Швајцарскиот фармацевтски гигант „Рош“ објави денеска дека ќе инвестира 50 милијарди долари во САД во следните пет години, истакнувајќи дека неговата цел е фармацевтскиот извоз да го надмине увозот.

Компанијата ќе отвори 1.000 работни места во нови и проширени капацитети, а дополнителни 11.000 ќе бидат отворени во градежништвото и помошни работни места за нови производствени капацитети.

– Рош во САД вработува 25.000 работници во 13 производствени капацитети и 15 центри за истражување и развој, а инвестицијата потврдува дека САД му се важни – изјави извршниот директор Томас Шинекер.

Кога ќе почнат да работат новите и проширени производствени капацитети, „Рош“ ќе извезува повеќе лекови од САД отколку што моментално увезува на американскиот пазар, нагласуваат од швајцарската компанија.

Со инвестицијата, „Рош“ ќе ги прошири производствените и дистрибутивните центри во Кентаки, Индијана, Њу Џерси и Калифорнија.

Во Пенсилванија ќе градат нов објект за производство на генски терапии, а во Индијана фабрика за решенија за континуирано следење на концентрацијата на гликоза во крвта.

Компанијата, исто така, ќе изгради нова фабрика за производство на лекови за слабеење и ќе формира центар за кардиоваскуларни, бубрежни и метаболички истражувања во Масачусетс.

Кабинетот на американскиот претседател Доналд Трамп минатата недела отвори истрага за увоз на лекови, истакнувајќи дека нејзината цел е да го поттикне домашното производство.

Минатата година САД увезле фармацевтски производи во вредност од речиси 213 милијарди долари, три пати повеќе отколку во 2014 година, покажуваат трговските податоци на Обединетите нации.

The post ШВАЈЦАРСКИОТ ГИГАНТ „РОШ“ ЌЕ ГО ЗГОЛЕМУВА ИЗВОЗОТ НА ЛЕКОВИ ОД САД Ќе инвестира 50 милиони долари во нови погони appeared first on plusinfo.mk.