Авто-школите ја зголемија цената на обуките за 35% односно 8.500 денари. Новата цена важи од 1 ноември, а одлука за за поскапувањето ја донело Здружението на авто-школи.

Според новите цени, обуката за возач од Б категорија од 24.500 денари е зголемена на 33.000 денари. Во цената како што е познато влегуваат 20 часови теоретската настава кои сега чинат 4.500 денари, практична настава од 36 мото часови кои сега чинат 28.500 денари.

Дополнително идните возачи треба да платат и 250 денари на час за 3 посети на полигон колку што се планирани со обуката, како и уште по 1.500 денари за користење на возилото на авто школата за полагање на прв и втор практичен дел  кое се плаќа пред полагањето. Дополнителен час за возење пак чини 1.000.

На овие трошоци се додава и лекарското уверение кое чини 1.200 денари.

Слични се цените и за обуките за возачи во останатите категории. За обука за  А категорија се наплаќа 24.000 денари, за БЕ категорија 15.000 денари, за Ц категорија  32.000 денари, ЦЕ -25.000 денари Д категорија 40.000 денари

Дополнителните часови се плаќаат зависно од категоријата до 2.000 денари и користењето на возило за возачки испит исто така има различна цена. На пример за користење возило за полагањ е возачки испит во  А и А плус категорија цената е 2.400 денари, за Ц категорија 2.000 денари и за ЦЕ категорија 2.500 денари.

Сопствениците на авто-школите кои ги контактиравме велат дека повеќе од 10 години не ја менувале цената, но зголемените трошоци ги принудиле на оваа постапка.

-Веќе неколку години ние обучуваме возачи за цена од 24.500 денари, но трошоците во овие години пораснаа како за гориво, така и за одржување на возилата за техничката опрема. За реализирање на новите стандарди во обуката донесени неодамна исто така имавме дополнителни трошоци – велат од авто-школата Мобилити плус која работи во состав на АМСМ.

Речиси исти изјави даваат и сопствениците на другите авто-школи.

-Трошоците се во прашање. На седница на Здружението донесовме едногласна одлука дека цените треба да ги зголемиме – вели сопственик на една автошкола.

Младите кои сакаат да се обучат за возачи велат дека поскапувањето е големо и ќе влијае на семејниот буџет.

-Многу ја поскапеле обуката, а има и дополнителни трошоци. Замислете млад човек кој уште не работи треба да ја плати оваа цена. Што значи тоа за семејниот буџет не треба многу да се зборува со оглед на тоа дека секојдневно нешто поскапува. Но, ако сакаме да работиме во фирми каде што се бара и возачка дозвола овој трошок може да го сметаме за неопходен – вели Анастасија која се подготвува за возач.

The post ОД 24.500 ДЕНАРИ ЦЕНАТА НА ОБУКATA ЗА ВОЗАЧИ СКОКНА НА 33.000 Авто–школите се правдаат со високи трошоци appeared first on plusinfo.mk.

Платформата за изнајмување сместување Букинг (Booking.com) се соочува со групна тужба од повеќе од 10.000 европски хотели кои тврдат дека платформата го искористила своето влијание за да го „искриви пазарот“ на нивна штета.

Здружението на хотели, ресторани и кафулиња во Европа (Hotrec), кое ја претставува индустријата во рамките на ЕУ и ја поднесува тужбата, неодамна го продолжи рокот  за поднесување на тужбата до 29 август поради голем интерес на хотелиерите.

Тужбата досега е поддржана од 30 национални хотелски здруженија.

– Европските хотелиери долго време страдаат од нефер услови и прекумерни трошоци. Сега е време да се обединиме и да бараме правда – изјави претседателот на Hotrec, Александрос Василикос, за Гардијан.

Од здружението информираат дека  повеќе од 10.000 хотели веќе се приклучија на паневропската иницијатива за барање надомест за финансиски загуби предизвикани од употребата на нелегални клаузули за „најдобра цена“ (паритет) од страна на Booking.com.

Во соопштението за медиумите се наведува дека Booking.com добил ветување за „најдобра цена“ од хотелите под голем притисок да не нудат пониски цени на други платформи, вклучително и на нивните сопствени веб-страници! Тие додаваат дека платформата, со седиште во Холандија, ги користела и овие клаузули за да спречи таканаречени резервации „слободни возачи“. Ова се случаи кога корисниците би пронашле хотел преку Booking, но би го резервирале директно, со цел да ја избегнат провизијата што ја наплаќа Booking…

Во 2024 година, Европскиот суд на правдата утврди дека паритетот на цените не е неопходен за работењето на Booking, но не го прогласи за нелегален. Но, подоцна хотелиерите добија правна основа за својата тужба со воведувањето на Законот за дигитални пазари…

Во соопштение за медиумите, Booking.com претходно ги оцени изјавите на Hotrec и други хотелски здруженија како „неточни и погрешни“.

Постапката, за која правните експерти велат дека ќе биде исклучително тешка, бара отштета за периодот од 2004 до 2024 година.

The post ЕВРОПСКИТЕ ХОТЕЛИЕРИ ЈА ТУЖАТ ПЛАТФОРМАТА „БУКИНГ“ Не дозволувала пониски цени за нејзините конкуренти appeared first on plusinfo.mk.

Денешниот ден е клучен бидејќи ќе решаваме за целите за зајакнување на капацитетите и за тоа како ќе се трошат парите за потребите на одбраната, изјави денеска во Брисел генералниот секретар на НАТО, Марк Руте при пристигнувањето на состанокот на министрите за одбрана на земјите членки на Алијансата.

– Моите предвидувања се дека ќе се договориме за целите за капацитетите. Секако ќе разговараме и за многу други прашања, но ова е клучно во пресрет на Самитот во Хаг, за да бидеме сигурни дека во Хаг ќе се договориме за поголеми трошоци, за поголемо производство и секако за нашата поддршка за Украина – рече Руте.

Според него, како што јави дописникот на МИА од Брисел, договорените цели ќе треба да му овозможат на НАТО да биде способен да може да се одбрани во случај да биде нападнат, а за што е потребно да се зголемат трошоците за одбраната.

– Ако сте подготвени за војна, тогаш нема да бидете нападнати – нагласи Руте.

Тој потенцира дека за да се постигне тоа потребно е значително зголемување на трошоците од страна сите земји членки на НАТО, затоа што мора да се инвестира во противвоздушната одбрана, во ракети со голем дострел, во маневарските способности на копнените сили и во командните системи, за што се потребни огромни инвестиции на целата територија на Алијансата.

Руте додаде дека притоа исто така е важно да се изедначат трошоците на европските членки на НАТО и Канада со одбранбените издвојување на САД, бидејќи, како што рече, ако сакаме фер Алијанса сите сојузници мора да трошат подеднакво.

Во врска со неговата идеја за постепено зголемување на трошоците за одбраната до ниво од пет отсто од БДП до 2032 година, Руте рече дека тоа е само предлог за кој ќе се дебатира во следните недели.

– Тоа е добро, затоа што во крајна линија ова е демократска Алијанса и мора да донесеме одлука со консензус. Ќе ги изнесам моите предлози за одбранбените трошоци и за новиот план и попладнево ќе ве информирам што ќе се договориме – рече Руте, додавајќи дека затоа денешниот министерски состанок е многу важен.

Според него, целта на сите овие планови и инвестиции не се само да се троши повеќе, туку да се зајакне Алијансата за да биде способна да се брани не само сега, туку и во наредните години.

Тој потсети дека во рамки на денешниот состанок во форма на работен ручек ќе се одржи и неформално заседание на Советот НАТО-Украина, на кое ќе учествуваат и украинскиот министер за одбрана Рустем Умеров и високата претставничка на ЕУ за надворешни работи и безбедносна политика Каја Калас.

The post НА НАТО МУ ТРЕБААТ ПАРИ ЗА ДА СЕ БРАНИ Руте го правда зголемувањето на одбранбените трошоци appeared first on plusinfo.mk.

Нелоски на денешната седница на Советот ги соопшти огромните разлики во трошоците и неразумното трошење на ЈП Дрисла.

– Само за потрошен материјал за одржување за 2020 година потрошиле 3,4 милиони денари, додека во 2021 потрошиле 6,4 милиони денари. Трошоците за резервни делови и за материјали гуми сумата се зголемиле 3 пати, трошоците за ситен инвентар се зголемиле околу 2,5 пати, од 14 на 3,5 милиони денари. Одржувањето на веб страната има зголемување за 6 пати, додека за тековното одржување на објект има двојно повеќе поголеми трошоци. Трошоци за софтверот е зголемен 3 пати, додека пак хардверот само 20% повеќе во однос на 2020 година – рече Нелоски.

Ова претпријатие за трошоци за интелектуални услуги има потрошено двојно повеќе од планираното, а за правни адвокатски и нотарски услуги, исто така двојно повеќе, а повисоки се и судските трошоци.

– Кога сме кај вработувањата во ова претпријатие, тие се драстично зголемени, а само по основ на бруто плати споредено со минатата година потрошени се повеќе 5 милиони денари, додека трошоците за привремени вработувања се зголемиле од 4,8 на 6,4 милиони денари – изјави Нелоски.

The post ВО „ДРИСЛА“ СЕ ТРОШЕЛО КАКО ДА НЕМА УТРЕ Фрапантни податоци за зголемени трошоци за сѐ и сешто appeared first on plusinfo.mk.