења.

Рече дека не го поддржува заминувањето, иако ја разбира очајната состојба на Михајлова.

Амбасадорот повторно обвини за различен третман поради нејзината бугарска припадност. Според него, расправата за преминувањето на границата го потиснала прашањето зошто не ѝ било дозволено лекување во странство.

The post БУГАРСКИОТ АМБАСАДОР СЕ СОМНЕВА ДЕКА МАКЕДОНСКИТЕ ВЛАСТИ НЕ ЗНАЕЛЕ ЗА БЕГСТВОТО НА МИХАИЛОВА Бугарија не знаела однапред, тврди тој appeared first on plusinfo.mk.

Со химните на Република Бугарија и на Република Северна Македонија, кај споменикот на генерал-мајор Константин Каварналиев во близина на Дојран беше одбележана 113-годишнината од смртта на бугарскиот офицер, загинат за време на Меѓусојузничката војна, пренесува БТА.

На настанот присуствуваа амбасадорот на Бугарија во Северна Македонија Желјазко Радуков, генералниот конзул во Битола Петар Петров, претставници на Министерството за одбрана на Бугарија, курсанти и професори од Високото военовоздухопловно училиште „Георги Бенковски“, претставници на дипломатските мисии, организации на воените ветерани и претставници на бугарската заедница во земјата.

Во своето обраќање, амбасадорот Радуков истакна дека улогата на бугарската армија е „да го заштити бугарскиот народ“ и дека Каварналиев загинал „купувајќи време за населението да се повлече на безбедно“. Тој нагласи дека воената професија е „најдостојната, но и најнеблагодарната“, бидејќи бара од човекот да го положи својот живот „за да можат други да продолжат да живеат“.

Радуков потсети дека споменикот, изграден во 1916 година, бил разрушен во 1966 година, а неговото обновување траело речиси три децении. Тој подвлече дека, вистински добрососедски односи не можат да се градат со „епизодни гестови на добронамерност“, додека уништувањето на спомениците е системско. Во 1916 говор по повод откривањето на споменикот одржал легендарниот бугарски воен командант и педагог полковник Борис Дрангов.

Споменикот од бел врачански камен беше обновен и откриен во 2019 година, во присуство на тогашните премиери Бојко Борисов и Зоран Заев. Оттогаш, секоја година на ова место се одбележува годишнината од смртта на Каварналиев.

За животот и подвигот на генерал-мајор Каварналиев говореше пензионираниот генерал-мајор Тодор Дочев, а отец Теофил од Струмичката епархија отслужи заупокојна молитва за загинатите бугарски војници. Венци и цвеќиња беа положени од институции, здруженија и претставници на бугарската заедница.

Константин Каварналиев загинал на 23 јуни 1913 година кај Дојран, откако со околу 4.000 војници се спротивставил на многукратно побројна грчка војска. Посмртно бил произведен во чин генерал-мајор. На истото место се погребани и петмина војници од неговата рота.

The post ОДБЕЛЕЖАНА 113-ГОДИШНИНА НА БУГАРСКИОТ МАЈОР КАВАРНАЛИЕВ Споменикот беше обновен и откриен во 2019 година appeared first on plusinfo.mk.

Денеска во Министерството за надворешни работи и надворешна трговија беше повикан вонредниот и ополномоштен амбасадор на Република Бугарија, Жељазко Радуков, брифираат од Министерството за надворешни работи и надворешна трговија за Плусинфо.

На нашето прашање каква реакција му е упатена на бугарскиот амбасадор, од МНР одговорија:

– На средбата му беше упатен усен демарш во врска со несоодветното адресирање од страна на министерката за надворешни работи на Република Бугарија, Весислава Петрова Чамова, која во својата вчерашна изјава за време на Советот на министри за надворешни работи на Европската Унија употреби несоодветна и неправилна придавка изведена од името на нашата држава, користејќи го изразот „северномакедонски партнери.

The post ДЕМАРШ ОД МНР ЗА БУГАРСКИОТ АМБАСАДОР Остра реакција за „северномакедонски“ на Петрова Чамова appeared first on plusinfo.mk.

Замислете, на 28 ноември, на Денот на албанското знаме, националниот празник на Албанците, делегација на ВМРО-ДПМНЕ на чело со лидерот Христијан Мицкоски, да се сретне со српскиот амбасадор во Македонија. А потоа, oд средбата да биде издадено официјално соопштение, во кое ќе се каже дека владејачката партија изразила ставови идентични со позициите на Белград во спорот со Приштина.

Како би го доживеале тоа Албанците во Македонија?

Како тешка провокација што ги загрозува меѓуетничките односи во Македонија. А како поинаку?

Секој Албанец би рекол – погледнете, Мицкоски нè предаде!

Не го сакам тој тежок збор, но да – во случајот, тоа би било рамно на предавство.

Како би реагирала коалицијата Вреди, која е партнер во Владата?

Како би реагирала опозициската ДУИ?

Најостро. Во најблагата форма, би барале повлекување на изјавата и јавно извинување од Мицкоски. Но, не би било неочекувано еден таков непромислен гест да доведе и до сериозна политичка криза, па и до распад на владејачката коалиција.

Она што Мицкоски нема да го стори на 28 ноември, го стори Али Ахмети на 11 октомври, на Денот на народното востание.

11 октомври е важен датум во поновата историја на Македонија, бидејќи го означува почетокот на народното востание против фашистичката окупација во Втората светска војна. Тоа што некои луѓе во Бугарија сега велат дека 11 Октомври бил „антибугарски празник“, тоа само покажува дека тие се самоидентификуваат со марионетската фашистичка влада на Бугарија, која ја предводела окупацијата на Македонија, од 1941 година до капитулацијата на таа влада во 1944 година.

Што направи Али Ахмети?

Ден по 11 Октомври, во текот на празничниот викенд, во седиштето на Демократската унија за интеграција, претседателот на ДУИ остварил средба со новиот амбасадор на Бугарија во Скопје, Жељазко Радуков. Од партиското соопштение издадено по средбата, јасни се гледа дека во однос на спорот меѓу Македонија и Бугарија, Али Ахмети целосно застанал на страната на Софија.

Не велам дека ДУИ и нејзиниот лидер немаат легитимно право да имаат ставови различни, па дури и спротивни, од ставовите кои добија поддршка од огромното мнозинство Македонци на последните избори. Слободата на изразување и на политичко мислење е гарантирана со Уставот.

И секако не велам дека политичките лидери во Македонија не треба да се среќаваат со бугарските дипломати, на официјални и на неофицијални средби. Напротив, секој разговор придонесува за подобро разбирање на позициите на двете страни и само со жив и отворен дијалог може да се дојде до взаемно прифатливо решение на спорот.

Но, има тука едно огромно „но“…

Ова што го прави Ахмети нема врска ни со слободата на изразување – која никогаш не му била ускратена, дури ни кога се „изразуваше“ со калашникови – а ни со елементарните политички слободи.

Ова што го прави Ахмети не е дијалог, туку мешетарење.

Средбата на 12 октомври во Мала Речица беше намерна провокација кон мнозинско население во оваа земја, кон етничките Македонци, но и кон сите други народи, на кои им значи и го чуваат споменот на народното востание и на антифашистичката борба, чиј резултат е создавањето на македонската држава во 1944 година.

Меѓу нив се и Албанците, се надевам дека Ахмети го знае тоа.

Средбата во Мала Речица беше уште една порака упатена до јавноста дека во спорот меѓу Скопје и Софија, Али Ахмети е на страната на своите софиски пријатели.

Симболичното значење на таа средба е отворено и грдо предавство на македонските национални интереси.

„Репликата“ на Мицкоски на овој чин и на коминикето издадено од таа средба, за мојот вкус, е зачудувачки умерена и блага. Очигледно е дека пред своите значајни средби во Берлин, македонскиот премиер не сакал да се оптоварува со коментари кои би го дефокусирале од разговорите за иднината на пристапниот процес кон ЕУ.

Но, тоа не е причина непријателскиот гест на Ахмети кон Македонците да остане незабележан.

Најмалку што очекува македонската јавност е јавно извинување од него и од ДУИ за празничната провокација.

Ахмети треба да има предвид дека во Македонија има многу потомци на сите оние храбри луѓе кои учествувале во народното востание од 1941 до 1945 година и кои се заслужни што утре и нашите потомци во учебниците по историја ќе ја учат вистината – дека Македонците во текот на Втората светска војна немале свој фашистички марионетски режим, туку кренале востание против фашистичката окупација и биле дел од светската антифашистичка коалиција од самиот почеток на најголемата војна во историјата на човештвото.

Според соопштението на ДУИ, ни Ахмети ни Радуков не нашле ни причина ни повод, на средбата ден по 11 октомври,на граѓаните на Македонија да им го честитаат Денот на народното востание.

Невиден простаклук!

Но, од Ахмети не очекувам ништо друго.  Напротив.

Следната средба на Али Ахмети со амбасадорот Жељазко Радуков се очекува на 3 март. Тоа е денот на потпишувањето на Санстефанскиот договор, кој Бугарија го празнува како свој национален празник.

Ете идеална прилика Ахмети и другите асови на ДУИ уште еднаш да ја покажат својата приврзаност кон Бугарија, но и својот анимозитет кон Македонија – земјата во која живеат боговски, во која со години беа на власт и во која внукот на Али Ахмети се наполни ко брод.

The post На Денот на народното востание Али Ахмети покажа дека помила му е Бугарија одошто земјата во која неговиот внук се наполни ко брод! appeared first on plusinfo.mk.

Од партијата соопштија дека Ахмети му го честитал враќањето во Македонија на амбасадорот Радуков и го уверил дека блиската соработка во поглед на европската иднина и добрососедството ќе продолжи уште повеќе.

„Бугарската заедница во Македонија е реалност и треба да биде вклучена во Уставот, а од ова никој ништо не губи, напротив, сите добиваат. Приоритет на ДУИ е токму продолжување на европскиот пат, затоа уставните измени мора веднаш да се случат, бидејќи граѓаните очекуваат да станеме дел од Европската Унија“, порачал Ахмети.

Тој повторил дека Охридскиот договор, Договорот од Преспа и Договорот за добрососедство се одредби на ДУИ и ќе се ангажира за нивна поддршка и имплементација.

„Ахмети и Рудаков разговараа и за политичката состојба во земјата, при што Ахмети зборуваше за тенденцијата на власта со моноетнички легитимитет и на надгласувачкиот Уставен суд целосно да го прекрши Охридскиот договор, неговиот дух и социјалната кохезија, кај нас со наметнување етничка надмоќ. Ова е неприфатливо. `Чесните` и претпочитани Албанци избрани од ВМРО-ДПМНЕ се откажаа од Европа, но и од еднаквоста, омаловажувајќи ги и понижувајќи ги Албанците за нивните лични корумпирани мотиви“, соопшти ДУИ.

The post БУГАРИТЕ ВО МАКЕДОНИЈА СЕ РЕАЛНОСТ, МЕСТОТО ИМ Е ВО УСТАВОТ Ахмети му се жали на амбасадорот Радуков за наметнување етничка надмоќ appeared first on plusinfo.mk.