Претседателот на Украина Володимир Зеленски соопшти дека неговата земја преговара за партнерство во областа на вооружувањето со државите од Персискиот Залив, пренесува ДПА.

Во своето редовно вечерно обраќање, Зеленски истакна дека овие земји покажале голем интерес за искуството на Украина во борбата против беспилотни летала, особено во контекст на конфликтот со Иран.

– Украина нуди заемно корисно партнерство: можеме да ги зајакнеме оние што можат да нè зајакнат нас – изјави тој.

За возврат, Киев бара системи за воздушна одбрана и финансиска поддршка за дефанзивните операции против Русија.

Зеленски го поврза ова дипломатско приближување кон Заливот и со пречките од страна на Унгарија во врска со мултимилијардскиот заем од ЕУ, нагласувајќи ја потребата од алтернативни начини за зајакнување на одбраната. Според него, Блискиот Исток и Заливот претставуваат вистинска насока и сериозна можност за зајакнување на украинските капацитети во војната која трае од февруари 2022 година.

The post ЗЕЛЕНСКИ НУДИ ИСКУСТВО СО ДРОНОВИ, БАРА СИСТЕМИ ЗА ВОЗДУШНА ОДБРАНА Украина сака партнерство со земјите од Персискиот Залив appeared first on plusinfo.mk.

Земјите од Персискиот Залив побараа итна дебата во Советот за човекови права на Обединетите нации во врска со нападите на Иран врз цивили и енергетска инфраструктура низ Блискиот Исток, покажуваат дипломатските документи.

Во дипломатска нота во која имале увид некои светски агенции, нападите со балистички ракети и дронови врз Бахреин, Јордан, Кувајт, Оман, Катар, Саудиска Арабија и Обединетите Арапски Емирати се опишани како „ситуација на сериозна загриженост за меѓународниот мир и безбедност“ со сериозни импликации за човековите права.

Земјите од Персискиот Залив истакнуваат дека неиспровоцираните напади, и покрај нивните уверувања до Техеран дека нивните територии нема да се користат за антиирански активности, бараат итно внимание.

Нацрт-резолуцијата предложена од земјите од Персискиот Залив ги осудува нападите и го повикува Иран веднаш да ги прекине нападите врз цивилната инфраструктура и комерцијалниот бродски превоз во Ормутскиот Теснец, како и да надомести за штетите врз цивилите, инфраструктурата и животната средина.

Советот на ОН го прими барањето и моментално разгледува датум за одржување на дебатата, според писмото од претседателот на Советот, Сидарт Реза Суриодипур.

The post ЗЕМЈИТЕ ОД ПЕРСИСКИОТ ЗАЛИВ БАРААТ ПОМОШ ОД ОБЕДИНЕТИТЕ НАЦИИ Итно да запрат иранските напади врз цивилни цели appeared first on plusinfo.mk.